منتدى عالم الأسرة والمجتمع - سويت عملية تلقيح صناعي و ابيك تجاوبين على تساؤولاتي يا بنت النيل اذا ماعليك كلافه

السلام عليكم و رحمة الله و بركاته
اول شيء حبيت ابارك لنا رجوعك يا بنت النيل و الحمدلله على سلامتك
بصراحه المنتدى تو ما نور

ما ادري اذا كنتي تذكرين حالتي والا لا بس بشرح لك بإختصار حالتي و ابيك تجاوبيني اذا ما عليك كلافه على تساؤولاتي

انا متزوجه من سنتين ، حملت بعد شهرين طبيعي، في الشهر الرابع قالت الدكتورة الجنين مافيه نبض و عملت لي عملية تنظيف
بعدها بسنه قررنا احمل بس ما قدرنا و رحنا المستشفى و قالت لي الدكتورة هرمون الحليب مرتفع شوي بس ما كانت مقتنعه تعطيني دواء
بس بعد شهر عطتني لانه كانت تتابع التبويض بالسونار استغربت ليه ماصار الحمل مع انه التبويض وحجم البويضات ممتاز جداً
رجعت امريكا و الدكتور قاللي اقطعي الدواء ماله لزمه و عمل تحليل للهرمون علشان يتأكد و كل شيء تمام
عمل لي اشعة الصبغه للتأكد من الانابيب و كان فيه انسداد صغير في القناة اليسرى بس قاللي الحمل يصير بقناة وحده
عمل تحليل للحيوانات المنويه لزوجي و طلعت ممتازه جداً
عمل لي عمليه (مادري وش اسمها) علشان بعد يتأكد اذا موجود التصاقات في الرحم او قناتي فالوب و تعيق الحمل و طلعت النتيجه انه كل شيء على ما يرام حتى اكتشف انه مافي انسداد في القناة اليسرى بس يمكن ذيك المره انا كنت متشنجه و هم يعملون لي الاشعه و اثر على وصول السائل بس الحين وراني الصور انه السائل وصل للأنبوبين بكل سهوله
طبعاً اول زيارة لي عنده كشفوا لي على الرحم كشف اعتيادي علشان يتأكدون من سلامته من الالتهابات و انه الافرازات طبيعيه وطبعاً كل شيء كان طبيعي

الحين تبين له ان اثنينا سليمين من جميع النوااااااحي بس مو قادرين احمل و صار لنا سنه وشوي نحاااااااول ..!!!

سألنا اذا نبي تلقيح صناعي لانه تصير حالات عقم من غير سبب
طبعاً و اقفنا على طول

انا سويت عملية تلقيح صناعي يوم الجمعه
طبعاً الدكتور يعرف ان بويضاتي حجمها ممتاز بس علشان يضمن حجم البويضات عطاني كلوميد من خامس يوم الدورة الى تاسع (5 ايام كل يوم حبه)
واليوم الـ13 من الدورة كان عندي موعد رحت و شيكوا على التبويض وكان اكثر من ممتاز (في بوبضتين كبار في المبيض الأيمن) و بويضتين في الأيسر كبار بس اصغر من اللي في الأيمن
المهم ان عملوا لي تحليل دم (لهرمون معين علشان يتأكدون من انه الخصوبه ممتازة او لا )
و طلعت النتيجه ان الخصوبه عاليه في ذاك اليوم عطاني ابره تفجيريه و بعدها بأربع و عشرين ساعه اخذوا الحيوانات المنويه لزوجي و نظفوها و قال انهم كانوا ممتازين و نشيطين جداً لمن عاينهم و بعدا بنص ساعه تقريباً من اخذ الحيوانات عملوا لي العمليه
في شيء حسيت انه غير عن العمليات اللي اشوف خطواتها بالعربي
وهو انها بعد ما عمل لي العمليه حط لي شيء بلاستيكي مثل الكره الصغيره تنتهي بخيطين تسد بها الفتحه علشان تمنع الحيوانات المنويه من الخروج
قال لي بعد 4 ساعات اشيله
انا شلته بعد 5 ساعات

وهو قال لي نجامع اليوم اللي بعد العمليه لزيادة نسبة الحمل

السؤال الأهم انه تتوقعين كم نسبة نجاحها للي في مثل حالتنا الاثنين سليمين...!!
هل سويتين هالعمليه او تعرفين انه في احد سواها لسليمين و نجحت من اول مره...؟؟
عن جد راسي بينفجر في هالاسبوعين اللي انتظر فيهم النتيجه

ووش هي الأعراض المعتاده بعد عملية التلقيح

الغريب انه رجلي صارت تألمني شوي وانا خايفه انه يعني العمليه فشلت !!
ما عمري سمعت انه الم الارجل من اعراض الحمل ..
ممكن تكون اعراض الدورة اللي تجيني مثل الم الساقين نفسها اعراض الحمل؟؟؟
انا دورتي 27 يوم و مفروض تجيني الدورة على يوم 12 او 13 جولاي يعني بعد اكثر من اسبوع و انا ما تبدي معاي اعراض الدورة الا قبل يوم او يومين بالكثير

اختي اكرر أسفي و انتظر اجاباتك على أحر من الجمر
خالص دعائي لك ياغاليه

0طلب اخير : دعائكم لي بالذرية الصالحه عاجلاً غير آجل انا و جميع المحرومين و المحرومات من المؤمينين و المؤمنات