منتدى عالم الأسرة والمجتمع

الله يعينها بالصراحه مافيه شيء اعظم من النساه و الوحم
الله يسهل عليها بصراحه
شوفي اختي انا بعطيك الأشياء اللي استفدت منها و انا حامل و ان شاء الله تستفيد اختك منها مع العلم اني قريت هالأشياء في كتب او في بعض المنتديات من تجارب الأخوات
1- اول ما تجلس من النوم قبل لا تقوم من السرير تاكل بسكوته مالحه بتخفف عليها وحم الصباح اللي هو اعظم شيء
2- انا شخصياً جربت ان يكون الكورن فليكس (العادي مو بسكر) دايماً بإيدي يعـــني مثلاً قبل وجبة الفطوراو اي وجبه اجلس آكل منه و بوقت الوجبه يكون مزاجي معقول و اقدر آكل . او لمن بروح مطعم قبل لا اروح و بالمشوار اجلس آكل منه لين ما اوصل و بعدين اقدر آكل من غير لوعه.
3- السفن آب انا نفع معي يعني كان يخفف اللوعه شوي ولو ان بعض الأطباء ما ينصحون بالغازيات لكن في اطباء ينصحون بالسفن آب بعد ...!!
4- الليمون الحامض يساعد على تخفيف الغثيان .. واذا ما خففها لمن ترجع وانتي بكرامه يكون بسهوله يعني ما تحس بحراره وقت الترجيع ولا طعم الترجيع بعد ما تخلص.
5- تبتعد عن الحمصات و الأشياء الدسمه و المبهره وايد و بعد بدال ما تاكل 3 وجبات كبيره باليوم تصير تاكل 5 او 6 خفيفه
6- لمن تجي لها اللوعه تنام على ظهرها و تاخذ شهيق و زفير و تحاول تنسى الموضوع شوي و تاكل بسكوته مالحه
7- انا كنت ارجع علشان ارتاح حتى لو اضطر ان احط صبعي في فمي لإن بعد الترجيع اقدر آكل طبيعي و نفسيتي تتغير للأحسن لمده كم ساعه فـنصيحتي لها انها ما تمنع الترجيع لإن هذا يخلي اللوعه دائمه معاها يعني اذا حست انها بترجع مو تسكت و تحاول انها ما ترجع لا تروح ترجع و ترتاح
8- يقولون التفاحه على الريق تخفف اللوعه (بس انا ما اتحمل التفاح وقت الحمل فما اقدر افتي فيه)
9- بعد الموز يمدحون فيه بس اهم شيء ما يسبب لها إمساك

ع العموم ترى وايد زين اذا هي تاكل فواكه و خضروات و حليب لإني ما كنت آكل ولا حتى اتحمل الحليب يعني الحمدلله ان عندها فيتامينات و كالسيوم
بس لا تحاتي الجنين لإني سمعت طبيب يقول ان الجنين اول ثلاث شهور يسحب العناصر اللي يحتاجها من دم امه يعني هي اللي بتتعب اذا ما أكلت شيء و ان شاء الله الجنين مافيه الا العافيه بس اكيد لازم تاكل و تتغذى زين

بالصراحه هذا اللي تذكرته و اذا تذكرت شيء ثاني بأرجع اقول لك
الله يسهل عليها