|
امي...والمشاكل التي حولها
السلام عليكم ورحمة الله وبركاته...
كيف حالكم اخواني وخواتي الكرام..... لا اعرف من اين ابدأ...فقلبي يتمزق على امي يوم عن يوم....امي لم تقصر على حد ولا شتمت حد...سوى انها تخدم الناس بكل ترحيب وعفويه.....لكن وين اللي يقدر في هذا الزمن...سأبدأ من زوجة عمي (هداها الله) هي ساكنه جنبنا ...المهم اخواني الصغار يذهبون مع ابنائها الصغار الى المدرسة يعني بنفس السياره... المشكله اذا واحد من اخواني اتأخر بس دقيقه ...على طول تتصل على بيتنا ما تقول ها خير عسى ما شر ؟ لا على طول تغث امي بكلامها ...مثلا ( ليش ولدج تأخر حرام عليكم عيالي من الصبح في السياره لا فطروا ولا شي...و ابوي سمع امي وهي تكلم زوجة عمي وعصب...قال حق امي هي بأي حق تتكلم معاج بهالطريقه امي كم مره حلفت ابوي ان ما يتدخل عشان ماتصير مشاكل...بس ابوي هالمره ماسكت...اتصل عليها قالها : ليش دايما تتصلين وتأذينا بكلامج...قالت الحين انت متصل عشان تقولي هالكلام...قالها: يعني زين اللي تسوينه في زوجتي يوميا يوميا عيالي وعيالي...قالت والله عيالي وحليلهم ما يفطرون عشان عيالك قاعدين بالسياره ولا شي...تتكلم بصراخ استغفرالله.... والله ان عيالها يتأخرون بس امي ما تنطق بكلمه تجنبا للمشاكل...المشكله امي كثر ما تسوي للناس الناس ماتسويلها وفوق هذا في رمضان والله مرت عمي تتصل في امي تقول اذا مسوين سحور ارسلوا بيتي لأن تعبانه ومالي خلق اطبخ...امي والله ترسل جدر عيش اشكبره حق عيالها وريلها...والمشكله ان عمي واقف مع زوجته...ويقول حق ابوي كله من زوجتك وكله من زوجتك ...اظاهر ناسي منو كان يرسل سحور بيتهم...استغفرالله شو هالدنيا يعني تقابل الاساءة بالاحسان...........لييييييييش هالزمن الطيب دوم قلبه خسران؟؟ والسموحه اذا طولت عليكم...ولكن كيف اهدي امي لأن نفسيتها وايد تعبانه |
مشاكل عاديه لا تنشغلين فيها ودعيهم هم يحلون الامر
|
يا أختي
أهم شئ أبوك ما يتأثر بكلام أخوه و الرصاصة اللي ما تصيب تدوش هذا أولا ثاني شئ خل أمك توقفهم عند حدهم يعني إذا مرت عمك اتصلت علان أخوانك تأخروا خلي أمك ترد عليها مو تعطيها مبررات ؟ علشان لا تستقوى زوجة عمك أنا لو مكان أمك بأعاندها و أخلي أولادي كل يوم يتأخروا :d |
اشكرج اختي منى الله يعطيج العافيه على مروج
روح الطير...هههههه والله ضحكتيني يوم قلتي بتعاندين...والله نفس الكلام اقول حق امي شو رايج اتطنشين ويتأخرون شوي..قالت وي انا ناقصه كلام ...والزعيمه ما بتسكت عموما مشكوره الغاليه على مشاركتج الطيبه.....يعطيكم العافيه إن شاء الله |
الله يكون بعون امك
بس انتي ضحكي وسولفي عشات تنسى القهر انا امي تجرعت المر من اهل ابي الله يكون بالعون |
مايضيع شئ عند ربي
بالنسبه للكلام خلي امك تطنش بس تدق وتقول ارسلو لي سحور سلاماااات !!!! |
حاولوا تبعتدون عن مصدر التوتر وهو ذهاب الاطفال مع بعض للمدرسه
كل واحد من الاخوان يذهب بأبنائه لوحده لتفادي المشاكل والباب اللي يجيلك منه ريح سده واستريح |
حبيبتي لا تزعلين نفسك ..
الحياة مليانة مشاكل مثل هالمشاكل و اللي يبغي يريح عمره يعمل الخير و يرميه البحر و لا ينتظر مقابل .. و امك الله يعطيها ألف عافية و يجزيها كل خير على سماحة نفسها .. و طولة بالها .. مادام انتو ابناء العمومة و الأطفال علاقتكم حلوة مع بعض .. يكفي هذا الشيء .. و الكبار أكيد متعودين على هذا النوع من الخلافات البسيطة .. و لا يهمك حبيبتي و ربي يجعل راحة البال من نصيبكم .. دمتي بخير أختي |
عادي مثل هذه المشاكل والواجب على والدك ووالدتك حفظهم الله يحقرون زوجة عمك يعني مايعطونها وجه ويترفعون حتى عن الرد عليها لأن فيها ناس ماتعيش الابالمشاكل وهذا الظاهر صنف زوجة عمك والخير اللي تسويه الوالده معهم لازم ماتقطعه بالعكس تستمر عليه وتحتسب الأجر فيه....
|
الله يعين امك
بس صدقيني مايضيع شي عند ربي وسعي صدرك |
| الساعة الآن 03:21 AM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©