|
آخر مستجداتي مع زوجتي
السلام عليكم ورحمة الله وبركاته
يسعد مساكم كيف حالكم يا اخواني عدت اليكم بعد غيبه وودي افضفض لكم شوي خلال الفتره اللي راحت من يوم ما رحت من عند زوجتي الى الان اللي بينا فقط رسايل واني اعيش في حاله نفسيه وصارت مستجدات خلال الفتره اللي راحت الوالد ذهب اليهم زياره وجلس مع زوجتي وقال ان زوجك ماهو مرتاح ولا مبسوط ومدري ايش قال بعدها وصلتني رساله منها انها تضايقت من هالشي وانك لو متكلم من قبل وقبل لا اتعالج بيكون اهون علي من الحين قبل ما اتحسن واحسن وضعي معاك واحط يدك بيدي انت مليت وانا ببداية علاجي انت صبرت وماقصرت وما جنيت ثمار صبرك وانا ماني جابرتك تصبر علي حبيت اوصلك اللي بخاطري فرديت عليها قلت انا ما قلت كذا والوالد عارف وضعنا وان قصدي ما هو مبسوط معك قصدي وضعنا اللي صاير وحنا اعلم فيه وانا لو اني ماني مبسوط كان ما تعاونت معك هذا من نفسي لاجبرتيني ولاصبرتيني وانا ابيك من نفسي امس ارسلت لها وقلت لها كيف تحسي وكيف وضعك الحين حاسه براحه وانا ما ابي اعذبك معي وبنفس الوقت ابيك ترتاحي وانتي مافيك شي السبب اني معك ولا قدرتي تاخذي راحتك وتعودين معي وعارف انك ماتبين كذا وتغصبي نفسك بس نتي قادره وما قصرتي تحاولي وبنحاول وانا معك وقلت لها تحسين اذا بعدت عنك ترتاحي هذا اللي خايف منه ولاهو بيدك ولا ذنبك وانا باقف معك من غير ما تطلبي وانا الحمدلله شايف انك مهتمه ومفرحني هالشي انتي ادرى بنفسك والكلام مو عشانا انا مليت لا اكبر من كذا وبيكون عشره مدري وش اللب ببالك او طفشتي كتبت هالكلام ابي اعرف شعورها وش تحس فيها ردت علي وقالت الحمدلله احس بفرق احسن من اول بكثير وما اكذب عليك لما اكون معك اتضايق واذا كنت عند اهلي واذا جاء طاريك اتضايق والله ما كنت اقولك لاني ما ابي اضايقك انت وانا لو احد يقول لي اتضايق تقصد نفسها بتأثر وبنفس الوقت كنت اظغط على نفسي واحاول مدريوش السبب اتعب واقلق حسيت بأحباط ويأست لاني قبل حاولت بس بدون فايده كنت اقول لا هالمره غير بسوي واسوي لكن لما تجي اتعب واتعب ويتغير كل شي لدرجة ما اقدر اتحرك احس اني مربطه بس انا الحمدلله الحين مداومه على الرقيه والعلاج واحس بتحسن دعواتك هذا اللي وصلني منها وعرفت وش تحس فيه بكلامها لاني انا من غير ما تقول شايف هالشي هذا مهي ماخذه راحتها بس ودها رديت عليها ادري غصب عليك ولا راح اقولك ليه شي من ربي ولاراح اشيل ابد شي ناحيتك لاني متاكد نفسك تسعديني وتسعدي دام انك تحاولي ولا ودي تحبطي لكن ما دام تحسي بتحسن الحمدلله بسوي اللي اقدر عليه معك عشان ترتاحي لانك تعبتي اكثر مني بس كله عشان ربي يوفقنا اذا الله اراد راح يكون وما ندري وش الخيره فيه بس الله يكتب اللي فيه خير هذا اللي صار يعني ما ادري وش اسوي انا حاس انها تعبت هي صح ماتبي بس احيانا اقول الطلاق راح يحل كل شي ويمكن الامور ما تكون زي مانحب لاني انا ابي انسانه تشبعني واقول لا بعد العلاج والشفاء بتغير 180 درجه وراح اكون معاها نهاية هالشهر واحيانا اقول لا هي بنفسها قالت اذا جاء طاريك اتضايق فكيف اذا صرت معها واهي تقول اتحسن انا واحيانا اقول لا اخر شي رمضان احس ان تفكيري يودي ويجيب يعني ادري انه غصب مو عيب فيني تتضايق او مقصر هي بنفسها تقول انا مقصره معاك بكل شي وان شاءالله ربي يفرجها دعواتكم لعل الله يبدل من حال الى حال |
الله يفرج همك ويشفي زوجتك
اي خطوه تبي تسويها استخير قبلها والله يكتب الي فيه الخير لك ولها |
الله يسهل عليك امورك وخلك واقف معاها حتى تتشافى
باين عليك رجل شهم واصيل تحياتي |
لاتتركها اخوي دان هي حاسه بنفسها وبتصرفاتها ...شئ مبشر بالخير...بس انت لاتتركها بعدين اسال الشيخ
احيانا المريض من كثر تهئيات مو قادر يضغط ع نفسو يعني هو خالق مشكله بنفسو....عشان كذا انت روح معها لشيخ واسالو لاتخليها تتعود.حتى لوتضايقت منك لاتحكي لها انو انت منتبه خليك طبيعي وتغافل انو هي متضايقه...اجلس بجنبها احضنها حسسها بوجودك... انت فكر فيها كثر البعد يخلق حاجز فكيف مع المرض روح معها قرب منها ....بس لاتتركها وهي تحبك |
الله يارب يجزاك الخير لتقديرك لزوجتك ومواصلتك واهتمامك فيها باذن الله نتايجها راح تكون كويسه وخلي شيخ يشوفها دايما ويقرا عليها
الله يعينكم يارب ان شاالله فتره وبتعدي |
الله يفرج عنك و يشفى زوجتك
|
الله يشفيها ويعافيها
ويسعدكم ويسخركم لبعض عاجلا غير آجل |
|
طول الوقت افكر وش صار عليك وليه تغيبت كثير
والحمدلله على رجعتك عقبال رجوع زوجتك بالعافيه لاتنقطع ياخوي عنا نبي نعرف وش صار معك لأننا كلنا معك ونحاتيك انا مادري وش اقولك صراحه بس عسى الله يفرجها عليك وعلي كلنا مهمومين ياخوي الله يفرجها لنا ولاحول ولاقوة الابالله |
اقتباس:
الله يجزاك خير يارب والخيره فيما اختاره الله |
| الساعة الآن 05:33 PM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©