زوجى يخونى هل اتركة ام ستمر معة ؟
 

السلام عليكم ورحمة الله وبركاته

انا عندي مشكلة كبيرة ارجو منكم مساعدتي وحلها لي انا متزوجة من 18سنة
من 4سنوات اكتشفت ان زوجي على علاقة بوحدة ... ولما واجهتة انكر وبعدين اعتذر وطلب السماح وسامحتة بعد سنه اكتشفت انة يكلم وحدة ... أخرى ونفس المأساة طلب السماح وجلس يبكي عند رجولي ويقول انة ما يقدر يعيش من غيري لما شافني لميت اغراضي وانة يحبني وما رح يعيدها وحلفلي المهم قبل شهر لقيتة يكلم وحدة ... أخرى وما كفاة المكالمة لا يصرف عليها بعد ويدفع لها ايجار بيتها في ..... يعني استغلتة مزبوط لانة مخفة المهم صار نفس السيناريو ابي حل اتركة ولا استمر واطنش عشان اولادي مع العلم انهم 4 واجلس لاولادي وهو بالطقاق الله لا يرده وهذا لا يعني اني ما احبة بالعكس بس خلاص تعبت

الاشراف : الرجاء عدم التصريح بذكر بلدان معينة ..

الاشراف / تم تغير العنوان بما هو مناسب للمضمون

السلام عليكم
حبيبتي هذا مو حل انك تتركين زوجك وابو عيالك لاي من هالدخيلات
واحمدي ربك انو مايحب وحده معينه يعني الواضح انو يحب اللعب بس ويهتم لمشاعرك
لازم تسوين هالنقاط صدقيني راح يرجعلك
1-ادعي الله انو يسخره لك ويجعلك دانه في عينه
2-شوفي ايش ناقصك والله صدقيني الرجل يفرح باي تغير من المراءه حاولي تجددي حياتك معاه كل يوم بشكل واسلوب
3-حاولي تلعبين فيه زي مايلعب فيك بس انتبهي من انو يشك فيك مو قصدي تسوين الي يسويه لا قصدي اعملي نفسك مشغوله بشي وهو مو اكبر اهتماماتك الرجال يموتون بالي يطنشهم يعني شدي وارخي
حاولي صحيح راح تتعبين بس الموضوع يستحق التعب
وربي يسخرهم لنا

مشكورين حبايبي عنادية وحب الطفولة الله لا يحرمني منكم على هالتفاعل مع قصتي وارجو منكم الدعاء لي وابيكم ما تحرموني من نصايحكم لأني فعلا مثل الغريق الي يدور نجاته

بنات اي وحدة مرت في الي انا مريت فيه وتصرفت صح تقولي وش سوت انا بسوي مثل ما قالولي عنادية وحب الطفولة الله لا يوريهم مكروه بس ابي اعرف احد مر بتجربه مثلي وش سوى اكيد الدنيا مليانه خونه مثل عينة الأخ الي عندي انا ماني عارفه اتعامل معاه لأني شاكه في كل تصرف يتصرفه مع العلم انه ما يقدر يجلس في البيت من بعد المغرب لازم يطلع يسهر مع اصحابه ممكن يرجع بدري بس مستحيل يفوت الطلعه واذا قلتله اجلس الليله قال لازم اروح عشان اشيش ما اصبر من الشيشه مع العلم انه لما يمرض يجلس بالأسبوع العشرة ايام ما يدور عليها يعني احس انها حجه عشان يطلع رغم اني مخليته على راحته لأنه لوجلس غصب لازم يسوي هو شه في البيت مستحيل تمر بسلام ............اعتبروني اخت لكم واعطوني حلول لهالشخصيه المريضه لأني فعلا اعتبره مريض نفسي انا في مشكلة حقيقية ارجو المساعدة ..

مالك الا الصبر والاحتساب والمناصحة ياأختي...خصوصا بعد هذي العشرة الطويلة واحذري احذري احذري أن تتركي له البيت لأن هذا الإجراء سيزيد المشكلة تعقيدا ..من الواضح أن زوجك لديه قلة وازع ديني مع تأثر شديد بأصحاب السوء والله المستعان ..لذلك عليك ان تحلي هذي الاشكالية من هذا الجانب أهديه شريط ديني كتاب روحي وياه لمحاضرة منتقاه احسني التعامل معه بيني له أن هذي الامور لا تليق بمسلم ناضج في سنه وعمره ..هو لا يبحث عن عاطفة بقدر مايبحث عن شهوة عارضة يزينها له ابليس ...استمري في نصحه وأظهري له الحزم والشدة مع الشفقة لحاله ...وأدعي له وأخبريه بذلك ....الله يصلح الأحوال..ويوفقك لما يحب ويرضى ويسخره لك ويجمع بينكم بخير ..

عليكم السلام ورحمة الله وبركاته

عفواً .. هنا المكان المناسب للمشكلة .

الله يهدي زوجك واصبري ان شاء الله يقدر صبرك وحفاظك على اسرتك

اختي لا تتركين بيتك

ادعي لزوجك والحي بالدعاء

وحاولي انك تساعدينه انه يبتعد عن هالطريق

الله يجعل زوجك قرة عين لك ويجعلك قرة عين لزوجك

ويرزقكم بر أبناءكم

ربنا يهديلك زوجك ان شاء الله ويقوى ايمانك وثقى دايما ان الله معك