|
مشكلتي مع ابنتي والكذب
السلام عليكم ورحمة الله وبركاته .... كل عام وانتم بخير يارب ....
الصراحه انا جدا متوترة من بنتي وهي عمرها 6 سنوات .... تاعبتني جدا والله يجزاه خير اللي يساعدني لاني خلاص فقدت الثقه في قدرتي على السيطره عليها .... بنتي تحمل كثير من الصفات السيئه لي موعارفه اني اغيرها ابدا وياليت تساعدوني .... 1_ فتانه درجه اولى .... اي شي تشوفه تنقله حتى لو هذا الموضوع مايهمها او مالها علاقه فيه ... 2- كذابه الى ماله نهايه .... يعني في البدايه كانت تكذب في مواضيع بسيطه .... ممكن تكذب انها ماخربت او ماضربت اخوها او ماكسرت .... لكن ياجماعه اللحين تمادت قامت تكذب في اشياء ماتستاهل الكذب نهائي واختلط علي كذبها من صدقها ...... هذا ان بقى صدق اصلا ... 3- التاليف ..... عندها قدرة موطبيعيه على تاليف الاحداث وطريقه غريبه للاقناع ..... لدرجة اني اصدق واجزم انعا صادقه وفي النهاية اتحطم نفسيا لمااكشف التاليف .....بذكرلكم موقف من تاليفها ... احنا في عمارة كلنا اهل مع بعض ... مرة من المرات نزلت بنتي عند جدتها وقالت جده شوفي مرت عمي ... عمي طقها وطق راسها في الجدار وطلع منها دم وهي تصرخ تبي امها وموراضي يوديها ... طبعا الكل انفجع ... وقاموا يتسالون وشلون وكيف .... نزلت انا والكل يسالني فقلت خلاص بصعد اتطمن على البنت ....لما طلعت عندها لقيت البنت مافيها شئ ومبسوطه ... فقلت ماادري انا سمعت صوت قبل شوي عندكم فسلامات عسى ماشر .... قالت لاوالله الابجورة اللي في المدخل طاحت ... قلت اجل وين زوجك عسى ماضايقتكم ... قالت لا والله طالع من الصباح .... نزلت عند جدتي وسالت بنتي قلت من قالك هالكلام ؟؟؟ طبعا في المرة الاولى قالت انا شفتهم .... لما انا رجعت وسالتها وكانت طبعا عارفه اني طلعت فوق عشان اتاكد ... قالت لاني سمعت صوت احد ينطق قلت هذا عمي طق زوجته ..... تخيلتوا لاي درجه تالف ... مع العلم ان مامر علينا ابدا ولاشافت احد يطق زوجته عندنا .... 4- دائما تتكلم في صديقاتها اللي من سنها وطبعا هم بنات صديقاتي كلام سئ وانهم موكويسات وان هم يغلطون ويكذبون وموشاطرات في المدرسه وطبعا لازم تذكر مواقف كاذبه عشان تدعم كلامها وارجع اتاكد بطريقتي كالعاده وتطلع للاسف كذابه .... وغايتها في كذا يعني شوفيني انا احسن منهم ..... 5- تتدخل في مواضيع الكبار وسوالف الحريم وهذا اكثر شي مضايقني .... يعني تخيلوا تعلق على ملابس وحده صديقتي تقوللي يالله مرة ماما صديقتك ذوقها بدوي ياربي ماتعرف تشتري خسارة فلوسها على هالخلاقين .... تخيلوا ان هذا كلام طفله عمرها 6 سنوات .... وتسوي نفسها كبيرة لدرجة انها ممكن تقحم نفسها مع جلسات الحريم وتدخل في سوالف وتاخذ وتعطي بدون خجل نهائي ولو انا مامنعها كان تمادت للاعظم والله واعلم ..... طبعا لاتحسبوني ماتخذت اي موقف .... بالعكس حاولت اكثر من مرة لكن في كل مرة انجح نص ساعه وافشل معظم الوقت لكن الحمدلله مايئست .... يعني مثلا صرت اقولها قولي الصدق ومهما كان غلطك اوكذبك بسامحك بس لاتكذبين وفعلا لماتعترف لي اسامحها وافتح صفحه جديده .... لكن مافي فايده احسها اامنت العقاب .... قلتلها ان الله سبحانه يشوفك وان الله مايحب الكذابين وان الشيطان يلعب عليكي لكن نفس الشي ماشفت اصلاح نهائي .... ارجوكم اللي عنده اي حل اي روابط سابقه اي مساعده يساعدني لاني انا ابي اتدارك الموضوع قبل لايتطور وخايفه بعد اخوانها الصغار يمشون على نهجها واتورط ...... |
الله يعينك
ويهدى بنتك تحياتى |
تفاحة خضراء
الله يحفظ لك بنتك ويحميها لا تخافي يا أختي بنتك ليست كذابه هي مجرد مؤلفة قصص محترفة وخيالها خصب ماشاء الله بعض الأطفال تختلط عليهم مفاهيم الكذب والصدق بالخيال والقصص ولا يفرقون بين الواقع والخيال نحن الكبار نظنها كذبات لكن بالنسبة لهم هي قصص وخيالات يحكونها بوجهة نظرهم هم ! لا تركزي كثيرا على هذه النقطة الآن ودعيها تتكلم وتخرج كل ما في جعبتها من حكايات.. اقصد اتركي قصة الكذب والصدق الآن لا تشتتيها وحرضيها على التحدث اكثر اطلبي منها ان تحكي لك قصة ما قبل النوم بدل لا تحكينها انت اطلبي منها ان تصف لك البيت أو الغرفة أو الأكله وستندهشين من دقة تفاصيلها واضافاتها حسب ما ترى ! خيالها خصب ماشاء الله وتحتاج ان تفرغه بأشياء بعيدة عن الواقع اجلس معها وتحدثي معها عن الواقع والخيال مثلا فهميها انه افلام الكارتون خيال وماما وبابا واقع .. حطي امثلة احكي لها عن الثواب والعقاب عن طريق القصص بدل عن الطريق المباشر فهذا ما يؤثر فيها اكثر الله يحفظها ويحميها ولا تعصبي عليها :) |
عادي شئ طبيعي هاذا السن يكثرون من الكذب بس حاولي تفهميها ان اللي يكذب يروح النار واذا كذبت حاولي تحرمينها من الشئ اللي هي تحبه او تطلبه ولاتحني عليها عشان تحس بالذنب
اتمنى اني ساعدتك |
اختي متعبه ... اشكرك على الدهاء الله يتقبل منك ..
اختي بكر الشايب .... والله ماتعرفين وشلون كلامك اثلج صدري بس المشكله اني موقادرة استوعب كيف ممكن تالف قصص على الناس وهي في هالسن ... طيب معناتها اذا كبرت واستمرت على هالحال راح تخرب بيوت ... وهو فعلا فكرتك اني اشغلها انها تتكلم وتحكي قصص عن الجمادات فكرة حلوة .... اوانها تحكيلي انا قصص كمان حلو ... ان شاء الله اقدر اطبقها .... وارجع واقولك مشكورة وجزالك الله خير على نصيحتك والله لايحرمنا طلتك على مواضيعنا ... اختي ريفان .... مشكورة ياقلبي على المرور ... فعلا انا معك كثير من الاطفال يكذبون لكن المشكله ان ماصرت اعرف صدقها من كذبها وفعلا جربت اسلوب العقاب لكن مافاد ثاني يوم ماكان صار امس اي شي .... وجزاك الله خير على التصيحه ... |
هلا حبيبتي تفاحة
لا تخافي باذن الله لن يستمر هذا التأليف ويجب أن تحتويه منذ صغرها لتفرغ طاقاتها هذه بكتابة القصص واتوقع لها مستقبل رائع في السرد وستحصل على علامات كاملة في الانشاء صدقيني بعض الاطفال يتميز بخصب خياله ولا تخافي دام احتويتيها جميل أن نأخذ اساليب التربية الحديثة وندمجها مع سنتنا وديننا لا تشدي عليها كثيرا ولا تحرجيها خصوصا امام اخوانها بخصوص "كذبها" أو تأليفها انتبهي لها قد يكون ايضا نقص الاهتمام بها سببا يجعلها تفعل ما تفعل حتى تحصل على انتباهك كوجود طفل جديد في العائلة أو غيرتها من أخ أو أخت بارك لك الله بها وحفظها من كل شر |
انصحك تقرأين في علم نفس الأطفال
الاطفال في هذي المرحلة ما نسمي كلامهم الغير صحيح كذب لأنهم ما يعرفون يكذبون هم بس يلفقون .. يعني يشوفون شي أو يسمعون شي ويحطون عليه من خيالهم بدأئ علميها الصدق والكذب والفرق بينهم من سن السابعه راح تستوعب اكثر بالنسبة لنقل الكلام .. كثير من الاطفال كذا وروحي سألي مدرسات الصف الأول والثاني الابتدائي راح تسمعين العجب كل الي يصير في البيت يقولونه للمعلمه .. حتى لو الأب والأم متخاصمين وكل واحد ينام بغرفه ينقلونه .. حالتهم حاله .. بس طبعاً هذا غير صحيح وعشان تبطل هالحركه تعمدي انك ما تتكلمين جنبها يعني سوي كأن عندكم اسرار وما تقولون لها لأنها تنقل الكلام .. واذا اصرت تعرف خذي منها وعد انها ما تنقله ولو نقلته ماراح نتكلم قدامك بشي بالنسبة للتأليف .. عادي جلسي خليها تقص عليكِ قصص من خيالها أو قولي لها اني بكتب قصصك و انا اتوقع راح تستمر على هالشي حتى بعد ما تدخل المدرسة عشان كذا خليها تكتب كل الي في خيالها على الورق عشان تفرغ طاقتها وتشبع رغبتها في التأليف الكلام على صديقاتها .. دايماً قولي لها عيب نتكلم على الناس كذا .. ترضين احد يقول عنك مو شاطره ووو ويبي لك على طول تنبهيها لهنقطة لأنها ابد مو حلوة والخوف انها تكبر معها .. بس اذا شفتيها بدت تتكلم على الناس سوي انك مطنشه ولا تعطينها انتباه ولا كأنك تسمعينها .. مع الايام راح يفقد هالشي متعته عندها لأنها بتشوفه ما يلفت النظر ولا يعمل لها مكانه مثل ماهي متوقعه .. تدخلها في مواضيع الكبار والتعليقات الي مو حلوه ابد لا تسمحين لها ونفس الي قلت لك فوق مع صديقاتها طنشيها ..قولي لها عيب .. وانتوا بعد مو كل شي تقولونه قدامها انتبهوا لها ترى شكلها تحب هالاشياء والمشكلة انا اشوف الي كذا ذكائهم وقدرتهم على التحصيل الدراسي اقل من غيرهم يعني ممكن تكون شاطره بس مو مثل غيرها لأن مخها كله في هالاشياء وخاصه الي يعرفون يتكلمون مثل الكبار .. |
| الساعة الآن 03:53 PM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©