زوجتي مسرفه هل من حل لديكم؟
 

السلام عليكم ....

اعود إليكم اخوتي واخواتي بموضوع بدأت اشعر بأنه سيكون ازمة جديدة بيني وبين زوجتي ... قد يكون البعض قد علم مشاكلنا السابقة ... ولكنها حلت الحمد لله وولت بلا رجعة ان شاء الله مع وجود مناوشات بسيطة هي دارجة في اي بيت واي حياة ... ما اعاني منه الان ((اسراف)) زوجتي وعدم احساسها بقيمة النقود .... تحب وتعشق الشراء ... لا تضع رجلها في سوق او مول او سنتر إلا واشترت منه شي ... تكلمت معها مرارا وتكرارا ان هذه العادة لا تعجبني ولكن دون فائدة تذكر ... تستجيب لفتره ثم تعود من جديد ... ما جعلني اليوم اكتب لكم هو ما وصل إليه الحال بكل صراحة من الضيق لدي ... سأحكي لكم مقتطفات من سيرتها التسوقيه ...

زوجتي تحب المشتريات لدرجة قد تشتري شيئا لا تستخدمة إلا بعد شهور .... تخيلوا مره اعجبتها شنطة واشتريتها لها ولم تستخدمها إلا بعد 6 شهور وعند سؤالي لها ((ليش ما استخدمتيها ترى نسيت اني شاريها لك )) تقول : (( دورها كان ما وصل للان)) طبعا لان خزانتها مكدسة بالشنط ....

اليوم وانا وهي في احد المولات اعجبت بعباءة قالت وبكل دلع : (( زوجي حبيبي نفسي فيها )) قلت لها ((عندك من العباءات ما تكفيكي انتي والجيران وانتي شاريه عباية ومتصايحين عليها)) لانها شرتها بمبلغ جدا غالي ((بكل ما تحملة كلمة غالي من معنى )) !!!!!!!!! والله عقلي كان بيطير ... اقلها وانتي مو شايفه ان هالمبلغ يجيب لك خمس عبايات ... كان عذرها غير مقنع وسكت لان العباية اشترتها وانا مسافر يعني الكلام ما بيزيد غير حرق دمي وبس .... قلت ما فيه عباية ولا شي وطبعا كان الموقف انها ((زعلت)) مع محاولات لعلي اغير رأي واشتريها لها


طبعا لا ننسى الشوزات اكرمكم الله اللي تارسه الخزانه والملابس اللي من افضل الماركات ... والله اني تعبت ... تعبت من عدم تفكيرها بالمستقبل ... صحيح هي موظفة وانا موظف ومستورة والحمد لله بس هي ما تفكر بشي اللي بجيبها تصرفه .... جلست معاها كثير يا زوجتي يا حبيبتي عندنا اقساط سيارتك وسيارتي نبي ننهيها بسرعة حتى نتفرغ ونشتري بيت ... لا حياة لمن تنادي

واليوم بصراحة وصل الحد منها لدرجة صحيتها من النوم وصارخت وخرجت من البيت ... الموضوع ان وانا في السفر لاني واصل من اسبوع ... قالت تبي تشتري (كاوية ملابس وهيتر حق تسخين الماء)) قلت اوكي اشتري وحددت لها نوعيات معينه واشترتهم ... انا رجعت اشوف الشغلات ما لقيتها مثل ما حددتها ... وافتح الكاوية ألقاها مستخدمه ... سألتها انتي استخدمتيها قالت لا ... طبعا عرفت انها كالعادة تاخذ وترمي بالعربة وانتهينا ... قلت اوكي هذي لازم ترجع هاتي الفاتورة قالت بيت اهلي ... ومر على هالموضوع اسبوع واليوم جابت الفاتورة وانا اطالعها انصدمت ... مبلغ غالي جدا ما توقعته .... صحيتها من النوم وصارخت الصراحة فقدت اعصابي ... قلت شايفة مرتباتنا كم حتى تشتري شغله بهالسعر وتدري انها لازم نرجعها وساكته لليوم ... ما تحسي بقيمة تعبنا ... ومن هالعبارات ... ترد علي وتقول انت ما شفت السعر من اول ؟؟؟ قلت كيف اشوفه والفاتورة جايبتها اليوم من عند اهلك ... وتركت البيت وطلعت ...


تعبت وانا احاول افهمها ... الاسراف حرام ... اليوم عندنا بكره ما نعرف ... غيرنا يتمنى يشتري بقيمة ساعة من ساعاتك غرفة نوم ولحاف ينام ويتغطى من البرد ... غيرنا مو لاقي ياكل وانتي ترمي هنا وهنا بدون تفكير ...
واللي قاهرني اكثر انها تشوف نماذج من اخواتها وقريباتها يصارعون الحياة حتى يعيشوا بمستوى معقول وهي تبذر ولا همها كأن الحال مستمر ... والاعجب اذا قالت (( بكرة يزيد راتبك وانا راتبي بيكون وصل للمبلغ الفلاني ونرتاح شوي )) يعني مبيته النية للاسراف ولا شلوووووووون !!!!

اسف طولت عليكم بس كان لازم افضفض واتكلم ... لو كان عندكم طرق او اي اسلوب في التعامل مع الموضوع لا تبخلوا علي فيه ... يعلم الله اني مو بخيل معاها ... بس في نفس الوقت ما ابي اضيع شبابنا ومرتباتنا واذا كبرنا لقينا نفسنا ما زلنا بشقة اجار ... ورصيدنا صفر ...

تحياتي لكم

..................
تم توضيح العنوان
الاشراف

أخي الكريم عطر الزمان

بكل اختصار

كما قالت الاخت رواء الايمان

إقطع لها مصروف شهري على ان تتفق معها ان لاتطلبك غيره

وإذا إحتاجت لشي ضروري قبل حلول الشهر أعطها واخصمه من مصروفها

أو تحدد لها الذهاب للسوق مره كل شهر أو شهرين أو كيفما تراه مناسب

وتحدد لها ميزانيه تصرفها حين ذهابها

لابد من وضع نظام صارم لها لانك أنت الممول وأنت المحاسب بالدرجة الاولى

دائما يردد في الدعوات اللهم لاتؤاخذنا بمافعل السفهاء منا

وهذا الاسراف بالمال من السفه أخي وعليك ظبط الامور

اعانك الله وسدد بالحق خطاك


للتذكير هذه مواضيع اخينا السابقه

http://www.66n.com/forums/showthread.php?t=162906

http://www.66n.com/forums/showthread.php?t=164211

وانا رأيي من رأي اختي ليتني اسلى

ولازم تكون صارم شوي اخويه ...لا ترضخ لها لانها بتفسر طيبة قلبك على انه ضعف

وان شاء الله بتلاحظ تغيير في تصرفاتها ...والله يفرج همك ويهديكم ويبعد عنكم كل شر

اختك ---- لمني بشوق

اذا كانت تصرف من راتبها فهي حرة فيه تصرفه كيفما تشاء ,,
اما من ناحيتك ضع لها مصروف شهري ثابت و عودها تشتري مقاضيها بنفسها و ريح راسك ,,
بهالطريقة راح تضطر هي تضبط مصاريفها و راح تقدر انت تركز على الاشياء الأهم كالبيت و السيارة ..الخ

والله ما ادري شو اقول لك ترا هاذي ترجع لنفسية الشخص و يمكن اكثرية النساء يحبون يسرفون بس انت حدد لها مبلغ محدد كل شهر و لا تعطيها و اذا نقصها خلها تدفع من جيبها بكرا لما شافت ان فلوسها نقص و ما يكفيها راح تعرف ان تدخر علشان تقدر تشتري اشياء ثانية و انت حاول تدخر من راتبك للبيت الجديد و قول لها انا ناوي اخلص الاقساط و اشتري بيت و انت لج شهريا مبلغ مثلا 500 ريال مب اكثر و راح اشتري لج الاشياء الي تحتاجينها و الي لازم كل زوج يوفرها لزوجته و الاشياء الي ماله داعي و تبين تسرفين كيفج عندج راتبج و انتي حره و حتى اقساط سيارتها خلها اهي تدفع من راتبها، كذا تكون انت تدخر من صوب و تعلمها درس من صوب اذا بدت تدخر كان كويس لك و لها و اذا لا، تكون على الاقل انت مدخر شي للمستقبل

شوف اخوي الصراحه انا زوجي دايما يخانق يقول اني مسرفه مع اني والله يشهد مااصرف شي على نفسي الا على الاولاد والبيت يعني مااشتري لنفسي شي الا كل كم من شهر (مع انه راتبي انا مااخد من ماله ولا ريال ) بس لما تعبت من كتر كلام زوجي عن مصرفي (( خاصه انه بنخطط متلكوا انا نشتري بيت بس ربنا يفرجها ويصير عنا مبلغ يساعد ))قعدت معا حكيتله انت تقول اني انا مسرفه خلص لي كل شهر مبلغ *** واذا تعديته لك الحق انك تقول اني مسرفه شرط انك ماتعترض على اللي اشتريه طبعا المبلغ من راتبي واللي اشتريه مهما كان سعره دامه من مصروفي مالك تعترض

ليه ماتحدد نفس الشي مبلغ معين لزوجتك يكون بايدها تتفقوا عليه مع بعض تصرفه على اللي بدها اياه ومالها غيره الا مع بداية الشهر الجديد

وصدقني هدي الطريقه للتحويش جدا حلوه انا اقدرت اجمع مبلغ حلو لاني ماعدت امد ايدي على الفلوس اللي في البنك الله يرزقنا واياكم المال الحلال

تحياتي

اخي اذا كان راتبها فهي حرة فيه ولكن طبعا عليك بالنصيحة من باب ان الله لا يحب المسرفين

ليه ما تعملوا جمعيات ماليه تدخلوا فيها المبلغ ويكون منصف بينك وبين زوجتك ويبقى فقط لزوجتك مصروفها الخاص
بهذا يلتزم كل شخص بمبلغ معين
وزوجتك ان شاء الله راح تعتاد على ذالك