|
بين نارين .. بسبب الحزازيات بين أخي و زوجي
السلام عليكم والله مادري كيف ابدأ المصيبه اللي حطني فيها زوجي انتوا عارفين المشكله اللي بين اخوي وزوجي او الحزازيه اللي بينهم لمن تقدم لي ولمن جاني اخوي وتكلم بموضوع الانجاب وزعل زوجي لاني لم اجيب اخوي واقله اننا سليمين امس ارسلي اخوي مسجات كثيره كلها شتم وتهديد اثاريها رسايل من زوجي لاخوي واخوي ارسلها لي وقلي شوفي اللي حاربتينا على شانه؟ انا انحرجت وارسلتله اعتذار وانتظرت زوجي يرجع كان برا مع اصحابه ولمن رجع واجهته بالرسايل قال مالك دخل وهذا موضوع بيني وبين اخوك انا قلت لا معليش وترى شرطك انا راح انقضه وانا بزوره وبتقبل هداياه واتصالاته واللي تبي تسويه سويه انا مايهمني هو عصب وقال والله الطمك لو كررتي هذا الكلام قمت كررته وقلت اللي ماله خير في اخوه ماله خير في احد واساسا انت شخص حقود اخوي كان معترض عليك وبعدين وافق ورضي ليش انت مصر تبني الحواجز قال انا حر قلت انت مو حر انت مريض نفسي واذا انت حر فأنا كمان حره وعلاقتي بأهلي ماتتدخل فيها ابدا وتركته ورحت المطبخ قام ارسلي رساله قال انا جوعان ممكن تسويلي اكل؟ قلت لا اطلب من برا ولا نام بجوعك احسن ولحقني عالمطبخ وكملنا خصام هناك وقلنا كلام كثير اخرتها قلت انا فعلا سرت افكر بالطلاق لانك انسان متعب تفكيرك وكلك وطلع من البيت زعلان وللان مارجع وانا تعبت والله احس بصداع وارهاق ارجو انكم تحكمون بيننا وانا رراضيه بالحكم؟ انا تنازلت كثير بسبب وضعه ولكنه يتمادى واعتقد انتوا لاحظتوا هذا الشي؟ من جد انا تعبت لان المشكله هي نفسها دايم تتكرر اهلي واخوي وحساسيته منهم رغم ان اغلب اهلي يحبوه الان ويعاملوه بكل احترام واهله انا عمري ماتدخلت فيهم ولا بمشاكلهم تصدقون انا من فتره طويله مارحت لاهلي واذا رحت ما اطول لانه يتضايق اذا طولت فكنت اداري عليه واحاول ابين له اني معه ولكنه فهم اني ضدهم فوق كل هذا مايطلعني مكان وانا صابره وساكته وكثرت مشاكلنا وخصامنا لنفس السبب انا تعبت وابغى حل نهائي لان اعصابي ماتتحمل اكثر ولو تهورت وعصبت فلن ارحمه لاني اعرف نفسي انا بطبعي جدا عصبيه اتمنى ان اجد عندكم حل او بداية خيط للحل وشكرا:( عفواً تم تعديل العنوان ليتضح المضمون الإشراف |
سلام
اختى يجب ان تضعى حد لتدخل اخيكى بحياتكم الخاصه فمسئلة انجاب وغيرها امر يعنيكم وحدكم وان حصل خلاف بينهما كونى حياديه |
السلام عليكم
بصراحة اللى قلتيه لزوجك هدا ماينقال حق الزوج على زوجته اكبر بكثير من حق اباها وامها فما بالك بأخاها لقد اسأتى الادب معه ولم تعامليه بأحترام كيف تسبى زوجك وتقولى له انك حقود وانك مريض نفسى كما انه لايوجد شئ اسمه ""اللى ماله خير فى اخوه ماله خير فى احد"" انا ارى ان له الحق فى جميع ماسيفعله كما نا اخاك ليس له الحق ان يتدخل فى مسألة انجابكما زوجك هو جنتك ونارك تأسفى له واطلبى منه الرضا واطيعى زوجك صراحة انا لو مكانه لكان لى شأن اخر |
مونى شكرا لكي
بس هل انتي عارفه كل القصه؟ سوبر لا تقسوا علي اعتقد انك لا تعلم بكل القصه؟ وان كنت تعلم شكرا على كل حال لك |
يا أختى لا اعلم القصة
ولكن وان أخطأ زوجك لاتخطأى مثله واسأل الله ان يفك كربك ويصلح حالك مع زوجك |
اعجبني موقفك
واحيك على شجاعتك واستمري على موقفك حيث يجب عليه احترام اهلك وان يكون لك حق في زيارتهم ولكن بعدما وصلت رسالتك واضحة .... حاولي تتفادين النقاش في الموضوع اتركي لضميره ان يحاسبه لكن استمري على افضل الاخلاق و عامليه بكرم وطيبه |
اي ام
انا بتركه على راحته ولا بفتح الموضوع خير شر مو لاني زعلانه وبس بل لاني تعبت من السالفه نعيدها ونكررها ستين الف مره ونرجع نتخاصم عليها واصلا هو للان مارجع ولا اعرف وينه بصراحه دقيت على جواله ولم يرد الله يهديه ويحنن قلبه على اخوي لانه يكره مرره ملحوظه زوجي معاق وشكرا |
بسم الله الرحمن الرحيم
المفروض على كل زوج في هذا الكون يبادر بحبه وأحترامه وتقديره لأهل زوجته بدون أستثناء .. طالما حاس أن زوجته تحبه وتحترمة عليه التسامح ( ومن أجل عين تكرم مدينه ) ولو حصل سو فهم أو حزازيات بين الزوج وأبو أزوجة أو وأحد أخوان الزوجة فعلى الزوج يبادر بتسامح لأجل زوجتة .. ولا يربط أي حزازيات أو مشاكل مع أهل الزوجة في معاملة زوجتة أن يسيئلها أو يجرحها لأن هي مالها أي ذنب.. أما الزوج اللي له مشاكل أو حزازيات مع أهل زوجته وفالبيت يحط حرته في زوجته هذا أنسان فعلاً مريض نفسي وحقود وعنده وسواس قهري .. وأنصح الزوجة أنها تتركه من بدري |
اختي بنت غامد .. الله يعينك .. وانا قايله لك في موضوعك السابق انك راح تمري بكثير من المشاكل بسبب وضع زوجك .. فزوجك يا عزيزتي بسبب اعاقته فهو حساس جدا و يشعر بالنقص مهما حاول يداري و يخبي .. و بناء على ذلك تتضخم عنده مثل هذه الامور و تكون ردة فعله قويه جدا .. لو زوجك اكتفى بانه يمنعك انك تتواصلي مع اخوك يمكن مع الوقت راح يتنازل عن قراره و يسمح لك انك تتواصلي معه .. لكن للأسف زوجك اعلنها حرب و تهديد لاخيك و يريدك ان تقفي بجانبه في هذه الحرب .. فانت الان بين نارين .. زوجك واخوك .. الله يعينك .. في مثل هذه الامور اختي لازم تضبطي اعصابك و تتجنبي التهور .. لان اي كلمه تقوليها راح تخلي الموضوع يكبر و يتشعب .. حاولي انك تمسكي العصا من النص .. اتصلي على اخوك و ضحي له كل الموضوع و كيف ان زوجك تضايق من كلامه بخصوص موضوع الانجاب و كيف ان زوجك اخذ على خاطره منك انك ما رديتي على اخوك بانكم سليمين .. لكن لا تقولي لاخوك ان زوجك طلب منك مقاطعته حتى ما تكبر السالفه .. تجنبي قدر المستطاع ان تذكري الامور اللي تجرح حاولي تحجيم المسأله عشان ما تكبر .. حاولي انك تجدي شوية مبررات لزوجك اللي خلته يتصرف بهذا التصرف مع اخوك .. قولي له انه زوجك حساس جدا و ما يحب احد انه يتدخل في امور حياتنا .. (مع اني عارفه انه السالفه ما تترقع لان زوجك زودها بارسال رسائل تهديد و سب لاخوك) لكن يا اختي حاولي انك ما تخسري اخوك .. قولي لاخوك انك ما ودك تخسريه مره ثانيه لكن ليكن اتصالكم بعيد عن عين زوجك لحد ما تهدأ المسأله .. اما بالنسبه لزوجك و لتصرفك معه ... والله يا اختي ما اقدر الومك .. لانك في وضع لا تحسدين عليه .. واحيانا الواحد كثرة المشاكل تخليه يطلع من طوووره .. لكن اختي عليك بالصبر الله يعينك .. قولي لزوجك المسأله ما توصل انك تضخمها و تبعث لاخي هذه الرسائل .. فردة فعلك قويه جدا .. وانا لا اريد منك ان تضعني في موقف حرج مع اي احد من اهلي .. هذا ان كنت تعزني و تقدرني و تحبني اللي يحب يتنازل .. قولي له مثل ما انا تنازلت و قبلت بشرطك اني اقاطع اخي انت ايضا لازم تتنازل لاجلي ولا تضعني في مواقف حرجه مع اهلي .. اتمنى اختي اني قد افدتك .. وعذرا على الاطاله .. |
هلا اميرات
بالضبط انا اللي خلاني اطلع عن طوري رسايله لاخوي والله كلام استحي اقوله وتهديده بتكسير سيارته !!!!!!!!!!!!!!!!!!!!! وهو فضحنا عند اخوي ابشرك قله انا منعتها من التواصل معك تخيلي؟ وانا حسيت نااار شبت بصدري لاننا تصالحنا واتفقنا والمصيبه انه ارسله الرسايل بعد الصلحه اي بعد ماتصالحت انا وزوجي وتنازلت علشانه وبالاخير شوفي ايش عمل؟ شي يقهر مصر يعمل مشاكل ويحرجني مع اهلي ومعه هو ايضا لانه مهما كان هو زوجي ولا احب اكسر كلامه بس هو مستفز جدا وشكرا حبيبتي برق سحاب نعم انا معك وشكرا لمرورك عزيزتي |
| الساعة الآن 10:04 AM. |
Powered by vBulletin® Version 3.8.7
Copyright ©2000 - 2024, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©