يا جماعة الخير من تقريباً 6 شهور او اكثر توفي والد صديق عزيز علي ، فقمت بالواجب معاه ووقفت معاه بالعزاء ثلاث ايام وكنت اجيه في البيت من العصر وما اطلع إلا بعد ماينتهي العزاء الساعه تقريباً 9 بالليل ، لأنه الولد الوحيد لأبوه وماكان فيه احد يوقف معاه بالعزاء حتى عيال عمه اذا دخلوا البيت يعتبرون انفسهم ضيوف !!

المهم بعد العزاء تقريباً بأسبوعين جاني اتصال من رقم غريب فرديت عليه وكان اتصال من بنت تسأل عن فهد وقلت لها انتي غلطانه بالرقم وقفلت السماعه عادي ولا كأن فيه شي . بعد ربع ساعه رجع نفس الرقم يكرر الاتصال وطبعاً بعدها انا مارديت وخزنت الرقم بأسم (( لاترد عليه )) وطول اليوم والاتصال يتكرر علي وانا طنااااش ،،، بعد يومين جاني اتصال من رقم غريب ورديت عليه كالعاده وتفاجأت انها نفس البنت الغلطانه ، قالت اخوي بسألك انت ليه ماترد علي ؟ قلت خير ان شاء الله انتي غلطانه وبغيتي فهد وانا مش فهد ، واذا فيه شي ضروري رجاءً بدون لف ولا دوران قوليه ، فقالت اييه فيه انا كنت ابغى اتعرف عليك !!!
عطيتها كلمتين جامدين وقفلت ، واستمرت تغير بالارقام وتتصل لأني ما ارد على اي رقم مخزن بأسم (( لا ترد عليه )) ،،، تخيلوا يا جماعه انها مغيره خمس ارقام إلى الحين . المهم انا حبيت اعرف وش سالفة البنت ومن تطلع ، لأن الموضوع تأزم وسببت لي احراجات كثيره مع زوجتي بإتصالاتها ، المهم واحد من الارقام الي تتصل علي منه طلع بأسم وحده ( فلانه الفلاني ) والاسم غريب علي ما اعرفه ، فطلبت من الموظف (( احد اصدقائي في شركة الاتصالات )) يشوفلي وش اكثر رقم تتصل عليه يعني ( الارقام الصادره من الرقم ) فكان رقم صديقي الي توفي ابوه !!!! وانا بصراحه تفاجأت وماكنت مصدق ان صديقي يسوي فيني هالمقلب البايخ ، بعد يومين قابلت صديقي بالكوفي شوب ومع السوالف قلت له عطني جوالك بتصل منه لأن جوالي مايرسل ، عطاني جواله عاادي جداً وانا بحركه سريعه دقيت رقم البنت الي تتصل علي وتفاجأت بالرقم مخزن عنده بأسم ( ام فلان ) <<< زوجته :eek: وعلى طول مسحت الرقم وقلت لخويي خلاص خلاص ماهو ضروري الاتصال .

يا جماعة الخير رجعت للبيت وانا مفجوووع ومستغرب ومشاعري ما اقدر اوصفها ، انتوا ماتتخيلون وش المسجات الي ترسلها لي بشكل شبه يومي من الارقام المخزنه عندي بأسم (( لاترد عليه )) مسجات مخجله وفيها كلام صريح وواضح انها بتسوي كل الي اتمناه لو بس رديت عليها وتفاهمت معاها .

بالله عليكم قولولي وش اسوي اقول لخويي ان زوجتك وام ولدك تخونك وتراها تتصل فيني كل يوم وهذي رسايلها . وذيك الساعه 100% يطلقها ومليووون بالميه بيقطع علاقته فيني وبيكون مجروح وعينه منكسره قدامي طول عمره وهالشي مستحيل ارضاها على عدوي ، فكيف بشخص عزيز على قلبي ورجل احترمه واقدره بالحيل ؟؟

ولا اسكت واطنش ولا كأن فيه شي ، واخاف يكتشف اتصالاتها فيني صدفه وذيك الساعه كأني انا المذنب وبطبيعة الحال بيحط اللوم علي ومدري وش يصير بيني وبينه ؟؟