|
زوجي يبي يطلقني ومالقى سبب مقنع
الله يخليكم انا في حاله لايعلمها الا الله
مر على زواجي خمس سنين كنت في البدايه سعيده مع زوجي والان عندي ولدين واحد ثلاث سنوات والثاني سنه ونص وزوجي يدور على الزله عشان يطلقني والسبب الرئيسي انه يبي يتزوج وحده غيري ومايبي يجمع ثنتين لانهمايقدر يصرف على بيتين والله اني خانقتني العبره بس عيت الدمعه تطلع زوجي حالته الماديه ضعيفه وانا دايما اساعده بفلوسي وحتى الاشياء الخاصه فيني اكتبها باسمه عندي محل مشغل من نصيبي في الميراث وكتبته باسمه والحين علطوول معصب في البيت وانا ما ارد عليه اخاف تكبر المشكله ولكن هو يستفزني عشان اطول لساني ويلقى سبب لطلاقي ولكن انا الحمدلله ماسكه اعصابي واخر شي اليوم شافني طالعه بروح للجيران قالي بدون سبب اذا طلعتي لهم اعتبري هذا اخر يوم بيني وبينك هو عارف اني ما اقدر اعيش بدون جيراني عشان كذا يبي سبب قوي عشان يطلقني وانا طبعا اعتذرت من الجيران رجع وقال لاعاد تصلين عليهم قلت ليش وش السبب قال كذا بس بدون سبب ومنعني من المسلسلات قدام الاولاد قال تخرب اخلاقهم من المسلسلات وحتي اهلي يقول مافي روحه عندهم الا كل شهر مره وهو هدفه الرئيسي يحاصرني في البيت عشان اطلب الطلاق وانا صابره عشان عيالي وساكته وبالعه قهر الله يخليكم ويوفقكم عطوني الحل المناسب مع هذا الزوج لاني احس ان بجلوسي في بيته ماعندي كرامه احس بالذل تكفون خففوا عني واسعفوني بحلولكم |
الله يعينك يا أختي الكريمة
( إن مع العسر يسرا ) ادعي ربك أن يصلحه و يصلح ما بينك و بينه . أصلحي ما بينك و بين ربك يصلح ما بينك و بين زوجك. عليك بالدعاء و بأوقات إجابة الدعاء تحينيها و ترقبي الفرج إن شاء الله. قابلي سيئته بالحسنة و سيصبح صديقا و حميما إليك إن شاء الله. |
انا متاكد انه يمر بازمه نفسيه فاصبري عليه واطيعيه في كل اوامره
صدقيني الرجل يمر احيانا بازمات نفسيه قد لايكون لها سبب مبرر حاولي التجديد في حياتك اهتمي بنفسك اكثر اظهري له منك مايسره من ملبس وطيب قدر الامكان حاولي ان تكوني هادئه وتقبلي كلامه بصدر رحب لاتظهر له تمسكك به بسبب الاطفال ولكن اجعلي تمسكك به لاجله هوه هذه ازمه يمر بها اي بيت فقط تحتاج الى صبر الزواج صدقيني مراحل ويحتاج الى تضحيه من اجل الاستمرار ولاتنسي الدعاء في اوقات الاجابه والالحاح على الله بالدعاء الله يوفق بينكم ويشرح صدروكم لبعض |
ياربي اعووووووووذ بالله من رجل هكذا
اختي مالج الا الصبر واذا تمادى ...اشتكيه لابيه او لابيك ودعي الامر بايديهم ..... حاولي بشطارتج تجذبينه لج مره ثانيه من ناحيه كشخه ومن ناحية اهتمامك بنفسك واذا كنتي سمينه حاولي ان تنقصي من وزنك حاولي تشغلين نفسك بالشئ المسموح لك به ....وعامليه بالحسنى ترى اسلوبك راح يخليه يزداد احساسه بالذنب....هو ماطلقج لان لين الحين هو حاس بتانيب الضمير تجاهك وتجاه ابنائك ويحاول انه يلقى اي زله منج حتى يرمي يمين الطلاق بكل ثقه بس انتي لاتسمحين له ينتصر عليج والله يوفقج اصبري ...ان الله مع الصابرين ومابعد الصبر الا الفرج واذا بغيتي ترتاحين اكثر واكثر تضرعي لله وتقربي منه في قيام الليل وقراءة القران والله يزيل همج يالغاليه |
والله ماعرف شو اقولك .. بس غريب امره هالزوج .. تعطينه من عندك .. وانا متاكدة انك لا زلتي تعطين ..
قعدي معاه ناقشي بهدوء .. ومسكي اعصابك نفس مانتي مسويه .. لا تعطينه الفرصة يمسك عليك شي.. عشان يطلقك .. والله ماعرف وشو اقولك بس بدعيلك يالغلا .. تتسهل امورك الله يعينك |
اقتباس:
اخوي وليد الحمدلله انا علاقتي برب العالمين قويه ودائما استغفره واصلي وادعيه في ثلث الليل الاخير بس هو عافني شكله مايبيني يبي يتزوج وحده من قريباته وقبل لاتطلع في حياته كانت حياتنا مستقره وكان طيب معي لابعد الحدود يمكن هذا ابتلاء من الله |
اختي معقوله فيه رجل يحاول يهدم بيته ويشتت ابنائه بسبب نزوه!!!
تأكدي أختي فربما أنتي مقصره في حقوقه وهذا سبب تصرفاته.. لاتكوني سلبيه !!اجلسي معه وناقشيه بهدوء عن سبب تغيره ولا تظهري بمظهر المستكينه التي تطلب رضاه.. |
اقتباس:
والله انا البس له كل شي حلو و انظف البيت وابخره وابدا معه بكلام حلو بس مايرد علي وهو مايمر بأزمه نفسيه ولا شي هو يبي قريبته وفي نفس الوقت مايقدر يصرف على بيتين او يمكن هي اشترطت عليه انه يطلقني حسبي الله ونعم الوكيل |
ايش خلاك تقولين يبي يتزوج
هو صرح لك أنه يبي يتزوج ؟ ولا وش عرفك أنه يفكر في واحده من قريباته ؟ومن متى بدا بهالأسلوب ؟ أنتبهي يمكن في واحده قاعده تحوم حوله اللهم رد زوجها رداً جميلاً ماأملك غير الدعاء وأنشاء الله الأعضاء يفيدونك بحل |
اقتباس:
والله جسمي معتدل الحمدلله حتى بعد الولاده حافظت على جسمي ورجعته مثل اول وما اقدر اشتكيه لابوه لانه بيتهمني بالكذب وابوي الله يرحمه رحمه واسعه |
| الساعة الآن 01:31 AM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©