ممكن تفيدوني انا وزوجي
 

مرحبا اعزائي :


اكيد تدرون ان العيشه مع الاطفال ومسئولياتهم تطفش وانا ودي اسافر مع زوجي لوحدنا بس بما ان محد يتحملهم الا امي الله يطول بعمرها راح تتحملهم لمده يومين ؟؟؟ فانا اخترت مع زوجي السفر بالسياره ( يعني نغير شوي وبيني وبينكم
بالسياره واروح البحرين او السعوديه ولا بالطياره وهم معاي لاوربا هههههه ) لذا اعزائي اتمني تنصحوني وين اروح علشان اغير الروتين الملل تنصحوني بالشاليهات او الفنادق ووين الخبر او الدمام او البحرين والله انا في حيره من امري وباقي 4 ايام للموعد ابي مكان رومنسي تكفون دلوني ( انتظر اجاباتكم باحر من الجمر)

بكل بساطه اذا ماتبين تبعدين عن عيالج وايد
فاجئيه انتي واحجزي في فندق
او اذا بتطولين روحي اوروبا امممممم احسن شي ايطاليا وفرنسا بلد الحب
خاصه ان كل المعاريس الجدد يروحون هالبلدان اجوائها ساحره وحلوه

انا انصحك ماتتأخرين على عيالك كثير لان الوالده الله يطول بعمرها بتتعب معاهم
يعني روحي للبحرين والسعوديه زي ماتقولين
الخبر روووعه ووناسه واحجزوا في فندق الميريديان لانه قريب من كل شي ويطل على الكورنيش
والله يسعدكم

إذا بتروحين البحرين روحي المنتجع اللي في جزر حوار أنا بصراحه ما رحته بس يقولون مره رهيب
أما بالنسبه للفنادق ما فيه على الرتز كارلتون مع ان سعره شوي ....... بس يستاهل ;)

بالنسبه للشرقيه فيه شاليهات حلوه في شاطئ الغروب و شاطئ الخليج مدري قرية الخليج و فيه كمان منتجع الهوليدي إن اللي بالهاف مون بالنسبه للفنادق فيه الخليج ميريديان (هذا يطل على واجهة الأمير فيصل بن فهد) و فيه القصيبي كمان حلو

سلام

أفاااااااااااااااااااااااااااااااااااااااااااااااا ااااااااااااااااااااااااااااااااااااااا يامها الكويت ولافكرتي في قطــــــــــر ،،
ترى عندنا فنادق الريتز والانتر و.........الخ ، وجونا هاليومين يجنن مره وعندنا مراكز تسوق كبيرة وراقيه وسينمات ومطاعم والكورنيش اللي وش حلاته والمقاهي اللي على البحر كل هذا وماتبغين تجينا؟؟؟ على العموم الله يسامحك وان فكرتي تجينا بجد والله لحطك في عيوني واطلعك واسهرك انتي وزوجك وطبعاً انا و زوجي.
الله يسعدك ويخلي ايامك كلها عسل بعسل ....

روحي جده لان جــــــــده غير :>

البحرين :)

رتز كارلتون في المنامة

او شالية في منتجع البندر في منطقة سترة


وويك اند سعيد :)

بالكويت وما تدرين وين تروحين ؟!
كل يوم بعد ما تخلصين من عذاب تدريس العيال وبعد ما تعشينهم روحي الممشى ساعة مع ريلج وتمشو .

وبالويك اند حجزي بفندق وقولي لاهلج انج مسافرة مع ريلج وروحوا الفندق وتكونين قريبة من عيالج للطواري لا سمح الله . ونفس الوقت وناسة .

او حجزي بشاليه فيه حمام سباحة ونااااااااااااسة من قلب

والله انا استانس بالكويت اكثر من السفر لدول الخليج صراااحة لان خززززززز وما تاخذين راحتج .

واذا ودج تسافرين روحي مصر والا لبنان . قريب يعني .

ورايي ما تسافرين روحي شاليهات وفنادق وتمشي كل يوم بالاسواق والا على البحر اونس

اشكركم علي الردود :

1- ( شواقي) الله يهديك اولا : انا لي فرصه يومين بس وثانيا اوربا مو ممكن بيومين وتسلم علي الرد.

2- (ايلاف) تسلمي اختي علي الرد بس انا صارلي فتره متزوجه ودايم بالكويت احجز بفنادق بس انا ودي اسافر الخبر مثل ما تفضلتي او الدمام ااو البحرين واتمني شاليهات او منتجعات اتوقع انها رومانسيه اكثر بس المشكله اني دايم اجي الخبر واسكن في الفنادق بس اذا تعرفين منتجعات اذكريلي وشكرا يا قلبي علي الرد.

3- (ملقوفه) اشكرك علي يا قلبي علي الرد .

4- ( الهنوف) والله علي راسي اهل قطر بس والله انا ابي القرب لاني ابروح بسياره وابروح يومين بس ؟؟ بس والله في بالي اني اروح
قطر توها عمتي جايه منها وتمدحها حيل وتقول حتي الاسعار ارخيصه حيل ياليت اتبلغيني باحلي الاماكن المميزه وتسلمين ياعمري.

5- (توته) توني بالصيف كنت في العمره وجيت جده 3 ايام وحيل عجبني محمود سعيد الجديد والنافوره بصراحه حسيت شني في مصر وعلي قولتك جده غير .وتسلمين ياقلبي علي الرد .

6-(سماوه 2) والله امدحولي شاليهات البندر هل هي احلي الشاليهات في البحرين ؟؟؟ وتسلمين علي الرد

7-(ام خالد ) اتصدقين اني زهقانه من الطلعه بالكويت ماشاء الله ما نطلع وهم مليت من الفنادق بالديره ودي اسافر علشان ارتاح شوي والله نفسيتي تعبت بس اذا اتعرفين شاليهات معينه فيها حمامات سباحه تمام للمستقبل هههههههه وتسلمين يا قلبي علي الرد
( في انتظار الرد ) وتسلمو اعزائي

ماقصروا الاخوان والاخوات .. :)


اخوك/hant ( الموقوف )