اخوي الوحيد اتمنى يكون رجال
 

السلام عليكم

احنا كلنا بنات وكان عندي اخوا كبير البكر بس توفى

وامي جابت اخر العنقود ولد وسمته على اخوي المتوفي


وامي روحها معلقه فيه لانه الولد الوحيد ولانه على اسم اخوي المتوفي


امي طبعا فاتحه حساب باسم كل شخص وحاطه فيه ورثه من ابوي والي يبي شي ياخذ من فلوسه

وباقي الورث عند عمي يشغلها وما نقدر ناخذ منها شي لان الحمد الله عندنا الي بالحساب واجار البيت

اخوي عمره 15 سنه اومي تبي تشوفه كبير باي طريقه

كل ما بغى شي راح يصرف من فلوسه واحنا نقوله ماينفع كذا كل شوي تسحب من حسابك على اشياء تافهه

كل شوي يغير جواله والمشكله يشتريه وبعدين يرميه

وهذي حالته اي شي نفسه فيه يشتريه اخر مره اشترا جهاز بلايستيشن بثلاثه الاف

وضيعه في المطار ولا اهتم عااااااااااااادي انواع البرود لانه ماحس بقيمه الفلوس

الان ازعج امي يبغى يشتري سياره تخيلوفو في السن هذا وامي ماعندها مانع بس متردد لانها عارفه انو احنا ماراح نرضى وخايفه من كلام الناس

بس اتوقع السنه الجايه تشتري له وسياره على ذوقه

لما امي قال الفلوس ماتكفي سياره الان مزعجها يبي دباب وامي وافقت وكلنا اعترضنا وشلون يا ماما هذا اخونا الوحيد

ماتخافين عليه تقول المكتوب بيصير

احنا عارفين ان الناس راح ينتقدونها وقلنا لها يا ماما لا تفشلين نفسك ترا الناس بيتكلمون فينا

ولا صدقتنا راحت واتصلت على عمتها لان ولدها عنده محل دبابات

وطلبت منهم يجيبون لها دباب وعمت امي ما سكتت سمعتها كم كلمه قاسيه واخيرا امي اقتنعت لانها مستحيل تقتنع منا

اقتنعت من عمتها لانها كبيره وفاهمه

الان المشكله ان اخوي صار خلاص ماتهمه الفلوس يبي يصرف وبس

غير كذا اخوي احس ان مافيه رجوله يعني لو شاف احد يضرب واحد من عيال اختي ما يحب يدافع يخاف


وكذااااااااااااااااااااااااااااااااااااااااااااااا اااااااااااااااااااااااب

وشكاااااك يشك في اخواتي الي اكبر منه انهم يكلمون شباب ورغم كذا اذا بغو يطلعون مع السواق مايروح معهم نقوله المفروض ما تخلي خواتك يروحون لحالهم مع السواق يقول انا مو فاضي


حتى مايعرف يسلم سلام رجاجيل لازم الواحد يقوله سلم على فلان او انه يسلم ببرود

مافيه شجاعه خواف ولا يشيل اشياء ثقيله مثل عيال خواتي

بفكر في نفسه وبس وويحب يهبل بالي اصغر منه حتى الاطفال الصغار مره

يطلع مع اصحابه احيانا يمرونه اصحابه ويروحو اسواق بعيده تبعد عن بيتنا نص او ساعه الا ربع

ومايجي الا متاخر بس هذا نادر مو دايما

بس دايم يطلع في الحاره ومع عيال الجيران


يحب يدعي عند الناس ومايحب يشوف احد احسن منه


بصراحه انا خايفه عليه اخونا الوحيد واتمنى يكون رجال بمعنى الكلمه


اخو نفتخر فيه وينشد فيه الظهر


دايما اكلمه واقوله خل عنك الدبابات والسيارت ليه ما تشارك في نادي فروسيه تتعلم الشجاعه والرجواله

والخيل مثل الدباب بس بدون حوادث :30:


ما ادري وش الحل معاه تكفون ساعدوني بحل قبل لايضيع اخوي

صدقت اخوي بس للاسفف امي مابقي احد من الجيران ومن المعارف الا ونصحها بس ما تقتنع ابدا


عشان كذا احنا تعبنا خلاص امي مافيها امل تتغير


اما بالنسبه لعمي فهو في عالم ثاني وحتى هو كان عنده علم ان اخوي كم مره ساق السياره بس عادي عندي ما يبي يتحمل مسؤليه احد

وللاسف هو عمنا الوحيد

اما اخوالي فهم في منطقه ثانيه عن الرياض وهذا احسن لنا ولهم لانهم للاسف ناس مصالح بس عند الجد ماتلاقس منهم احد

الف شكر لك اخوي وانتظر منك المزيد

الله يعينكم

فترة مراهقه رح تكون صعبه

لازم مامتك ماتطيعهوش فى كل حاجه لان الطريقه دى سيئه جدآ فى السن ده

أختي الكريمة

اقترح عليكم تسجيله

في المجمعات القرآنية المسائية

يشرف عليها ناس لهم باع طويل في تربية المراهقين

و تكون فرصة له لتكوين صداقات مع شباب في مثل سنه

إذا ودك حددي أنتم في أي منطقة من الرياض ( شمال ، شرق ، .... )

و أعطيك أسماء بعض المجمعات

شكرا للجميع المشكله خلاص اخوي تعود وامي هي السبب

واذا تكلمنا ما تسمع منا يعني صعب نغير امي وحتى كل اخواتي شالو ايديهم من الموضوع لان امي تزعل وتصير بينهم مشاكل

وانا الوحيده الي مصره ان اخوي يتغير يمكن لاني ماعندي عيال كثير وخواتي مشغولين مع عيالهم لان عيالهم بسن المراهقه

وانا ماعجبتني التربيه هذي ابيه يتغير عشان كذا ودي يسجل في نادي فروسيه

ودي يسجل في اي شي ممكن يغير من طباعه السيئه

ياليت بعد اذا فيه كتب ممكن تكتبون اساميها عشان اشتريها واعطيها هديه لاخوي

يعني في مره سمعت عن كتاب بس مو متذكره اسمه بس هو يتكلم عن عشره صحابه والله اعلم لهم مواقف جميله

حبيت اعطيه اخوي وولد اختي لانهم بنفس السن واعمل لهم مسابقه واطلب منهم يقراون الكتاب ويقولون من اكثر شخصيه عجبتهم وليه

وعلى كل سؤال بعطيهم مبلغ من المال لان هذي نقطه ضعفهم

قلت عشان يقرون الكتاب صح ويتمعنون فيه وفي القصص

اخوي اهلي ساكنين منطقه الجنوب بالرياض

أختي العرووووس

مالي معرفة بجنوب الرياض

لكن باسأل لك و أرد عليك

[info]الاشراف: تم نقله إلى قسمه المناسب (عالم التربية والحوار الأسري) [/info]

الله يعطيك العافيه اخوي ولو تعرف في الشمال حي الصحافه ياريت تدلني عندي بعد عيال اختي