|
أنا في معاناة بعد فطام طفلي
بسم الله الرحمن الرحيم السلام عليكم ورحمة الله وبركاته بجد بجد أنا محتاجة مساعدتكم لأني تعبت مع ولدي عمره سنتين و8 شهور تقريبا بعد ما فطمته من الرضاعة لأنه كان متمسك بيها بشكل غير طبيعي وما ينام إلا وهو حاضنها عدت فترة والله ما يذكرها والحمد لله قلنا في تقدم لكن لنا تقريبا اسبوعين والولد يصحى من النوم يصرخ بأعلى صوته يبغاها وأنا خلاص عودتوا على شرب كوب حليب قبل لا ينام أقسم بالله جاب لي الجنان كلمته بالهدوء وقلت ياحبيبي الرضاعة حقت النونو على اخوه انت كبير ورجال ولا كأني اكلمه مطنش على الآخر الشي الثاني ماشاء الله عليه من عمره سنة وهو في غرفته مع أخوه الكبير لنا اسبوعين اصحى ألقاه وسطنا أنا وأبوه وارجعه لسريره وشوي ويرجع وسطنا لا ويزيدها صراااااخ الولد هذا طير النوم من راسي أقسم بالله اني تعبانة بجد وماأنام مضبوط قريت عليه مافي فايدة يعني تخيلوا أكون سهرانة مع الصغير أبو 7 شهور ودوبي أدخل في أحلى نومة ويجي الثاني يقومني والله تعبت حتى الحمام اعزكم الله تعبني فيه مو راضي يتعلم لالالا أخوه الله يحفظه ماتعبني زي كذا زوجي يقولي انتي كسلانة ماتتدربيه على الحمام وأنا الله يعلم اش اسوي يبغى يقلد أخوه الصغير في كل شي رضاعة وحفايض ونوم عندي .........صح له فترة ما كان فيه شي بس قبل الإسبوعين هاذي وخاصة وقت ما مرض الله يحفظه اتغير ما أقدر اجلس مع ابوهم دقيقة وحدة يجي من دوامه في الليل يلقاني محاطة بالإثنين بس الصغير ماتعبني يرضع وأغير له وينام ما شاء الله لكن الكبير هو مشكلتي حتى أبوه صار يتضايق من تصرفاته ودلعه بالله عليكم انصحوني ساعدوني بأي شي أنا فكرت اجيب له شراب الكحة اللي ينومه ويريحني يا ليت تنحل مشكلتي ( على فكرة انا أقومه الصباح بدري ويلعب طول اليوم عشان من بعد العشاء ينام بس ما في فايدة وجربت مرة خليته يغفي شوي الظهر وكمان مافي فايدة) شكرا لكم لسعة صدركم وسامحوني اكتب وانا راسي مصدع منه تحيــــــــــــــــــــــــــاتي عذرا تم تعديل العنوان ليتضح المضمون الاشراف |
وعليكم السلام ورحمة الله وبركاته
هدي أعصابك واضح أنك منترفزه مره ,,,, الله يخليهم لك يارب أنا كنت مثلك جبت طفلي الثاني والأول عمره سنتين تقريبا وكانت فعلاُ معاناه ,,, لكن من كلامك طفلك الكبير ماتغير الا هالاسبوعين لانه تعبان فأنت راعي حالته الصحيه وعطيه من حنانك يبي يحس باهتمامك شوي ,,,, الكبير اللي مثلي ومثلك يحتاج أحد يحس فيه وقت مرضه فما بالك بالصغار ان شاء الله أنها فتره وتعدي على خير الله يخليك لهم ويخليهم لك ويجعلهم من عباده الصالحين يارب |
ماادري وش اقولك
اسالي المجربات من الأفضل ... خليه على راحته ولاتشيلي هم باين عليه يعاند وربما ذكي بسم الله عليه فخليه على طبيعته ولاتشدي عليه واذا منطش لاتقولي شي ولاتحرقي اعصابك خليكي طبيعيه فهو يعاند ويحب على راحته حاولي تناقشيه بحوار جميل وخذي رايه حتى تعرفي الأسباب منه مع الأيام يتحسن وضعه ان شاء الله ماعليك الا الدعااااااء وفقك الله لكل خير |
السلام عليكم،،
غاليتي صراحة ما صار عندي هالموقف لان كل عيالي بينهم 3 سنوات فرق، بعطيكي من خبرة أختي الله يحفظلها عيالها بينهم سنة و شهور، يا الله كنهم توم كيف تجيبهم ورى بعض الله يعطيها العافية، المهم لاحظت إنها تنومهم مع بعض كل واحد بفراشه بغرفة وحده، لما ترضع النونو تعطي الكبير زجاجة الحليب و تحطه جنبها و هو يرضع تكلمه بلطف و هدوء تفهمه إن هو أحلى من البيبي، و هو رجال و انه الاكبر و هي تحبه اكثر منه، و تقرا لهم قرأن لما يناموا و تخليهم بمكانهم مع بعض لما يصحوا ما شاء الله هي هادية بطبعها، و سالفة الحفاظ تقوله "شوف النونو وسخ ملابسه، و هو ما نظيف" و تمثل عليه إنها زعلانه على الصغير لكن هو نظيف بيروح الحمام لوحده و ماما راح تساعده. ما شاء الله يبالها طولت بال، الله يوفقك و يعينك. تحياتي القلبيه |
اقتباس:
هديت اعصابي الحمد لله وسامحوني عايشة في قلق صادقة يا روز انه كان تعبان لكن الحمد لله مافيه شي الآن أحسه يدلع ويبغى يقهرني اقسم بالله اشتريه العاب اضحك معاه بس يرد علية بالضرب ولا يطنش وما اكذب عليكي هو بدأ يختلف ويتغير من يوم جبت اخوه طيب ارجع له الرضاعة ولا اكمل معاه على الكوب لحد ما يتعود صح ينرفزني بس يحزن وهو يترجاني يبغاها ............اش رايك الله يعينك ويعيني ياااااااااااارب مشكورة على دعواتك ياعسل وجزاك الله خير تحيــــــــــــــــــــــــاتي |
اقتباس:
الله يسعدك يا همس القلوب ويرزقك بالزوج المحب والحياة السعيدة والذرية الصالحة هو باين عناده مرة وانا مستعدة اطنشه لكن ما اتحمل صراخه ما شاء الله عليه عليه صوت ينرفز ولما يبغى حاجة إلا يسويها وما يسمع كلامي لا انا ولا ابوه تخيلي يطنشني ويطنش ابوه لو كنا في البيت أو في اي مكان ثاني ولا يخاف الله يهديه ما ينفع معاه حوار لأنه ما يعطيني وجه اصلا وعلى قولك مالي إلا الدعاء بس حبيت اسأل اللي مجربات هالوضع مثلي كيف اتصرفوا الله يسعدك ياقلبي وشكرا لمرورك الحلو تحيــــــــــــــــــــاتي |
اقتباس:
ما شاء الله عليك احسن لك ان بينهم هالفرق الله يحفظهم لك انا ولدي الكبير عمره 7 سنوات وبعده هاذا الله يهديه بينهم 5 سنوات تقريبا عشان كذا ما تعبت معاهم لكن الله اراد وحملت بالثالث وهو لسه صغير صدقيني اعامله كم مرة بلطف وحنان لكنه عفش رغم انه ماشاء الله اللي يشوفه يقول بنوتة من نعومته وبصراحة هو اتغير من يوم ما شرف اخوه لكن تعبت معاه وهو خلاص قرب الثلاث سنوات هل ارجع له الرضاعة لحد ما يتركها لوحده ولا اكمل ؟؟؟؟ بالنسبة للحمام ندلع ونلعب ونمدح ولا حياة لمن تنادي بجد الأطفال مختلفين عن بعضهم ما تعبني الكبير مثله لكن الله يعين ويساعد جزاك الله خير ياقمر والله يحفظها اختك على طولت بالها ويسعدها شرفني مرورك الكريم تحيــــــــــــــــــاتي |
السلام عليكم ورحمة الله وبركاته
بالليل خلي ابوه يكلمو ويهددو بالضرب قسي قلبك شويه ومن جهة البكاد وقت يبدا بالبكاد امسكيه من يده وادخليه غرفه لوحده وقولي له وقت تنتهي من السنفونيه اخرج انما ما تغلقي الباب على الآخر وكل شويه اسأليه : انتهيت ام بعد بالليل اخبريه انو والده جايب عصا كبيره قربو ويا ويل ويلو اللي يقرب صوب الغرفه اتفقي مع ابوه واخوه الاكبر الله يساعدنا انا اكثر شي تعبتني بنتي والله جا وقت ما تنام الا فوقي وخدها على خدي ويا سلام وقت تظبط النومه انما بالآخر عصا كبيره وقسيت قلبي وكان صوتها يوصل لآخر الشارع وعنا ممنوع بعني اي جار يسمع صوت ولد بهذا الشكل يتصل بالبوليس يحسبوه عنف عائلي انما مشي الحال هم الاولاد هيك يفاجئونا كل يوم بشي جديد اهم شي ابو العيال الليل له |
اقتباس:
الله يلهمني ويلهمك الصبر ويعينا على تربيتهم |
عذرا تم نقل الموضوع الى ركن الطفل حيث مكانه الانسب
|
| الساعة الآن 06:51 PM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©