|
مشكلة خطيبتي مع المكالمات
السلام عليكم اخواني انا الحمد لله ملكتي كانت الاسبوع الماضي والأمور تمت على مايرام بس الي شاغل بالي ومحيرني خطيبتي ..!!! اول مكالمه بينا كانت ساعه وعليها بعدين قفلنا لأن كان عندي موعد ثاني مكالمه ماطولنا ربع ساعه لانها كانت في بيت خالتها عندهم عزيمه وقلت كلميني قبل ماتنامين وأنتظرت وسحبت علي ما اتصلت ولا شي :d ثاني يوم كلمتها ساعتين تقريباً وسألتها ليش ما اتصلتي امس قالت ماعليش تعبت ونمت با الصاله وانا آسفه اني مارسلت لك مسج اني بنام !! المهم ثاني يوم رسلت لها مسج وسألت عن اخبارها وقلت وينك الحين ردت بعد ساعتين وطمنتني عن حالها وقالت انا في المطعم مع اهلي ورديت عليها بمسج على اساس اني بسولف معها با المسجات وسحبت علي الين الحين لاهي ردت بمسج ولا اتصلت :( يعني يومين ماكان بينا الا مسج واحد بس !! وطبعاً انا ماني متصل ولا مرسل مسج لأن الزم ماعلى الأنسان كرامته وعزة نفسه .. وعلى فكره دايم احاول اسولف معها با المسجات وهي ترد بمسج مسجين وتطنش ..!!! بس والله الشي هذا سببلي احباط نفسي وضيقة صدر لأني كنت رامي نفسي بكل مشاعري عليها وهي كانت باردة في مشاعرها معي بس طبعاً طبيعي هالشي منها لانها مستحيه مني .. بس انا ابي تحسسني بإهتمامها فيني وانها المفروض تحرص على المكالمات مثلي عشان تبدأ تفهمني وافهمها وتتعلق فيني واتعلق فيها .. على العلم اني احس بفرحتها فيني من خلال المكالمات ومن خلال قعدتنا مع بعض في الملكه .. على اساس ان ما احد فيكم يقول انها مغصوبه او شي من هالكلام لأني واثق من خلال تعاملها وسواليفها انها مرتاحه جداً معي ..!! بس والله مدري وش اسوي ابي ارسل مسج او اكلم بس متردد الين قررت اطنش والي يصير يصيــر .. والله احساس شين لما الواحد ماله الا كم يوم مع خطيبته وتكون سبب في ضيقة صدره والله يعطيكم العافيه ادري طولت عليـكم :29: بس تكفون الي عنده شي يقدر يساعدني فيه لايبخل .. لأن هالشي حطمـني واحبـطـني ..!! |
وعليكم السلام ورحمة الله وبركاته...
أخي أنا قرأت موضوعك كاملا ثم عدت لأتأكد من موعد ملكتك...فتفاجأت بأنها كانت الأسبوع الماضي فقط!! يا أخي لم يمض على عقد قرانك الا أسبوع فقط فكيف لك أن تتوقع منها سيلا من المكالمات والرسائل؟! هذه فتاة وليست شاب وأنا متأكدة 100% بأنه الحياء الذي يمنعها من ارسال الرسائل والإتصال فعليك أن تفرح بأن خطيبتك فتاة خجولة لا أن يضيق صدرك... لو أن عقد قرانك قد مر عليه شهر لنصحتك بأن تصبر حتى يزول عنها بعض حياءها... لا تتوقع الكثير وخصوصا في الشهور الثلاثة الأولى... عليك بالصبر ثم الصبر ثم الصبر... تحياتي... |
لا تخاف اكيييييييييييد مستحيه
وبعدين ما في كرامه بينكم انتوا زوجين عود نفسك وعودها انكم شئ واحد وممكن تكون الفاتوره او الرصيد مثقله عليها شوف اش وضعها يا انك تسدد فاتورتها او تشحن جوالها بس مو تدلعها ع الاخر كل شي بحدوووووووووووووود |
وعليكم السلام ورحمة الله أخوي الكريم !دروب الشوق! بارك الله لك وبارك عليك وجمع بينكما بخير أخوي توك للحين ما كملت 7 أيام من من عقدك لقرانـك ... وتبغـى منها كل ما كنت تـتـوقـع أو تتصور...!! ، فأقـولك بالغت بالتصور ولـو استمريت على ذلك قد تصاب بخيبة الأمــل وتتصـرف تصرفـات تنفركما من بـعـضكما ،،، أخي الكريم أرجو أن تكون الإتـصالات غير مبالـغة فيها وألا تكون ردات الفعل بينكما عالية ومبالغ فيه كما ذكرت بموضوعـك ، لكـن لعب دور الزوجـيـن لم يحن وقـتـه بعد ، فـأعـط كل مرحلة حقها وهذه مرحلة ميزتها أن زمام أمورها بيدك فأنت تحدد طبيعة العلاقـة بين زوجتك وكيف تودع في بنكها مخزون إيجابي يقوي العـلاقة، خذ لك جولة بالقسم وابحث عن مفضلة هذا القسم ،،، فتجد ما يسرك وينفعك ،،، استغـل هذه الفترة بما ينفعـك ويـقـوي العـلاقـة بينكما ولتكن هـادئاً وصبوراً في إظهار عـواطفـك لها فالعمـر أمامكـما ... وأرجـو أن تكون فترة الملكة والزواج قصيرة ،،، أخوك عزوبي:21: بس:d رجل:30: |
وعليكم السلام ورحمة الله وبركاته
باختصار اخوي اعتقد الخجل هو الي يمنع زوجتك انها تكلمك او قد يكون السبب ان بعض البنات يخافون يطيحون من عيون ازواجهم اذا كثرو اتصالات او مسجات الله يوفقكم ويسعدكم |
ياحليلك توك جديد ماشفت شي
تحل بالصبر لا تستعجل خلك ثقيل حبتين وبتهون ان شاء الله |
اقتباس:
>> و انت دورك كبير في هالمرحلة مامداك أخوي تبي تتغلى أجل وش نقول عن البنت اللي تستحي ، وش تبيها تسوي ؟ أنا أعرف لك بنات معارضين فكرة المكالمات و الزيارت و يقولون ما فيه إلا يوم الزواج يقعد معي و يسولف لين يشبع و إلا قبلها لأ و بإذن الله لمى تتحسن أموركم أكثر بتشوف الفرق و يمكن توصل مكالماتكم فوق الثلاث ساعات لمكالمة وحدة بدون انقطاع ^^^ و اسأل المجربين من المتملكين حاول تشجع زوجتك إنها ترتاحلك و تقرب منك أكثر لأنك إنت القائد وفقكم الله و يسر أموركم |
وعليكم السلام
تطمن اخوي هاذا شي عاااااااادي وانابقولك اقرب مثال : انا كانت فترة ملكتي اربع شهور وكان زوجي هو اللي يتصل علي ويرسل رسائل اما انا طول الاربع شهور ما اتصلت الا مره وحده بس وكنت مضطره بعد لاني ابي رأيه بشغله بس وكنت خجلاااااانه لاكن ما انكر اني كنت انتظر اتصالاته واشتاقلها, اما من ناحية زوجي لنا خمس سنوات متزوجين الا الان ماينسى هذا الاتصال إلي كان مدته ثلاث دقائق بس , فنصيحتي لك خل البنت على راحتها ولا تضغط عليها .:29: |
اقتباس:
اصبر عليها اخوي ... ولا تحكم عليها من بدري ... ربي يسعدك ... هموووم |
السلام عليكم ورحمة الله وبركاته
الحمدلله اسال الله ان يكون هذا اقصى همك الايام اجلاية راح تكون افضل |
| الساعة الآن 12:04 PM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©