|
لا تلوموني ..أبي أنتـــــــــقم..
السلام عليكم ورحمة الله وبركاته.. الصراحة أنا عندي مشكلة وأبي أدش في الموضوع على طول..وأتمني أنكم ما تبخلون علي بآرائكم .. طبعا تعرفون أن زوجي توفى من فترة قصيرة إثر أزمة قلبية (الله يرحمه ويغمد روحه الجنة ) وتقريبا الحين باقي لي شهر وأطلع من العدة ..وأهل زوجي_ حسبي الله عليهم _كان لهم دور البطولة في مرض زوجي وحرماني من أجمل أيام عمري ..الخ. وللعلم أنا عندي ولد واحد من المرحوم عمره سنتين ونصف ..والحين بعد ما تدمرت حياتي وخسرت كل شئ..جايين يطلبون ولدي ..طبعا للمظاهر أمام الناس..يبون ياخذونه عندهم ساعتين ثلاث وبعدين يردونه لي بعد ما يفرونه صوبهم ..وهذا الشئ مستحيل ..على حياة زوجي ما فكروا فيه ولا في ولده وذوقوه الويل غير الضرب والتهديد والشتم ..فالمرحوم كان دائما يوصيني على ولده ويقول لي لا تفكرين يوم من الأيام أنج تخلينه بروحه مع أهلي تراهم وحوش إذا ما ارحموا ولدهم بيرحمون ولد ولدهم؟؟ وطبعا أنا الحين أبي أنتقم منهم..أبي آخذ حق كل يوم كل دمعة كل آه..والله أنهم وحوش بمعنى الكلمة.. لا تقولون لي أنت غلطانة وأنت لازم تودينه ..هم أهله ..أرجوكم ما أبي أرجع لهم ولا أبي ولدي يكبر في أحضانهم ..مو بعيدة يحرضون ولدي علي ويتهموني أني أنا اللي ذبحت أبوه..ناهيكم عن العادات السيئة اللي راح يغرسونها فيه..وبعدين مصلحتي ومصلحة ولدي في ابتعادي عنهم والعكس صحيح .. أدري أني طولت عليكم ..لا تلوموني والله ..أنا ما أبي أحسسهم أني ضعيفة ..بالعربي أبي أعلن الحـــــــرب..! في إنتظار الردود.. |
اختي الله يهديك تعوذي من الشيطان واذكري الله
الله يرحم زوجك ويسكنه فسيح جناته ويجمعك واياه في الجنه ان شاء الله اذا انهم فعلا ناس ما تأتمنين ولدك معاهم اهو معاك ولا توديه لهم وابعدي نفسك عنهم خليك انت احسن منهم ربي بياخذ حقك منهم |
وأينك من صلة الرحم والصبر
؟؟ .. . وإن كان اللهيب بداخلك قد إستعر فإسألي الله العوض والصبر صدقيني الإنتقام والحزن والحقد نار يكتوي بها أولاً صاحبها . . وللعفو لذة لايساويها سوى جزيل الأجر .. . ُظلم زوجك وأساء أهله إليه فأينه الآن بيدي أرحم الرحمين لاُتربي إبنك على القطيعة لكن ساعات وتنقضي ويبقى لك منها دعوات مجابه بأن يحفظه الله ويقر عينك . . رحم الله حسين وبارك لك في إبنك . . لن ألومك لكن تصبري . تحياتي ،، . |
الله يرحمة
دام الولد لين الحين صغير خلي يروح عندهم لين تهدى الامور ان شاء الله بيصير خير .... الله يهديهم ويأخذ حقج من الي ظلماج .... |
أختي من عفى واصلح كان اجرة على الله
وانتي عندك ولد والله بيجازيك بولدك على كل عمل سيء بتعملية لذا اقول اخيتي استهدي بالله وانسيهم وولدك ما تفرطي فية ابداً وما حد يقدر يأخدة منك القانون بصفك وتذكري دائما انة الدنيا هذة ما ترحم حد ظالم وبتدور الدايرة على من ظلم لذا ابتعدي عنهم انتي وطفلك |
السلام عليكم ورحمة الله وبركاته
اختي الله يعيينك في الحقيقة المشكله الكبيرة انهم مثل ماقلتي وحوش وممكن يغرسون فيه اخلاق مش زينه .. رايي انهم اذا ارادوا ان يشوفون الولد انك تروحين معاه بيغلطون عليك وبيغثونك اكيد بس اهم شي ماتخلينه بروحه معاهم وبكذا ماتقطعين الرحم .. وماتخلين الناس تتكلم وتقول امنعت الناس من ولدهم :) ولا تنسين حاولي قد ماتقدرين تزيننين الاخلاق الفاضلة عند ولدك .. وتكونين له قدوة حسنة .. ولا تذمين اهل ابوه الله يرحمه قدامه والله يعييينك وييسر لك الخير وين ماكان ويجمعك في زوجك في الفردوس الاعلى يارب |
رحم الله زوجك حسين وغفر له ماتقدم من ذنبه وما تأخر يارب العالمين |
نصيحة اختي
ترحمي على الميت ولاتقطعي ولدك من اهله ولاتحملية احقاد الماضي وتوكلي على الله في كل امر والله يرزقك ويعوضك بخير والسلام ختام اخوك |
الله يرحم زوجك ويصبرك..
اشعر بما تشعرين به اختي لأني مررت بتجربة مشابهه بل اقسى وأمر!! والله رأيت الظلم من اهل زوجي بعد وفاته وأكل حقوق أولادي ظلما وبهتاناً!! ومع ذلك في النهاية هم اهله مهما حاولتي تقتعين نفسك بالعكس!! لما كان ولدي صغير كنت اضغط على نفسي واوديه لهم وأنا معه لأنه ماكان يقدر يفارقني والآن تعود كل فترة والثانية يروح لهم,, طبعا لازم يحاولون يأثرون فيه ويغيرونه عليك,, لكن. أنتي وفري لولدك كل شي بحيث مهما حاولوا معه فأنتي الأفضل عنده لكن لاتحاولين تكرهينه فيهم لأنه في النهاية إذا كبر هم اهله وعزوته ويمكن ينقلب تحريضك له ضدك... فكرت والله مرارا بما فكرتي به لكن إذا رجعنا للعقل لازم ترضين بالأمر الواقع.. كان الله بعونك |
فما في احسن من نصح اللي عايش التجربة .. أختي والله عذاب .. اخذي براي اختنا كل الغلا بما انها عايشه نفس موقفك .. والله ييسر لكم الخير وين ماكان .. ويريح ازواجكم يارب وينور عليهم قبورهم ويجمعكم بهم في الفردوس الاعلى ..
|
| الساعة الآن 03:54 AM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©