يعايرني من حولي
 

هذي جديدة علي ..

يعايروني ..

وحدة من صديقاتي تزوجت من فترة ..كلمتها ..سوالف عادية

سألتني السؤال المحتوم ((ها ماانخطبتي ؟؟))

جاوبت :لا ..

قالت ياالله معليش ..صحيح انك كبرتي ((وضحكت)) ..بس ياالله معليش ..

تخيلوا ..لا تقولها وهي تضحك ..

تعايرني ..

هنا في البيت ..لما أجي بعمل أي شي جديد ..يعايروني ..

نويت أغير غرفتي ..ضحكوا علي ..

بااستهزاء يقولون ((وليش تغيرنها ..مايدخلها غيرك..؟! ))

نويت أغير جوالي ..بس كذا من باب التغيير ..

ضحكوا علي ..قالوا نحسك تبين تعملين أي شي عشان تصيرين سعيدة ..

ياربي ..يعني حرام افرح ..يعني عشاني ماتزوجت مايصير أستمتع شوي ..

حتى لو أبخدع نفسي ..

أعوض نقص ..

مايصير ..

كبرت ..أي نعم ..

ماعاد فيه من يدق الباب ..

من سنتين مادخلوا بيتنا الخطاب ..لا والله أكثر من سنتين ..

مستغربة ..ليش ؟!!

ماعرف ..

يمكن لأني عقدت قراني وانفصلت ..صرت بعيون الناس مطلقة ..

أو لأني كبرت وألحين يبون بنات صغار ..يبون تحت الـ25 ..

أو لأن مافيني الجمال اللي يطلبونه..

أو لهالثلاث أسباب مجتمعة ..

طيب والحل ..

أذبح عمري يعني ..

كل اللي أقدر أسويه سويته ..

صدقة - دعاء -خطابات ..كل مايخطر على البال ومالا يخطر ..

اتخذت بالأسباب ..

وصبرت ..وطال الصبر ..

ماباقي شي على الثلاثين ..

أمس بكيت ليما حسيت بصعوبة في التنفس ..

ماعدت اتحمل ولاااااا كلمة

ولا نظرة ..

تهربت من التجمعات ..عزلت نفسي

أخاف أسمع كلمة تضايقتي ..

إذا مارديت ..تتعب نفسيتي ..

وإذا رديت ..تصير مشاكل

والحل ..

أكل وشرب ..,ونوم ..

على قاعدة ((صل فرضك ..واقبض أرضك ..وخلها للي عيونه ماتنام..ونام ..))

للحين عندي أمل ..

بس ساعات أضحك ..أضحك من كل قلبي ..إذا تخيلت أن فعلا ممكن يصير ..

صعبة الحياة ..

صعبة جدا ..

بس ياالله ..

مو انا الوحيدة ..في غيري كثير

بس والله صعبة ..

الله العالم بلوعة الحزن ..وحرقة القلب ..

ربي وحدة يشوف حالتي بالليل ..والناس نايمة وانا أون ..وأبكي

أصحى من نومي أشوف المخدة مليااااااااااااانة دموع

تنميت اعيش وأفرح وأضحك ..حياة طبيعية مثل كل اللي عاشوها صديقاتي ..والبنات اللي في سني ..

بس للأسف ..ماصار

تهقون ..ممكن يصير ..

والله جاتني الضحكة ..

ياترى ..ممكن يصير

ههههه ..

والله ضحت من قلبي ..

وعنسنا ..وصار اللي صار..

ههه ..

الله يفرجها أختي
لا تيأسي من رحمة الله
و من يصدر منهم هذا الكلام
أناس أقل ما يقال عنهم
افتقادهم للذوق
بالعكس
عيشي حياتك
و اكثري من العبادات
و مارسي هواياتك بأريحية
و اللي كاتبه الله , فيه خير لك بإذن الله
و ما تدري ما تخبئ لك الأيام

أمنياتي لك
بحياة هادئة سعيدة

خلي الهمة عالية .. وخلي ايمانج برب العالمين اقوى من ذلك
الحياة مب بس زواج .. نحنا خلقنا لنعبد الله .. ونؤمن بالله
وجهي تفكيرج لهالشي .. وكوني لله فقط .. لا تهدج كلمات ناس مافيهم ذوق .. ما تدرين
كيف هم اصلا عايشين حياتهم .. ! رب يعوضج باللي في خاطرج واحسن من اللي في خاطرج ويرزقج الذرية الصالحة

آمين

أختي أمة الله....معايرة الآخرين تصرف يسيء لمن يستخدمه وليس للمتلقي وهو دليل نقص فيهم وليس فيك....الله يفرج همك....وعندي احساس ان زواجك قريب.

سيبك من كلامهم و لا تسمعي كل شي و تزعلي روحك

انا عمري 25 سنة مع اني ساعات اتضايق من ان محد خطبني للحين بس ما ازعل نفسي كثير مع اني و اعوذ بالله من كلمة انا بشهادة الكل على خلق و حسن و دين و لكن الله ما اراد اني اتزوج و و الله اراد بيتم و اذا ما صار خلاص ايش اسوي يعني

انا خالتي ربنا جاب نصيبها و هي عمرها 34 سنة و ماشاء الله عندها الحين 3 اولاد يعني صبرت و نالت



لا تزعلي نفسك عيشي و اشتري اللي تحبينه و فرحي عمرك ترى ما بقى من العمر شي انبسطي و افرحي انا اسوي مثلك


و لا تزعلي نفسك

السلام عليكم

حبيبتي لا تيأسي من رحمة الله،، اختي عمرها 30 وما اتزوجت لحد الان تشغل نفسها بالشغل وبالتلفزيون وهالامور اكيد في نفسها غصه ولكن هذا قدرها وسبحان الله ممكن اتأخر نصيبها ..
صدقيني قريبتي تزوجت وهي عمرها 35 سنة سبحان الله
وكمان قريبة صديقتي والله تزوجت وهي عمرها 40 سنة والان عندها طفل عمره اشهر سبحان الله
ان الله كريم وان شاء الله بيرزقك بزوج صالح وذرية صالحة امين امين امين عاجلا غير اجل

الله يرزقج اخية ويرزق الجميع يارب