|
غداً ستأتي والدته لرؤيتي
السلام عليكم..., مادري من وين ابتدي بس اللي اعرفه اني معجبه بمنتداكم واعضاءه واراءهم المقنعه والواقعيه ... وعشان كذ حبيت اعرض عليكم مشكلتي :( تقدم لي رجل معروف باحترامه وطيبته والتزامه وسمعة اهله الطيبه بالاضافه لانه طبيب ويكبرني بـ 3-4 سنين تقريبا.. طبعا الى الان ماتم شي رسمي لكن بدت الامور تاخذ طريقها.. هو صديق اخوي ومعروف بالنسبه لنا يعني السؤال مو مشكلتنا,, بس امي اليوم جتني تقول ان امه اتصلت وبتجي بكرا تشوفني :( احس اني انصدمت وضاق صدري (هالموقف احس فيه استرخاص لي يعني وشو داخله معرض عشان تقول باجي اشوف البنت؟؟:29: ) لما زعلت امي استغربت مني وقالت انه شي عادي ومتعارف عليه.. الحين انا محتاره بشيين.. اولا : مقابله امه بكرا وكيف بتكون ووش ببالها ووش بيصير و و و وغير كذا انا ما عطيناهم الرد النهائي عشان تمون وتطلب هالشي...ولدها خوي اخوي واخوي ماشاءالله وسيم وماعليه بشي يعني وش بتتوقع اني باطلع؟؟ يوم تفكر كذا :( والثاني : وهو اللي من اول ما كلموا اهلي وانا افكر فيه (انه طبيب) يعني احس بيئة عمله مسببه لي ارق من الحين...لاتقولون موسوسه لاني مافكر بشكل سطحي بس احب اتخيل المستقبل واتوقع كل شي عشان ما انصدم واكون محتاطه نفسيا لاي موقف .. ابي مشورتكم ببكرآ اذا اقابلها او لا وبالنسبه لعمله اذا اي وحده عندها تجربه او خبره باحد من اقاربها او شي ممكن تريحني وتقنعني فيه لاني احس ان هالشي ممكن يخليني ارفضه نهائيا |
اتوقع شيء عادي أخيه
بالعكس اكسبيها وعامليها زي امك تكسبي اجر وتكسي زوجك اقرئي سورة الفاتحه وآية الكرسي ويس وادعي الله ان يسهل الأمر ويتممه |
غريبه وش الي يضايقك بالموضوع ...
بالعكس احسها لو ماتجي وتشوك اقول هاذي موب مهتمه ... حبيبتي بسمي بأسم الله واقرأي وردك والله يكتب لك الي فيه خير ... |
المعروف عن الطبيب عادة أن ساعات عمله طويلة .. و بالتالي فتغيبه عن البيت كثيرا .. و في أوقات مختلفة .. يجب أن يكون واضحا في ذهنك ..
سلام |
انا مادري وش المشكله؟؟
امه بتجي عشان تشوفك وتقول لولدها... اما بالنسبه لانه اخوك وسيم مو شرط يطلع خواه جميلات هو بتزوجك ما ارح يتزوج اخوكي تحيتي |
عادي جداااااااااااااااااا هذه الزيارة انا استغربت من ردة فعلك
انا ام زوجي قبل ما تخطبني اولا سألت عني من قريبات زوجي اللي شافوني ثانيا قبل العيد سألتني عن المسجد اللي بصلي فيه وجت عشان تشوفني ثالثا جت عندنا بالبيت هيا واخت زوجي كذا زياره قبل الخطبة يعني عاااااااااادي جداااااااااااااا لاتقلقي انتي البسي احسن ما عندك واعملس تسريحه حلوة وطمنينا يا عروس |
حنا الأمر هذا عندنا عادي
إذا كان الرجال طيب و ملتزم بدينه فكري زين استخيري أولا ثم نفذي قرارك وفقك الله |
اما عن زيارت امه عادي الاغلب كذا
اما عن وظيفته طبيب انا لااويد الزواج لعمله المختلط وبشده لاكن هذي وجهت نظر |
بالنسبة لعمله, انا زوجي طبيب و دوامه من 8 الى 4
و عنده مناوبات تقريبا من 3 الى 4 في الشهر و انا متزوجة لي اكثر من 3 سنوات و ما شفت على زوجي شئ و هو فيه دين الحمد لله طبعا العمل كله اختلاط و هو طبيب نفسي بعد !! بس ما اثر هالشئ على حياتنا اذا كان خطيبك صاحب دين و خلق لا تضيعينه و الله يوفقك... |
بالنسبه لزيارة الام مافيها شيء عادي بالعكس علشان تتعرفي عليها وعلى طبيعة ولده اكثر
وحنا عندنا دائما يصير هااشيء بالذات انها ماتعرفك فالطبيعي انها تبي تتعرف عليك اكثر.... اما بخصوص عمل الخاطب كطبيب مافيها شيء بالعكس مهنه شريفه اذاكان صاحب دين وخُلق استخيري الله وتوكلي عليه بس لازم تسألون عن هذي النقطه وغير كذا حطي ببالك انه راح يكون وقته ضيق لانه يقوم بعمل انساني فلازم تتقبلي الفكره وتتكيفي عليها من الأن حتى يكون كل شيء واضح قدامك أسأل الله ان يكتب لك الخيره اينما كانت... |
| الساعة الآن 05:07 AM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©