|
كل ما زعلنا انا وزوجي من بعض أمه تزعل مني
السلام عليكم يااخواتي واخواني
ابغى رأيكم في مشكلة صارت معاي مشكلتي ان كل مازعلنا انا وزوجي من بعض امه تزعل مني وتقلب وجهها فيني لاني مزعلة ولدها طبعا هي ماتعرف من يكون الغلطان بس اهم شي عندها اني زعلت ولدها فتقلب علي انزل عنها ماتكلميني وتبقى طول الوقت مكشرة فأنا تفاديا للشر اطلع بيتي فوق وطبعا كل مشكلة لازم تدخل فيها حتى لو مادخلناها احنا تسوي نفسها المستشارة حقتنا المهم اخر مشكلة صارت معانا انا وزوجي بدت صغيرة وصارت كبيرة انا مااروح عند اهلي الا يوم الخميس كعادة كل الحريم وبقية الاسبوع مااطلع من البيت الا نادرا اذا كان ي عزومه والا شي وطبعا هذي مو كل اسبوع نادر ماتصير يوم الاربعاء كلمتني امي قالتلي كل عماتك مجتمعين وفلانه جايه وفلانه تقولي حاولي تجين قلت اوكي وماتوقعت انه يقول شي لان هو اصلا رح يطلع كالعادة ومارح يرجع الا متأخر خصوصا انه يوم اربعاء اصلا هو يوميا يطلع لما قلتله ماوافق قلتله ليش انت رح تطلع وانا طفشانه قاللي اذا رحتي اليوم مافي روحه بكرة وهذا الكلام تقريبا المغرب يعني اليوم راح وش رح استفيد سكت بنتي كان عندها موعد عند الدكتور وديناها وحنا راجعين قاللي تبين تروحين عند اهلك قلتله لا مو قلت اذا رحت اليوم مارح توديني بكرة قاللي اي قلت اي ليش بزران هذا انت كل يوم تطلع الاستراحة خلاص اجل انت رحت امس مافي روحه اليوم قاللي ليش على كيفك قلتله شفت ليش تضايقت انا نفس الشي اللي يسمعك يقول يوميا اروح بيت اهلي قاللي تبين تروحين بعد بدري بكرة انا كنت قايلتله قبل بيوم اني ابغى اروح بدري يعني من الظهر العصر لانه مايوديني الا متأخر قاللي انا صايم بكرة قلتله واذا صايم نفس الاكل اللي بنسويه على الغدا راحت تاكل منه اش فرقت معاك يعني وعلى فكرة انا مااطبخ في بيتي يعني بالحالتين مو انا اسوي الاكل المهم نزلت من السيارة معصبة سكرت الباب بقوة وطلعت على طول فوق عدا هذا اليوم صحيت من بكرة قلت خلاص بصير عادية مارح اسويها مشكلة مع اني كنت مررة متضايقة من حركته لان عارف اني مااجتمع مع الناس الا نادرا المهم كان يوم خميس فصحيته الساعة 2 ونص عشان يقوم يصلي الظهر قبل مايأذن العصر صحى وصلى لما خلص صلاة اذن العصر قلتله شفت زين امداك تصلي المهم رجع يبي ينام مااذكر اش قلتله فجاوبني بصوت نكدي قلتله اش فيك قاللي يعني ماتدرين الحين انا اللي مفروض اتضايق ومشيت الموضوع يجي هو يتنكد علي قلتله ايش فيك مارد علي المهم انا طنشت ولاحظو انه ماوداني عند اهلي المهم لما فطر هو نزل فطر تحت انا مااكلت معاهم لاني ماني صايمه انا خلصت صيامي طلع تقريبا قبل العشا بشوي قعد عالكنبة انا كنت اتفرج على التلفزيون قاللي تبين تروحين قلتله لا انا قايلته بروح بدري لان بدت المدارس وخلاص مافي احد بيسهر وخواتي كلهم بالمدارس ومتعودين اصلا ينامو بدري يعني بسهر لحالي وش الفايدة وقلتله هالكلام قبل مارد قاللي كيفك وجلس شوي بنتي كانت نعسانه وحاولت انومها مانامت كانت طفشانه وكان هو قاعد يلبس بيطلع قلتله خذها شوي بالسيارة خليها تنام قاللي عندي شغل ماني فاضي قلت بصوت واطي اها شغل بالاستراحة طبعا قاللي اش قاعدى تقولي وش قاعدة( تاكلين هوا ) انا هنا ناظرته نظرة ان خير وش هالكلمة هو حس نفسه غلط قاللي اش قاعدة تقولين قلتله اش قلت انت قاللي انتي اش قاعدة تقولي طبعا وهو يصارخ المهم انا مارديت لفيت وجهي وهو طلع بعد اكثر من ساعه نزلت تحت انا وبنتي تخيلو لقيته تحت واخته ناظرتني وضحكت قالتلي في ناس اليوم زعلانين ماراحو عند اهلهم انا انقهرت ليش قالهم شوي وطلع انا قعدت بعد ماراح شوي تحت بعدين طلعت بيتي وارسلتله مسج ( مو قلتلي عندك شغل وانت قاعد تحت بعدين مو انت تقولي لاتوضحين لاحد اذا كنا زعلانين ليش قلت لاهلك خلاص انا بصير كل كبيرة وصغيرة بقولها لاهلي) طبعا انا بعمرررررررري ماقلت لامي او ابوي شي هو بعد كذا دق علي يصارخ قاللي ايش الرسالة هذي قلتله اش فيها زي ماقريت ليش تقول لاهلك قاللي كل هذا لاني ماوديتك امس قلتله من جاب سالفة امس انا ماقمت من الصبح اكلمك عادي بس انت صحيت متنكد وقاعد تصارخ انا مشيت موضوع امس والا لا اليوم ليش انت سويت كذا قاللي اسألي نفسك :(اموت واعرف وش يقصد المهم قعد يصارخ قاللي وش رايك ماعاد في روحة بيت اهلك ابد ونشوف قلتله اذا تقدر لاتقصر قاللي تشوفين وقعد يصارخ انا هنا خلاص فقدت اعصابي قلتله سوي اللي تبي وتشوف رح تشوف مني شي ماتتوقعه وسكرنا لما سكرت كنت مرررررررررررة معصبة كان معي ريموت تلفزيون رميته بالارض وانكسر وعلبة كريم رميتها وانكسرت شوي وتدق علي خالتي(ام زوجي)مارديت شوي والا هي طالعه تدق الباب فوق فتحت قالتلي ايش في وش صاير قلت ولاشي انا كسرت اشياء قالتلي ليش قلتلها كذا قالتلي اش صاير يعني قلتلها عشان يعرف يتكلم ثاني مرة وتركتها ودخلت الغرفة المهم نزلت انا رتبت كل شي وبقيت جالسة بالغرفة دقيت على زوجي قاللي وش في قلتله تعال قاللي مااقدر معزوم المهم رجع الساعة 1 ونص وانا كنت منسدحة بغرفة بنتي دخل معصصصصصب ويصارخ وش تبين قلتله اش فيك قالي مو تقولين تعال جيت وش تبين وقعدنا نتكلم وكذا وهو مررررة معصب يعني مافي امل اتناقش انا واياه كل ماقربت منه يقولي وخري عني:( ثاني يوم الجمعه دنزلت تحت وقعدت نص ساعه لما راح الصلاة بس محد جا عندي قعدت لحالي مليت وطلعت بعد شوي نزلت تحت اجيب اكل لبنتي كانت خالتي موجودة بالمطبخ ومكشررررررررررررررة طلعت ماكلمتها بعد شووي دقت امي علي تقولي اش فيكم وش صاير وش مسويه امس انتي قلتلها وش مسويه قالتلي وش مكسرة قزاز وطاوله كان عندي طاولة مكسورة من زمان بنتي كاسرتها قلتلها من قالك قالتلي ماعليكي بس ليش كذا قلتلها ليش مجنونه اكسر طاوله وقزاز قالت مدري قلتلها من اللي قالك قالتلي مالك شغل انا عرفت ان خالتي بس قلت خليني اتأكد دقيت على اختي قلتلها من داق على امي امس قالتلي خالتك انا سكت لماجا زوجي من الصلاة قعد شوي بعدين نام كان صايم قعدت اجهزله للفطور عندي فوق قبل الاذان نزل قلتله ترى قاعدة اسويلك فطور قاللي باكل تحت وطلع انا انقهرت سكرت الباب وراه بقوه بعدين العشا طلع وقعدنا نتكلم وهو يصارخ طبعا انا حاولت قد مااقدر اكون هاديه من ضمن كلامنا قلتله ليش امك تكلم امي هو سكت قاللي انا قلتلها بس بعدين يوم كلمته امه سمعته يسألها ليش تدقين على امها تكلمنا وتكلمنا لين وصلنا اني ارتب اغراضي بروح عند اهلي قعدت ارتب الاغراض طلع قاللي لما تخلصين دقي علي انا لما طلع وقفت عن الترتيب قلت بستنى لما يجي واتكلم معاه نومت البنت ودقيت عليه وجا قاللي خلصتي قلتله هذي ثالث مرة اناقشك وعلى فكرة طول المناقشات الثلاث كنت هادية واستغفر بس هو يصارخ قعدت اكلمه لين راق شوي قلتله خلاص انا باكل وبشرب فوق لحالي ماابغى كل مازعلنا من بعض تزعل امك مني ماشفتها كيف مكشرة بوجهي مافي داعي كل ماصار بيننا شي تدخل احنا نعرف نحل مشاكلنا (وعلى فكرة كل ماتدخلت تكبر المشكلة ) قاللي انا مااكل فوق مااخلياهلي قلتله كيفك بس انا باكل فوق اتفقنا كذا وتصالحنا ورحنا نتمشى رجعنا تعشينا سوا ثاني يوم راح الدوام انا مانزلت لما طلع من الدوام دق علي قااللي وش طبختو قلتله مانزلت مو احنا اتفقنا كذا ماقال شي رجع تغدى وطلع ينام وكل شي عادي ثاني يوم لما جا من الدوام جا عندي فوق قاللي وش طبختي قلتله ماطبخت ماعندي شي قلتلك جبلي اغراض ماجبت قاللي وش باكل انا قلتله مو انت تبي تاكل تحت قاللي كيفي اكل وين ماابي اليوم مافي اكل يعني قلتله ماعندي الا نواشف قاللي اليوم بعديها وبجيبلك اغراض عشان بكرة اكلنا وصار عاد ي ماتكلم شي نمنا العصر لما صحينا راح كالعادة طبعا عطيته ورقه بالاغراض اللي ابيها جابها وقعدت ارتبهم بالليل وصرت اطبخ فوق بس امه الحين زعلانه مني مع اننا تصالحنا هي كذا دايما كل ماتزاعلنا ونتصالح بس تبقى زعلانه بس انا هالمرة مارح اكلمها واراضيها لاني ماسويتلها شي تبي تتعدل من نفسها كيفها امس زوجي بعد ماجا من الدوام قعد تقريبا ساعة تحت ويوم طلع مقلوب كمته قلتله حاول تكلم امك مابي الوضع يبقى كذا قاللي خلاص اتركي امي بحالها بس هذا مو وضع وش الحل عطوني رايكم الإشراف / عفواً تم تعديل العنوان ليتضح المضمون |
الموضوع طويل لكن اللي فهمته تبغين حل مع أمه والحل هو قاله لك
اتركي امي بحالها قولي سمعا وطاعه أنتي لاتزعلين أمه وخليك طبيعيه معها احترميها وقدريها تزعل أو ما تزعل هذا شي ما يخصك اللي يهمك ويخصك إنك تحترميها وتقدريها اتفقي مع زوجك ان مشاكلكم وأسراركم ما تطلع وإن اللي فات مات وافتحو صفحه جديده الله يألف بين قلوبكم |
اختي الكريمة موضوعك يبي له ثلاث ايام عشان الواحد يقراه فحبذا لو تختصرينه باربعة سطور حتى نفهم المشكلة و نساعدك
|
اقتباس:
اتركيها بحالها يعني لا انزل تحت ولا اكلمها ولاتكلمني ولا اشوفها هذا قصده وعارفة ان الموضوع طويل بس عشان اعرف من الغلطان>>>>>>>>>>>>>>هذا وانا مختصرة اشياء كثيرة:25: |
انا أقول اتركيها بحالها يعني لا يهمك أمر زعلها
وتشيلي هم زعلها وكيف تراضيها لأن مالها لا ناقه ولا جمل بالموضوع اللي أشوفه انك تنزلين تحت وتسلمي عليها ولا تطولين باليوم أو باليومين ربع ساعه بالكثير واستغني بنفسك وبيتك واهتمي بزوجك وبصراحه ما اتوقع إن زوجك يرضى تقاطعين أمه كلامه لك اتركيها بحالها ردة فعل سريعه قالها بدون تفكير ممكن يقصد تقللين زياراتك لها الله يوفقكم ويألف بين القلوب دعواتك لي بالزوجه الصالحه |
كوني بارة بها فقط .. عامليها كمعاملة والدتك .. اذا زعلت وانتي مو السبب لاتشيلي هم مابقولك طنشيها بس توددي لها اهديها المعاملة بالحسنى تخلي الصخرر يلين وانتي اسلوبك حلو ماشالله :18:
واالله يسعدك يارب. |
وليش اصلا تتدخل بينكم خلى خلافتك مع زوجك مو لازم احد يعرف عنها ولا تبينوا لاحد
بالتوووفيق |
طبعا هي مالها حق نهائيا تزعل ولا تدخل بينك انتي وزوجك ودامها تزعل من الهوا سيبيها اهم شئ زوجك قالك مالك دخل فيها خلاص حطي في بطنك بطيخة صيفي واطبخي فوق وخليها خليكي طبيعية واضحكي عادي
|
كل الغلط على زوجك لييييييش كل ماصار بينكم شي يروح يقول لأهله يااااااااكرهي للرجال ألي كذا؟!
سبحان الله مهماكانت رجولة الواحد يطيح من عيني لما يروح يتشكى لأمه من زوجته!!!! وش خلى للحريم لاااااااااازم تقنعينه أي شي يصير بينكم يبدى وينتهي بينكم بدون مايطلع برى البيت أنتي وياه راح تتصالحون وتنسون لكن ألي برى البيت سواء أهلك أو أهله ماراح ينسون الشي هذا وراح تكبر الحواجز بينكم والكراهيه وحتى لو كانت المشكله تافهه رااح تكبر وتكبر وتكبر وممكن توصل للطلاق فلازم تنتبهون لحياتكم |
حبيبتي
بكون صريحة معاكي .. اسلوبك مع ام زوجك لا يليق أبدا .. قالتلي اش صاير يعني قلتلها عشان يعرف يتكلم ثاني مرة وتركتها ودخلت الغرفة لو تعامليها كأنها أمك ما كان تركتيها ودخلتي غرفتك ..صح والا لا ؟.. بصراااحه حركتك تزعل .. يعني لو قلتي لها سلامتك يا خالتي مافي شي .. تفضلي تقهوي معايه .. بالله اش راح تخسري ..!!! لو حطيتي في حسابك انها امرأة كبيرة في السن وكل اللي في عمرها يتدخلوا بقصد او بدون قصد في حياة أولادهم .. واللي يهون علينا موضوع تدخلااااااتهم المستمرة .. هو اننا متأكدين انهم يتمنوا السعادة لنا .. فانا رأيي عليكي انك تروحي تعتذري لها .. مو ذنبها ان ولدها قالها عن مشاكلكم .. هي أم وطبيعي ماراح تظل سااااكتة.. " فحلي هالمشكلة مع زوجك بعيد عنها " قولي لها يا خالتي سامحيني بس كنت معصبة والشيطان لاعب لعبته .. وعامليها مثل ما تعاملي امك بكل احتراااااااام وتقدير .. ومهما صدر منها لا تغلطي في حقها .. هذا بالنسبة لأمك .. أقصد ام زوجك .. ............ أما عن اسلوبك مع زوجك حبيبتي والله العناااااااااااد ما يفيييييييد .. يعني مثلا لما سألك أوديكي عند بيت اهلك في يوم الاربعاء كان بينتي فرحتك بسؤاله وتشكرتي منه واعطيتيه كلمتين حلوين .. فتفرحي انتي بشوفة اهلك وضيوفهم ويفرح هو لفرحك وتشكرك منه .. وماتدري يمكن يعرض عليكي ثاني يوم تروحين مرة ثانيه .. .. اسلوب التشرط وكلمة بكلمة أسلوب ينفر زوجك منك فانتبهي حبيبتي .. الله يهدي سركم ويصلح حالكم .. ت ح ي ا ت ي .. |
| الساعة الآن 05:01 AM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©