منتدى عالم الأسرة والمجتمع - يوم لايمكن نسـيانه في حيـاتي / انـخـطبت ولكن

السلام عليكم ورحمه الله وبركاته

صبـــــــاح الخــير \ مــساء الخير

امس كان يوم مميز عندي:22: بحاجات كثيرة

بحاجات اول مرة احسها :24:

يوم اتذكر امس مادري اضحك على نفسي:d

والا ابكي على خيبتي وتفكيري الاعوج:29:

ويمكن حتى انا مالي دخل :d <<<<<ابغى ابرر لنفسي الموقف

يمكن الناس والمجتمع هم الى لهم الدخل هم سبب تفكيري امس

انا بقولكم الى صار وانتم احكموا :23:

كان يامكان
حكايه غموض والاحلام

يوم صااااااااار امس المغرب ناداني ابوي

قالي / ترى فيه رجال يبغى يجيني افتحوا الباب له
قلت انا / من هو يبه :d
قال ابوي / فلان عمك <<<ابوي الله يصلحه كل واحد من عيلته يقول عمك وهو اصلا مايقربني:17:

انا يوم قال كذا صرت :24: :24: كذا

تتوقعون ليش

هاة توقعتوا:26:

قلت بيني وبين نفسي والفرحه ماهي سيعتني الدنيا من كبرها

خلاص ياغموض فرجت :d ربي ولك الحمد هذا اكيد جاي يخطبني انا واختي الكبيرة لعياله :14:
لان هو ماشاء الله عندة ولدين كبار على وجه زواج ومن فترة سمعت خالتهم تقول يبغون يزوجونهم

انا هنا صنمت قدام ابوي وقلبي يطقطق :24: من الفرحه

وابوي منهبل مني شافني جالسه اتبسم مايدري وش السالفه

ويمكن بعد داري اني احسبه جاي يخطب ومستانسه :( بس مايبغى يبين لي عشان مايحرجني
ابووووي واعرفه اكثر مااعرف نفسي

المهم ماعلينا

قلت ابشر يبه الحين نجيب القهوة <<<مستعدة الاخت :d

وطيارة لامي تقل خبله اركض

انا / يمه عمي <<<<على طول خليته عمي ماعندي وقت :17: مع اني من قبل اشوي اضحك على ابوي انه يقول عمك دنيا غريبه مسرع ماغيرت رايي

امي / من هو عمك

قلت لها / عمي فلان

امي شكلتها بعد استانست المسكينه :30:

كلنا والله استانسنا انا وخواتي قلنا اكيد جااااااااااااااي يخطبنا والفرحه باينه بعيوننا

طبعا هذي كل وحدة من خواتي بينها وبين نفسها تقول هالكلام تعرفون مستحياااااااات من بعض

تدرون ليش

لان عند اغلب العوايل

ويمكن عرف عند اكثر القبايل ان الى يجي المغرب يعني مابين الصلاتين المغرب والعشاء يخطبون :d
مادري عندكم انتم كذا والا بس عندنا

المهم وجهي انا واختي الكبيرة صار كذا :o :o

اتخيل لو ابوي جاء يسالنا عن راينا وش نقول لابوي موافقات والا لا :25:

نقول موافقات على طول من الفرحه :d <<<اعذروني ماعمري حسيت بالاحساس هذا :( ماعمر احد جاء خطبنااااااااااااااااا انا واختي الكبيرة شريكتي بالمعاناة :d
ماعمرنا حسينا بالخطبه وتفكيرها وشعورها
بقولكم شي لاول مرة اقوله لحد تصدقون نفسي اصلي صلاة استخاااااااارة عشان خطبه وزواج مثل ماشاء الله اغلب البنات
نفسي استشير احد بالخطبه واقول فلان خطبني فلان طلب يدي واشاور واستشير :d <<<رحت لبعيد برا الموضوع

المهم خلوني اكملكم سالفه خطبتي

خذيت اشوي وانا كل اشوي ارفع عيوني للباب :18:

اشوف انفتح والا لا

اشوف احد طلع منه والا لا

عشان يعطينا خبر الخطبه :eek: :eek:

صار هالباب عندي مثل سفينه النجاة الى انتظر فيها من سنين

انتظرها تجي وتنقذني من الى انا فيه <<<<الحمدلله حمدا كثيرا طيبا مباركا

بهالحظات القليله هذي عشت عمر بحاله :d من الحلم والخيال والاحلام الجميله :25:

عشت فترة الخطوبه لحظه بالحظه :14:

افكر كيف اذا زعل اراضيه :11:

صرت افكر بالطبخ ياربي وش اعمل له انا صراحه ماحب الطبخ كثير

قلت ياربي اخاف طبخي مايعجبه :11:

حتى اسماء عيالنا اسم ابوهم بيني وبينكم مو حلو :d

قلت ياربي اصير ام 0000000:11: مو حلو لكن قلت يالله ماعليه كل هذا يهون عشان ابو الشباب

برضوة هو ابوة ولازم اسمي عليه حتى لو ماكان اسمه حلو كافي انه جاء يخطبني لولدة :d

الله يكثر خيرة المفروض اسمي الاول على اسمه والثاني والثالث مو هو بعد الله اختارني زوجه لولدة :d

وش اقول وش اخلي من الافكار الى دارت براسي بهالحظات القليله

صحيت من احلامي على فتحت الباب عرفت انه الرجال راح او بالاصح بتلك الحظات ابو زوجي راح

قلت اوووووووووف اخيرا مابغى يخلص خطبه

افففففف اشوى الحمدلله مو كل يوم ننخطب

اذا طول كل هالتطويله بس عشان خطبه وهو يعرفنا وحنا نعرفهم يعني من نفس العيله

اجل كيف خطبه الغرب الى مايعرفون بعض الله يعنهم

المهم ماعلينا خليك ياغموض بخطبتك وش لك بخطبه الغرب

جلست استنى احد يدخل علي يستشيرني

جلست قلت يمكن يتشاورون بالموضوع

لازم هذا مو لعبه زواج

مصير عمر بحاله عشرة عمر

دقيقتين مرت نص ساعه مرت ساعه مرت ماشفت احد فاتح الموضوع معانا

قلت يابنت مايبغالها اسال واشوف وش الموضوع رحت لابوي

قلت / يبه وش يبغى عمي 000000 وانا وجهي كذا:o من الحياء

بس استنى الرد

استنى بالكلمه الى جلست مدة طويله انتظرها

ياما ايام جلست افكر فيها طول الليل

ياما حلمت بهالكلام ايام كثيرة

جاء يخطبك

لكن المفاجاءة

والمفاجاءة الى ماكنت متوقعتها نهائي

والا حطيت واحد بالميه ان جاي عشانها

تتوقعون ليش جاااااااااااااااااااااي

:d

جاء عشان يعالج يد ابوي فيه جرح بسيط :18: لان ابوي فيه السكر خايف عليه

الله يرحم امأ جابتك ياعمي ابو 00000

صدق انك جاي تخدم ابوي وعامل نفسك دكتور عندة :d

والله يجزاك خير ويرزقك من حيث لاتحتسب على قلبك الكبير وحنيتك على ابوي

لكن ماتدري وش عملتي فيني بالزيااااااااااااااااارة البسيطه

يمكن انت عندك زيارة عاديه واخذت منها اجر كبير باذن الله

لكن

ماتدري وش خليتني احلم بالزيارة

ماتدري وش كثر فتحت جروح مسكرة عندي

صحيح عالجت جرح بسيط بيد ابوي

لكن فتحت جرح بقلبي كبير

الله يعين بس

السؤال الحين من الغلطان انا:29: لان تفكيري راح على طول لخطبه

والا المجتمع لان عاداتنا الى يجي المغرب خاطب

بالله مو موقف يضحك ويبكي بنفس الوقت

بس

بس ماقلتلكم يوم مميز اليوم الحمدلله :d دخلت المنتدى وانا مايحتاج اكتبلكم شعوري
دخلت والله اعلم وشلون النفسيه بعد ماعرفت سبب الزيارة الغريبه لعمي العزيز

دخلت لكن الحمدلله لقيت خبر روعه ماشاء الله :d كتب كتاب اختي وحبيبتي العام ربي ولك الحمد الله يسعدها ويوفقها ويعوض صبرها خير يارب :14:

رجعت ماشاء الله

لااله الا الله النفسيه عال العااااااااااااااااااال

كان خبر كتب كتابها :17: ميزان ضرب على اعلى شي بعد مكان نازل لاخر شي

الحمدلله الحمدلله

الفرج قريب باذن الله :23:

اسفه طولت عليكم

لكن حبيت اقولكم ان امس كان يوم مميز بالنسبه لي <<<<لانكم صرتوا عيلتي الثانيه

يوم راح اسطر بدفتر حياتي

يوم لايمكن نسيانه

لاني حسيت بااحساس جديد على وهو اول مرة احس فيه

تدرون وشلون عامل احساسي امس

يقولك الشى الاول مرة بحياتك يصيرلك لايمكن تنسين يومه والا احساسه سواء احساس زين او شين

مثل البنت الى اول مرة تصير ام تقدر تنسى هذا الاحساس وهذا اليوم مستحيل

صدق يوم لايمكن نسيانه بحياتي :d :d