|
يا فرحه ما تمت
السلام عليكم ورحمة الله وبركاته
اشتفت كثير للمنتدى وتصدقون حذفته من عندي لاني ما ادخل غير القسم هذا وكنت كل ما ادخل اطلع وانا محمله بكل انواع الهم والتشائم مع ان فيه مواضيع مثل مواضيع اخونا الكبير تبعث الامل والسرور بس وش اقول في نفسي المتشائمه بعد طول انتظار بدون حتى خاطب واحد تقدم لي رجل بعد معاناه مع وسطاء الخير تقدم رجل اخلاق ومتدين جدا لا يترك فرض في المسجد لا يترك محاضره ما يحضرها رجل اخلاقه عاليه وكل الناس تشهد له من دخل الرجل هذا بيتنا ابوي نفذ كل الخطط الممكنه والغير الممكنه عشان يطفشه لكن الولد كان دينه يغلب اخلاقه وكان يحترمه ويقدره اول ما جاء ابوي يخبرني عنه ما قال جاك رجل ونعم الرجال جاء يركض ويقول الرجل ثوبه قصير ولحيته طويله كأن هذا عيب فيه او ينقصه لان وبكل بساطه يبغى زوج مثل زوج اختي لا يصلي!!! اما امي الحبيبه فهي تضحك شماته من دخل الرجل!! عانيت الامرين خلال 3 شهور ابوي استفذ كل الطرق في تطفيش الرجال ومعاي انا حدث ولا حرج كان يضغط علي ويخبرني بالفرقات الي بينا وهي انه متدين ووضعه عادي فهو موظف يستلم راتب معقول طلب مني ابوي اجهز نفسي مع ان لم نعقد ويبغاني اجهز كل اغراضي بمبلغ 2000 ريال!!! اعطاني هي اروح لسوق فيها كان يأخر وقت العقد بكل طريقه سئلته في يوم قلت احنى مصريين الخطبه 5 سنوات والزواج بعد 10 سنين!!! علشان كل هذا الوقت قال لي لالا لازم ما نندفع ونكون لنا هيبه!! يوم الشوفه الشريعه جاء الرجال واهله طلب رؤتي بناء على طلب ابوي ان يجي يشوفوني رفض!! وقاله تعال بكره جاء الرجال واثناء الشوفه الشريعيه وامام الرجال قالي هذا الرجل مو من جماعتنا ولا يقربلنا!! خجل هذا الرجال مثل خجل البنت بسبب كلام ابوي امي كانت مثل الي لا وجود لها لا سئلتني ولا استشرتها لان بكل بساطه مالها دخل اخواني نفس الشي كنت استشير ربي فقط واستخير كثير وكل مره ارتاح لان يكفي نور الايمان من وجه الرجل اول ما كلم الرجال اهلي بين لهم ان السكن في بيت اهله وبعد مده من الزمن وبعد الموافقه اهلي شافو البيت وقالو لا يليق بي!!! وكأني عايشه في قصر الان عشان يقولو لا يليق بي وفي النهايه وبكل بساطه ابوي افتعل مشكله مع اخواني وامدت المشكله الي ضرب باليد كل واحد الان وبعد هذا الوقت يبغى يفرض رايه وفي النهايه وقفو اخواني وقالو لا تتزوجي هذا الرجال ليش بتسكين في بيت اهله في غرفتين وحمام انتظري كم سنه ثانيه وش فيها صح وش فيها انقضى سن الشباب وانقضى كل شي لا زواج ولا ولد ولا دراسه ولا صديقه وحده بهالوقت الحمدلله اللهم اجرني في مصيبتي واخلفني خير منها ربما تدخل وحده ويحز في نفسها ان انا مريت بتجربت الخطبه وهي لم تخطب بعد بس اقولها عمرك ما بتحسين بضياع الي انا فيه اكره غرفتي لان تخليني وحيده افكر اكره كل شي |
وعليكم السلام ورحمة الله وبركاته
اهلن اختي الكريمه تحسبي الله واذكريه وان شاء الله خير اعرف انه امر يضيق بالخاطر ولكن توكلي على الله سبحانه وان شاء الله ربي بيرزقك برجل تغر به عينك ودين وان كان الثوب قصير فهذه سنه ... ولا ارا فيها شيء وبالعكس كما قال النبي صلى الله عليه وسلم :: اذا اتاكم من ترضونه دين وخلق زوجوه: ادعي الله ان ييسر امورك اخيتي |
الله يعينـــج غااليتي ؛؛
الله يررزقــج الزووج الصـــاالح وووايعينــج على أهلــج دعووواتي لج اللآن وفي صلالاتي وفي كل وووقت اتذكررج فيـــه ياا اختي الغااليـــــه اعتبرريني اختــج الصغيـــررةة *_* وسسسسمحيلي |
اسال الله العظيم رب العرش العظيم ان يفرج همك ويكشف غمك ويرزقك بالزوج الصالح عاجل غير اجل
وان يهدي اهلك ام يزيد وامل اسال الله ان يجمعني بهم في الجنه ويعوضني خيرا منهم |
يا أختي الا يوجد رجل عاقل في الاسرة مثل عم أو خال أو جد
يصلح ما فسد؟ |
اشكر جميع من ردو يا اخواني واخواتي وبارك الله فيكم ووفقكم
mtween للاسف عمي علاقتنا مقطوعه معاه والسبب امي وابوي خالي من جاء وخطبني الرجل يقول لامي من وين جبتو الرجال لان انا مو صغيره وهو مثله مثل اهلي لا فائده فيه |
لاحول ولا قوة إلا بالله
|
احس بضياع مو ضياع عشان الرجل لا والله احس بضياع في نفسي اقضي يومي كله بنوم عشان ما افكر تنصحوني بأيش
|
حبيبتي أم مزنة...
لا والله فاهمينك...وحاسين فيك بعد.. صدقيني أغلبنا جرب هالموقف وإن ااختلفت تفاصيله... وش رايك أنا يوم انخطبت أول مرة و في يوم الرؤية الشرعية صار الشي اللي محد توقعه.. تخيلي الكل ينطر هاليوم.. أنا تجهزت...ولبست...وترتبت... أمي جهزت كل شي لاستقبال الضيوف... خواتي ينادوني بالعروس... اخوي يقول سبقتيني وشكلك بتتزوجين قبلي... لكن.. في هاليوم اللي تحلم فيه كل بنت... ولا أحد حضر من أهل الخاطب ولا حتى أهله... تخيلي مايبوني و غيروا رايهم في يوم الرؤية... انصدمت... الكل انصدم... الكل يشوفني بعين الشفقة و انا متزينه و مستعدة... هاه وش رايك في الموقف؟! السالفة طويلة لكن حطيت لك منها الموقف اللي مستحيل انساه... يرفض أهلك وانت مالك دخل أهون بكثير من أن أحد يقول مانبيها ويحرجك جدام الكل.. موقف ثاني.. انخطبت مرة ثانية و صرت مثلك متمسكه فيه لالتزامه و إن كنت ما أصرح بهالشي... بس أهلي ما يبونه... سئلوني عن رايي ووافقت بعد الاستخارة و بعد ما اخوي سأل عنه إلا و تعرف عليه.. وصار يمدحه من كثر ماهو معجب باخلاقه... تخيلي وافقت و أبوي قال لاخوي دق على الخاطب و قول له مافي نصيب البنت مب موافقة.. قالوا اني مب موافقة مع اني وافقت... الحمدلله على كل حال... اختي صدقيني حاسة فيك و فاهمه شعورك... بس سبحان الله كله نصيب.. ولو كان ربي كاتب ان هذا نصيبك كان اخذتيه لو الدنيا كلها معارضة... أهلك مجرد أسباب و التدبير من رب العباد... وتذكري دايما.. " لو اجتمع الانس و الجن على ان ينفعوك بشيء لن ينفعوك إلا بشيء قد كتبه الله لك، ولو اجتمع الانس و الجن على ان يضروك بشيء لن يضروك إلا بشيء قد كتبه الله عليك...رفعت الأقلام و جفت الصحف" ،، ،، ربي يسعدك و يرزقك بالزوج الصالح المصلح اللي رب العالمين يرتضيه لك... |
هل أنت كبيرة ؟
هل سبق أن تزوجتي ؟ هل تخشين فوات القطار ؟ أرجو أن تجيبي على الأسئلة لأن سيساعدنا على إيجاد الحلول |
| الساعة الآن 04:52 AM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©