|
ارجوكم اقرأو قصتي وساعدوني الله يساعدكم
بسم الله الرحمن الرحيم
اخواني واخواتي اتمنى تساعدوني في مشكلتي اللي سببت تعاستي وحيرتي ....اتمنى تفهموني وتفهمو قصتي وتساعدوني ... ارجوكم... من 4 سنوات اتعرفت على شاب في النت وحبيته وحبني وبعد 3 شهور من الحب اتقدملي وخطبني...وتمت الخطوبه رسمي...وانا اصلا ادرس برا يعني ماني متواجده في السعودية الا في الاجازات تقريبا في السنه مرتين شي زي كذا... المهم...مع الايام والسنوات هو اتغير عليا مرة انا حاولت اخلي نفسي زي ماانا مااتغير عشان احافظ على اللي بيننا...صار مايسأل ولا يتصل.. ومايعاملني زي زمان..انا مااقدر اقول انه خانني ولا اقدر اقول صار عنده شي جديد..ولا اقدر احكم بشي لاني متاكدة انه يحبني موت لكن الي اثر فيه اني بعيده عنه ودايما كان يقولي ارجعي...هو دراسته اقل من دراستي.. وكثير قالولي انه راح يتعبك عشان فرق التعليم ..انا اتغاضيت عن هذا الموضوع برضو... قبل سنه هو زاد تغيره عليا لين خلاني ابرد وصار اللي بقلبي شي عادي مرة او بالاصح اتجمد...مايسال ولا يدري عني بحجة احواله شويه مزنقه عليه وكدة انا برضو حاولت اتحمل لكن هو مرة زاد لين انا بعدت عنه بدون لا احس كنت كل يوم انا اكلمه واتصل واسال وارسل واخلص فلوسي على التلفون وانا في غربه وهو اللي عند اهله ماكان يسال عليا... بعد ماقعد فترة قاطعني...جا يحاول يرجعلي وكنت ابردت خلاص صرت مااحس شي ناحيته ولا اتأثر مع العلم ان كان يتقدمو ناس احسن في كل شي بس كنت ارفض لاني مخطوبتله....وزادت المشاكل بيننا هومومرة واثق فيني لانه يعرف اني قبله كنت اعرف واحد وانا اللي حكيتله عشان مااكون خبيت عليه وصار أي مشكله بيننا يفتحلي الموضوع... بيني وبينكم انا كبرت وعقلي وتفكيري كبر معايا وصرت افكر بعقلي قبل قلبي وشفت اني راح اكون مظلومة لانه مستحيل شاب سعودي وعقليته زي عقلية خطيبي ينسى موضوع زي كذا بدليل ان كل ماتصير مشكله بيننا يفتح الموضوع هذا وانا مخطوبتله اجل كيف لمن اصير زوجته...اكيد راح تجيني مشاكل اكبر ...مع اختلافات كثيره بيننا...ناس كثير رفضتهم وضحيت بس عشان ارتبط فيه وانا متاكدة وميقنه اني راح اعيش في مشاكل كبيرة.... في الوقت اللي مطنشني فيه جا شاب على مستوى عالي من التعليم وابن ناس ومن نفس المدينه اللي انا فيها لان خطيبي مو من نفس مدينتي.. وطيب مرة وانا سألت عليه وهو بصراحه ابن حلال.... كلمت اهلي وقلت لهم ابغى افسخ خطوبتي لاني ماني مستفيده منها شي غير اني معلقه وهو مو سائل فيني... اللي صار... وهنا بدأت اموت... ان هو حس اني ابغى اتركه...قام يحاول يرجع ويحاول يحنن قلبي عليه ويحاول يعنذر واهله يكلمو اهلي يحاولو يتقربو اكثر وانا والله كألأنه شي سحرني وخلاني ابرد كذا....حاولت اضغط على نفسي...غيرت رقم تلفوني ماصار يقدر يوصلي ...لييين امس..امه اتصلت على ماما تسال عننا وعني بالذات لاني متغيره على ولدها فماما صدمتها وقالتلها كل شي نصيب يعني نفركش,الام صارت تبكي من كثر ماهي خايفه على ولدها ايش راح صير فيه لمن يعرف...انا هذي اللحظه قلبي اتحرك وجاني انهيار مو طبيعي صرت ماني متخيله كيف انا راح اجرحه واسوي فيه كذا ...بيني وبينكم انا نسيت كل اللي سواه فيني ولين اليوم احبه وخايفه عليه مني ومن الصدمه اللي بتجيه من ورايه ....حتقولو طيب ليش هذا كله ارجعيله.....هنا المشكله اني مااقدر ارجع لاني متاكده من المشاكل اللي راح تجي في المستقبل...وانا دحين بين نارين من جد ....ياأني اقبل اتزوجه واكمل معاه واعيش في مشاكل مع الماضي واضحي بالانسان الثاني اللي يبغاني..او اني ادعس قلبي واخليه يتعذب وارتبط باللي احسن منه..طبعا اختيار قلبي لو اني اخترت ارجع واختيار عقلي لو اخذت الثاني... انا ماني قادرة اتخذ أي قرار ماني قادرة اسوي شي اعوذبالله احس كاني مربوطة ماني قادرة افك ولا قادرة افكر كل همي اني خايفه عليه من الصدمه ومن العذاب انا كنت في حياته شي مرة حلو وحلم مرة حلو وهو كان في حياتي نفس الشي لكن حياتي معاه صعبه...لو تركته راح اعيش عذاب الضمير طول حياتي لاني اعرف كيف متعلق فيني....والثاني المسكين متعلق وخايف اتركه في أي لحظة وانا والله العظيم مخي انشل عن التفكير ماصرت عارفه اقول لمين او استشير مين غير ربي كل يوم اصلي استخارة بي مااشوف شي تعبت من جد وماما وبابا يقولولي هذي حياتك احنا مانجبرك اللي تبغيه تاخذيه بأختيارك..... ارجوكم انصحوني دلوني قولولي ايش اسوي فين الصح...اعيش بعذاب ولا اعيش براحه ....اعتبر نفسي ارتكبت جريمة قتل في حقه لو تركته ...واعتبر اني ارتكبت جريمة انتحار في حق نفسي لو اخذته....ارجوكم ساعدوني والله النوم مااعرفه...خايفه على دراستي تتأثر انا دراستي صعبه ومو بالساهل وصلت للمرحله الدراسيه اللي انا فيها.... الله لا يحير احد انشالله.....الله يسعدكم اختكم الحيرانه :( |
أنا أرى يا أختي إنك تتركيه لأنه إذا وأنتم في البداية وفي بينكم أشياء غلط أكيد حتصعب عليكم الحياة فيما بعد خصوصا الحياة الزوجية صعبة إلا على اللي ربي يوفقهم
أضغطي على نفسك واتخذي القرار واتركيه من الأول أحسن لك صحيح هو غالي عليك بس ما حيكون أغلى من نفسك عليك لو بكرة النهار عاملك بسوء وحبيت تتركيه راح يسويلك نفس الشيء وأنه هو نادم وحتعيشي لا سمح الله في دوامة معاه هذا لو ما تركك معلقة وسوى هو اللي في راسه وعلى فكرة في واحد في عائلتنا اتعرف على واحدة عربية في الخارج وانزوجوا زواج اسطوري زي ما يقولوا هنا في السعودية وبعد حوالي 10 سنين زواج وبعد ما خلفوا طلقها لأنه يقول ماني قادر أثق فيها رغم إني ماشفت عليها شي بطال إيش رأيك ؟؟ إذا عندك أي سؤال أسألي أنا في انتظار ردك |
من جد مررررررة اشكرك على مشاركتك ورأيك..
طيب انا كذا مااكون ظلمته؟؟لانه لسا يحبني ومنحطم من قبل لايدري اني راح اسيبه؟؟ عادي اكسر قلب انسان عشان انا اعيش سعيده؟؟ كثير قالولي ادعسي قلبك عشان نفسك مشكلتي انا ابدي الناس عليا واضحي بنفسي عشان الناس وهذا اللي دحين انا خايفه منه كل خوفي عليه ...كان عنده كانسر بعد الشر عليك انشالله ...وخايفه يرجعله بسببي..واهله يحبوني مرة وربطو كل شي عندهم فيني معتبريينني زوجته خلاص :( |
أنا قبل ما أتزوج كنت مخطوبة لواحد وكنت أحس أنه يحبني بجنون وبعد إرتباط 3 سنين قاللي معليش ماني قادر أتزوجك مع أني حست قبلها بإهمال منه زي حكايتك بالضبط وكنت انا اتصل به وهو مايتصل مع إننا في مدينة واحدة وبعدين صرت أنا كمان ماأكلمه وبعدها بكم شهر صار اللي صار ومن بعدها صرت أشوف أنه الأفضل للواحد أنه مايبدي أحد على نفسه هذه هي طبيعة البشر إيش نبغى نسوي وأنا أشوف أنك تقولي لوالدك ووالدتك اللي تبغي يسير وهم يتصرفوا بمعرفتهم وبحكم سنهم أكيد حيتصرفوا صح والله يختار لك اللي فيه الخير
|
طبعا الحب شئ كبيرجدا ولكن هناك حب و هناك زواج....
المهم اول خطوة يا اختي هي صلاة الاستخارة.... اما الشئ التاني...الحياة مش كلها حلوة . يعني توافقي عليه و بينكم شك ولو نصف في المية صديقيني بعد الزواج راح يزيد وبعدها تصير مشكلة معقدة اكثر ويمكن تؤدي الى طلاق ...يعني راح يكون اسمك مطلقة (واحنى عارفين نظرة المجتمع للااسف مش كويسة للاخواتي المطلقات) و غير اذا كان هناك اطفال...فكري الي المدى البعيد ....والزمن كفيل بالنسيان....نحن معشر الرجال بسرعة ننسى مش مثل النساء(الله يعينهم) ...يعني يزعل شوية ...يتحطم والبيت ما انبنى احسن من انو تحطمو عمارة و عائلة باكملها..... واخيرا يا اختي العزيزة عليك بصلاة الاستخارة فالله سبحانه افضل مساعد لنا ...والله اعلم |
اختي انتي غلطانه لانك قلتي له معرفتك بالشاب والوحده المفروض ماتقول شي عن ماضيها ابدا للرجل
لانه ماراح يتقبل هالشي وانا انصحك انك تبتعدين عنه لان لو كان يحبك ماتركك ولا دقيقه الا كلمك فيها وماتركك كل هالفتره والله يوفقك ويسعدك تقبلي تحياتي |
اختي الكريمة
لقد قمت بالاستشارة وعليك بالاستخارة وعن نفسي ارى ان تبتعدي عنه وانتما لم تتزوجا بعد تجنبا لما قد يحدث من مشكلات بعد الزواج وبعدين من اكبر الخطأ ان المرأة على وجه الخصوص تتكلم عن معرفتها بآخر وخاصة لمن خطبها |
اختي الغاليه : مابالك تتأرجحين بين اليمين وبين الشمال
ارى انك حساسه وعاطفيه بدرجه كبيره وهذا النوع من النساء يتعب كثير في حياته لأن الحياه غاليتي اكبر بكثير من العواطف لما فيها من امور اخرى تحتاج ان تكون مهمه في حياتنا ورأي لك ان تتبعي عقلك وتختاري الثاني وبالنسبه للأول فلا تخافي عليه لن يموت بعدك فالأنسان من طبعه النسيان وهذه نعمه الله علينا لكي تسير الحياه فهي لن تقف عند شخص واحد ونصيحتي هذه عن تجارب كثيره فأنا كنت اعرف انسان احببته بكل جوارحي وكنت اشعر بأن الحياه من دونه لا شيئ ولم اتخيل حياتي يوم من دونه ولكن ما حدث انه كان مايزال امامه مشوار ليستطيع ان يتقدم لي وفي نفس الوقت كان هناك الشخص الجاهز والمتقدم شعرت بنهاية الحياه ولكن بعد الزواج اختلفت النظره لأن هناك الحب الاعظم والاكبر والحقيقي هو حب الزوج رب البيت وابو الابناء فهو اعظم من اي حب في العالم وهو يزداد يوم عن الاخر لما في هذه الحياه من تغيرات . صدقيني عزيزتي ماسوف يربطك بزوجك اعظم واكبر مما تتصورين وأسألي مجرب اتمنى التوفيق واسفه على الاطاله وبلغينا عن اخبارك |
اختي الغالية .
انا اوافقهم الراي ، ما عليكي الا والاستخارة وتوكلي على رب العالمين واتمنا لكي حياه سعيده اختك نونو الحلوه |
بسم الله
ماشاء الله الأخوة قدموا الحلول العملية من استخارة واستشارة واتخاذ قرارات عقلية غير عاطفية حازمة والحزم مطلوب وأرى أنك غير واقعة في مشكلة ، أنت مشكلتك خفيفة المشكلة للشاب وليست لك إذا كان فعلا صادقا وهذا أمره سهل ، ولا بد من الإيمان والرضا والقبول بالنصيب لكما والله الموفق والله تعالى أعلم . أخوكم المحب الناصح أبو همام |
| الساعة الآن 10:22 PM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©