|
امك وتأخرك بالزواج
بنات شلووون اتصرف :(
امي الله يحفظها من بدت اجازة الصيف وهي تردد "كل البنات تزوجوا الا انتي" امس وحده تقربلنا اصغر مني انخطبت على طول امي التفت علي وقالت "ريماني كل البنات تزوجوا الا انتي" قبل كم يوم بنت صديقتها اصغر مني جابت بنوته ماشاء الله قالت نفس مقولتها "كل البنات تزوجوا وخلفوا الا انتي" يعني وش اسوي؟؟؟؟؟؟؟ ليش هو على كيفي؟ بنات ابي اعرف وش موقف امهاتكم من تأخر زواجكم هل تحسون انهم مهمومين مرررره؟ يسمعونك تعليقات مالها داعي؟ انا امي ياعمري عليها قايمه قاعده تدعي لي بالزواج حسستني اني هم كبير وكل محد يقولها شئ تقول بزواج ريماني ان شالله حتى الناس حسو انها متأزمه من وضعي صار موضوع زواجي شغلهم الشاغل من غير مبالغه احس لما اتزوج كثيرررر ناس بيرتاحون :25: اكيد حب الام وخوفها على مستقبل بنتها يخليها تتصرف كذا بس لاشعوريا اتضايق وتجيني الصيحه بس احاول اكون على طبيعتي وان الموضوع ماهمني يالله ابي اسمع ردودكم وشلون تتصرفون بهالمواقف |
كم سنك حبيبتي؟
|
أنا الحمدلله أمي لا تذكر لي هذا الموضوع نهائيا لحساسيته وحساسيتي أنا أيضا لدرجة أني أحيانا أقول يمكن زواجي مو على بالهم هي وأبي لكن أعتقد أنها تكتفي بالدعاء بينها وبين ربها
|
والله ما حد يشيل همنا مثل أمهاتنا الله يخلي أمك لك ويخليلي أمي ويخلي أمهات العالم كله والله ما في مثل الأم ............. حبيبتي من حبها لك تحاتيج وإن شاء الله يستجيب دعائها وتفرحين بالزوج الصالح والذرية الصالحة عاجل غير آجل يا رب العالمين ،،،،،،،،،،،،، ولا تأخذين الموضوع بحساسية وتتضايقين الناس تعرف إن الأم تشيل هم أولادها واي وحده بتكون نفس أمج .............. الله يطول في عمرها ........... لفظ المشيئة يكتب هكذا (إن شاء الله) |
حليلهم أمهاتنا ! هذا والله أختي الحبيبة شيء يحصل عند كل متأخرة مثلنا ... أمهاتنا شايلين الهم ... وكل واحدة تتمنى تشوف إبنتها في بيتها مع زوج يخاف الله فيها تدرين حبيبتي ... أنا ساعات أحاول أنسى الموضوع ... وأقول عادي كل شيء يجي بوقته واللي لها نصيب ... حتماً بتاخذه لكن كلمات أمي وأمنياتها ودعواتها ... تجعلني أفكر ربمــــا لكي ترتاح وتكون سعيدة خصوصاً هذه الأيام مع الزواجات الكثيرة وهو موسم أعراس يزداد حنينهن ... وتتابع دعواتهن أنتي بس حاولي تقولين لها كلام طيب ... إن كل شيء قسمة ونصيب ... وأن التأخير فيه الخير ... وغيرها من الكلمات التي تهدي للصبر الله لا يحرم أمهاتنا فررررحة بنا في القريب العاجل الله يسعدك حبيبتي بالزوج الصالح التقي النقي الذي يقدّرك ويسعد قلب أمك الغالية اللهم آمين أختك " زهرة " |
ياقلب الأم الكبيــــر
صدقيني ياريماني أمك من كثر ماتحبك تتمنى لك الخير هذا أكيد لكن تعبيرها يمكن يضايقك لأنه منها بالذات أعرف إنه كل بنت نفسها تفرح قلب أمها علشان كذا متضايقة إنك سبب ضيقها الحل الوحيد إنك تقنعين نفسك بأنه أمك تحبك ومن حبها بتشوفك أفضل الناس إذا قالت كذا لاتتحسسين وطمنيها وقولي بإذن الله بكره بتزوج وبفرح قلبك إذا قالت فلانة تزوجت وفلانة ولدت قولي بإذن الله أنا بيجي يوم وبتزوج وبفرح قلبك لاتتضايقين منها ياريماني اللي تقوله أمك تنفيس عن اللي جواتها لكن لو كانت تقوله عند كل الناس إجلسي معها وكلميها بهدوء وحنان إنه ولا وحده من البنات هي اللي جابت الزواج لها كله بيـــــد الله لو كان بإيدينا كان من زمــــــــــان إخترت واحد على مزاجـــي وأكيد هي حريصة عليك لما تقولين لها إذا صرتي تبينين للناس إنك مهمومة ومتضايقة مني بكره كلهم بيشوفوني ثقيلة وإنك ماتحبيني وإنت عكس هذا كله أحبك وتحبيني بالكلمة الحلوة ياريماني إن شاءالله تقدرين على أمك وتقنعينها وتريحين بالها ومالنـا إلا الصبـــــــــــــــــــــــر . |
تصدقي بالله .. اذا انا ماسمعت كلمة ( ان شاء الله بنسويها بزواج ( العام ) ماارتاح .. احس اذا ماقالوها اني ماراح اتزوج واحسهم مو متحمسين لزواجي
لكن امي الله يهديها تعايرني بعض الاحيان بطلاقي .. لمن يجي عريس يبغى يشوفني وانا اقوم ارتبك تقوم تقول المفرض خلاص تعودتي على هاذا الموقف .. تقولها من باب مزح لكن تحز بنفسي والله الله يفرج كربتنا وبعوضنا خير .. معليه حبيبتي تحملي .. شوفي شوبارد سم الله عليها الله يحميها .. كانت تسمع من والدتها الله يخليها لها كلام يعور واحنا كنا نهون عليها .. وشوفيها ماشاء الله عليها اتزوجت وامها مبسوطه فيها .. الله يحميها ويبعد عنها شر الحاسدين مالنا غير الصبر .. ومابعد شيقة الا فرج |
يا مكثر ما سمعت من أمي كلمة ياعـــــــانس !!
ودعاوي السم أرحم منها والله ما عقدني بحياتي غيرها الله يهديها |
أنا أمي ما تقول كلام يجرح...
لكنها كثييييييير تدعيلي... يعني بمناسبة و بدون مناسبة.... أحيانا أتمنى إني ما أسمعها و هي تدعي عشان ما أحس إني تأخرت في الزواج و أهلي شايلين همي.. اختي... ترانا كلنا نمر بنفس الظروف وان اختلفت المواقف... والأمهات ربي يخليهم ترى و الله من حبهم الزايد يقولون اللي يقولونه... ربي يحفظهم و يخليهم يارب... وانت التمسي لامك العذر ترى والله ماتكلمت إلا من حبها لك... ،، ،، ربي يرزقك ويرزق كل بنت في هالقسم بالزوج الصالح... |
أمي
أمنيتي في الدنيا اشوفها تحضر عرسي ..احس هذا حلم حياتها .. الله لايحرمنا ولا امهاتنا من هاليوم .. |
| الساعة الآن 08:14 AM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©