|
غاب الشيطان شهر وعلى الفطور حضر
عيدكم مبارك وكل عام وانتم بخير لا أدرى بماذا أبدأ ولا ماذا أقول ... ولكن سأجعل مافي صدري يتناثر حروف في هذا المنتدى ... فمشاركتي هذه ليست الا فضفضفه أو اخراج هم في صدري ... فقد توصلت لقناعة بأن الحل محاااااال الا ان يشاء الله أمراً ... فلا الصبر ينفع ... ولا الطيب ينفع ... ولا التطنيش ينفع ... ولا اللين ينفع ... ولا القسوه تنفع ... ولا النقاش ينفع ... ولا الهدايا تنفع ... ولا الاحترام والتعامل بأدب ينفع ... يعني باختصار دوامه مالها نهاية ... ولا منها مخرج ... الحاصل ... لنا كم يوم لف بالأسواق ومن سوق لسوق وشغلتنا ندخل محل عشان نطلع منه للمحل اللي بجنبه وعلى هالحال وانا فاهم عليها مضبوط تبيني اتكلم معاها واقول لها ليه كذا وعارف جوابها اللي بتقوله المهم قلت اقطع عليها كلامها اللي بتقوله وسكت ولا قلت لها انه غير معقول انها مالقت اللي هي تبغاه بالمحلات هذي كلها أو المولين اللي رحنا لهم بكبرهم يومين تحملت و الثالث قلت لها حنا نروح على شان نلف والا نشتري ... عاد لقت فرصتها ... قالت الكلام اللي ادري انها بتقوله ... ( قالت لازم الواحد يلف السوق كله قبل وبعد مايخلص يشتري قلت ماهو معقول المول هذا لفيناه امس الظهر محل محل والليله لفيناه محل محل وبعد تبينا نلفه مره ثالثه قالت لا نبي نروح للسوق الثاني الحين عرفنا اللي هنا ونشوف اللي هناك لفينا السوق الثاني وكالعادة من محل للثاني مع ملاحظة اني اصحى الظهر الساعه 1 او 1 ونص الظهر ونلف الى الساعه 5 العصر ... المهم امس قلت ترا العيد ماينتظر احد والسوق خلاص يقفل الساعه 2 بالليل والا اذا ماعندكم نية تشتري وقصدك بس تلفي على قولتك نفس الحريم اللي يلفوا لين يدوخوا رجالهم ويلفوا مرتين 3 مرات قولي لي وخلاص ... قالت انا كيف اشتري وانا كل ما سألتك عن شي قلت لي ماهو حلو ... قلت انا اقول لك حسب ما أشوف اذا زين اوكي مو زين بقول ماهو بزين وكانت تتكلم وهي تنافخ الكلام هذا وحنا بالسياره رايحين للسوق قلت الحين وش اللي رافع ضغطك عشانك اذا سألتيني عن شي قلت لك ماهو زين ... فعلاً ماهي بزينه والا تبيني اقول لك حلو لو ماكان حلو ... وبعدين هذا ماهو كلامي انا بس حتى ( بنتنا ) رايها من رايي وكانت البنت معانا بالسياره وقالت فعلا ماما اللي اخترتيهن وشاورتينا عليهن كلهن ماهن بزينات الوان متداخلة ومتخالطة مع بعض وتفشل ... المهم اول ما دخلنا السوق البارح الساعه 10 قلت ترا مابقى الا الليله ولفينا لين قلت بس ترا بكره برتاح ولا راح نروح للسوق ولا تشاوريني على شي ... ولا رجعنا الا الساعه 2 بالليل واشترت ( قلت الحمد لله ... بيني وبين نفسي ) المهم جلست بالصاله وهي جالسه وقعدت تسأل البنت الكبيره عن سعر التيور اللي هي شرته قالت لها بنتي تايورك ياما طلع بـ 700 قالت مالت عليكم ماقلتوا لي الله ياخذكم حسبي الله عليكم ماتعلموني عن السعر هذا وهي مالها شغل بالحساب طبعاً انا اللي احاسب ولا ادقق عليها بالسعر الغالي لا تخذيه والا خذي هذا وعندي بنتي عمرها 6 سنوات طبعاً ماكانت تروح معانا وجايب لها أنا هي واختها اللي أكبر منها بناطيل وباقي بلايز المهم جلست جنبي البنت قالت بابا ليش ماوديتني للسوق قلت بكره كله لك انتي بس اوديك الظهر من الساعه 1 الى 5 ونروح بالليل من 8 الى 2 ونجلس نتعشى هناك ولا احد يروح معنا الا اللي انتي تبينه يروح ... قالت ايه هي تبي توديها الساعات هذي كلها وانا ساعتين ومرجعني قلت لها صدقتي انتي المهم العصر اليوم مزاجها منقلب ومكشره وحالتها حاله وقالت بنتي يله بابا ودني السوق قلت يله وطلعنا الساعه 5 العصر وقال الولد بروح معاكم قلت يله وقال ترى ماما تقول جيبوا فطاير ومريت على محل متخصص للأطفال وملابسه ماركات على طول دخلنا اخذت بلوزتين للبنتين وطلعت لمحل الفطائر وكان مزحوم ( اثاريها مخططه لشي انا مادريت عنه ) خلصت من الفطاير قلت امر على محل عصاير واخذت عصير للبيت وبرضه فيه زحمه المهم رجعت للبيت الساعه 6 يعني كل المشاوير هذي تمت بساعه وجلست على السفره عشان الفطور وماكان فيه الا التمر والشغاله بتجيب الفطور قالت شفت كيف يوم رحت انت للسوق جلست ساعه تقلب بالمحل على هالبلوزتين ولقيت الزينات والا انا بالسوق اللي مليان محلات اروح اخم اي شي الكلام هذا وانا يادوب أكلت تمره قلت عن المغثه نفطر احسن وتجلس تبربر وتتحنطر وانت وانت قلت اقول اسكتي ( طبعاً كلامها كان اقرب للصراخ ) انا خلاص نرفزت قلت اقول ابلعي لسانك واسكتي ... ومستمره شلت صحن من قدامي ومسكت نفسي بآخر لحظه ... كولي تـ ... واسكتي ... ماهي راضيه تسكت وقمت وأنا أقول بيني وبين نفسي ... حسبي الله عليك ... حسبي الله عليك ... الله لا يوفقك ... كل الكلام هذا قبل اقامة صلاة المغرب ... وقلت بيني وبين نفسي شرط ان بكره هو العيد واليوم آخر يوم رمضان بدليل ان شيطانها حضر مع اذان المغرب ... ( ملاحظة : دائماً في ليلة العيد مشااااكل ... لا العيد هذا ولا اللي قبله ولا اللي قبله ارجع بالسنين ورا لحد أول سنة زواج ... فليالي العيد وفرحتها ووناستها انتهت مع زواجي منها ) قبل صلاة العشا قالت نبي المشغل انا والبنات قلت يله مشينا وحنا بالطريق قلت كم تبون فلوس سكتت ماردت وصلنا المشغل ووقفنا قدامه واخذنا شوي ساكتين قالت ننزل قلت مدري عنكم قالت وين الفلوس قلت سالتك مارديتي قالت تدري للي بالسياره كلهم قلت الله ياخذك وياخذ نفسك الخايسه اللي ماشفت اثقل من طينتك على وجه الأرض وعطيت بنتي 500 ريال ومشيت ... قلبت مزاجي بغبائها اللي ماله نهاية ... لكن قررت وبمشيئة الله اني اروح لمنطقة ثانية احتمال كبير بحصل لي عرض وظيفي أفضل من الحالي رغم ان وظيفتي ولله الحمد والمنه ممتازه وبتركهم بالبيت ومصروفهم يوصلهم وبس منها ارتاح وترتاح هي والا تتعذب هذا اللي جنته يديها ... اعرف ان فضفضتي قد تكون في نظر الغير ثرثرة ... ولكن لا يعنيني هذا فأنا أتيت لأفضفض ولأعلن قناعتي بأن الهم امرأه ... والنكد امرأة ... والمشاكل امرأة ... وخلف كل بيت مهدوم امرأة الا ماندر ... وتمنياتي لكم بعيد سعيد ... ولهااان الحزين ... ليلة عيد الفطر 1430 |
صدق من قال .. الفرس من خيالها
|
الله يسامحك يا ولهان ليش تظلم الحريم
المشكلة انك انت عودتها على طبعك ( طولت البال ووساعت الصدر ) هذا موعيب بالعكس انت من احس الرجال بس لازم تعرف زوجتك ان كل شي له حد غلط انك تتركهم ........... هذا اسمه هرررررب ... حل المشكله معاها ... اذا علت صوتها هددها بأنك تهجرها او خلك طول الوقت برة البيت ... ترى ما يقهر المره اللى هياته الرجال بره بيته وما تعرف وين هااايت خل البيت للاكل والنوم وطلع .. احقرها ... طنشها ..... وان شا الله راح تتغير او تتقل على الأقل من نفسها الشينه او انك راح اتعلم اخوها او ابها ..... لكن بدون ما تغلط عليها علشان ما يضيع حقك وتطلع انت الغلطان لا تترك بيتك ... هذا مو حل هذا هرررب ... عيالك محتاجينك.. قلل من طيبتك معها ... الله يهديها ويسخرها لك الله يرشدكم الى الطريق الصحيح |
الله يعينك ويهديها لك
سواليفك وربي نبهتني لاشياء واجد فرج الله همك واقر الله عينك بذريتك |
لاحول ولاقوه الابالله
مااقول غير الله يصبرك ووسع بالك اذا موعشانها عشان بناتك لاينكسر خاطرهم بالعيد كان الله في عونك |
الله يكوووون بعونك ياخوي والله رأفت بحالك
الله يصلحها يارب وعلى فكره انت منت غلطااان ابدا وكنت اقرا بعض مواضيعك السابقه انت ما قصرت معها بس الظاهر انها تحب النكد خوفها بقرارك انك بتتركهم وشوف رده فعلها أجرك عند الله بأذن الله |
علو النفس ... أسأل الله العلي العظيم ... ان كنت رجلاً أن يرزقك الله مثل عقليتها وتفكيرها وتصرفاتها لا تزيد ولا تنقص ... وان كنتي بنت أسأله أن يرزقكي زوجاً مثل عقليتها وتصرفاتها وتفكيرها ... لكي نرى الخيل والخيال ... فهل عندما يحترم الزوج زوجته ويترفع عن الأذى مثلما يكرهه نقول الخيل من خيالها ... أنا ان كنت خيال سيئ بوجهة نظرك قد أكون إنسان ويتعامل بالانسانية و يقدر قيمة الانسان حتى وان خالف هذا الانسان جادة الانسانية ارفض ان اعامله معامله حيوانيه ولا أريدها ان يكون احترامها دافعه الخوف مني ...
سافر معي ... اعرف ان قراري هو هروب ... ولكن هو الأهون والأسهل وقد يكون هروب للحياة ... لأني والله أكره النكد ولا أحبه ولا أبحث عنه وأتغاضى إن صادفته ولكن التغاضي اتعبني ... وقد يكون بالهروب مصلحة للجميع اما ابلاغ اخوها فتم ذلك عدة مرات ولكن بقي الحال على ماهو عليه واغلب التغاضي عنها لأجل الأبناء ... اشكر مرورك ورد وذبل ... اتمنى أن يكون بطرحنا لمشاكلنا وهمومنا ... عبرة وتنبيه لبعضنا البعض ... فالانسان يولد ويتعلم ولا يعيبه ان استمر يتعلم حتى الموت ... فالعلم يبني لا يهدم ... شاكر لكي طيب دعواتك أسأل الله لكي مثلها طموحي غير ... أسأل الله ان يستجيب دعائك ويرزقكي ماتتمني ... فالبنات ماحسوا بشي بالعكس مبسوطين للعيد ومن المشغل كل شويه بابا مر المحل الفلاني جيب العطر الفلاني وروح للمكان الفلاني جيب اكسسوار وتعال خذ فلانه خلاص بطلت من المشغل تبغى السوق بتكمل بقية اغراضها وانا والله اغلى في داخلي مو منهم ولا طلباتهم لا والله من تصرف أمهم البايخ اللي أخاف يكرهني حتى بأبنائي زوجة عبدالعزيز ... الله يديم الحب بينك وبين عبدالعزيز ... اسأل الله الصبر وصلاح الحال لي وللجميع هنا ... لو تضبط يوم ترجع اللي بعده ... أنا ماراح أبلغها بقراري لحد ماتشوفه واقع |
اسال الله العلي العظيم ان يهدي زوجتك ويصلح شانكم
اخي الكريم سؤال ليه تلف معها بالسوق عطها الفلوس وواعدها ساعه معينه تجي تاخذها وريح راسك اذا بدأت بالثرثره كما تقول بكل هدواء قم واتركها لمكان اخر كل عام وانت بافضل من هذا الحال |
بصراحة مافهمت المشكلة تمام يمكن لأني لم أتابع مواضيعك مسبقا لكن من الموقفين اللي ذكرت اثنينكم متشنجين ,,,هي تفكيرها ساذج و منرفز بلفها على السوق و تضييع الوقت خصوصا في العشر الأواخر و الناس تستشعر روحانية رمضان,, و في كلامها و صريخها ,,,و للأسف يبدو لأنها طريقة بعض النساء للفضفضة أو لجذب انتباه الزوج حتى يثني عليها و يقول لها أن تصرفك صح و مايحتاج تزعلين و أنت الكل بالكل و يفداك الفلوس لكن انت نرفزتها بقولك...(كلي... الله ياخذك و ياخذ نفسيتك الـ....) الرجل يسكت المرأة الغاضبة ....بالكلمة الطيبة و المرأة تسكت زوجها الغاضب بالصمت ثم كلمة طيبة بخضوع,,, قد لايعجب كلامي بعض الأشخاص من أصحاب عبارة لاكرامة بين الزوجين بينما يقصد بها لاكرامة للزوجة للأسف , و سيعتبرون ردك بلطف عليها و مجارات (تفكيرها) ضعفا منك , بل قد يعتبر ذلك نقطة ذكاء لجذبها لصفك , فحين تمدح زوجتك و لو كذبا ستكسبها ثم بعد ذلك غيّر من أفكارها ,,اجعلها تتطور و ترقى بالحوار ,, لكن أنت بردودك عليها الفضة كمن صبيت الزيت على النار. تحياتي |
الزواج بأخرى أفضل حل ياأخـــــــى
|
| الساعة الآن 08:34 AM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©