|
اول مره اشارك بموضوع
احس اني في ازمه زعلالالالالالالالانه وحزينه من صار اللي صار انا وزوجي متزوجين من 19 سنه بعد حب دام سع سنين يعني من فتحت عيوني على الدنيا وانا احبه وماعرفت غيره هو انسان ممتاز وصعب نحصل رياييل مثله ملتزم ويخاف الله وكريم ومحب لبيته وعياله ولي اللي جرحني اني من اسبوعين بالصدفه حصلت مسج عادي بس رومانسي (يعني من المتداول بين الناس) ومخزن عنده باسم غريب الاسم غريب لريال طبعا لفت نظري وخلاني ادق من تلفوني وانصدمت انها وحده انجنيت وواجهته وحاول ينكر بس ماقدر طبعا بالاول حلف جذب للاسف وعقب بعد المواجهه قالي مو مهم التفاصيل بس انا عرفت هالحرمه وهي كبيره عيالها كبااااااار المهم حلف وحلف بالله ان الموضوع بس هالمسج ومايدري ليش طرشته ! انا لازم اصدقه لانه فعلا مايطلع من البيت ولو طلع معاي او اعرف وين رايح وماعنده ربع الا بشغله يعني صعب اشك فيه بس هذا اللي شفته ! اعتذرلي وايد ويحاول ينسيني الموضوع باي شكل وقطع تلفونه بس قلبى والشك يذبحني اول مره بحياتي من تزوجنا اشك فيه كنت اثق فيه ثقه عميا ومااصدق انه يفكر بغيري ابد ! هالموضوع مجنني النوم ماانامه ومب قادره انسى شسوي !!!!!!!!!! احاول اتعامل طبيعي مب قادره اللي قاهرني فعلا ان زوجي جاف جدا معاي بس الحب اشوفه بافعاله والله كلمة حب او غزل ماتطلع منه ابدا واحس عمري محرومه من هالاشيا واخرتها احصل مسج حب ومخزن من وحده غيري !! وانا يوم اكلمه كلام حب يصدني والا اطرشه مسج حب يقولي بايخه وشخيفه وكبرنا !!! كيف يهدا قلبي ياناس !!!!!!! حتى بعد مااعتذر واعترف انها غلطه كيف ارتاح !! امس بالصدفه لمحت اني للحين شايله بقلبي قالي اني نكديه !! ساعدوني عندي حق والا انا مكبره الموضوع !! انا للحين احبه وادري انه يحبني بس هو طبعه جاف والكلام الحلو مااسمعه ىمنه الا بعد الخناقات ! ليش ياربي هل كل الازواج جذي يبخلون على الزوجه حتى لو يحبونها بكلمة غزل او كلمه حلوه !! اسفه على الاطاله بس اعتبروها فشه خلق وياليت اللي يقدر يجبر بخاطري بكلمه يساعدني ابا اعرف الريال ليش ممكن يسوي جذي مع العلم اني ماني مهمله ابدا لا بشكلي ولا ببيتي وبشهادته هو يعني ماني مقصره ابدا !! |
الله يهدى قلبج و يبعد عنكم الزعل و يهدي زوجج و ازواج المسلمات انشالله
|
اختي يكفي انه اعتذر لك سامحيه وقفلي على الموضوع لانه بعدين لو شافك كذا يمكن يرجع لسوالف شينه بحجت انك نكديه على قولته الرجال يغلط ولازم نسامح قدرنا لان الغلط بس منا الي مايتسامح
واذا كان جاف معك ويحبك بفعاله فهذا طبع الرجال ماعندهم رومنسيه بس يحبونك ومايعرفون يعبرون الا القليل النادر من جيل الشباب ذا انسي حبيبتي وهذي الحرمه ارسليلها مسج انها تستحي على وجهه ولا راح يكون هناك علم ثاني وغفلي على الموضوع احسن |
اختى حاولى تمالك اعصابك واهدئي حتى تستطيعي التفكير بطريقة ايجابية
ليس هناك معصوم وزوجك ربما اخطات وليس بالضرورة لانكى مقصرة او لانه لا يحبكى ولكن ربما للتجربة او للرغبة فى تغيير نمط الحياة فسامحيه نحن بشر والله يسامح فهل نرفض ان نسامح نحن الخطائون؟ تاملي كلماته تعالى وَلَا يَأْتَلِ أُوْلُوا الْفَضْلِ مِنكُمْ وَالسَّعَةِ أَن يُؤْتُوا أُوْلِي الْقُرْبَى وَالْمَسَاكِينَ وَالْمُهَاجِرِينَ فِي سَبِيلِ اللَّهِ وَلْيَعْفُوا وَلْيَصْفَحُوا أَلَا تُحِبُّونَ أَن يَغْفِرَ اللَّهُ لَكُمْ وَاللَّهُ غَفُورٌ رَّحِيمٌ [النور : 22] الا تحبين ان يغفر الله لكي؟ اكيد تحبين اذا فاعفى واصفحى كما ان التمادي فى الغضب والحزن ربما يجعله يحن او يشتاق للتجربة التى كان يحاول خوضها فلا تكونى انتى الدافع له ان يعود ولكن حاولى ان تغيري كثيرا من روتين الحياة واشغليه بمشاكل الاولاد ودراستهم واحرصي على الخروج معه والتحدث كثيرا معه وحاولي مجاراة الوضع الذي انتى فيه بامكانك ان تكونى ببيتك ملكة جمال وانتى غير مطالبة ان يكون الشكل الخارجى شاغلكى الشاغل لانكى ام وربة منزل وهو يدرك هذا جيدا لذا فاى تغيير ستفعليه سيشعر هو به الله يبعد عنكم شياطين الانس والجن ويحافظ على استقرار بيتكم ويسعدكم باطفالكم |
السلام عليكم
اختي الكريمه : هوني عليكي ولاتكبري السالفه وتعطيها اكبر من حجمها زوجك انسان بشهادتك قليل أمثاله , واعملي نظره على مشاكل الزواجات هذه الايام والخيانات والمعاملات الفظة . وهم حديثي الزواج .. واشكري ربك ماشاء الله لاحول ولاقوة الا بالله صار لكم عمر مع بعض وماطلع منه غلط فهل تنكدي عيشتك مع هكذا زوج لأجل غلطه بسيطه وباعترافك مسج عادي . انسي الامر نهائي وتعوذي من الشيطان الرجيم الله يبعده عنكم ولشكواكي انه لايكلمك كلمة حلوة او غزل ..اختي صارلك معه كل هذه السنين ألم تتعودي طبعه ؟؟؟ أم ان هذه المشكلة الصغيرة والتي اعتذر عنها وراضاكي أخرجت لك مساوءه التي عشتي معها تسعة عشر سنة أنصحك لوجه الله داري زوجك واهتمي به فهو كنز نادر الوجود وجل من لايخطىء وتأكدي ان من عصم نفسه عن الغلط أيام الشباب والطيش فانه لن يفعلها الان ربي يهدي سركم ويسعد حياتكم ويبعد عنكم شياطين الانس والجن |
حينما يعتذر الزوج لزوجته هي قمة الشجاعة...
لا تخسري زوجك بسبب الشك... فالشيطان حريص على التفريق بين الأزواج ... احمد الله على زوجك... واسأل الله وادع الله بظهر الغيب... وأكثري من الاستعاذة بالله من الشيطان الرجيم... |
الله يهديك و يهدي زوجك لا تخسري زوجك بسبب الشك...
فالشيطان حريص على التفريق بين الأزواج |
جزاكم الله كل خير على الكلام الطيب
بردتوا ناري شويه حبيت اسمع وجهة نظر الازواج بحالتي لاني ماعرف كيف يفكر الزوج بحاول اسامح بس الاكيد اني ماراح انسى بسهوله ماتدرون شكثر صعب تكونون بنيتوا حياتكم بعد كل هالسنين ويجي فجاه موضوع يضرب بالاعماق بالاساسات بالثقه والامان انا فقدتهم بعد اللي صار ولو اني احبه بس احس كل حياتي تتنافض جدامي وخاصه ان هالحرمه لها 3 ارقام بتلفونه واللي تاعبني اكثر اني ماعرف الحقيقه وشو كانت العلاقه بالضبط ! يمكن لو يعترف لي بالحقيقه يمكن ارتاح ادعولي يارب تهدي بالي وتصلح احوالنا يارب العالمين ولا يبلاكم |
اختي اعرف ان موقفك صعب .. ما الومك ..
لكن لازم تحاولي تعدي هذه الازمه او راح تنقلب على راسك .. اولا زوجك اعترف واعتذر .. ويحاول انه ينسيك الموقف .. ثانيا .. هو قال لك انك نكديه ... هذا انذار لك اختي .. كأنه يقول لك تراك بديتي تطفشيني .. وراح يكون معي حق اني ادور على راحتي خارج البيت .. اختي انتبهي على نفسك .. ثالثا .. ليه تبين تعرفين التفاصيل ؟؟ اذا انت الحين ميته مره .. فتأكدي انك بعد ما تعرفي التفاصيل راح تموتي الف مره ..لا تهتمي بالتفاصيل ابد .. لانه قد تكون مؤلمه.. اختي صعب انك تنسين لكن سامحي مع الوقت راح تنسين .. حاولي انك تشغلي وقتك بأي هوايه تلهيك وابعدي الشيطان من وسطكم او راح تتأسفين بعد ما يطير زوجك من بين يديك .. حاولي انك تحسسيه بالثقه مره ثانيه .. وربي يمسح على قلبك .. |
السلام عليكم اختي ..
والله حاسة فيك شعورك بعدم الثقة في زوجك شعور صعب جداًً جداًً حسيت فيه وقطعني تقطيع خصوصا من شخص قريب منك يقاسمك اللقمة والفراش .. لكن نصيحة مني تناسي الموضوع وحاولي تبعديه عن تفكيرك واكثري الاستغفار وكل ماخطر ببالك هالشئ تعوذي بالله من الشيطان الرجيم وارجعي لزوجك احسن من الاول والا بتضطريه يسوي شئ من وراك وقلبي هالمنتديات وشوفي المشاكل والخيانات والبلاوي مالله به عليم .. وفقك الله لما يحبه ويرضاه وجعلك الله حورية بين عينيه وعسلا بين شفتيه وصرفه الله عن غيرك يارب .. |
| الساعة الآن 11:26 PM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©