|
رسالتي الى زوجي الخائن هل من اضافات ؟
السلام عليكم و رحمة الله
انا قلت لكم سالفتي مع زوجي الخائن و قررت ابقى معاه عالاقل شهرين احاول اعدله و اخذ بيده للطريق السليم انا لما احاور زوجي احسن اني اتعب و اتنرفز و انسى كل النقاط المهمه اللي ابي اقولها و احسن حل هو الرساله فقررت اكتب له هالرساله و في بالي كلام وااايد بس ركزت على اهم النقاط ارجو انكم تقولون لي رايكم و شالاضافات اللي ممكن احطها عالرساله حاولت اكتب كلام رقيق و حلو بس ما عرفت شأكتب بالضبط بس حاولت اعيد كلمة حبيبي و زوجي عشان ما يكون الكلام جاف حبيبي فلان.. من فتره احاول اكتب لك رساله بس انشغل مع العيال و ما ألقى وقت.. المهم..فلان انت تعرف اني احبك و اموووت فيك و انا متأكده انك تحبني.. بس فلان انا واااااايد متضايقه من خياناتك لي يمكن انا كذا مره عديت السالفه بس بصراحه ما اقدر اتحمل اكثر بلييز فلان اذا تحبني لا تعيد هالسوالف.. و اذا رحنا المستشفى عشان اركب اللولب ابيك تسوي تحاليل لاني بصراحه اخاف من هالبلاوي.. ابي اطمن عليك و على نفسي.. فلان.. ابيك توعدني انك ما تخوني ابدا.. لا خيانه جسديه و لا حتى بالتلفون..مثل ما انا احافظ على نفسي عشان زوجي.. ابي زوجي حبيبي يكون لي انا و بس.. فلان .. انا اعرف مشكلتك بالضبط ..انت مشكلتك تشوف افلام و ودك تسوي كل اللي يسوونه.. يمكن انا ما اقدر اسوي كل هالحركات.. بس انت تشوف اني احاول قد ما اقدر اني ارضيك.. صح و لا لا؟!! احاول قد ما اقدر اني اغنيك عن بنات الحرام.. بس انت الله يهديك.. مشكلتك الثانيه ربعك(اصحاب السوء) اللي على قولتك مو متزوجين و انا ادري ان فيهم ناس متزوجين و ما يستحون.. المهم الحل بسيط هالربع ابعد عنهم و اذا ما تقدر تبعد عنهم ممكن تكون معاهم بس ما تسافر معاهم لانهم بيجرونك للدمار و الحرام.. حبيبي.. انا ألاحظ ان هالخيانات ما تصير الا اذا سافرت مع ربعك.. شبيصير لو خذتني انا و عيالك معاك حتى لو عندك شغل معليش ودنا معاك حتى لو ما بتطلعنا المهم اني احفظك من الحرام.. مشكلتك الثالثه (اهم مشكله) هي انك ما تصلي و وااااااايد مبتعد عن ربك .. يمكن صعب انك اتغير في يوم و ليله بس عالاقل ابدا شوي شوي..صل عالاقل فرض في اليوم و شوي شوي بتتعود عالصلاه و ما بتفوت و لا فرض ان شاء الله .. فلان..فكر في زواجنا.. و عيالنا.. حلل نومنا مع بعض.. عود نفسك عالصلاه عشان عيالك يتعودون عالصلاه و عشان حياتك كلها تعتدل و الله حتى بترتاح نفسيتك و الله بيوفقك في حياتك.. الموضوع السابق خيانات زوجي ما الحل ؟ |
حبيبتي الله يعينك و يهدي زوجك
ما عندي شي اقوله اتمنى من الاعضاء يفيدوكي |
جزاج الله خير اختي
و بانتظار ردود الاعضاء |
اميرات بسرعه ردي
انا بصراحه احب اقرا نصايحج مع ان انتقاداتج شوي تعور قلبي بس احسج تفهمين في هالسوالف |
حبيبتي لازم رسالتك تكون أقوى من كذا
لأنه غلطان أحس رسالتك هذي كانك تترجينه |
اقتباس:
اسم الله على قلبك يا قلبي .. رسالتك يا اختي ضعيفه جدا لازم تكون اقوى من كذا .. لي عوده ان شاء الله اساعدك في كتابة رساله قويه .. |
فعلا رسالتك بارده لازم تهزينه بشي
|
مشكورين خواتي عالردود
انا حسيتها ضعيفه عشان جي كتبتها لكم عندي كلام واااااايد ابي اقوله بس هالثلاث نقاط هي الاهم و ما عرفت شلون اكتب الرساله بلين او بشده و صرامه بس اذكر مره قريت موضوع ان اهم شي في الرساله تكون فيها كلمات لطيفه و نصح و في نفس الوقت بليين ما ادري هل هالشي مطلوب في هالحاله و لا لا اخت اميرات بانتظارج حبيبتي الله يخليكم لي خواتي |
شوفي يا اختي .. بكون صريحه معك .. بدون ما تزعلين مني .. المشكله ليست في الرساله .. المشكله في شخصيتك الضعيفه امام زوجك .. لو بتكتبين مليون رساله قويه دام ان شخصيتك ضعيفه و زوجك عارف نقاط ضعفك راح يكون تأثير الرساله ضعيف .. انا لا اريد ان احبطك يا اختي .. لكن لتكوني على علم بنتائج رسالتك .. قد لا تؤثر في زوجك لانه عاااارفك زين .. انت لازم تغيرين من تفكيرك و لازم تكوني حازمه اكثر و تكوني صاحبة موقف ضد خيانة زوجك .. واضح ان زوجك مدمن خيانات .. وذلك ليس لعيب فيك انت .. انما العيب و الخلل من زوجك .. فمن يترك طريق الله يتجه الي طريق الشيطان ... زوجك ايمانه ضغيف و علاقته بربه ضعيفه لذلك الشيطان مسيطر على عقله .. زوجك يجب ان يعترف انه ماشي في طريق المعاصي عشان يقدر انه يتجه الي الطريق المستقيم .. لكن اذا كان زوجك عاجبه الوضع فاعتقد انه محتاج الي مصيبه كبيره تصحيه من غفلته لان الله يمهل و لا يهمل .. لكن ارجع و اقول ان تهاونك في اتخاذ موقف قوي ضد خيانة زوجك هو من جعله يتمادى في هذا الطريق.. معلش اختي اطلت عليك .. لنعد الي الرساله .. لتكن رسالتك خاليه من اي شوق او عتب و خاليه من الاستعطاف و الترجي .. قولي له انا كتبت لك هذه الرساله بعد ان عرفت ان الحوار معك ما ينفع .. ولن اقبل منك الخيانه لانها اهانه لي .. لقد تخطيت كل الحدود و قفلت جميع الابواب .. لقد كنت لك نعم الزوجه و نعم الام لطفلك .. صبرت عليك و على خياناتك و على سفراتك .. صبرت عليك وانت تشاهد هذه الافلام القذره المقززه و تريدني ان اجاري العاهرات في افعالهن و رضيت و حاولت اني ارضيك و لكنك لا تشبع لان النظر الي الحرام لا يروي و كأنك تشرب من ماء البحر فلا ترتوي انا ابحث عن رضاك و صابره ..لكن انت لم تكلف حالك و تبحث عما ينقصني .. ولم تراعي مشاعري .. بل انت لاهي مع اصحاب السوء من خيانه لاخرى و من سفره الي اخرى .. هؤلاء الاصحاب سوف يجرّونك الي المهالك وربي راح ينتقم منك في الدنيا قبل الاخره .. اتقي الله يا رجل و اصحى من غفلتك قبل ان ينزل علينا غضب الله .. ضحيت من اجلك و من اجل ان تستقر حياتنا و انت تكافئني بالخيانه تلو الخيانه ..بدل ما اسمع منك كلمات الحب و تشبعني عاطفيا و جسديا تتجهه بعواطفك الي الحرام و تتركني في همي و حزني .. هذا جزاة الاحسان ؟؟ الخيانه تلو الخيانه ؟؟ انا امرأه لي حقوقي .. واعرف جيدا واجباتي.. ولي احتياجاتي .. احتاج الى زوج يعرف حقوقي ويقدرها و يحترمها و اعيش معززه مكرمه في كنفه و تحت ظله .. لا ان اعيش مع رجل غارق في الخيانات .. و اصحاب السوء .. انظر الي نفسك .. الى متى وانت تسير في هذا الطريق المؤدي الي النار و بئس القرار ؟؟ الي متى سوف تترك الصلاه و الابتعاد عن الله ؟؟ متى سوف تفيق من غفلتك و تلتفت الي نفسك و الي بيتك و زوجتك ؟؟ اصحى قبل ان يخطفك الموت و بعدها تستيقظ ولن ينفعك الندم .. اختي لك مطلق الحريه في اقتباس ما تريدين من هذا الكلام .. خذي ما يناسب زوجك .. وربي يهديه الي الطريق المستقيم .. |
جزاج الله خير حبيبتي اميرات
مثل ما قلت لج احب اقرا نصايحج و لو ان انتقادج لي يعور قلبي و الله ان عيوني دمعت و انا اقرا كلامج انا اعرف اني ضعيفه و ودي اتغير بس ما اقدر انا اصلا شخصيتي ضعيفه حتى مع الناس ودي اتغير رسالتج عجبتني و الكلام اللي فيها قوووي وان شاء الله المره الجايه ما راح اسكت له و اول ما اعرف عن الخيانه بتصل لاخوي و بروح بيت ابوي مع عيالي هو يقول ان عنده دوره بعد شهر و طبعا بيسافر مع ربعه انا ابيه يعتدل الحين قبل لا يسافر لانه لو سافر انا متأكده انه بيخوني مره ثانيه انا الحين بطلع و برد عليكم وقت ثاني |
| الساعة الآن 05:31 AM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©