مشكلتي مع النكد
 

السلام عليكم ورحمة الله وبركاته

الله يجزاكم كل خير على هذا الموقع

بصراحه سجلت فيه وكلي امل الاقي عندكم حل لمشكلتي

بدخل بالموضوع على طول واتمنى تتحملوني لاني بطول عليكم

انا متزوج من اربع شهور بس

لكن مشكلتي صار لها سنتين

في البداية خلوني اشرح لكم وضعي انا طالب في الجامعة وينصرف لي راتب بسيط من الحكومة بس الحمدلله عايش مع اهلي وعلاقة زوجتي مع اهلي ممتازة وهي راضية بهالوضع

لكن للاسف في مرض وراثي بعائلتي وهو عدم القدرة على الانجاب وانا فيني هالمرض لكني اتعالج والامل بالله كبير

من وانا صغير كنت بيتوتي ما احب اطلع وايد ومالي اصحاب كثييير ومنغلق على نفسي ومريت بكم تجربة حب قبل زواجي وفشلت فيهم فشل مش هين

طريقة معرفتي بزوجتي هي كالتالي :

اتعرفت على بنت جيرانا او بالاحرى هي اللي تعرفت علي ولاحقتني من مكان لمكان وصارت تكلمني عن طريق اختي وتكلمنا على الموبايل

استمرت علاقتنا سنتين لكن ما مر يوم من غير لا نتخاصم فيه احيانا على شي كبير واحيانا على اشياء تافهه

كنت اقول لعمري اتركها واتخلص منها لكن خوفي من اني اعيش تجربة فاشلة مرة ثانية يمنعني من هالشي

وبعدين للامانة انا كنت اعرف اني ما راح اخلف قبل لا اتعرف عليها وخبرتها وهي قالت لي انها مستعدة تستحمل اي شي عشاني وهذا خلاني اقدرها واذكر نفسي دايما انها وقفت جنبي ومستحملة عشاني

انا ادري انها تحبني وتموت فيني لكن المشاكل بينا تزداد يوم ورى الثاني كنت متخيل انه بعد الزواج راح تروح المشاكل لكن للاسف في ثاني يوم زواجنا والمفروض تكون احلى الايام ونكون مشتاقين لبعض اتزاعلنا وصارت مشكلة الها اول ما لها تالي

والله العظيم نفسي اقعد معها اسبوع من غير مشاكل ومن غير نكد لكن يا تيجي منها يا تيجي مني

احيانا اكون انا غلطان واحيانا هي والحين سبب زعلنا انه ولله الحمد عندنا 3 خدامات في البيت وكل ما اطلب منها شي تخلي الخدامة تسويه ويا ريت تراقب الخدامة وتشوف اذا سوت هالشي ولا لا

يعني امس كانو عندي ضيوف خبرتها خلي الخدم يحطون فواكهه وشاي وقهوة وهي خبرتهم لكن طلعت على حجرتها ويلست اتطالع فيلم وروحوا الضيوف وما تحلو

بذمتكم مب شي يقهر

الحين انا مطنشها ولا قمت اكلمها ابد حتى غرفتنا قمت انا ورتبتها قلت يمكن تحس فيني وما عدت اطلب منها اي شي لو ابى فطور قمت اسويه حق عمري وما اخليها تسويلي ياه حتى لو كوب شاي اسويه حق عمري

الحين هي انجنت من تصرفي هذا وطول الليل تصيح وما رقدت عندي نامت بغرفة ثانية

دلوني على حل يشيل النكد يا جماعة الخير والله تعبت وما خليت طريقة والحين مجرب طريقة التطنيش وان شاء الله تنجح

الحل انك تضع النقاط على الحروف ..
لازم تتحاور واياها وتتفاهم معها على هذا الشيء ,, ويكون الحوار لما تكونوا كلكم هادئين وبعد ماتصفى نفوسكم من بعد هذه المشكلة الاخيرة اللي ذكرتها ,,
بين لها انك ماااااتحب الخدامة تسوي كل شيء ..يعني دورها فقط انه تنظف البيت وتغسل الاواني أما الاكل وتجهيزه قولها:
انا من زمان منتظر اليوم اللي اطعم فيه اكل من يدك واشوفك تقدميه لنا بطريقة زينة ياعمري ,,
وقولها ( كفاية المر اللي لقيته من الخدامات وانا عزوبي )......الخ
وشجع زوجتك لما تدخل تطبخ او تجهز الاكل ..مثلا ادخل معها المطبخ وقولها تحتاجين شيء ياحبيبتي اساعدك فيه ..وهكذا ,,
نصيحة اذا زوجتك دائما متوترة ومتنرفزة خليها تكثر اكل السمك لانه يخفف التوتر :30:
الله يصلح بينكم ويرزقكم الذرية الصالحة ,,
وفقكما الله

زوجتك يمكن ماسوت هالاشيا إلا لانها متضايقة منك وصايرة تعاندك ..

لازم تقعد معاها وتتصارحون في كل شي وتحطون حل حق هالموضوع بشكل ودي وتعود المياه إلى مجاريها

تحياتي

التطنيش لا يحل المشكلة.. التطنيش هو هروووووب كبير... يجعل الأخطاء تتحول الى مشاكل ..والمشاكل الى مصائب مدفونة تنفجر في اي وقت
الحوار ...لا الهروب