زميلتي 12 سنة ضرب و إهانات هل تنصحونها بالطلاق ؟
 

السلام عليكم

و الله ما ودي أكدر خواطركم ، و خاطري أنزل موضوع أكثر إيجابية عن الزواج لكن !



زميلتي متزوجة من 12 سنة تقريباً و تعاني الأمرين مع زوجها ، سأوجز مشكلتها في نقاط حتى يسهل علي احتواء ما اعرفه من المشكله و يسهل عليكم الرد :

-هو لا يصلي بانتظام يعني يوم يصلي و يومين لا ، حاولت نصحه مراراً لكن بدون فائدة

-يسهر خارج المنزل ...صحبه سيئة +علاقات محرمة "متأكدة من علاقاته لأنها شافت صور بنفسها "

-يهينها و يضربها باستمرار أمام الأولاد" و هذا إللي معور قلب" و أمام الخادمات

-مايصرف عليهم إلا الفتات كل فلوسه تروح على سهراته

-راتبها أعلى من راتبه و هي متحملة إجار البيت لأن بدل السكن مالها أعلى لكن هو يدفع فرق بسيط

- شخصيتها ضعيفة جداً أمامه "قليلة خبرة في الحياة مع إنها مو صغيرة " من بداية الزواج و هو يهددها
بالطلاق ،تخاف إذا تطلقت المحكمة تحكم له بالأولاد لأنها شيعية و هو سني .

-أبوها ريال كبير و بعد شخصيته وايد ضعيفة ،يشوف بنته تنضرب جدامه و ما يسوي شي بس يحاول يهدي الموضوع و يتهمها إنها هي إللي تستفز ريلها و أبوها جدا متعلق بأولادها و ما عند إلا هي و بنت ثانية مو متزوجة .

- تظن إن المشكله فيها و تحاول دايماً تغير من شكلها عشان ترضيه !

طبعاً هي دايماً تتكلم عن سلبياته لكن حاولت أطلع منها بعض الإيجابيات :

يصلي أحياناً و يأمر عياله بالصلاة
يحب يساعد الناس
يحب عياله و هم يموتون فيه


من 4 أيام تقريباً حصلت مشادة بينهم في السارة و صفعها جدام الأولاد و الخادمة ، طلعت من السيارة و راحت البيت ، و ردوا اتخانقوا مرة ثانية في البيت و ضربها جدام أبوها فهددته بالاتصال بالشرطة ، لكن أبوها لم الموضوع و خذت عيالها و راحت بيت أهلها !

ألحين محتارة شو تسوي ؟ المدارس باقي لها أسابيع و تبدأ يعني لازم تروح بيتها ، لكن هي تبى تلقنه درس و هو لينحين ما كلمها ، سألت مستشارة أسرية و قالت لها غيري مفتاح البيت و خليه يحس بقيمته و يرجع لج ، لكن حتى هالحل هي مو مقتنعه فيه و تخاف يطلقها خصوصاً إنه سبق و طلقها طلقة واحدة .

بقولك اياها بصراحه حتى لو اختلف معي اغلب الاعضاء / ايييه نعم انصحها بالطلاق ، رجال بالمواصفات الي ذكرتيها ما ادري على اي اساس بتعيشين معاه طول العمر وهو من ماله امان بهالحياة ،،، بكره يبليك بمرض من والله ان يرميك ولايفتكر فيك ،،، ثاني شي تقولين انها خايفه تطلب الطلاق وياخذ العيال ،،، انا رأيي قبل ماتقدم على اي خطوه طلاق تدور وتحتفظ بكل شي يدين سوء اخلاقه ،، سواءً كانت صور او رسايل او تسجيلات صوتيه او حتى لويطلع يسهر برا بجلسة فسق واهي تعرف وين مكانه تتصل بالشرطه وتبلغ عنه باسم فاعل خير علشان يكون إدانه عليه ولايقدر ياخذ العيال بالمررره ،، وبعد ماتجمع ادانات عليه واثباتات فوراً تطلب الطلاق عن طريق المحكمه وتقدم اثباتاتها للشيخ .

والله يعينك .

اساليها ليش متحمله كل هالظلم

بتقولك علشان اولادي

هو مؤكد ان زوجها لابد ان تدخل رجال من العائله ياخذ منه عهد بعدم التعرض لها

والام بعدما تنجب وبعد مرور السنوات

تصبح حياتها وقرارتها ليست بيدها

بل بيد اعين بريئه تريد امان واستقرار في جو والدين مهما كانت ظروفهم ومهما سااءت

تظل افضل بكثير من شتات واسبوع عند ماما

واسبوع بابا

وربما زوجة اب لاترحم

فالافضل صلح بشروط تؤخذ على زوجها من رجل من اهله ورجل من اهلها

والله يصلح شائنهم



ملاحظه

والدها عايش المشكله وكلمته هذه لم يقولها من فراغ

كيف تستفزه ولماذا ؟؟

واحد ما يحافظ على صلاته وش تتوقع منه
واذا هو يحب عياله صدق فليه يخليهم يشوفونه بمنضر بشع من ضرب لامهم امامهم
بصراحه اساليها وش بتخسر اذا خرج من حياتها (ما يصرف مافيه احترام وضرب يعني جو اسري سيئ جدا) اتصور الايجابيات اكثر بكثير
واذا قصدها على العيال يمكن ياخذهم فالي مثله ماراح ياخذهم لانه ماراح يقدر يصرف عليهم بالعكس بيتركهم عندها عشان يتفرغ للي هو فيه
بس قبل تطلب الطلاق تسوي اللي قالت لها المستشارة الاسريه تروح البيت وتغير الكيلون وتمنعه من الدخول إلا كضيف في حال يشوف عياله فقط واذا مو عاجبه بتطلب الطلاق وتشتكيه في الشرطه على ضربه خصوصا ان فيه شهود
وصدقوني عشان مصلحة العيال لازم مايشوفون ابوهم بهذا الشكل فبعدهم عنه افضل عشان ما يشوفونه إلا وقت محدود يكون فيه بوضع طبيعي وهادي

نفس الموضوع طرح أمس

ما يصرف عليهم الا الفتات
يحب أولاده
ويحب يساعد الناس كيييييييييف

اي حسنات الي له هذا ؟؟!

حسبي الله ونعم الوكيل فيه

اختي التغيير لازم يبدأ من داخلها وتقول لضعف شخصيتها لا وتكسر الانثى المسلوبة الارادة الي بداخلها

ثم تطرد شره من حياتها

واتوقع لو ثبت عليه عدم اهليته للتربية من علاقات محرمة وسهراته الغير لائقة والضرب ووو وخصوصا ادا كان عندها دليل عليه

تشتكي عليه ادا ابوها ماقدر ياخد لها حقها ولا هي قدرت تاخد حقها في حكومة في البلد تاخد حقها وفي رب كبير بعد ياخد حقها ان شاء الله من هالظالم

وتاخد كل حقوقها وخصوصا البيت

هي بس لو تشتكي عليه لانه يضربها وعندها تقارير المستشفى تثبت ذلك يروح فيها


الله يعينها ويقويها ويفرج عليها كربها ويزيح عنها همها ....

خالد الذابح

دمعات الروح

زهرة نجد


الله يجزيكم خير على ردودكم ، هي ما تبي تتطلق ، تقول عشان الأولاد لكن أنا أحس إنها تحبه و أضعف من إنها تاخذ مثل هالقرار .

في رأيي الطلاق مو حل ،إلا إذا استمر على نفس الطباع و فشلت كل المحاولات في إصلاحه ، أعتقد هي لين ألحين ما خذت أي موقف يوقفه عند حده عشان جيه هو متمادي ،و الله ما كاسر خاطري إلا هالأطفال ، عندها أربعة و بنتها الصغيرة تقول لها " ماما أنا ما أبي أشوفج إنتي روحج و ابوي بروحة أنا أبا أشوفكم مع بعض"

اذا تطلقت منه راح تكون هى الكسبانة

زوج بهذه المواصفات عدمه افضل

الله يوفقها لما فيه الخير

نسيت اقول ان المشكلة منها هى مو هو لأن شخصيتها ضعيفة والرجل ما بيحب المرأة الضعيفة
اذا فى ال12 عام ما اخذت موقف شو متوقعة منه بعد ذلك

الله يعينها والطلاق افضل حل