|
الظلم ظلمات ربي يرد لي حقي
بسم الله الرحمن الرحيم السلام عليكم ورحمه الله وبركاته انا كتبت مشكلتي قبل كذا في هذا المنتدى واليوم كتبتها في الاستشاره بس ماعندي صبر اخاف يتأخرون بالرد وانا ودي اعرف من تجاربكم اي شي يفيدني اولا ابي اقول لحد يقولي اصبري وحاولي .. الموضوع بيني وبين زوجي انتهت ونفسي طابت منه نهائيا مو بس من مشاكلنا بس لانه يتعامل معي كعدو .. ينتقم مني باطفالي .. وشخص زي هذا مااقدر اعيش معه بامان فعذر لو مارديت ع الي يقترح علي العوده حتى لو في سبيل التضحيه لاجل اطفالي لاني جربت ورجعت واكتشفت اني اضحي بهم وبنفسي بالعوده لانه لان نفسياتهم كانت مره تعبانه .. من مشاكلنا انا بحاله ماتسمح لي اكتب مقدمات واتفلسف بس باختصر الكلام اني زوجه وام اعيش في المنطقه الشرقيه وطلبت الطلاق من زوجي بسبب مشاكل كثيره وابسط حقوقي مالقيتها معه .. لاماجال للعوده ابداااااااااااا وعندي 3 بنات وهو كان مسافر لاهله ومخلي البنات عندي الكبيره 8 سنوات الثانيه 6 سنوات ونص والصغيره 4 سنوات .. وبعد فتره اشتاقوا لابوهم وكان اخوي مسافر لنفس المنطقه وهي مدينه اهلنا حيث زوجي ولد عمي .. فارسلت لزوجي ان البنات الكبار ودهم يشوفونه وارسل وقال خليهم يجون وارسلتهم وليتني ماارسلتهم !! ارسل لي رساله قال انه بيرجع وبيخلي البنات عن امه وبيخليهم يدرسون بديره اهله .. مع العلم امه ساكنه لحاله مطلقه وهو متهاوش مع ابوه واخوانه عند ابوه واخوانه ساكنين حوالين امهم بس مو معها بيخلي بناتي عند امه في منطقه شماليه تبعد عن الشرقيه اكثر من الف كيلو .. وهو وانا نعيش بالشرقيه حتى بعد ماانفصلنا .. هل يحق له يسوي كذا !!!!!! البنات لاعندي ولاعنده .. وامه مطلقه وعايشه لحالها مع شغاله ؟؟ وش يحق لي بالوضع هذا ؟ كيف اشوفهم واتطمن عليهم ؟ مع العلم ان زوجي فيه حاله نفسيه ومايصرف علي ولا على بناتي في الفتره الي تركته والحين بيجيب لامه شغاله عشان البنات بيصيرون عندها يعني عنده الفلوس يقدم على خادمه لامه ولاقادر يصرف علينا ؟!؟!؟ للمعلوميه طول الفتره كانت شهرين ونص مايجي يسئل عن البنات يمكن بس جاء ثلاث مرات ربع ساعه يوم بالاسبوع الي هو الخميس يوديهم السوبرماركت يشترون حلويات ويمشي مايقعد معهم ولا يعطيهم مصروف ولا يعطيني !! يعني قادر يصبر عن انه يشوف بناته مع ان المسافه بيننا 70 كيلو ابي اعرف وش اقدر اطالب فيه وش حقوقي من هالناحيه ؟؟ كيف اتعامل معه ؟؟ بناتي صغار حرام بدون ولي ومع شغاله وحرمه عجوز تنام 15 ساعه .. !! يعني بس هم مع الشغاله ..؟؟ اي قلب يقدر يخلي بناته بوضع زي كذا ؟؟ ماني عارفه وش الي لي والي علي ؟!؟!؟ حسبي الله ونعم الوكيل .. اللهم رد كيد من اراد بي كيد اوشر في نحره يارب العالمين عطوني ارائكم وتجاربكم وكيف اتصرف .. والي ماعنده معلومات ممكن تفيدني .. ياليت دعوه ولو عن ظهر قلب محتاجه لكم والله معلومه : يمكن اكون غيرت شوي بموضوعي الي قبل لكن من باب الاحتياط لاني كنت اظن انه يدخل هذا المنتدى .. لكن الحين مايهمني شي .. اهم شي بناتي اختكم ام البنات |
الله يفرج لك ولكل مسلم ومسلمه
حقيقه يا اختي تعاطفت معك جدا لان اختي قد كانت تعيش مثل وضعك وكانت عندنا والاطفال عند ابوهم ووشغالتين بس حقيقه عاشوا الاطفال عيشه سيئه والخادمات علموا الاطفال عادات سيئه ومرت السنين وبلغت البنت الكبرى واتت لامها بذلك اليوم زياره وكانت الطامه جت وقالت سوالف ياكبرها حينها عادت الام لأطفالها كخادمه فقط وتجمع من مكافأتها لتعطي ابناءها وهو يعطيهم بالقطاره وبالسنه حسنه مع انه ملياردير انا اقول لك انها ندم حيل لما ردت واقعدت فتره طوله ندمانه<بالسنين> بس لما كبروا العيال ارتاحت بستبقى خادمه فقط اطلبي اعيالك واطلبي نفقه وخاصه انه مريض |
اقترح شكوى عاجله من جهتين الاولى على المحكمه القريبه منكم والثانيه على امارة الشرقيه طبعا بعد المحاوله مع اقاربه ومن يمون عليه لعل وعسى ويفضل توكيل محامي لو عندك استطاعه والله يفرج همك ويردلك بناتك
|
اقتباس:
نعم اختي وانا بعد مع هالاقتراح وبعدين طلب الحضانه من حقك للبنت اللي عمرها سته والصغيره (هذول اكيد ) اما الكبيره فبعض المشايخه يختلف في عمر الحضانه لكن يمكن ان تعتمدين على النقاط التاليه 1- في الشرع لا ولايه لمن لا ينفق 2- فيه بعض المشايخ يحكم للحضانه للاب حتى اقل من سبع سنوات اذا كان بين الطفل والاب مسافه قصر (اي يجوز ان تقصر الصلاة بقطعها ) وبالتالي لايمكن للبنات ان يكونون بعيدين عن ابوهم وفي مدينه ثانيه عندك اقرب لابوهم 3- فيه ام كانت لها حضانه بناتها وقدر الاب يسحب حق الحضانه بحجة ان الام ليس لديها محرم في بيتها ونفس الكلام على جدة بناتك 4- اذا تقدرين تثبتين وضع ابو بناتك الصحي (الحاله النفسيه) بيسهل عليك حضانتهم وولايتهم بعد والله يوفقك ويحفظ لك بناتك |
الله يقر عينك برجوعهم لك !
وش هالتفكير الأعوج ... يضيع بنآته مع خدآمة الله لا يبلآنا ..!! أولآ وقبل كل شئ .. البنت اللي عمرهآ ست سنوات قآنونآ باقي لها سنة في الحضآنة ماله ولا ذرة حق يأخذهآ .. ثآنيآ : اذا كآن عندك إثبآت انه غير مؤهل بمرض أو ماشأبهه الله يشفي مرضى المسلمين .. ارفقيه بشكوى ضده قد تسقط منه احقية الحضآنة وتثبت لك للأبد بإذن الله ..وطالبي بهالقضية حقك بالنفقة من يوم اللي ترككم يقدرها القاضي ويحكم فيها وممكن يكون المبلغ كبيربما انهم 3 .. ومايقدر عليه او مايبغى يدفع فتتنازلين انتي مقآبل ورقة يتنازل فيها بالمحكمة انه متنازل لك بحضآنه البنات.. ثالثآ : وممكن تبدأين فيه لأن السلم أفضل بهالحآلات لأن من مصلحة البنوتآت والكل .. بمآ انه قريبكم دخلوا وآسطة من كبآر العآيله يمكن ينفع معه.. لآن مصلحة البنآت معك بكل الأحوال .. آدري كلامي غير منسق بس تعآطفت معك الله يربط على قلبك ويبرد عليك برجوعهم اليك عاجلآ غير آجلآ .. |
كان الله في عونك ياأختي
فيه موقع مبادرة الطلاق السعودي(ابحثي بالقوقل عنه لأن وضع الروابط هنا ممنوع) روحي لمهم واعرضي مشكلتك وراح يعطونك التفاصيل ويمشون معك خطوة خطوة حتى تستردين حقوقك كاملة |
اقتباس:
مع انه ماطلق بس انا طالبه الطلاق وقلت له لاتطلق ماهمني الورقه بس اهم شي مايجمعني بك بيت واحد هو حتى بشرفي قذفني وشكاك !! مو مشكلتي مو واثق من نفسه ولو مصدق الكلام الي قاله ليه يحاول يرجعني اذا شاك فيني !!! تنااااقض ابوي يقول لاتعاندين بعدين تعتبرين ناشز !! كيف وانا طالبه الطلاق لاسباب مقنعه بس ابوي يقول مايشرب ويصلي ويصرف عليكم الاساسيات يسويها !! يعني غير كذا مايجوز اتطلق !! الصرف يصرف علينا اكل وشرب بس لارحت لاهلي مااشوف ريال الله يكتب الخيره بس انا والله تعبت يعني حتى جربت العوده مانفعت بناتي بشي بس مشاكل ومرض وقلق ماانتبهت لهم ابد الله يكتب الي فيه الخير يارب الله يجزاك خير ويوفق اختك |
اقتباس:
بعدين اشتكي على اي اساس .. وش الشي الي مسويه غلط بحكم الشرع !؟ انا سمعت ان الحضانه من حقه ولا اقدر امنعه من شي ؟؟ ودي اعرف يحق لي اشوفهم ؟ كم يوم في الشهر؟ واذا بعدهم بارادته كيف اشوفهم .؟ عندي استطاعه وعندي نيه بس ابوي مو راضي عشانه ولد اخوه :( حسبي الله ع الظالم قريب وبعيد الله يجزاك خير يارب اقتباس:
هو مشكلته ناوي يرجعني بس انا ماابي لاني طالبه منه اشياء كثير مو راضي يعترف فيها وغير كذا قذفني وكرهني بعيشتي ويتمنن علي بكل شي ويعيد ويزيد انه مايبيني !! طيب ليه ماتطلق يامتناقض استغفر الله اعذروا الفاظي والله ماسكه نفسي غصب من القهر الله يجزاك خير يارب |
عاشقه الرياض
الله يجزاك خير .. وش اسوي والله تعبت معه ومن ناحيه الواسطه مافيه احسن من ابوي في المسايس وقدرت الاقناع مع الاحترام ماوراه انه وقف صفه لا بس حاول يفهمه اننا مانصلح لبعض وهو غلط ع ابوي كالعاده وكلموه غير ابوي ياانه طنش او غلط عليهم مايحترم احد كل الناس نمل بعينه الله يهديه ---------------- 3yn الله يجزاك خير بافعل ان شاء الله بس خليني اتاكد وش نيته اخاف اتسرع ويكبر راسي واخرب ع بناتي ادعولي بس الله يعطيك العافيه بردتوا قلبي بردودكم واهتمامكم لاعدمت طيبة قلوبكم جزاكم الله خير ولو فيه احد عنده اقتراح او خبره يفيدني والله نفسيتي تعبانه وجسمي مرهق من هبوط الضغط لاقادره افكر ولا ابحث احاتي بناتي الله يحفظهم يارب وين ماكانوا ويكتب الي فيه الخير لي ولهم ولجميع المسلمين والمسلمات يارب دمتم بود |
الله يفرج همك يا اختي الحبيبة ويعوض صبرك خير لا حول ولا قوة الا بالله
|
| الساعة الآن 12:35 PM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©