هل الجأ للمحاكم؟!
 

السلام عليكم ورحمة الله وبركاته

ادري اني تعبتكم معاي .. تعبتكم بمشاكلي الي ماتنتهي بس والله مالي غيركم اشتكيله .. ماقدر اشتكي لاهلي ولا صديقاتي لان كلهم بيقلبون علي وبياكلوني بقشوري.. وماقدر اكلم زوجي.. لاني بوضع مايساعد بدل مانصير يد بيد ... صايرين ضد بعض مع ان بقرارة انفسنا انحب بعض..

توني قبل شوي.. قبل دقايق كنت قاعدة مع امي وبنتي... وامي كانت تسالني وهي معصبه انتي تبينه؟!
تقصد زوجي.. وبهالوقت اخوي جا وسمع هالكلمة .. وعصب علي وصارخ .. ودار حوار بين امي واخوي وانا مالي رااي...

كنت قبل فترة بنلجا للمحاكم لكن اهل زوجي قالوا صبروا شوي.. (اهل زوجي: عمامه وحريمهم) قالوا صبروا شوي عشان كل ماتطول مدة وجود ام وداد في بيت اهلها كل مايصير الوضع لصالحنا..
فصبرنا.. وجت اجازة الصيف .. خواتي سافروا وانا وامي واخوي وبنتي قاعدين هني .. يعني اتفرقنا.. واهل زوجي سافروا بقينا بس احنا في البلد .. الكل يشوفهم انانييييييين .. ويفكرون بانفسهم لان بالاخير سافروا وعلقونا هنا.. انا عن نفسي بعد تدخل بنت عم زوجي بيني وبين زوجي.. بديت احاول اتراضى ويا زوجي.. وطبعا كل مابينا مسجات وبس.. لا شوف ولا مكالمات .. وصليت استخارة كثير.. وادعي ربي بان انا زوجي تتصلح امورنا ونرجع لبعض ... وامي ماتدري.. لانها كارهه زوجي كره العمى .. حتى خالاتي وخواتي يتمنون اني مارجع لزوجي.. واعيش مطلقه مع بنتي اعيش في بيت اهلي.. مستسهلين الطلاق كثيييييييير..

الي صار بين امي واخوي .. ان اخوي جا وقال اهل زوجها انانيييييين سافروا وخلونا لحالنا هنا.. وانتو كثير باردين وماتتحركون .. ام وداد ماعندها لا شغله ولا مشغله .. قاعدة مجابلة بنتها لا شغل ولا دراسه .. صارت فاشله .. ماعندها حياة .. والسبب زوجها الي هاجرها ومايسال فيها ولا في بنتها ولا يصرف عليهم .. وامي طبعا كارهه زوجي واستانست على عصبية اخوي وحماسه وقالت لا خلاص يوم الاحد بنتحرك .. (لان اجازتنا الاسبوعية يوم الجمعه والسبت) وبنروح للمحامي وبعدين للمحاكم ومن هالكلام..
وانا قاعدة محد ياخذ برايي ولا شي..

وبعدين بالاخير عقب ماقرروا كل شي .. سالني اخوي انتي شاللي تبينه .. قلتلته انا مخي مشوش .. واساسا مابي محاكم ومشاكل..وعصب علي وصرخ.. قال لي القرار قرارج .. لكن في حال قررتي تستمرين مع زوجك .. انا مالي دخل فيك ولا راح اوقف معاك اذا صارت لك مشكله ... ومن هالكلام الي يخوف..

والحين الصراحة انا مادري شو الحل .. ولا اعرف شو اسوي .. قلبي يتقطع .. ودموعي ماسكتها مابيها تنزل... وامي اتشوفني..

لكن الي اعرفه اني احب زوجي.. وبنفس الوقت مو واثقة منه .. مادري هل بيتعدل ولا لا مع انه وعدني بهالشي.. ويحلف دايم انه يحبني واني حبه الاول والاخير..

والحين والله ماعرف اتصرف قلبي يعورني .. وراسي .. وميته من الخوف .. متخوفه من سالفة المحاكم .. مابي اروح للمحاكم .. ولا ابي مشاكل.. ابي كل شي يمر على خير.. سواء استمر مع زوجي ولا لا.. ابي الهدوء..

ادعولي الله يخلللييييييييييييييييييييييييييييييييييكم .. ادعولي بان حالي يتصلح ..

ودلوني .. لاني صدق مشوشه وماعرف شو اسوي .. وماعرف وين الصح من الغلط ..

أسأل الله أن يعجل بفرجك يا ام وداد

نصيحتي لكي: أن تعودي إلى زوجك فهو المسؤول عنك في الأول والأخير

بما انه وعد انه يعتدل فأرى انه من الافضل الرجوع لزوجك

وبما انك تحبيه وهو يبادلك نفس الشعور وقد رزقكم الله ببنوته أموره , فمالها لازم محاكم

وتضييع عمر البنت في مشاكل لا تنتهي

عموما : الرأي الأول والأخير لك , وأكثري الاستخاره

وانا أقول : ارجعي لزوجك


ولكي منا خالص الدعوات

اختي العزيزه اشكركج على وقفتج معاي
خاطري اساعدج بس انا مو قاهمه الموضوع
لنتي اذا تحسين تبين زوجك ليش خايفه
شنهو سلبياته
يارب يجمع بينكم
انا محرومه واحس معناه فقدان حنان الزوج
والأخوان ساعات احس انانيين لاتزعلين مني بس ما يبون مشاكل مايحسون بخاوتهم
انا مشوشه فاعذريني

انا ودي ارجع لزوجي انا ودي اعيش معه اليوم قبل باجر.. بس ابي ارجع والكل في بيتنا راضي عني.. لانهم احتووني لما كنت وحيدة ومتضايقه .. وزوجي وعدني كثير من قبل بس مانفذ وعوده .. ويقول انه حاول بس مو كل شي قدر عليه ..
بنتي مابيها اتعيش من غير اب.. والله ان قلبي يعورني لما اشوفها احس قلبي يتقطع عليها .. ادري انها ماتفهم الحين .. لكن لما تكبر بتسالني.. وشو اقول لها .. ؟ والله ماتفقنا.. صحيح هالكلام.. بس الحين زوجي وعدني بان نطلع في سكن بروحنا .. ووعدني وبنت عمه الكبيرة شاهدة على هالكلام.. انا عشت سنه مريرة من امر سنين حياتي.. لكن كنت في بيت اهله والحين في بيت اهلي.. وللحين ماجربنا السكن المستقل.. وزوجي طلع روحي والحين بيطلع سكن .. اخاف اتطلق واسمع كلام اهلي وبالاخير اندم لاني استعجلت بالطلاق قبل ماجرب السكن ..


الله يعيني..

مشكور ياخوي لانك اهتميت

يا بعد قلبي والله يا نايت انا واقفه معاج .. وبوقف معاج على طول ان شاء الله

ربي ارزقها بالزوج الصالح والذرية الصالحة .. وان شاء الله يارب يجيج الزوج الطيب الي يحبج واتحبينه والاهم اهله يكونون طيبين ويحطونج على راسهم من فوق... ان شاء الله ربي بيعطيج لانج صبرتي.. وربي يحنن قلب امج عليج ...

ان شاء الله الحرمان ما يطول..
الزوج مهم صحيح .. بس والله انا من زود المشاكل الي حصلتلي ..صرت ماتذكر عدل كيف كانت حياتي مع زوجي.. المشاكل الهتني عن احتياجاتي للاسف...
اخوي خوفني لما قال ماراح اوقف معاج اذا قررتي ترجعين له بهالسهوله انا احتاج اخوي خصوصا ان ابوي شايل ايده مو متواجد في حياتنا..
اهلي مستسهلين الطلاق.. للاسف..
وانا مابي اتطلق احس سنة وحدة ماتكفي...
وامي بنت حياتي كلها على استنتاجات .. والسبب ام زوجي النسرة (اسفة على هالكلمة) بس والله اذتنا كثير ياريت بس انا .. لكن لا اتدخلت بين امي وابوي وادت الى طلاقهم .. والحين امي خايفه من تصرفاتها .. وتبي تنتقم منها عن طريقي.. واتقول تبي تبعدني عنها وانا مالومها ..بس اخاف اندم اذا لجات للمحاكم لاني حتى لو بعد المحاكم رجعت لزوجي .. بيصير فيه عناد .. وشوية حقد .. اتوقع
ومابي هالشي يصير..

ادعيلي يالغلا وانا بدعيلج ..

مشكور اخوي على الدعاء

وعلى الروابط ..

وهذا بعد رابط مهم .. فيه التفاصيل..

سوف أطلق من زوجي.. أحتاج لكم
http://www.66n.com/forums/showthread.php?t=130597

لاتزعلين مني بس بعد مافهمت امج اشدخلها بعلاتج بينج وبين زوجك
لج دعوه مني وانا بعد اترجاك لان انتي احسن مني انا سويت ذنوب الله يغفرها لي
الله يجمع بينج وبين زوجج
الأهل صاير عندهم كل شي عادي
البنت تم بلا زوج وتطلق عادي
احس فييج والله
اقري سوره الكهف وبعدين ادعي لنفسج مباشره
وصلي على النبي 100 مره وبعدين ادعي
ياربي ياذا الجلال والأكرام ياديانالسماوات والأرض اجمع ام وداد بزوجها وسخر لها القلوب العاصيه كما سخرت البحر لموسى
الله يبعد عنج كل شر
ادعي بالدعاء اللي كتبته ياربي يستجيب لج وتصدقي وانا انصحج ترجعيين لزوجج بصراحه

سامحوني يا جماعه ادري اني وايد أشتكي بس والله مشاكلي مستمرة ...

ماودي اسوي افلام .. بس والله هذا الي يصير معي.. اتمنى تنتهي مشاكلي.. واخلص من الهم ..

امي مصعبه علي الامور كل ماتشوف خلقتي تتكلم عن زوجي واتطيح فيه سب.. واتزيد همي.. تحسب ان بكلامها بكره زوجي.. وبصمم على الطلاق..

امي تتدخل لاني طلعت من بيت اهل زوجي وانا تعبانة نفسيا .. وكنت حامل .. وفيني فقر دم وبلاوي..
ولاني قاعدة عندها فترة مو قصيرة ..
ايه وانتي الصادقه كل شي عادي صار بهالايام .. يعني مادري امي في بالها اني اذا تطلقت بتزوج مرة ثانية بسهولة .. خصوصا ان معاي بنت مو بروحي..
ان شاء الله يالغلا بقرا سورة الكهف.. وبسوي كل الي قلتيلي عليه

ياربي ياذا الجلال والأكرام ياديانالسماوات والأرض اجمعني بزوجي وسخره لي كما سخرت البحر لموسى

وان شاء الله يارب ارجع لزوجي .. واتكون كل الامور تمام