|
ماضي مطلقة،،والحاضــــر!!
السلام عليكم ورحمة الله وبركاته نبذه مختصره عني.. عمري 22 سنه .. قبل اكثر عن سنة حملت لقب مطلقه بكر... (عقد قران بس) المهم مريت في ظروف صعبه جدا جدا .. وذقت المر من أهلي ومن طليقي والحمدلله اني ارتحت منه وكلن سار في دربه وبنهاية المطاف أهلي حسوا بغلطتهم وانهم اجبروني على قريبي واحنا مومتوافقين في اشياء كثيره بس احس في نفسي موقادره انسى مواقف اهلي معاي.. احاول انسى اشغل نفسي كل ما اتذكر مواقفهم الله يسامحهم .. كانت كبيره على قلبي ونفسيتي .. وقتها كنت عايشه وحيده اصارع الظروف والألم .. مواقف اهلي معاي اثرت اكثر من مواقف طليقي في الوقت السابق وفي الوقت الحالي.. مامخلينا بحالنا .. وكل مره يطلعوا علي وعلى أهلي كلام . وانا صابره واقول حسبي الله ونعم الوكيل... ومتاكده ان شاءالله ربي بياخذ الحق منهم في يوم بعد ما انفصلت .. شليت من بالي فكرة الزواج وحطيت خطة لمستقبلي .. كنت وقتها خريجه .. واشتغلت الحمدلله على طول والحين اكمل دراستي وقبل شهرين بدوا خطاب يدقون بابنا .. وانا ما افكر ارتبط في الوقت الحالي.. نفسيا مومتقبله الوضع ابي يوم اوافق اكون نسيت الماضي 100% .. ومستعده اني اخوض تجربة جديدة بحلوها ومرها وقبل فترة صديقتي طلبتني لواحد من قرايبها .. هم ماعليهم كلام الحمدلله بس الولد ما اعرف عنه شي لين الحين.. على كلامها اكيد راح تمدحه وانا اشوفهم ناس زينين بس بنفس الوقت مابي اتسرع بالقرار .. وبنفس الوقت احس هالانسان مومثل مارسمته في بالي طبعا بتقولون مستحيل احصل على رجل تفصيل مارسمته مخيلتي.. لكن هالمره يوم برتبط بشخص ابي اتجنب اللي فقدته في التجرية السابقه للتوضيح اكثر (مثــــال).. طليقي شهادته ثانوية ... وكان فرق وايد بالتفكير بينا .. وصعوبة في التفاهم على رغم انه اكبر مني ب 5 سنين والشخص المتقدم لي اكبر مني بسنتين وبعد شهادته ثانوية عامه.. وانا خايفه اخوض نفس التجربة بصعوبة التفاهم .. وكنت دايما اتمنى ارتبط بشخص مناسب لمستواي التعليمي والثقافي والفكري.. حلو التوافق بين طرفين ادري مو شرط المثقف يكون فاهم الدنيا صح .. بس هل ممكن اتخلى عن هالشي؟؟ احيانا احس اني مابي استمربالرفض بدون سبب .. اخاف ربي يعاقبني في يوم لاسمح الله وبعد احس اني رافضة فكرة الزواج الحين وليس الأشخاص انفسهم انا استخرت بس شعوري متضارب وافكار تروح وتجي .. محتاجه حد يفكر معاي اتمنى يكون كلامي مفهوم وواضح أختكم شموع رومانسية |
نصيحة لا تريدين الخطاب الاكفاء وانتي بهذا العمر
لانك كل ماتقدمتي في العمر راح يقل الخطاب تدريجيا واغلب الشباب يفضلون الصغيرة في العمر لا تشرطي شهادة او غيرها اهم شي الدين والاخلاق |
السلام عليكم وحرمة الله وبركاته
اخيتي الشهاده ليسة مقياس على الاستيعاب الفكري صدقيني كم شخص لا يملك الا شهاده ثانويه وزوجاته اعلى المناصب و ماشين بالدنيا وامورهم طيبه وللله الحمد اخيتي اهم معير الخلق دين وخلق كما حثنا الرسول اللهم صلي وسلم عليه ان كان ذو دين فأستخيري والله ميسر الاموور بووركتم.. |
اختي شموع الشهادات مش كل شي في ناس بدون شهادات بس مثقفين واعيين وفاهمين
ومافي في الدنيا انسان كامل الكمال لله سبحانه وماتعرفي يمكن يجيج اللي تقبلي مستواه العلمي بس ما يكون قد المسؤولية او يكون ما متفاهم صلي صلاة الاستخارة وتوكلي على الله وان شاء الله خير |
|
لا تغلطى غلطتى وتضيعى فرص قد لا تتكر ر والنتيجه انى عانس
|
وفقك الله
لا تردي من يطلب الحلال |
انا رأي من رأيهم .. وانا الآن منفصله وعمري 24 ومن انا اللي ارفض العرسان ابوي الله يهديه هو اللي يرفض ويكون مافيهم شي بس كذا المبدأ رافضه .. ويقول لو جا نصيبك بتأخذيه لو ماجا انتي جالسه هنا بالبيت .. والله انه كلامه يقهر لكن مااقول غير اني وكلت امري لله ..
لاترفضي وعمرك مناسب .. احسن من بكره تقل الفرص عليكي اسمعي كلامي |
وعليكم السلام ورحمة الله وبركاته
غاليتي إذا جاءكم من ترظونه خلقه ودينه فزوجوه أنصحكِ بان تسألي عن دين الرجل وخلقه أولا ثم الإستخااارة وكثرة الدعاااء ولا تفكري بأنه أقل شهادة بمعنى أنه سيكون تفكيره متضارب مع تفكيركِ لا غاليتي فكم وكم وكم ممن هم حاملوا الدكتوراة وعقولهم ما زالت في ركبهم وكم ممن لديهم ليس شهادات ثانوية بل إععدادية وعقولهم متفهمة وواعية ولا تفكري بأنك لا بد ان تخرجي من تجربتكِ السابقة وتنسين الماضي لا غاليتي ربما يكون أرتباطكِ بهذا الشخص ينسيك الماضي ويعوضكِ ربي به خيرا أسأل ربي أن ييسر لكِ أمركِ وان يكتب لك الخير حيثما كان بشرينا عنكِ غاليتي |
أشكركم جزيل الشكر على التواصل والمعذرة على التاخر في الرد.. لظروف سفري تابعووووا المستجدات قريبا محتاجه وقفتكم معاي من قلب ومالي غنى عنكم |
| الساعة الآن 08:35 AM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©