|
نظره في جمال البنات...بين الحلم الكبير..والواقع المرير!!!
السلام عليكم ورحمة الله وبركاته
صارلي تقريبا شهر وانا طاري الزواج لايفارق لساني وماخليت عجوز او انثى ممن تربطني علاقه قرابه بهن الا وارسلت لها ((تعميم)) اني ابي اتزوج وانه خلااااااااااص مافيه حجه قربت ال28 ويمكن اعنس وقلت خليني الحق نفسي..لحد الان كل شي طبيعي. لكن اللي مو طبيعي ابدا هو اني صاير كاني (سيكورتي) على صالة الحريم ..ومافيه بنت ابوها تدخل والا تخرج والا لازم اعرف مين هي وايش مواصفاتها ومين اهلها..(طبعا اسال خواتي..مش اوقف الحريم واسوي نقظة تفتيش).الى ان القى القبض علي من قبل امي(وانا استجوب وحده من خواتي)..وقالت لي بالحرف : تدري عاد انك ماتستحي...والله انا مصدومه منك ومن تصرفك ..صاير خفيف مرررررررره وين ولدي الثقيل اللي اعرفه وووووين ووووين وووين؟؟؟(مع حركة يد والتفاف الاصابع كنايه عن الاستهزاء الى ما الت اليه حالي). طبعا انا والله العظيم ماشفت لا وحده دخلت ولا خرجت..بس كل اهتمامي اعرف هالحريم اللي يجوننا عندهم بنات ..وممكن عن طريق الصدفه اشوف وحده منهم..واعشقها واقول هذي هي!!!هههه لكن المصيبه يااخواني واخواتي الافاضل الغالبيه اللي يزوروننا للبيت (هم جياكر وشواذي)..يعني شوف وجه الام واحلب لبن..ناهيك على انه خواتي بعمرهم مامدحوا لي بنت من اللي يزوروننا..وكل ماتخلص عزيمه والا شي..وادخل على خواتي مااشوف الا انواع التعليق..على انواع البنات اللي كانوا موجودات.....طيب لييييييييييييييييييييييييييييش؟؟ حظي كذااااا.....واللي يزيد الطين بله..انه خواتي بفم مليان ينصحوني في البحث بعيدا عن اللي يزوروننا..اذا كنت ابحث عن جمال طبعا...؟؟؟ اختي الكبيره تقولي اذا تبي دين واخلاق..ابشر من بوكرا فيه 100 وحده..بس اذا تبغى دين واخلاق وجمال اصبر اشوي..لانه صعب. مررررره وحده من الاخوات هنا وفي هذا المنتدى ..ذكرت بانها هي وامها تبحث لاخيها عن زوجه لها اكثر من سنه..وتذكر انها شافت عشرات البنات فيهم الدين والخلق لكن الجمال قليل جداااااااااااااا. وحتى كلمتها ماتروح من بالي والله....قالت : (الله يعينكم يالشباب)..لاتحلمون كثيرررر. طبعا انا اعرف الردود الان ..منها من يذكر انه ..طالعوا اشكالكم يالشباب اول..وبعدين اسالوا عن الجمال..وارد انا واقووووووول صحيح..بس يبقى الشاب مهما كان جيكر وشاذي ..اذا توافر فيه الدين والخلق الطيب والوظيفه..فهو لايرد...ومن يقول بغير ذالك فهو يضحك على نفسه. اما الفتاة فاكيد يطلب منها الدين والخلق اولاااااااا..لكن يجب ان يكون فيها لمسه جماليه تثبت انوثتها..ولا ننسى هنا حديث الرسول صلى الله عليه وسلم (تنكح المراه....الى اخر الحديث) فالجمال مطلوب. ..طبعا اللي مو جميله (حشا اننا نتعترض على خلق الله..) مانقولها روحي انتحري...ولكن اطلب منها ان تكون واقعيه.. وانها تناظر وجهها عدل في المرايه قبل لاتقول مواصفاتها...وانها لاتاخذ براي امها او خالتها (لانه القرد بعين امه غزال). الخلاصه: تعرفون ماهي المصيبه يااخوان ان بعض البنات (هداهن الله) هن عند انفسهن انهن ملكات جمال وانا اتحدى انه فيه وحده بالكون تقول عن نفسها ان شكلها عادي...واكثر مايثبت لي هذا الكلام وخصوصا من نوعين من النساء....المتزوجات التي يتزوج عليها زوجهااااااااا....والعوانس. المتزوج عليها زوجها..قالت والله اهله يحسدونه علي من كثر جمالي وجمالي يهبل وراح تزوج علي. والعانس تقوووووووول...ما الله خلق مثلي اثنين..مواصفاتي الجماليه..صارخه ونادره..ولكن للاسف الخاطب مادق بابي الى الان.:( اما اللي اشوفه بعيني..واقسم على هذا الكلام...الفتاة الجميله سوقهااااااا ماشي..وماتوصل ال18 الا وكان الطلب عليها بالعشرات...هذا اذا ماانحجزت اصلا :25: ملاحظه..هذا الكلام لايعمم على كل البنات طبعا..ولكن الغالبيه هن كذالك.:( |
اما اللي اشوفه بعيني..واقسم على هذا الكلام...الفتاة الجميله سوقهااااااا ماشي..وماتوصل ال18 الا وكان الطلب عليها بالعشرات...هذا اذا ماانحجزت اصلا
كلام صحيح 100/100 |
أخي الفاضل..
الجمال مسألة نسبية .. ومن قد تراها أختك (وسط) قد تراها أنت ملكة جمال ... والعكس صحيح. لماذا إذاً يوجد هناك شيء اسمه النظرة الشرعية؟؟؟؟ أم أنك ستتزوج دون أن تراها قبل عقد القران؟؟؟؟؟؟؟؟؟ نقطة أخيرة.. بدون تعميم .. ولكن معظم البنات لا يرين جميلات إلا أنفسهن ;) لذلك لا تعتمد كثيراً على آراء البنات في بعضهن البعض .. واعتمد على نفسك في التقييم. |
انا مومعك ابدااااا:26:
اولا مقياس الجمال يختلف من شخص لآخر00 اللي ماعجبو اخواتك ممكن يعجبونك والعكس صحيح ثانيا00 اخواتك ممكن اذا شافو صفة في احد البنات 00 او متعودين على اشكالهم قالو هذي ماتصلح لكن لما يشوفون بنات غيرهم ومافيه اي معرفة ممكن مايدققون على هذي الصفة لأنه مافيه معرفة سابقة بينهم ثالثا00 بعض البنات لما يشوفون بنات احلى منهم يحسون بالغيرة ومايتمنون يكونون زوجات لأخوانهم وصار لي شخصيا هذا الموقف! رابعا00 أنا بنت وعايشة بمجتمع كله بنات والله الجمال بكل مكان لكن في اختلاف الطول واللون والجسم والملامح ولاحظت ان كثير من المطلقات والعوانس هم من فئة الجميلات00 ودائما اسمع من الناس اذا شافو وحدة منفصلة مثلا00 فلانةجمال ونسب وحظها طايح! والموقف اللي انت تمر فيه عادي جدا000 سبق ومرينا فيه وقت ماكنا نخطب لأخوي اتذكر كنت اجلس عنده واقوله قلي المواصفات بالضبط ايش تتمنى بكل شي وكنت لما اشوف البنت ماشوفها يعيوني وبس كنت اتذكر كلامه ورأيه |
ياليت تورينا صورتك عشان نشوف هالملح الي يقطر منك والجمال الي يتناثر من محياك .. لأنه من زود ثقتك بنفسك و على شروط الجمال الي انت طالبها اكيد اكيد اكيد اكيد انك ملك جمال
وانا مـتأكده انك مو مثل الشباب الباقين الي شين وقوى عين .. اقصد بعظهم اكيد مو انت لا تفهمني غلط بس بعضهم يكونون (قرود وشواذي) ومو راضي يتعدل .. وزياده على كذا لا منصب ولا مال ولا جمال .. مو انت طبعاا اقصد بعض الشباب .. ويتشرط في البنت الي يبغى يتزوجها مادري شين وقوى عين .. |
سبحان الله اخى الكريم انت حكمت من خلال نظرة اخواتك وليس نظرتك انت
من الممكن ان من تعجب اخواتك لا تعجبك والعكس صحيح |
الجمال !!
الجمال ياخوي احيانا نقمه على صاحبة .. اهم شي الدين والاخلاق صدقني .. انا عن نفسي .. كنت محجوزه .. وكان كل يوم يطق بابنا خطاطيب ..وارفض عشان شخص واحد احبه ويحبني .. عشان قصة حب .. والكل ياحظ فلان بفلانه .. حتى اخوان زوجي كان يقوله ياحظك خذيت وحده حلوة .. واحنا لأ .. وبالاخير اخوي شنو حصلنا ؟؟؟ عايشين بتعاسة .. زوجي من شيخ لي شيخ يتعالج .. ومن دكتور لي دكتور .. قالوا سحر وعين وجن.. تصدق يشوفني بصورة انسانه ثانيه!! هذا إللي خذيناه من الجمال !!! هذي قصتي .. http://www.66n.com/forums/showthread.php?t=128742 والحمدلله على كل حال ..وانشاءالله باذن الله يرجع لي زوجي والله يوفقك اخوي ويرزقك ببنت الحلال إللي تسعدك |
عليكم السلام ورحمة الله وبركاته
تدري وش مشكلتك يالميترو ؟! إنك مغرور !! أتكلم جد أنا فيك من الغرور مثل بقية الشعب السعودي << الأغلبية علشان ماتقولون لاتعممين وغرورك مش شرط علشان جمالك أو طولك أو وسامتك غرورك نابع من والدتك وأخواتك ووظيفتك فقط كذا مره تتكلم عن وظيفتك ومركزك فيها وهذا بحد ذاته يخليك تشوف حالك وكأن البنات كلهم مايبغون من الزواج إلا رجل ذو وظيفة مرموقة إنت بنفسك حصرت نفسك بالبنات القريبات منك وحكمت عليهم إنهم مش ولا بد من ناحية الجمال ! مافكرت تطلع عند المحيط القريب منك وراح تلقى اللي ترضى فيك وتشبع غرورك صعبـــــــــة جدا ً تحكم على البنات من خلال كم بنت شفتهم أو شافوهم خواتك ومسألة إنه البنت الحلوة أم 17 تروح بدري وتتزوج صدقني مش علشان جمالها كله توفيق من الله وأغلب الجميلات حظوظهم الله يرحم حالهم مايميدها تفرح إلا تنحاس كل حياتها وحتى العوانس على قولتك مش شرط إنها ماتزوجت علشانها شينة مسيكينة يمكن جمالها صار نقمة عليها ومامشت من كثر العيون اللي تبيها انطقت في بيت أهلها والله يعلم بحالها ونفسيتها يعني ياأخ لا الصغيرة أم 17 ولا المعنسة جابت العرس لنفسها هذي شغلة والشغلة الثانية الجمـــــــــال موجود وبأكثر مما تتصور وحتى البحث عنه سهل اللي يقرأ موضوعك يقول ياااالله معقولة خلصوا البنات الجميلات ومافيه إلا شيون وماطاحت إلا على راس الفقير إلى ربه الميترو الله يسعده ويرزقه الزوجه الحلوة الجميلــــــــــة اللي تسعده . |
اممممممم .. الصراحة أنا معاك من ناحية أن البنت الجميلة يمشي سوقها ..صح ..:22: لكن مو معك ابداااااااا ان الولد (الجيكر )على حد تعبيرك ..يمشي سوقه .. :25: أنا كنت مخطوبة وطلبت الانفصال عن خطيبي لأني ماتقبلت شكله بالمرة ..ولما حاولت أضغط على نفسي علشان ماأجرح مشاعره صار الانفصال لسبب ثاني .!!!والحمد لله ماجرحته ولابينت له أنا من وجهة نظري أقول الجمال مطلوب وإذا ماكان علىالأقل القبول .. وهذا شرط في الطرفين .. ييعني أنا مثلا ماعتبر نفسي جميلة .. لكني مقبولة ..فيني مقاييس جمالية ..وفيني عيوب أيضاً .. انخطب كثير ومايصير نصيب ومن بين كل الخطوبات اللي فشلت .. وحدة بس كانت بسبب ( نحافتي الزايدة) الولد كان يبي وحدة مليانة ..!!! وانا الصراحة لو تقدم لي واحد فيه كل لمواصفات الزينة بس ماتقبلت شكله مستحيييييييييييل أوافق انا مابي واحد وسيم ..أو أحلى مني ..لا بس على الأقل يناسبني أو أتقبل شكله ولأتم أعيش عقدة النص طول عمري أو أعيش معاه تعبانه واذا رفضني واحد بسبب شي في شكلي مو عاجبه اتقبلها برحابة صدر ولا ياخذني وهو مو مقتنع فيني بعدين يطلقني أو يتم يعايرني طول العمر وعلى فكرة احنا لماخطبنا لاخواني أقل واحد فيهم وسامة هو اللي اشترط الجميله .. وأوسم واحد فيهم زوجته مافيها ذرة جمال لأنه ماشترط الجميلة .. حتى والله ياكثر تعليقات الناس قالوا حرام خطبتوا له هذي ..هو كثير أحلىىىىىىىى منها .. بس ماشاء الله هذا هم عايشين مرتاحين ويحبها ويموت فيها وأعرف أخو صديقتي تقول تشرط في الجمال كثير ومالقينا مواصفاته وآخرته شاف وحدة عكس مواصفاته بالضبط ..قال بس هذي هي أبيهااااااااااا .. ليش لأنه ارتاح لما شافها .. عموما أنتو ل لا تبالغون في مواصفاتكم الخيالية وانزلوا لأرض الواقع ولاتكثرون من شوفة الفيديو كليبات .. وناظروا في المناظر زين ..قبل لا تناظرون في بنات العالم واذا طالت سالفتك .. ردد :يااااااااااااااااااليل..ماطولك:29: :29: |
ياأخي
كلامك ممكن يجرح مشاعر أي فتاة متوسطة الجمال أو ليست جميلة وهذا منتدى فيه آلاف الفتيات فليتك تختار كلماتك بعناية في ظنك كم من الفتيات سوف يصيبهم الإحباط بعد قراءة مقالك مقالك صريح لحد التجريح هداك الله |
| الساعة الآن 09:43 AM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©