أخت زوجي تكلم رجل أجنبي هل أخبر عمها ؟
 

السلام عليكم ورحمه الله وبركاته

كل عام وأنتم بخير وعيدكم مبارك

اخواني واخواتي الموضوع واضح من العنوان .. بصراحه أنا اكتشفت بالصدفه من زوجه عمي ,, لاني سافرنا عندهم وحسيت ان البنت الله يستر عليها فيها شي غير طبيعي وسكت والله .. لكن زوجة عمي امس فجاءة قالت فلانه تكلم واحد وانا والله من الفجعه والمصيبه من امس ماجاني النووم وحتى درجه حرارتي مرتفعه من هالمصيبه الي سمعتها .. ومااني عارفه وش اسوي لان والله عمتي الي هي امها وخالي ناس طيبين وماتوقع هالشي يحصل لهم .. وانا خائفه استغفرالله العظيم من الي بعد المكالمات
المهم ان استخرت اني اخبر خالي وهو عمها يصير بنفس الوقت وبصراحه هو تصرفاته عقلانيه وضامنه مليوون بالمئه ماراح يمسني شي انا يعني بطلع منها بس بنفس الوقت خائفه ومتردده

الله يسعدكم ويخليكم ولا يوريكم مكروه في من تعزون وش تنصحوني فيه والإ اتركها ماكأني دريت عن شي ومع اني مااقوى بس بسمع نصائحكم

الله يعينج اختي و يهديك للي فيه المصلحة .. و يستر على اخت زوجج يا رب العالمين

انا اشوف الاحسن انج تكلمين زوجة عمج اللي عرفتي منها الموضوع عشان تتاكدين و تعرفين هي كيف عرفت .. لان لو طلع الموضوع فيه لبس بتكون مصيبة كبيرة

لو تاكدتي ان الموضوع صح كلمي البنت و حاولي تحصلين طريقة تراقبينها .. بس ما انصحج تخبرين ريلج او ام البنت او ابوها .. على الاقل مو الحين ..

بعدين هي البنت كم عمرها؟؟ و كيف تكلمه هل هي تطلع بروحها؟؟ عندها موبايل او تكلمه بالنت؟؟ حاوي تعرفين اكثر عن الموضوع و تتاكدين عشات تقدرين تقررين شو اللي ممكن تسوينه

انا من وجهة نظري انك تكلمين البنت نفسها وتفاتحينها بالموضوع وتحاولين نصيحتها واذا وجتي منها عدم تقبل للنصيحه هدديها بانك بتعلمين عليها ابوها واذا ما اهتمت علمي عليها

والله يعينك على هذي المصيبه

عليكم السلام ورحمة الله وبركاته

كيف شخصية البنت ؟

وكم عمرها ؟

أمها كيف تصرفت معها مادامها عارفه عن بنتها ؟ وكيف عرفت عنها ؟

إذا كانت طيبة مثل أهلها راح تسمعك وأنصحك تكلمينها إنتِ في البداية طبعاً ماأوصيك

كلّميها بهدوء وخوّفيها من الله أولاً وخوفيها من المجتمع وكيف نظرته للبنت وإذا ماسمعت منك

قوليلها أنا لأني أحب لك الخير ماأبي أقول لأحد عنك لكن لو مامشيتي بالطريق الصحيح أنا مضطره

أقول وأتكلم لأني ماأبي أشوفك تغرقين قدامي وأنا ساكتة طبعاً هذا تهديد لها لكن لا تنفذينه

إلا لما خلاص مايبقى في يدك أي حل وإنتبهي تقولين لوالدها ماراح يتحمل الخبر عن بنته

الله يكون في عونك .

السلام عليكم ام البراء ...
نصيحتي اختي لو انا مكانك راح افهمها و اعقلها و انصحها و اذكرها بكلام الله سبحانه و الرسول صلى الله عليه و سلم .. ممكن تفكر في نفسها و تبطل تكلم الشاب .
بعدين الله يجزيكي خير انتي ما شفتيها بعينك ولا سمعتيها بأذنك ولا تصدقي كل شي يقال .. ياريت تتأكدي من الموضوع بطرقتك .. و اذا الموضوع صح افهمي منها ايش اخرتها و نهاية المكالمات و و و و .
وقوليلها لو انو صح يحبك و يبغاكي يجيكي من الباب مو من الشباك .. وياما صارت قصص في حكاية التليفونات هذه . و أذا ما اقتنعت و سوت اللي براسها ساعتها قولي لأبوها بطريقة هادية و عقلانية ولازم يكون معك ادلة واضحه علشان تتكلمي بعين قوية ..
لآن لو ما عندك دليل بكل سهولة راح تكذبك و تبطل تكلم اللي بتكلمو فترة معينه لين تنسو الموضوع و يتأكد الاهل انها بريئة من التهم هذه و تسيري انتي في مكان لا تحسدي عليه ..
و ممكن تتسببي في مشاكل لنفسك و بينك وبين زوجك لأنك في نظرهم " مفسده " اسف على التعبير
وبيقولو عنك كلام عمرك ما راح تسمعيه .. و انتي نيتك الخير ..
نصيحة اخ ياريت تكوني متأكده و يكون معاك دليل او تجيبي شهود علشان تكوني في موقف قوي
وانشاء الله يوفقك لفعل الخير و العمل الصالح
و دمتي بخير

بنت_الحب
اختي زوجة عمي متأكده من هالشي وتقول كشفتها ولمن قلتلها اعترفت وتقول عرضت علي اكلم واحد بعد استغفر الله العظيم

البنت عمرها 19 وهي عندها موبايل


ويعطيك العافيه عزيزتي

o0o0o0o0o0o0se

اخوي انت فهمت غلط الي بخبره مو ابوها عمها ويصير خالي بنفس الوقت

ومادري متردده اقوولها لكن الله يكتب الي فيه الخير والصلاح

تسلم اخوي على مرورك

ابو فيراس

يعطيك العافيه اخوي بس والله متردده وانا بصراحه ماني قويه بهالمواقف

الله يعين يااارب


عزيزتي غـاليــة

بصراحه البنت حبوبه وعسوله لكن في الاوان الاخيره مادري وش صار لها صارت تلبس عبايه مخصره ونقاب الله العالم بحاله وتكشف اكثر ماتستر وانا لمن كلمتها على عباتها قالت ابوي ماتكلم وعادي مافيها شي كل البنات كذا
وصارت انطوائيه وكثير تختفي بغرفتها
وعمرها 19

والي عندها خبر مو امها زوجة عمي انا لانها ساكنه عندهم وبصراحه خفت عليها لان البنت تركت جوالها عندنا صدفه وزوجه عمي فتحت جوالها وطلعت صور للبنت تقول ترسلها للرجل الله المستعان وبصراحه خفت عليها خووف مو طبيعي

وانا بخبر خالي وهو يصير عمي بنفس الوقت بس اغلب الردود مانصحوني بهالشي وراح ابعد

ويعطيك العافيه عزيزتي وياليت تنورينا

ddmm

يعطيك العافيه اخوي وصدقت في كل كلمه قلتها لكن انا انصدمت في البنت وخفت عليها وابي اطلعها من الي فيه

لا حول ولا قوة إلا بالله


وين ابوها وامها عنها

لحظه وداع

والله اهلها موجودين وناس طيبين بدرجه ماتتوقعين لكن مادري هي البنت وش صار لها انا بصراحه مااعرف زميلاتها معرفه اقوول امكن من زميلاتها وماابي اظلم احد واهلها على نياتهم والله احيان تدخل تقول بنام تأخذ تقريبا 15 ساعه واذا ماوصلت 20 وهم يقولون نائمه يعني بالعقل في احد ينام كذا

الله المستعان ويصلحها والله ان خائفه عليها وخائفه اسكت وازيد الطين بله

تسلمين على مرورك ويعطيك العافيه

الله يستر عليها