أنا الغلطانة و لا أهلي ؟
 

السلام عليكم ورحمة الله وبركاته
انا عندي مشكلة وحلها بيد الله وانا اكتب هالموضوع لاسمع رأي الشرع في مشكلتي و للتخفيف عن معاناتي فنفس الوقت
بسم الله،
انا بنت في 23 من عمري من عالية معروفة و ابوي صاحب منصب ،والحمدلله عايشين احسن عيشة..

الحمدلله وانا عمري عشرين وايد خطبوني وكلهم ناس من عوايل محترمة بس هني المشكلة ان ابوي رفضهم كلهم مب عشان عيب فيهم بس ابوي شكله يدور واحد كامل (يعني رفض واحد لان امه من جذور مب عربية و الثاني لان شكله مب حلو و الثالث لان ابوه متزوج ثنتين فاكيد هو مزواج و ....الخ والله مابالغ يرفض لأتفه الاسباب يدور اي عيب عشان يرفض واللي اتقدمولي هذي السنة 7 بس دور فيهم حجة و قال مافي نصيب (مع العلم ان اللي تقدولي كلهم اخلاقهم عالية و ميسورين الحال وشكلهم مقبول وعيال ناس )بس اهلي مايعجبهم شي
ولما اكلم امي بالموضوع تقولي انتي بعدج صغيرة و اوقات تتمصخر علي واوقات تعصب
بس هي مالها كلمه على ابوي وشوره اللي يمشي

واخر واحد تقدملي البارحة
ولد ناس معروفين وتاجر واخلاقه عالية و يخاف الله وبار لامه (بس رفضه طبعا بدون لاياخذ شوري لاني مالي راي) ليش؟لانه ماعنده شهادة جامعية مع العلم ان معاشه اعلى من اللي عندهم شهادات(دخله ماشاالله وايد عالي) و هو يقدر يكمل دراسة )

يمكن انتو تقولون اني 23 وصغيرة بس انا انثى ولي احتياجاتي ابي اشبعها بالحلال وانا خريجة إن شاء الله ليش انتظر اكثر ؟ وليش كلهم انرفضو؟

وين الاهل عن كلام الرسول (ان جاءكم من ترضونه دينه و خلقه فزوجوه)؟؟؟

مع العلم اني استحي ان اطالب ابي بالزواج (ما اتجرأ) بس اقول لامي ومافي فايدة ؟
شو الحل؟
هل اهلي غلطانين بانهم يرفضون بالهبل؟ ولا انا الغلطانة المفروض انتظر لما اوصل الثلاثين و اتزوج؟
ريحوني الله يريح بالكم
يزاكم الله خير
(المهمومة)

يزاكم الله الف خير
بس ابوي رفضه خلاص وما بكذب انا متضايقة و مخنوقة وحاسة اني مابيدي شي وانا البنت الوحيدة ماعندي خوات وامي مب طايعة تسمع مني اي شي يخص الزواج
وطول الليل وانا ادعي لدرجة اني ادعي ربي ان ابوي يشوف ابوه( يدي الله يرحمه ) فالمنام لانه يحبه وايد ويحاول يقنعه لان محد يقدر يقنعه اذا شي براسه بيسويه وبس .والبنت اذا تكلمت يعني قليلة ادب.

وحبيت اسأل مافي حديث عن النبي غير اللي كتبته يلين قلوب الاهل عن الزواج؟ انا سامعة حديث بس مامذكرته عن خطورة ان الاهل يعسرون او الولد مايقدر يزوج والله مب مذكرة
واسمحولي ثقلت عليكم

الله يهديهم
عليك بقيام الليل ولا تيأسين .

اختي الكريمة
يسر الله أمرك ووفقك
اعلم والله شعورك واتفهمه
ولكن قبل أن ابدي رأيي يجب أن تسألي نفسك سؤال هل كتبت الموضوع لتسمعي ما تحبين فقط _يعني مثل عوايد النساء يشتكون عشان يفضفضون بس- والا تبين النصيحة ولو لم تكن على هواك؟
أنا لثقتي بعقلك سأفترض الثانية واليك النصيحة :
هل تعتقدين أن أبيك لا يحبك ولا يريد مصلحتك؟
أم هل تعتقدين أنه - اسمحي لي- سفيه ولا يجيد التصرف وغير مؤتمن على مصلحتك؟
اختي أنا اعلم تماما كما أسلفت لهفتك على الزواج مثل كل البنات لتجتمعي مع رجل يذيقك أنواع الحب ويسيقك الشهد وترزقين منه بأجمل البنين والبنات
هذه هي نظرتك للزواج، ولكن لأبيك نظرة مختلفة وليس شرطا أن يخبرك بكل أسباب رفضه فمثلا هذا الأخير ما أدراك أن ليس له تصرفات غير أخلاقية هل تتوقعين أن أباك يقولك أنه راعي بنات وهالامور
أختي ما أرشدك اليه هو أن تثقي بربك أولا ثم بأبيك وأنه باذن الله لن يضيعك ويعمل لمصلحتك لحكمة يعلمها بخبرته وتجهلينها لشوقك للزواج وصغر سنك النسبي
الجأي الى ربك بالدعاء بأن يوفقك لابن الحلال الذي يتقدم لك ويقبله أبوك
وفقك الله ويسر أمرك

اخي الكريم احترم رأيك بشدة
واذا عن اخلاق الولد ترا الولد صديق عمي (وعمي ما شاء الله اخلاقه عالية وهو نصحني بالموافقة اذا وافق ابوي) معظم اللي خطبوني يكونون اهلي يعرفون اخلاقهم و الناس يمدحونهم.
وانا اذا الريال عليه كلام انا مابيه .انا مابي اتزوج عشان الفستان الابيض و الكلام المعسول الزواج اكبر بوايد بس ابوي يرفض لاسباب تافهه (وماحبيت اذكر الوضوع هذا بس ولد عمي خطبني من سنة و مابغيته لاني اعرف من خواته ان عاق لاهله و عصبي و عنده سوالف بنات) فابوي غصبني اتزوجه وانا مابغيت ولما اصريت بعد بجي وتوسل برر الرفض لعمي ان البنت تبي تكمل دراستها والحين ابوي يقولي كيف ازوجج وشو بقول لاخوي؟ وامي تقول ينتظر ولد عمي يخطب ثانية.
بس انا شو ذنبي ؟ واذا ماخطب او طولت سالفته؟

لاتحزني يااختي نصيبك مابعد جاء واذا الله كاتب لك شى ماراح يرفض والدك