|
الحمد لله على كل حال نتيجة الحمل سلبيه
السلام عليكم ,,
أنا متعبة , فسأدخل بالموضوع مباشرة من دون مقدمات ,, قد يعرف البعض إني قبل يومين عملت تحليل الحمل في المنزل وظهرت لي النتيحة إيجابية ... طبعاً فرحت حدي وخبرت بنات المنتدى وفديتهم فرحوا معاي وباركوا لي بعد !! وآنه رحت طيران اقعد زوجي من عز نومه واقوله بالخبر السعيد ... زوجي ما صدق خبر وطار من الفرحة ,, ومن فرحته ما كان عارف شنو يسوي ولا شنو يقول غير إنه يقوم على طول ويصلي ركعتين شكراً لله .. جعلتني الظروف انتظر يومين دون الذهاب للمستشفى لعمل التحليل بالدم واتأكد وآخذ الخبر اليقين فلكم أن تتخيليوا كيف كان حالي بهذا اليومين سعيدة ومرحة واظن إني فعلاً حامل !! وزوجي الله يخليه شلون كان حريص علي ويعصب علي لو ركضت او اي شي .. الخبر اليقين أخذته البارحة ,, عند ذهابي مع زوجي للمستشفى .. سوت لي مساعدة الطبيبة فحص (بالبول) وانتوا بكرامه وكانت حدها مالها مزاج ومعاملتها معاي كانت كلش مثل الزفت !! يعني صج كان الوقت متأخر من الليل ويمكن فيها نومه ! بس مو جذي تتعامل معاي .. عفست مجاي بتعاملها معاي ... وصدمتني لما قالت لي :: أنتي مو حامل ! (انصدمت وصعقت) : آنا مو حامل ؟؟؟ - لا , انتي شنو في مشكل ؟ - الدورة ما جاتني !!! - تبين تكلمين الدكتورة ؟ - اي! وينها - اوكي بس نطريها بره لأن الحين مشغولة , طلعت من الغرفة حتى اقول حق زوجي بالسالفة... (لحد الحين عندي وعنده أمل ) قالي انزين نطري الدكتورة .. وقولي لها بالاعراض الي تحسينها وشنو سالفتها .. آنه بذاك الوقت كنت حدي مالي مزاج شيء ,, حسيت قلبي يعورني وراسي بينفجر صج احساس ما اقدر اوصفه مع إني كنت عندي أمل قوي ولكن احس روحي تحطمت !! ماقدرت انطر ,, او اصلا رجولي ما كانت تقدر تشيلني ,, من بعد مناقشة بسيطة بيني وبين زوجي قلت له ما اقدر انطر أكثر والدكتورة مشغولة الحين - بس لازم تدشين تسألينها تشوف شنو سالفتج !! - مابي .. ماقدر اوقف ولا انطر ولا ثانية وحدة ,, - اشفيج زعلانة حبيبتي لازم تجوفين على الاقل ليش ما نزلت الدورة للحين ! - انزين ودني اي مستشفى ثاني ,, اقولك تعبانة ومابي اوقف هني ولا ابي اروح اقعد هناك (هناك يعني الكراسي الي تنتطر عليهم الحوامل الي بدشون على الطبيبة) كنت مابي اقعد معاهم ,, مادري ليش ... !!!! أخيراً طلعنا من المستشفى,,, ورحت مستشفى ثاني ,, كانت الساعة 12 وشوي بالليل وكنت تعبانة حدي , بس الحمد لله خلوني انسدح على السرير وخذوا فحوصات ... وسألني الدكتور جم سؤال بعدين قرووا يآخذون لي تحليل ,, وخذوا مني تحليل (بول) وخذت مني بعد (دم) المهم مابي اطول عليكم ,, لأن أصلاً أحس مرت علي هالساعة ابطئ ما يكون ! وكنت على حالي منسدحة على السرير واصيح وزوجي مرة يهدأ فيني ومرة يدرس في الاوراق الي عنده حق الامتحان !! (صج فاضي) على ما جت نتيجة تحيليل البول ,, وقالوا (مو حامل) طبعاً ما له داعي اقولكم شنو كان شعوري ,, وشلون كنت محبطة بس حمدت ربي واستغفرته ... كنت صج صج مصدومة !!! بس لازال هناك باقي أمل ,, وهو تحيليل الدم ,, التحليل الي بيعطيني النتيجة 100% بعد إنتظار وإنتظار .... اتى الدكتور ,, وقال مثل الكلام (مو حامل) وعطوني موعد يوم السبت عشان يشوفون شنو سالفتي ,, طلعت مع زوجي للسيارة عشان نرد البيت ,, كنت خلاص تعباانة تعبانة من كل شي ,,, واحس ابي اغمض عيووني ,, تسندت على الكرسي وغمضت عيني ,, وزوحي معورة قلبه علي ومنقهر مني يقول لي (مو زين تسوين بروحج جذي ) ,, والخ من كلام الحمد لله رب العالمين ,,, آنه ما اعترض على حكمه ربي واصلاً هذي ارزاق والله يعطي الي يبي ... وآنه ما بآخذ رزقي إلا لمن الله يكتبه لي .. بس الي صار لي مو شووي !!! ... تعبني وأثر على نفسيتي ... حتى إن اليوم الجمعة ما طلعت ولا لي نفس اشوف أحد ! المهم البارحة قبل ما نرد البيت , مرينا على الصيدلية الي شرينا منها التحليل ونزل زوجي يقول لهم بالسالفة ,,, الي هناك طعباً استغرب وقال مدام طلعت النتيحة ايجابية المفروض تكون حامل بس غريبة الي صار معاكم ,, الحمد لله الحمد لله ,, من قال غريبة ؟؟ مافي شيء غريب على الله اصلاً ... وكملنا طريقنا للبيت ... أنا لحد الحين متأثرة بلي صار .. واحس روحي مخنوقه ,, وزعلانة مو قصدي اعترض على الي صار (استغفر الله) ولكن من حقي ازعل واعتقد شيء طبيعي تتأثر نفسيتي .. يعني الي صار مو شووي ,, عشت يومين على وهم إني حامل .. انزين والاعراض الي تجيني ؟؟؟؟ (الم اسفل الظهر - الم البطن - الدوخة - الافرازات) والاهم من هذا كلله الدورة للحين ما شرفت ولا لها أثر .. !! ع العموم بكرة موعدي ,, ادعوا لي ,, مادري اشفيني ,, إن شاء الله خير , واعتذر من العضوات الي خليتهم يفرحون لي على الفاضي =( المعذره تم تغيير العنوان الاشراف |
الله يشفيك ويرزقك ماتتمنين
انه على كل شئ قدير |
ياقلبي لاتحزني ولاتتضايقي ربي معاك
وان شاء الله قريب نفرح بحملك الله يرزقك الذرية الصالحة في القريب العاجل ربي يشفيك ويعافيك ويحقق لك كل ماتتمنين |
اللـــــــــه يرزقك بالذرية الصالحة عاجلا غير آجل
حبيبتي لاتيأسي من رحمة الله قيـــــه ثنتين من قريباتي واحدة جلست 10 سنوات بدون حمل والحمد لله هي اللحين حاامل وبانتظار مولودها الأول>>دعواتك بأن الله يتمم عليها هذا الحمل والثانية جلست 15 سنه وحملت بعد ماالكل فقدوا الأمـــل في حملها ومن الله عليها بستة ورووود الله يحفظهم ويخليهم لها.... انتــــــي افعلي الأسبــــاب من علاج ...ودعاء ... وتوكلي على الله (أنت تريد وأنا أريد والله يفعل مايريد) |
مشكورين حبيباتي ,,, والله يسلمكم ويعافيكم ,,
والنعم بالله ,,, وإن شاء الله يسمع منكم ويستجيب دعائكم ,, والحمد لله أنا لا ايئس من رحمة ربي ..... فـ ما اختارهـ لي أنا راضيه به الحمد لله رب العاملين ,,, واستغفر الله الذي لا اله إلا هو الحي القيوم |
يا حيااااااااااااااااااااااااتي انتي
ولاااااايهمك خيرة من الله عشان يختبر صبرك ويفرح بسماع صوتك وانتي تدعي وتستغفري اكثري من الاستغفااار ترى ربي اكرم منه مااافي ان شاء الله ربي يعوضك ويفرح قلبك وقلب زوجك بس اذا دورتك منتظمة ومانزلت معناته حمل ، بس تحليل الدم هو الاصح بس اقولك انه النفسية تأثر بشكل كبيييير في الدورة فانتي اتركي الامور كلها على اللي خلقها وانسي تماما موضوع الحمل ولا تترقبيه كل شهر والا ما يجي يوم وتكتشفي انك حامل وانتي ماتدري ياااارب يطعمك باللي تتمنيه ويقر عينك وعين زوجك يارب خلي املك بالله كبير واحسني الظن فيه وهو ماراح يخيب املك |
ربنا يصبرك يا حبيبتي و يرزقك بالحمل عاجلا غير آجل و يقر عينك بشوفة ولي العهد قريبا يا رب
|
الله يعوض عليك
بجد بكيت الله يسامحك |
يااااا قلبي انتي ... تدري اول وحدة اصادفها بحياتي
يخربط معاها الجهاز ... مابقول و لا بعلق الا لما نتاكد من فحص الدم ان شاء الله .... ياااااااااااااااااااارب تطلعي حاامل حبيبتي و ترجعي بكككررررررة فرححححاانة مووووت استبشري خير ان شاء الله و لا تتكئبي و استني لبكرة قومي اتوضي و صلي ركعتين و ادعيه سبحااانه .. و اتاكدي والله بدعي لك بكل صلاة ويارب يااارب يااارب تفرجيني بككككرةةةة يااارب العالمين >> عشان المكرونة بالباشميل .. اضحكي ياقمر ولا يهمك ... ان شاء الله حمل و يبين بالدم واذا لاقدر الله لا قدر اللله لا قدر الله ماطلع حمل و لا تزعلي نفسك .. روحي البيت واستمتعي شوي مع ابو الشباب و انبسطو قبل ما يجي النونو و تنشغلي بالحفايظ :) |
اقتباس:
آميــــــن يارب العالمين ,, أنا أعلم إن على كثر استغفار وتقربي لله سأكون مقصره كثيراً وما سوف يكتبه الله لي ما هو الا كرماً منه ... أنا هالشهر بالذات انشغلت عن سالفة الحمل لأني انوي عمل عملية تصحيح نظر لي ولأني انوي أن اتدرب السياقة قريباً ,, فقلت ربما هي خيره لي حتى اتمم ما في بالي ولكن هذا ما حصل معي ... والشيء المحير حقاً ,, دورتي منتظمة جداً ولا تتأخر إلا نادرة ويكون تأخيرها يوم واحد فقط وأنا لحد الآن متأخرة علي خمس ايام , لا أنا بحامل ولم تنزل الدورة ,, هذا الشي مزعجني وايد واحس بالقلق بس إن شاء الله غداً سيكون موعدي ,, وسأرى ماهي المشكلة اقتباس:
شكراُ لك عزيزتي ,, كم تفرحني دعواتكم يا اخواتي اقتباس:
اعتذر منك عزيزتي ,, فأنا لم اقصد وشكراً لك |
| الساعة الآن 01:34 AM. |
Powered by vBulletin® Version 3.8.7
Copyright ©2000 - 2024, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©