|
ابغى الحلول
السلام عليكم ورحمة الله وبركاته
ترددت كثير قبل ماأكتب مشكلتي بس ابي لها حل الله يوفقكم ويسخر لكم ازواجكم آميــــــــــــن انا متزوجه من رجل متزوج طبعا ربطتني به علاقة حب قوية اثنا الخطبة والملكة لكن اللي تفاجأت فيه انه تغير كثيررررر بعد الزواج وصار اغلب كلامه اللي كان يقوله لي في فترة الخطوبه والملكة خيال في خيال بعد شهر من زواجي طبعا أنا موظفة لما رجعت من دوامي ولبست له وتكشخت له غسل وجهه ولبس هدومه وطلع لزوجته الأولى طبعا هو جرحني بهالحركة يعني ليته قالي من بدري أنه راح يروح لها كان ماكلفت نفسي حسيت لحظتها أنه كسر في خاطري بقوة لدرجة اني بكيت لحد ما حسيت ان راسي راح يطق من الصداع المهم بعدها بفترة قال لي أنه لازم يعدل بيننا طيب مو مشكلة حبيبي اعدل هذا الشرع وما نقدر نعترض عليه لكن ياجماعة الخير راح يعدل بس في المبيت لكن مصروف ما يعطيني واهي يعطيها البيت هي مسكنها في دور كامل وانا بس غرفتين وحمام الله يعزكم والباقي مشترك مع أهله وين العدل والأمر والأدهى حتى أهله فيهم حقهم قبل شهرين متهاوشه مع أخوه وأخته وحدة غيورة تغار من كل شي لدرجة أنها في أحيان تطق علينا باب غرفتنا آخر الليل عشان طلبات مالها داعي ممكن تتأجل لليوم الثاني لكن الحمد لله انها مو على طول عندنا وامه الله يهديها بس مدري وش اللي يرضيها خصوصا اني حامل وكارهه حتى غرفتي وزوجي وكل اللي حواليني انا قلت له كذا مرة طلعني في بيت لحالي لكنه رافض قلت له عشان الفلوس عادي انا استاجر الشقة واثثها بس اطلع من هالبيت وارتاح من مشاكل اهلك لكن للأسف كلمة لا دايم على لسانه رغم اني ماني مقصرة في حقة بشهادة الجميع وشهادته هو بعد ولو واجهته بسالفة العدل طلع لي مية عذر وعذر يعني بعينه بس ان العدل بالمبيت بس وهو ماخذني بس عشان اريحة اسمعة كلام حب غزل اطبخ له اغسل له انظفة اهديه اصير عبدته لكن اني اطلب منه حقوقي لا وش اسوي المشكلة اني أحبه حيل وهو بعد يحبني وأنا متأكده من كذا لكن ليه مايكمل حقوقي مثل زوجته الأولى مع العلم ان اهله كانوا ساكنين عند زوجته الأولى تقريبا سته اشهر ولما تزوجني جابهم عندي مع انهم يقدرون يطلعون في بيت لحالهم وتكفون ياأخوات ابي حل للغيرة اللي عندي احس ان الغيرة بتقطعني خصوصا لما زوجي يطلع لزوجته الأولى رغم اني احيان اشغل نفسي بأشياء كثيرة لكن في الأخير لابد من الغيرة خصوصا اني في ديرة ثانية بعيده عن أهلي يعني لو كانوا أهلي عندي كان على الأقل رحت عندهم عارفه ان كلامي كثير ومواضيعي اكثر ومشاكلي أكثر واكثر لكن وش اسوي الوحدة تقتلني ولو طلعت لأهل زوجي ماعندهم إلا الحش والنم والعتاب عشان كذا حابسه عمري في غرفتي على طول أختــــــــــــــــــــــــــــــــــكم الحيرانه :29: |
اهلين اختي الحب والحياه
الظاهر انتي ياقلبي متحسسه شوي لانك حامل والحمل يجعل المراه اكثر حساسيه وتدقق على كل شئ وسالفة الغيره انتي عارفه انه متزوج قبل لا ياخذك وهذا امر طبيعي ممكن تزيد الغيره شوي عندك بس لا تخلينها تتعدى الحدود عشان انتي ما تتعبي ولا تقارني نفسك باحد ابد ا واخيرا اقولك الرضا ثم الرضا ثم الرضا بوضعك وما قسمه لك الله واختيارك لزوجك ومعرفة احواله من قبل سوف يجعلك سعيده دائما وان شاء الله بيجي المولود وراح تنشغلي فيه شوي ويتحسن وضعك باذن الله موفقه |
يااختي عجبي من كلامك انتي تزوجتي متزوج يعني لكي النصف فقط لا تطمعي في اكثر
وحكاية البيت الكامل للاولى اكيد عندها اطفال وتحتاج للبيت الاكبر والمصروف الاكثر بالعربي انتي زوجة ثانية ولازم تقدمي تنازلات كثيرة اذا اردتي بقاء زوجك معكي |
ياناس ابنفجر اليوم دريت ان أخت زوجي تتهددني أنها تحط لي حد أو اني اطلع من البيت
من المفروض انه يطلع أنا وإلا أخوها مع اني ماسويت شي كله عشان ما أطلع من غرفتي طيب مالي خلق اطلع من الغرفة ياناس شوفوا لي حل |
اقتباس:
وليس ذلك على الله بعزيز |
اقتباس:
|
اختي بانصحك نصيحه واحد مجرب تبين تكبرين في عينه لا تحسسينه انك تغارين او انك تكرهين زوجته
وحبي اولاده من حبك له راح تكبرين في عينه ويقول هذي اللي تسد مكان امهم |
اختي دامك رضيت بان تكوني زوجة ثانيه تحملي العواقب والمشاكل
لان الزوجة الاولى يكون لها الحنين والشوق اكثر ولازم تتحملين وخاصة انه زوجك يمكن يكون عنده احساس بالذنب تجاه الاولى لذلك يتركك ويذهب اليها تحملي واصبري والله يهدي الجميع |
ياأختي الفاضلة حسيت من كلامك انك عصبية نوعاً ما لا يا أختي لاتخلي الشيطان ينكد حياتك ويفرقك عن الإنسان اللى يحبك ويقدرك وأنتِ متزوجة وعارفة إنك الثانية فليش الغيرة ..؟؟....أنا أعرف المفروض الأولى تغار ...لاتجعلي الغيرة تدمرك وتضيع عليك زوج طيب محب أولاً : لازم تقنعي نفسك إن هذه حياتك وأنتِ وافقتي عليها ولااااازم تكوني عون لزوجك على العدل وتحثيه عليه بالعكس المفروض تحبيه أكثر لإنه عادل وهذا معناه إنه إنسان يخاف الله وماراح يظلمك ودائماً أمدحيه على عدله أما بخصوص السكن ففعلاً الأولى وأم العيال لها الحق في سكن أكبر وأيضاً مصروف أكثر لإن العدل يكون بإعطاء كل زوجة مقدار مايكفيها وأنتِ لست مثلها ثانياً : أهله لابد من حبك لزوجك أن تحبي أهله وتقدريهم وتتجنبي المشاكل أقترح أن تدخلي بطيبتك معهم وابتعدي عن كل مايسبب مشاكل بينكم اجعليهم أهلك وشاركيهم الطبخ وتقديم الحلويات وتحدثي معهم بأطيب الكلام وقدمي لهم الهدايا ليحبك زوجك أكثر وتنشغلي معهم عند غياب زوجك وزوجك أجعلي من ساعات وجوده عندك كأنه عريس وأبسطيه واسعدي معه لاتجعلي الشيطان يدمر حياتك فأنتِ الخاسرة الوحيدة وبإذن الله ستنجبيين وتنشغلي بالطفل ولكن اجعليهم يحبوك ليحبوا طفلك اسأل الله لكم السعادة والتوفيق |
الغاليه
مشكلتج مركبه 0 زوجه ثانيه -بعيد عن اهلها -حامل -ساكنه بيت اهل زوجها -اهل زوجها لا يعاملونها بطيب -زوجها لا يعدل في العطاء المادي -تغار من الاولى الغاليه خذيها حبهحبه -الزوجه الثانيه...مثل ما قالوا الاخوات انتي ماخذه رجل متزوج...لا بد وان تكون حقوقك متناصفه مع الاولى ... -البعد عن الاهل والحمل يخلي الوحده تحس بغره ووحده وحزن...وحساسيه اكثر -السكن بيت الزوج له ضريبه...خاصه اذا انتي كارهه الموضوع من البدايه...هالفتره حاولي تحتوينهم ...وتخلين علاقتج معاهم جيده....هدايا...قعدات .....هم اهلج بالغربه -العطاء المادي من حقج....ابدي فيه خطوه خطوه ...اذا طلعتي السوق خليه هو يدفع...فلوسج حوليها لاهلج بحجة حاجتهم واهم شي اللجوء لله |
| الساعة الآن 06:04 PM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©