ابنتي والطاااائره .. افيدوني
 

الله يسعد مساكن بكل خير ان شالله والله يعيد علينا هالشهر الفضيل اللي راح نصه ..

تقبل الله من الجميع ان شالله..

حبايبي المشكله مع بنتي انها تخاف من الطياره الحين عمره 2 ونص تقريبا.. والطياره احنا مضطرين نسافر عليها لزيارة الاهل علما باننا في الخارج ..

وماتصدقوون شيصير بشكلها وجهها يتنقط من الخوف ساعه نحن عليها وساعه نتنرفز منها انا وابوها..

في البدايه ماكانت تقول شي عليها لكن لما وصلت لهالسن بدت تخااف بشكل كبير " الطياره - المراكب- التلفريك.."

ارجوكم عطوني حل او طريقه اتبعها معها حتى يزول الخوف ..

الله يعينك بعدها صغيره والله

يمكن سامعه احد يتكلم عن حوادث او موت او شايفه هذا الشئ بعيونها او احد مخوفها

حاولي تجيبين لها دفاتر تلوين عن هذه الوسائل وقصص انها وسائل مريحه وسريعه والكل يركبها

واذا فيه شخصيه كرتونيه تحبها دوري على قصص عن هذه الشخصيه مع الطائره وكذا

علشان ما تخاف

الله ييسر اموركم

وخلال الرحله اخذي لها العاب ودفاتر تلوين علشان ما تتوتر

اختك بالله
جينز

مشكوره يااختي جينز ماقصرتي..

بصراحه هي صغيره توها ماتفهم شغلات تسمعها او احد يقول لها ..

وبعدين احنا قبل 3 شهور كنا مسافرين وماقالت اي شي ..

والله بالطياره معنا قصتها ودفتر الوان ولعبتها غير الشيبس يعني كل المغريات ..

اجلس اسولف معها ابغى الهيها لكن مافي فايده تسولف شوي وبعدين تترجع لحالتها

الله يهديها ويطمن قلبها ورانا سفره بعد شهر شايله هم والله

مالك الا تقرين عليها قرآن وحاولي تكون مو شبعانه نوم علشان تنام بالرحله وما تتوتر

بقرا عليها ان شالله والله يسهل ..

من ناحية النوم هي دايم والله اذا ركبت الطياره تدووخ وتنام يعني مانحس فيها .. الا المره اللي طافت وهذا اللي محيرني

ان شاء الله لاتحاتين ووسعي صدرك

على قولت امي خلي الهم لحزته :)

الله يخليها لكم وييسر اموركم

ربما شافت فلم عن سقوط طائره

او شاهدت سقوط طائره في نشرة الاخبار

او كنتم تتكلمون عن الخوف من حوادث الطائره

الطفل في هذه السن حساس جدا

مشكووره ياجينز والله تتعبتك معي..

اخي شاب ثلاثيني ..

الطفله صغييره ماتفهم هذي الاشياء لاهيه بالعابها وببرامج الاطفال يعني ماتشووف افلام ولا تفقه للاخبار

وشكرا على مداخلتك

لا يا اختي من قالك ما تستوعب سنتين ونص لايغرك ترا الطفل ذكي ويفهم مايدور حواليه وقوي الذاكره

صدقيني

الدكتور فكرى عبد العزيز استشارى أمراض المخ والأعصاب فيوضح أن ذاكرة الأطفال تنمو ببطء في عامهم الأول لكنها تنمو سريعا خلال العام الثانى من عمرهم، وهذا التطور يرجع إلى زيادة القدرة الاستيعابية لعقل الطفل إلى جانب عامل الخبرة لديه.

وأظهرت بعض الدراسات التى تم فيها عرض بعض الأفعال البسيطة على مجموعة من الأطفال مثل تنظيف مائدة وإلقاء قطعة قماش، والباحثون يصفون فى نفس الوقت ما يقومون بفعله أمام مجموعة من الأطفال، وأظهر الأطفال الذين تتراوح أعمارهم ما بين 12 و28 شهرا تمتعهم بذاكرة قوية تجاه الأحداث التي مروا بها قبل أربعة أشهر بينما لم يظهر الأطفال في سن 13 شهرا هذه القدرة.

وأن الاحتفاظ بـ(ذاكرة واعية) لفترات طويلة عند الطفل يزداد في العام الثانى، وهذا ما يؤكد الفكرة القائلة بأن نضج الفص الجبهى من الدماغ فى نهاية العام الأول يسهم في تعزيز الذاكرة فى أثناء عامه الثانى.


ان شاء الله اكون افدتك