|
ذبحتني المقارنة بين زوجي وزوج أختي !
السلام عليكم ورحمة الله وبركاته قبل لا أبدأ بطرح الموضوع ، أنا متزوجة من ست شهور ، وزوجي الحمد لله طيب وهادىء ورومانسي ويخاف علي وما يقصر علي بأي شي.. ، والأهم من كل هذا انه يحبني ويموت فيني وأنا بعد أحبه.. الموضوع وما فيه اني متضايقة من نفسي جدا ونفسي أبطل هالحركة وهي اني دائمة المقارنة بين زوجي وزوج أختي ، مو غيرة والله بس أني أتمنى بعض الصفات اللي في زوج أختي تكون في زوجي . طبعا هالمقارنة تكون بيني وبين نفسي بس من غير ما أقولها لزوجي لأني ما أحب أقول له فلان سوى لزوجته ولا أحب أجرحه ،( أو اذا صدر تصرف من زوج أختي وأعجبني ،، أقول اللي صار لزوجي بس مو بقصد اني أقول له سو مثله ، لا أقولها على انها سالفة عادية صارت لكن أنا من داخلي أقولها علشان ألفت انتباهه بس بدون ما يحس بقصدي) .. وهو مو مقصر علي لكن عيبه انه في كثير من المواقف ما يسوي اللي بخاطري من غير ما أطلبه ، وبنفس الوقت انا خجولة وماني متعودة أطلب من أحد شي حتى لو كان زوجي لان الخجل ملازمني حتى وأنا عند أهلي ما عمري طلبت من أمي أو أبوي أي شي ،، اذا يعطوني آخذ واذا ما عطوني ما أقول ،، والحمد لله اني انسانة قنوووووعة بصورة كبيرة وبشهادة الجميع من حولي.. زوجي كريم معاي جدا حتى مخليني أنا اللي أتصرف بفلوسه مثل ما أبي يعني المشكلة من مقارنتي كلها مو مشكلة فلوس أو ان زوج أختي يعطيها وأنا ما يعطيني ،، لا بالعكس في كثير من الأحيان أنا اللي أرفض انه يشتري لي أشياء.. أو مثلا أمر بموقف أتمنى لو انه تصرف بتصرف معين (طبعا هالتصرف المعين هو يمكن ما جا على باله لكن أنا أتمنى انه يسويه) وأسرح بخيالي أقول لو فلان( زوج أختي) انحط بهالموقف راح يتصرف بهالتصرف .. يعني مقارنتي في الغالب تكون مقارنة شخصية زوج أختي بشخصية زوجي .. زوج أختي عنده شخصية ومنطق جميل في الكلام ، بس زوجي أحسه ما يعرف يتصرف بنفسه ومنطق الكلام عنده مو ذاك الزود ،، يعني مو انه يجرح أو يقول كلام ماله داعي ،، لا قصدي يعني ما يعرف يتكلم بأسلوب حلوو أو كلام منمق ولا يعطيني رايه في شي أي شي أقوله أنا يوافقني ما يقول لا أو يبدي رأي مخالف لرأيي.. يعني الكلام اللي أقوله أنا يمشي عليه وكأني انا الرجال وهو المرأة ،، وأنا ما أحب جذي ، ولا أتمنى هالشي له أحب زوجي تكون له شخصيته المستقلة وانه ياخذ ويعطي معاي في الكلام ويوافقني بأشياء ويرفض أشياء مو كل شي يمشي وراي .. حتى اذا قلت له كلام حلوو ، ومع انه رومانسي لكنه ما يعرف يقول كلام جديد من عنده يرد يرجع يقول الكلام اللي أنا أقوله ،، يعني أحس ما عنده شخصية مستقلة بذاته. وش الحل ؟؟ أدري ان الخلل فيني أنا مو فيه ،، لكن أتمنى أشوف ردود تشجعني على ترك هالعادة السيئة وبنفس الوقت تعطوني حلول ونصائح تقوي من شخصيته . |
السلام عليكم
اختي فيه ناس ماتعرف تترجم مشاعرها بالكلام لكن تترجمها بالافعال وماشاء الله زوجك مو مقصر معاك على حسب كلامك يعني كريم ولايجرحك ووبعد يعيد كلامك معناه ان يحاول انه يكون رومنسي بالكلام يمكن زوج اختك الي عاجبك فيه صفات شينه وزوجك افضل منه لكن الشيطان يخليك تشوفين الصفه الحلوه ويكرهك بزوجك وبعدين ليش تقارنينه بزوجك من الاساس .. اهم شي انه يحترمك ويقدرك .. الله يوفقك ويسعدك |
والله كيذا بتخرب حياتك لو بتقارنين اجل قارني بالعيوب ممكن تكون عيوب بزوج آختك ومو موجودة بزوجك ..
|
الله يهنيكم ويسعدكم والمقارنة ياما خربت بيوت والحمدلله انتم متفاهمين يااختي الاصابع باليد ماهم سوا
|
بعلق على نقطة واحده وهي
أن زوجك ما يقول لك لا و ما يخالف رأيك هذا ليس ضعف في شخصيته بل هو يفعل ذلك من حبه لك وخوفاً على مشاعرك لكي لا تزعلي وتتضايقي الحل هو أن تقولي له اريد أن تكون لك شخصية وكلمه علي واحيانا اطلب اشياء او رايك في اشياء وهي غير صحيح او غير حلوه علشان تقول لا لا لي بيني له ان قوله لا لاتغضبك ولا تجرحك ابدا وستلاحظيه يتغيير على طول |
الحمدلله ليش تسحبين النكد لبيتك وانتي لسه في بداية طريقك اشكري الله على نعمة الزوج ونعمة التوفيق واكيد في زوجك اشياء حلوة مافي زوج اختك والقناعة كنز لا يفنى
اهتمي بحياتك وعيشيها وانتي مبوسطة ولا تنظري لمن هو فوقك با انظري لمن هو تحتك |
أشكر جميع اللي ردوا وأحب أبين لكم نقطة وهو اني أحمد الله ليل ونهار على هالنعمة اللي أنا فيها الحمد لله زوجي ألف من تتمناه .. ومو ناقصه شي اقتباس:
حطيت هالفكرة براسي ألف مرة وبكل مرة والكامل الله ما ألقى فيه شي عيب علشان أقارن فيه زوجي وأرفع معنوياتي .. وزوجي بعد مافيه عيب كبير غير اني أتمنى تكون له شخصية قوية اللي أبغاه تعطوني طرق للتعامل معاه وبنفس الوقت تخليني أساعده على صقل شخصيته.. لأني مابي أوجه له كلام مباشرة وأهز ثقته بنفسه.. |
اقول أحمدي ربك وشكري فضله
تدرين انتي ايش مشكلتك .. أنتي مشكلتك أنك ما تدرين أن في صفات في الرجال تسحب وراها صفات ثانية وزوجك أختك ممكن يكون أسلوبه في الكلام حلو وعنده منطق .. بس صدقيني هالنوعية كثير من الاحيان تكون متحكمة وما تحب تمشي إلا رايها تدرين أنا أول مثلك انخدع بالمظاهر .. الحين لا .. صدقيني حياتك أحلى من حياة أختك .. ويمكن أختك بعد تقارن مثلك زوجك روعة بس ناقصة شي أنه يشد عليكِ شوي عشان تعرفين أن لما واحد ينفذ طلباتنا ويثق فينا مو معناته ضعيف .. لا .. معناته أنه أنسان ما يحب يسوي من الحبة قبة يدل أن انسان طيب وحنون وقلبه ابيض ولا عنده عقد بس لا تستعجلين جايتك الايام الي بيشد عليكِ شوي وبيقولك لا بدال المرة ألف ربي يوفقك ويهدي بالك |
اختي انت تبغي زوجك يصير نسخه طبق الاصل من زوج اختك ؟؟؟ هذا شيئ مستحيل .. لا تقولي لا انا ما ابغاه يصير نسخه من زوج اختي .. انت بمقارنتك له تبغينه نسخه طبق الاصل من زوج اختك .. لازم تقبلي زوجك بشخصيته كما هي .. و لازم تحبيه كما هو .. تأكدي لو انه يقلد زوجك اختك كان قلتي كيف اخلي زوجي تكون له شخصيته المستقله .. زوجك انسان طبيعي جدا .. بالمعاشره راح تتقبلي طبائعه و راح يتقبل طبائعك .. حاولي انك ما تركزي على تصرفات و لا تراقبي زوج اختك حتى لا تصير عندك مثل العاده .. و خليك قنوووعه و لا تخطفي عينك باصبعك .. وربي يسعدك .. |
اقتباس:
الحمد لله والشكر له بدل الألف مليون مرة أنا ولله الحمد سعيدة جدا مع زوجي ومثل ما قلتي هو طيب وحنون جدا وقلبه نظيف بس ماهي مشكلة اني أتمنى تكون لزوجي شخصية شكرا لك أختي |
| الساعة الآن 07:04 AM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©