|
اسراري .. وصديقاتي الكثااار
السلام عليكم ورحمة الله الله يجزاكم كل خير يااارب على مساعدتكم الدايمه لي اللى مايعرفني .. انا بنت عمري 21 وادرس بالجامعه اجتماعية .. عندي صديقات كثير صديقات من ايام الثانوي صديقات الجامعه في قسمي القديم صديقات الجامعه في القسم الجديد صديقات متعرفهم عليهم من محيط المجتمع غير المدرسة يعني والجامعه بتقولون طبيعي وحلو كذا اوكي انا معكم لكن المشكله ان في كل مجموعه من صديقاتي اللى ذكرتها فوق فيه منهم 1 ولا ثنتين قراااب مني والحمدلله اثق فيهم كلهم وكلهم بنات ناس والنعم ونفس محيط بيتنا ونفس تربيتنا ومنا وفينا واثق فيهم ثقه تااامه وتفكيرهم و وجهة نظرهم مثلي يعني متفقين تماماااا والبعض منهم اتواصل معاه بشكل اسبووعي والبعض كل اسبوعين او كل شهر ومع ذلك اذا كلمتهم بالمسنجر او بالجوال ما احس علاقتي فيهم رسميه بالعكس احس كأنى مكلمتهم امس ونسولف ونضحك واحس مافيه شئ مفرق بينا لا قسم ولا جامعه ولا كلية ولا اى مسافه وعندي وحده من صاحباتي هذه اسميها اخت اعرفها من يوم انا صغيره وتعودت اسراري عندها .... واسرارها عندي واثق فيها ثقه تااامه لكن مع دخولى الجامعه وكثره صاحباتي لقيت نفسي بدووون ما احس لما تكلمني وحده واكون امون عليها واثق فيها احكي لها عن اى موضوع مضايقني .. طبعا مايكون موضوع مرررره خطير ومايصير احد يعرف عنه .. لا يكون شئ عادي بس مثلا محتاجه افضفض يصادف بعد شهر تكلمني وحده ثانيه وتكون نفس الشئ واقول لها عن شئ ثاني الحمدلله كلهم قد ثقتي .. بس انا مضايقني هالشئ ودي ما افضفض ولا اقول شئ لاحد اعتبره خاص او سر الا لوووحده بس اما قصه كل وحده بتكلمني على حسب الجو اقول لها شئ .. مررره مضايقتني السالفه مع العلم ان اللى قريبات مني يسولفون لى عن اشياءهم الخاصه ويثقوون فيني وبرأيي ويحترموني ويحبوووني ويشتاقون لي ولانهم يسولفون لى عن اشياء مضايقتهم بدون ماادري الاقي نفسي اسولف لهم بعد القضيه الآن .. انا مو متضايقه انى اقول اشياء لناس مو ثقه او انى اخاف انهم مو ثقه انا متطمنه من هذه الناحية .. لانها وثقو وفيني ولانى ما اعطيتهم اسرار خطيره لكن اللى مضايقني انى ما ابي كل وحده اقول لها شئ فهل عادي اللى اسويه او مو عادي وكيف اسوي كنترول على نفسي وما اضعف وافضفض لهم مع العلم ان اللى ممكن اسولف لهم وافضفض لهم هم تقريبا 4 وباقي صديقاتي اضعاافهم وانا لما اسولف لوحده منهم لجا وقت النوم يضيق صدري واحاسب نفسي واقول المفروض ماقلت المفروض اقول لصاحبتي اللى اعتبرها اختي وبس والباقي مو لازم .. بس يتكرر هالغلط .. وما ادري صح ولا مو صح !! اتمني انكم فهمتوني وياليت تنصحوني وآخر شئ بقول لكم من ناحية الثقة .. ثقو تماماً انى اثق فيهم وهم عاقلين يعني لا احد يحذرني من هذه الناحية .. والله يجزاكم الجنة يااارب لاتخلوني انتظركم شكرا |
عليكم السلام ورحمة الله وبركاته
ليه تتعبين نفسك وتبحثين عن مايقلقك ؟ مادمتِ مرتاحة مع صديقاتك ، وليس الكل تقولين له أسرارك فهذا دليل بأن لديك كنترول على أسرارك وليست كل صديقة يُقال لها وبإمكانك تطبيق ذلك حتى على الصديقات المقربات بالإرادة كل شي يتحقق والخطأ ليس فشل وإنما طريق للنجاح سوف أنقل موضوعك لعالم تطوير الذات لتستفيدي من الخبرات هناك وفقك الله . |
عفواً .. يُنقل للمكان المناسب .
|
الله يجزاك خير ياارب |
وينكم !!! |
مساء الخير أختي الكريمة ،،،
طبعا انا فهمت من كلامك انك متضايقة لما تقولي اسرارك لصديقاتك وانه المفروض ما أحد يعرف هذي الاسرار الا الناس المقربين منك مثل أمك، أختك أو صديقتك المقربه منك. طبعا هذا شعور طبيعي لأن عقلك الباطن قاعد يقول انه هذي اسرار فكيف انتي قاعده تقولي هذي الاسرار لكل وحده ؟ جميل ان تكوني اجتماعية ويكون لديك علاقات واسعة بين صديقاتك والمجتمع التي تعيشن فيه لكن مو معنى هذا ان كل وحده تقابلينها تقولين لها اسرارك ولا ما صارت هذي اسرار ! أنا أتفق معك انه الواحد أحيانا تجيه فترات وده يفضفض ويقول كل اللي في قلبه و يريح باله لكن في المقابل يجب على الشخص انه يختار الناس اللي يثق فيهم ويرتاح لهم ثم يقول مشكلته لهم لكي هم في المقابل يستطيعون يساعدونه أو يوجهونه للحل . وعشان تكوني بالفعل توب سيكرت :d وعشان تتخلصي من هذي العادة، حاولي دائما قبل ما تقولين اي شئ انك تفكرين هل لما اتكلم مع هذا الشخص راح ينفعني ؟ راح يعطيني حل ؟ راح يوجهني ؟ أم فقط راح يستمع مني وبس ؟ وانا متأكد انك راح تلاقين الناس اللي فعلا راح تثقي فيهم وراح يساعدونك ! آسف على الاطاله وآمل اني أفدتك ، تحياتي ،،، |
السلام عليكم ورحمة الله وبركاته
الله يسعدك ويشرح صدرك للمره الثانيه اقول لك اني احس انك انا وانا انت سبحان الله نفس الطباع والأحاسيس شوفي ياقلبي مادامك واثقه فيهم فلا تشيلي هم خليك على طبيعتك بس كمان انتبهي لاتقولي كلام اكثر تفصيلا خصوصا بعد خطوبتك وزواجك عما قريب بإذن الله فهنا يختلف الوضع تماما حاولي شوي شوي الين تتعلمي تكتمي وربي يشرح صدرك ويفرج همك وينولك مرادك |
اقتباس:
أختي الكريمة .. مشكوووره على ردك وراح احفظ آخر جزء من كلامك واردده دايم قبل لا اتكلم عن اى شئ الله يجزاك كل خير |
اقتباس:
أختي الكريمة روووح الغالي والله انبسطت بردك وفعلا حتى ردودك احس رد وحده فاهمتني :d من جد تشوقت اتعرف عليك اكثر مشكوووره على ردك وان شاء الله راح انتبه لنفسي ولكلامي اكثر لان الموضوع متعبني شوي خصوصا بعد الخطبة .. الله يجزك خير اختك/ توب سيكرت |
شوفي حبيبتي
اذاكنت تستفيدين من نصحهم ويعطونك راي زين وتحسين انهم حكيمات وينبهونك لغلطاتك اويشجعونك على الصح انصحك تستمرين معها .......... اما الي لاتعطيك راي سديد او تسمع وتسكت انصحك ماتقولين لها شي ويمكن اذا سويتي كذا اتوقع يقلون؟؟؟؟؟ |
| الساعة الآن 05:14 PM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©