هل الرجل يعاني نفسياً بعد الطلاق ؟نقاش جاد
 

السلام عليكم ورحمة الله
لدي سؤال وأتمنى من كل أعضاء المنتدى يشاركون فيه بكل صراحة .....
من المعلوم أن المرأة هي أكبر من يعاني من الطلاق فهو كما قال المصطفى صلى الله عليه وسلم (.....وكسرها طلاقها )
لكن سؤالي هل الرجل يتأثر نفسياً بعد أن يطلق زوجته ؟ وخاصة إذا كانت طيبة معه وحفظته في ماله وبيته ؟وظلمها بالطلاق مع أنها جمعت الخصال الأربع التي قال عنها الرسول صلى الله عليه وسلم ( الحسب والمال والجمال والدين )
هل سيظل يتذكرها حتى لوتزوج أخرى ؟
أرجو من كل رجل مر بتجربه مماثلة يعطيني رأيه بصراحة
وسؤالي أيضا كيف يمكن للمرأة أن تنسى أن هذا الرجل أدخلها عالم المطلقات دونما ذنب منها ؟

يالله من أمس منزله هالموضوع وماأحد تفاعل معه ورد عليه
معقولة ياجماعة ماتردون
عشاني عضوه جديدة ماراح تفيدوني بخبرتكم
وأنا كنت ناويه أكتب القصة كاملة لأن فيها عظة وعبره لكل الناس
وين تفاعلكم المعهود ؟؟؟؟؟؟؟؟؟؟؟؟؟؟؟؟

لست مطلق
ولكن اتوقع والله اعلم
اذا كان مجبور على الطلاق من طرف الزوجة يتألم او كان بسبب سحر او عين ولكن اذا كان بيده ما اتوقع لان العصمة بيده ما اعتقد في احد
بيطلق زوجته ويفرط فيها الا وهو كارهها

والله اختي بعضهم ولا شئ..


عادي كانه رامي اي شئ رخيص عنده..


خصوصا اذا كان متزوج قبلها.. ويحب زوجته الاولية ورجع خطبها ووافقت..


والله اعرف وحده تزوجها تحدي لبنت عمه.. ولما رضت عليه طلق هذي البنت بدون سبب.. وخلها هي وولدها..

ووحده تقول جابني زيارة لبيت اهلي.. وتقول يوم الخميس دخل اخوي متغير وجهه.. ومرت اخوي تبكي.. سألتهم ايش فيكم.. تقول هو كان زوجها بيرجع للرياض.. تقول اكيد فلان صار له حادث.. تقول تفاجأت انه عطى اخوي ورقة الطلاق.. تقولي لين اليوم ما ادري على اي اساس طلقني...

ووحده لما طلقها وهي بحايل.. تقول اخذنا من الرياض لحايل وطول الوقت ساكت ما يتكلم.. تقول وقفنا بمطعم ناكل وهو ساكت ما يتكلم.. نزلت عند بيت اهلي.. تقول تفاجأت الاهو مطلقني.. اتصلت عليه تقوليه ليش قالها انا طلقتك يعني رجل اجنبي عنك..لا تكلميني!!!!


اذا فيه سبب ممكن يتأثر بس اذا شبعان يطلقها وهو فرحان يفتك منها...

وانا مع اخواتي..اذا هو راغب بالطلاق وبدون اسباب فأكيد راح يرتاح

الا يمكن يقول هم وانزاح...ليشوف حياته من جديد

وزي ماقلت اختي دلوعة ومنحوسة..ياكثر من يطلق وبدون اسباب..وهذي الي صدق تكسر قلب المرأه يمكن حتى تسبب لها عقده من الرجال كلهم ..

انا اعرف قريبة لي زوجها كان يحب وحدة قبل يتزوجها وابوها كان رافضة وتزوج قريبتي

وبعد سنتين توفى ابو الي يحبها وعلى طول تطلقت واتصلت علية وقالت له ابوي مات وانا تطلقت

وبكل سهولة وفي نفس اليوم راح وصلها بيت اهلها قالها انت طالق وكانت حامل بعد في شهرها السابع

ماراعى حتى نفسيتها بالحمل... بالله هذا راح يـاثر نفسيا بالطلاق اكيد مثل هالاشكال عمرة ماتأثر فيه شعره

اما اذا كان سحر او عين يعني شي غصب عنهم اكيد بيكون التأثير اكبر واكبر (وانا واحدة منهم)

الله يحمي الجميع من شر كل شيطان وانس وجان...ومن شر حاسدا اذا حسد

* يارب ان كان رزقي في السماء ..انزله
وان كان رزقي في الأرض..اخرجة
وان كان رزقي بعيدا..قربه
وان كان رزقي قليلا..كثرة
وان كان رزقي قريبا..يسرة
يارب يسر ولاتعسر (ان مع العسر يسرا)

عن نفسي طلقني اكثر من مره على اشياء تافهه ويقول يحبني مادري شلون تصير!!

انقهرت اول مره طلقني لكن ثاني مره كان قهري اخف لاني يمكن طابت نفسي او مليت او جتني مناعه رغم اني احبه حتى بطبعه الشين لاني حاطه في بالي مافيه احد كامل سواء هو او غيره كل رجل في عيوب وجالسه معه على الحلوه والمره لكن الظاهر هو يبي الكمال ..
عموما تقول اخته ان وجهه اسود من المغثه وخاصه انه فقد ولده عشانه عندي مع العلم انه مايشوفه الا كل اسبوعين مره لو هو مشتاق له كان جا في الاسبوع مرتين وخاصه اننا بنفس البلد

لكن مايندرى هو مرتاح او لا
لكن ما اقول الا حسبي الله ونعم الوكيل الف مره
ظلمني وقهرني على مادري وشو خرابيط في خرابيط ... :(

أتمنى نسمع رائي الرجال المطلق ؟

من وجهة نظري المتواضعــه ....

أن الرجل لم ولن يتأثــــــــــــــــــــــــــر بأي حال من الأحوال ..


لأنه هو من أختار عن طيب خاطر..

والعرض أكبر من الطلب ..

والبدائل متوفرة وقد يكون خياره الثاني أو الثالث أو العاشر مدروسا أكثرررر بعد تجربته الممله في نظره ...

لكن نرجع لنقول ............

ياويل كل ظالم وما أكثرهم لم يراع حق الميثاق الغليظ وظلم بنت الناس التي لم تقصر في واجباتها معه ..

سيلقى جزاءه في الدنيا قبل الآخرة ..

وحســــــــــــــــبي الله ونعم الوكيل على كل ظــــــــــــــــــــــــــــالم ..

وضع الله العصمه بيد الرجل لحكمة قد يجهلها الكثير ولذلك الرجل يفكر ثم يقرر , أي أنه عقلاني يحكم عقله وليس عاطفي يحكم قلبه ,وبالتالي ليس هناك مجال للندم وإلا لما أقدم على فعلته ,بينما النقيض الآخر هو الطرف الثاني ( المرأة ) حيث أنها تقرر بناء على عاطفتها ثم تفكر وبالتالي قد تندم
ومثال حي عل ذلك ( عندما يقوم الزوج بخيانة زوجته أو يقوم بأي جرم آخر فإن زوجته تطلب الطلاق وعندما يقول أنا أحبك ياحبيبتي تتراجع ) فبالتالي هي غير عقلانية بل عاطفيه وهكذا تقاس الأمور وتحسم المسألة
وأتمنى من الأخوات المشاركات عدم الجزم والتعميم , فالرجل بشر , بينما لكل قاعده شواذ الشخص الذي يشذ, ويطلق دونما سبب مقنع لايعتد به ولايقاس عليه ولايقال الرجل يطلق ولايهمه وبدون سبب فهل أمهاتكم وأخواتكم مطلقات
شاكراً لكاتب الموضوع وللمداخلات مع تحفظي على بعضها وإشادتي بالبعض الآخر