|
ساعدوني بخبرتكم
السلام عليكم
طبعا اغلبكم عارف ان كتب كتابي راح يكون الثلاثاء القادم والحمدلله وطرحت الاخت سابنا فكرة انشاء موضوع عن كتب الكتاب وطرق تقديم المهر واستحسنت الفكره كثير المهر بيكون 60 الف ريال لان قبيلتنا كذا البكر 60 الف والثيب 30 الف مع المهر اخواتي بيقدمون اشياء غريبه بصراحه انا معترض بس هم يقولون لازم بيقدمون عطور وعود ازرق وساعه ولبان ومدري ايش؟ خرااااابيط نسوان وشرايكم؟ في سؤال امكنه سخيف بس والله شاغل بالي بعد الملكه اطلب جوالها من اخوها ولا كيف؟ والله خجلان من اخوها طليقتي كانت بنت عمي يعني جوالها عند خواتي واخوانها زي اخواني عادي كان الوضع كتب الكتاب والحفل بيوم واحد بس اهلي واهلها مافي معازيم كثير اعطوني رايكم؟ افكاركم؟ نصائحكم؟ وشكرا مقدما:d |
بعد الملكه اطلب جوالها من اخوها ولا كيف؟
جوالها خذه منها هي انت مملك وما تبي تكلمها ؟؟ جد انك قليل خاتمه قولها كم رقمك مستحيل بتقول لك لا عيب انت الان صرت زوجها |
هههههههههههههههههه
شكرا يا ايميل والله ضحكتيني |
السلام عليكم .. الله يتمم عليكم بخير ..
وفكرة اخواتك ترى حلوه .. وهذي الموضه هالايام .. وانا قلت في موضوع ثاني عن طرق تقديم المهر .. ان فكرة الجنيهات الذهب مره حلوه وغريبه.. بس من كلامك عن الوالد اتوقع ما يوافق .. عموما .. خليك على العطور ودهن العود والعود .. اما اللبان ماله داعي .. والعود ترى مو حلو الازرق خله عود زي العاده .. وكل هالاشياء حطها بعلبه حلوه وغلفها .. والله يوفقك .. اما المكالمه .. امممممم .. كم باقي على زواجكم ؟؟؟ انا من وجهة نظري ما اايد ابد المكالمات .. ترى كثر الحكي يجيب المشاكل .. خليكم بدون مكالمات وان شاء الله تتهنون بالكلام والسوالف بعد الزواج .. جعلك الله من اسعد الناس .. ورزقك باحسن الابناء .. اللهم امين |
الله يسعدك ويكتب لك الخير معها ووين ماكنت..طيب أنا ماأدري يمكن تقول فكرتك مجنونه لكن دائما أقول لنفسي تلك الحكمه أن تكون مجنونا مع المجانين أفضل من أن تكون العاقل الوحيد بينهم..
طبعا هي طبيبه وفي ذات الوقت جراحه..صح الكلام.. اذن فكرتي كالآتي ولو هي قابله للتطور والأضافه ممكن الجميع يساعدونك ومايقصرون.. أولا المرأه بطبيعتها وأنا أتكلم عن معشر النساء بشكل عام يعشقن اهتمام الرجل ومشاركته بتفاصيل حياتهم أيا كانت..واعتقد ستكون هي سعيده بتلك الفكره لأنها سترى دعمك لها واهتمامك لماتحب..وتشعر بتقبلك للوضع فبالتالي ستعطيك أقصى طاقات التفاني لأجلك لأنك أوصلت لها شعور الأتحاد الفكري والمشاعر بينكما..وكي أكتب الفكره سأعود لاحقا بعد فتره الغداء لأركز جيدا.. أتمنى لك كل ماهو أجمل بالوجود ..في رعايه الله |
الف مبروك اخوي .. والله مو عارفه اقول لك مهزوم .. ان شاء الله تكون منصور .. حنا عندنا اذا تم كتب الكتاب .. يدخل والد العريس عشان يبارك لزوجة ابنه و لازم يلبسها ذهب .. مثلا سواره حلوه .. او خاتم يكون محرز .. يعني فيه قطعة الماااااس .. اما بالنسبه للمكالمات فاعتقد انها ضروريه عشان ينكسر حاجز الخجل بينكم و تتعرفون على بعض اكثر .. بالنسبه لرقم جوالها كيف تطلبه والله مدري .. لان زماني ما كان في جوالات .. ما في الا يدق على رقم البيت .. واذا ما لحقت ارفع انا السماعه يرفعها ابوي او اخوي الكبير .. عاااد انواع الاحراج و الفشيله .. بس كانت ايام حلوه .. وربي يسعدك .. |
دانة الرياض
امممممممممم اولا شكرا على الافكار وبنقلها لاخواتي يعني اني انا صاحبها ههههههههههههههههه بالنسبه للمكالمات انا اختلف معك خصوصا بوضعي هذا انا ابي اكلمها مو علشان اللي خبرك رغم انه لن يخلوا بكل صراحه بس في اشياء لازم انا وهي نتناقش فيها زي البيت وموقعه؟ اجازتها متى وكم مدتها؟ انا متى انقل شغلي؟ الزواج ابوي يبيه في شهر الحج بس خواتي قالوا حراااااااااااااااااااااااااااااااااااااااااام هي دكتوره وما بتفضى تقضي بسرعه فترك الخيار لي انا وهي بس يبيه بسرعه سابنا انتظرك والله يستر شكل فكرتك عمليه جراحيه ههههههههههههههه اميرات تشكرات وبالنسبه للجوال نعم انا معك لازم لازم لازم اكلمها اذا انا اخجل من اخوها اجل كيف هي؟ والعصير اللي قضيت عليه اكبر دليل ههههههههههههههههه سبحان الله بتزوج دكتوره وانا اكره الادويه والابر وحتى ريحة المستشفايات:23: |
اخي الكريم الف مبروك عليك
اما بالنسبة لتقيدم المهر .. الحين هذا الي سائد عندنا تبعث لها صندوق مزين .. يكون فيه المهر .. ومعاه بعض الهدايا مثل بخور دهن عود عطر سبري ساعة وغيره وتودي الصندوق محل لتغليف الهدايا حتى يزنونه بطريقة زينه طيب خلي خواتك يتواصلون معاها واخذ رقمها لا تستحي واطلب الرقم من اخوها .. حتى لو اتقوله ان حق خواتك علشان يتفاهمون معاها الله يسهل عليك ويوفقك اخي الكريم |
الله يسعدك اخوي و يتمم لكم على خيير يارب ...
رقم الجوال سهل ... خلي وحدة من خواتك تاخذ رقمها وانت خذه من اختك او او او اشتري لها جوال جديد مع خط جديد :) و اهديه لها مع هدايا الملكة او عند اول زيارة بعد الملكة واكيد بيكون معك الرقم :) الله يجمع بينكم على الخير و يوفقككم و يرزقكم الذرية الصالحة ياارب |
مبروك اخوي 00الله يوفقك ويجمع بينكم في خير 00
انا صراحه كنت مثلك ذبحني الحياء 00 وفاتتني ايام المكالمات الحلوه والغزل في الجوال قبل الدخله 00 وانتبه 00 لا يفوتك 00 وتعض ايديك ورجولك وبراطمك 00هههههههههه جب الرقم بالطب وللا بالقوه اهم شي تجيبه 00 مثلا اذا قعدت تسولف معها بعد الملكه 00 قل عندي مقطع بلتوث برسله كم الرقم 00 هههههههههه (( ليه مقطع البلوتوث يبي رقم )) ههههههههه يمكن تمشي عليها هههههه المهم بالتوفيق 00 ونتبه من السهر وفوتير الجوال 00 دق عليها دقه وسكر خلها هي اللي تتصل 00 هههههههههههه واذا جيت تروح للملكه خذ معك عجرا عشان تكسر الحاجز ههههه تراي اخوه احب امزح لا توخذني 00 الله ييسر لك امرك 00 |
| الساعة الآن 10:27 PM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©