![]() |
من شاف مصيبة غيره هانت عنده مصيبته(ماأبي منكم غير الدعاء)
أجمل مافي الكون هو أن تتزوج والأجمل من ذلك هو أن تتزوج ممن تحب وأن تنجب منه طفلا وتستمتع برفقة ذلك الحبيب
لتعيش لحظات جميله لايمكن أن تتجاهلها أو تغفل عنها تبقى عالقه في ذاكرتك مدى الحياة قبل ماأتزوج عشت أيام خطوبه سنه كامله كانت أروع أيام بحياتي حب ودلع ولقاءات وهدايا مافي أحلى منها حسسني إني ملكه باهتمامه وحبه لي وحسيت أنه فارس أحلامي مرت الأيام وكل شي صار مثل مانبي تزوجنا وحنا طايرين من الفرح الحفله والفستان والكوشه والزفه اذكرها بكل تفاصيلها لأنه كان أحلى يوم بحياتي سافرنا شهر عسل أيام قمة الروعه حسيت مافيه اثنين بالكون يحبون بعض مثلنا حياتي مستحيله بدونه وهو جنونه ولاأبعد عنه مرت سنه على زواجنا كأنها بالنسبه لي شهر عسل ماتغير علي مثل باقي الأزواج أخواتي وصديقاتي يقولون الأزواج أيام الخطوبه غير وبعد الزواج شكل ثاني وأنا ماعرفت هالشي حبه لي واصل القمه وأنا بعد جنني باهتمامه وحبه لي ماعمره رفع صوته علي ولاحتى نظر لي نظرة زعل وماعمري طلبت منه طلب إلا يقول من عيوني مايعرف كلمة لا اطلبه كل اللي أبي وأنا واثقه أنه بيقول نفس الكلمه (من عيوني) حملت تسع شهور كان فيها تعب خفيف بس كان مهتم فيني للآخر كان أحرص مني على مواعيدي عند الطبيبه ولدت وجبت بنوته مثل القمر فرحت فيها وهو كان طاير من الفرحه تعلق فيها بشكل غير طبيعي يحبها ويرقدها في حضنه حنووووووون جدا أحيانا إذا بكت في الليل وأنا نايمه يرقدها قبل لاتصحيني بعد ثلاثة أسابيع تقريبا من الولاده جاني اكتئاب نفاس ابكي وأحس بضيقه بدون سبب وماأقدر اطلع من البيت ولاأتمشى عشان نفاس طلبت منه يخليني أسافر لأهلي مدة أسبوعين وأرجع عشان أغير جو وتتحسن نفسيتي طلبته سكت مايحب البيت بدوني ولايبي يقولي لا طلبته مره ثانيه قال خلينا نسافر سوا قلت لا خل إجازتك وقت الصيف عشان نروح مع بعض كلها أسبوعين وراجعه بالآخير وافق جاء اليوم اللي بسافر فيه جهزت أغراضي وقفلت الشنط ولبست الاموره الصغيره بأحلى لبس اتصلت فيه قال أنا عند الباب وبطلع أشيل الأغراض لبست عبايتي وكنت واقفه عالمرايه حسيت فيه دخل واقف عند الباب ماتكلم التفت له اطالع فيه عيونه حمرا ودموعه على خدوده بكيت على طول قمت وضميته باسني على جبيني قلت ماعليه حبيبي أسبوعين وراجعه لاتقطع قلبي ومسحت دموعه (في نفسي خلاص ماعاد ابي أروح بس مدري وش خلاني اصر عالسفر) أخذ الشنط ونزلها ونزلت وراه ركبنا السياره ماوقفت دموعه طول الطريق ماسك يدي يبوسها لحد ماوصلنا المطار نزلنا وودعني وودع الأموره وطارت الطياره وهو يطالعها وصلت عند أهلي انبسطت شوي بس كان شوقي لزوجي مقطع قلبي ماقدرت أنام أول ليله تعودت ماأنام بدونه ونفس الشيء الليله الثانيه كنت اتصل فيه واكلمه بس كانت مكالماتي تزيد شوقنا لبعض اليوم الثالث كلمني وقال أخذت إجازه من العمل وبجي خلاص ماعاد قدرت أدخل البيت بدونكم صار خيالكم قدام عيني وبمشيك وبعدها بنرجع سوا قلت اوكيه حياك الله بس حاول تجي طياره قال طيب اتصل فيني اليوم الثاني الصباح 9وربع تقريبا قالي أنا مشيت بر توي طالع من المدينه وربي إني مشتاق لكم موت قلت توصل بالسلامه ربي يحفظك وقفلت ونمت صحيت العصر الساعه 3 فتحت جوالي استغربت طول هالوقت مااتصل فيني المفروض يكون وصل دقيت عليه مارد علي قمت أخذت شاور وجهزت نفسي توقعت بيدق علي يقول هو عند الباب انتظرته وطال انتظاري بعد المغرب جاني أبوي قالي زوجك في التوقيف وأخذوا جواله منه قلت إن شاء الله خير طووووول الليل اتصل عليه إلين أذن الفجر وتقفل جواله ومارد علي صليت ونمت صحيت الصباح بدري اتصلت فيني أختي قالت زوجك سوى حادث أمس وهو الآن في غيبوبه ادعي له كان الخبر كالصاعقه سكت ماادري وش صار أنا بحلم ولابعلم أمي تكلمني أرد عليها بكلام بعيد عن اللي تقوله مافهمت وش قالت كانت بنتي في حضني نزلتها وطلعت من الغرفه بكيت وصحت شديت شعري ياربي وش صار لي إنا لله وإنا إليه راجعون لاأعلم لعل الله يريد لي خيرا ليش كل أهلي يعرفون بالخبر من أمس وأنا آخر من يدري ماأقدر أفكر بأي شي تذكرت آخر اتصال له يوم يقول (وربي مشتاق لكم موت) أنا في عالم والناس في عالم ماأنام وإذا مانمت حتى لو غفوه اتحلم فيه على طول كل 24 ساعه ماأنام إلا ربع أو نص ساعه وعلى طول اصحى مفجوعه كل ماتذكرته مرت الأيام الناس يتصلون فيني ويطمنوني يقولون إن شاء الله يصحى بأقرب وقت مر الشهر الأول والثاني والثالث إلين مرت سنه كامله ولم يفق 11شهر كل مانمت اتحلم فيه خياله مافارق عيني ليل نهار ضحتكه وكلامه ونظراته الحنونه قطعت قلبي كل ماتذكرتها له لحد اليوم سنه وشهر ومافاق تعبت تعبت تعبت إلى متى هالمعاناه بنتظره سنه وسنتين وحتى لو توصل عشر سنوات وإن شاء الله يفيق بأقرب وقت اكتب لكم دموعي مغرقه عيوني ماعاد شفت الكلمات من الدموع انحرمت من حنانه محتااااجه له موت موت موت بنته محتاجه له أكثر صبرت كثير ادعي ربي كثير ماخليت طبيب إلا اتصلت فيه كلهم يقولون مابيديهم شي كل شي بيد الله والله كريم ماينسى عبده تعبت نفسيتي والله العظيم سنه كامله ماعرفت طعم الراحه اضحك مجامله بس في داخلي حزن عميق مافيه بالدنيا كلها إنسان أطيب ولاأحن من زوجي اشتقت لبيتي ولطلعاتي معاه مافيه شي حلو بحياتي بدونه تعلقت فيه بشكل غير طبيعي تعبت كثييييييييير صايره عصبيه بزياده متوتره على طول تلاشت ضحكتي وفرحتي كنت متفائله دائما مبتسمه على طول الكل يقولي تغيرتي بس موبيدي الظروف اللي أنا فيها مو مخليتني أفرح ولاأضحك مثل غيري أبي من كل واحد يقرا موضوعي يدعي لزوجي دعوة بظهر الغيب بلسان صادق أن الله يشفيه ويقومه بالسلامه كتبت قصتي وأنا أعلم أن حلها بيد الله وحده (فضفضه لاأكثر) وماأبي منكم غير الدعاء له واللي يشوف مصيبة غيره تهون عنده مصيبته يارب تفرج همي وهم كل من ترد علي آمين |
قسم بالله اني بكيت
يارب بعزة و بقدرتك اشف زوجها ورده إليها ردا جيملاً |
يا أختي فجر والله ما قدرت أكمل .......لاحول ولا قوة إلا بالله الله يصبرك اللهم يامن تعلم بحال عبادك الضعفاء اسألك ان تشفي زوج أختنا فجر وأن تمن عليه بالعافيه والصحة في بدنه يامن لا يعجزه شي في السموات والأرض ، يامن مننت على نبيك أيوب بالشفاء بعد السقم ، اللهم أشفيه شفاء لا يغادره سقماً في هذا الشهر الكريم ،آمـــــــــين أختي عليك بالصلاة في جوف الليل والدعاء بحضور القلب في سجودك ،،،،،،،،،،،،ولا أذكرك بالصدقة معجله بأجابة الدعوة |
عزيزتي اقرا قصتك وقلبي متقطع عليك
ياقلبي قولي الحمدلله ,,, واستغفري ربك ادري انه شي يفوق احتمالك ولكن اصبري وباذن الله تفرج عزيزتي لا تجعلي الحزن يلهيك عن صلاة الليل والدعاء لزوجك واكثري من الاستغفار ,,, ان شاء الله شده وتزول عن قريب باذن الله ,,, وعساه يفوق ويعيد معاكم وتقر عينكم بشوفته الله لا يحرمكم منه ويخليه لكم ,,,, امسحي دموعك وتذكري ان الله لطيف بعباده وخلي الامل ملازمك ولا تقنطي من رحمة الله ادعيه في كل وقت وان شاء الله يجي يوم تكتبين لنا وتبشرينا بسلامة زوجك ,,, الله يصبرك ويعينك حبيبتي |
اسأل الله العلي العظيم ان يشفي زوجك وان يرده اليكِ سالم معافى اسأل الله بمنه وكرمه وقدرته ورحمته ان يشفي زوجكِ و يجبر كسرك اسأل الله أن يعظم أجرك ويشرح صدرك ويفرج همك ويجمعكِ به عاجلا يارب العالمين |
أختي رجعت لأقول لك حاولي أن تختمي القرآن في صلاة القيام كل ليلة جزء وأدعي في السجود ..........والله أن لها أثر عجيب في تبدل الحال الى الأفضل ،،،الصلاة في جوف الليل سهام لا تخطئ |
اقتباس:
|
اقتباس:
|
اقتباس:
تسلمين يالغلا |
اقتباس:
الله يسمع منك ويخليلك كل غالي |
الساعة الآن 03:27 AM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©