|
عانس مع مرتبة الشرف
عمري 30 سنه ومؤهلي العلمي على قدي مو ذاك الزود
وتقدم لي قبل فتره واحد متزوج ومطلق وعنده ولد واستخرت وعجزت اميل له وربي كارهته كره فضيع ماكنت انام الليل اذا تذكرته وكان اخوي الكبير يحاول فيني بكل الطرق يبغاني اتزوجه ورفضت وساعدتني امي واخوي اللي اصغر من الكبير كان رافض بالمره وقالي انه فيه قل صح واجلس طول عمري عانس افضل من اني اتزوجه وماصدقته لأن اخوي الكبير يقول غير الكلام يقول لاتاخذين رايه تراه جاهل ومايعرف بالمراجل وانتي اختي وكأنك بنتي ولو ماشوفه يناسبك ماقلتلك تزوجيه المهم الحمدلله تم الرفض والرجال راح بحاله وخطب من كل بيت وكلهم يرفضونه واكتشفنا انه مطلق مرتين وعنده عيال ومريض طبعاً هذا كله من الناس عرفت امي ماهو من اخوي المهم عقب فتره جلست مع بنت اخوي الكبير وقالت لي بأن ابوي يقول خطبك واحد مهبول مره وموب صاحي وماعلمك يبغاك تاخذينه يقول بأن محد بيتزوجك لانك كبرتي عشان كذا خبى عليك وماعلم احد غيرنا أنا وامي واخواتي يالله سكين وخناجر بشراييني من هول الصدمه أخو يانااااااااااااااااااااااااااس يغش أخته؟ ولد أمي وأبوي يرميني بيديه للهلاك؟ ليييييييييييييييييييييييييييييييييييييييش؟ وش الذنب اللي ارتكبته بدنياي عشان يبيعوني يفتخر عند زوجته وبناته اني صرت عانس ومحد يبغاني خلاص! الله يوريني فيه يوم جعلي ماموت الا اشوف فيه اليوم اللي كان ناويه فيني المشكله انا عند امي وابوي ماني عنده والحمدلله عمره ماحط بيدي ريال ابوي مو مقصر علي الله يطول بعمره والحمدلله بفضل ربي ماني شينه والا فيني عيوب تستاهل انه يفكر يرميني رمية ... وكانوا الخطاب كثار يجوني ومن ضمنهم عيال عمي وكان يرفضهم هو وامي بدون شوري ولمن كبرت يبغون يرموني لمريض ومهبول؟؟!! يالله اقسم بالله اكتب لكم ودموعي جفت من البكاء مو مصدقه لهدرجه انا صرت عاله على المجتمع!! يعني خلاص ماعاد لي اهميه بالحياة وربي اتمنى اموت وارتاح واريحهم مني تكفون ادعولي ان الله يوفقني ويرزقني ويغنيني عن الناس احس اني صرت استحي اطلع وادخل نظرات الناس لي اني عانس وللحين ماتزوجت تذبحني انعزلت عن العالم حتى عن اخواني ماحب اجلس معهم ومع زوجاتهم صار الكل يشفق لحالي صرت انفجع من كلمة عانس واي شي يبكيني ماعدت زي اول احس اني بدون هدف الموت ارحم لي كل بنات العائله بسني تزوجوا وخلفوا وانا للحين حتى ماعاد يجيني خطاب كأني مو موجوده بالحياة فعلة اخوي بي خلتني ايأس من الدنياء خلتني اشوفها سوداء والبياض انقشع منها احس ان درب الضياع هو دربي اذا الاخو ماعاد ينوثق فيه أجل بمين الثقه؟ |
أختي الكريمة لما الحزن واليأس والإحباط؟ أنت عزيزة وغالية على والديك الله يحفظهم ، وشورك من شورهم بس ، يعني كل إخوانك و أخواتك ما لهم دخل فيك وما يقدروا يجبروك على حياة جديدة أنت غير مقتنعة فيها لو جلسنا نتحسس ونفكر في نظرات الناس ونسأل انفسنا ليش أنا دون الناس يحصل لي كذا؟ كان ما مشينا في هالدنيا صدقيني الأمر سهل وما يهمك أي إنسان في هالدنيا إلا طاعة ربك ووالديك بس ، و أي شئ غيرهم ليش نتعب أنفسنا لدرجة اليأس وتمني الموت إحمدي الله وعيشي حياتك والمسألة ليست في العمر حتى تقولي عن نفسك عانس ، المسألة كلها في رغبتك للزواج حتى لو صار عمرك أكثر من خمسين صراحة أنظري لليمين والشمال ممن تزوج ، هل هم في سعادة في الغالب؟ لا ، لأن الحياة متعبة والكل يشتكي وما يبقى إلا باب واحد الكل يتفق ويتساوى فيه ، وهو باب الدعاء وعدم تعليق نفسك بأمر الزواج وكأنه هو الحل ، وخليك معززة مكرمة عند والديك ولاتهتمي لأي نظرة أو كلمة ، لأنهم إما حاسدينك أو يتمنون شخصيتك وتميزك صدقيني إذا ما حسستي نفسك أنك ناقصة عنهم فأنت عكس ذلك تعاملي معهم و أفرضي رأيك ووجودك معهم وكوني شجاعة ولاتجعلي الوحدة والصدود عن المجتمع هو الحل كلامي كثير ، ولكن أتمنى من الله لك التوفيق ، وتذكري أن فعلة أخوك وطريقة معالجته للموضوع غير صحيحة ، ولذلك لاتهتمي كثير بما حصل ، ورأيك وشورك وحياتك مع والديك بس دون غيرهما |
ما شاء الله اخونا عبد العزيز ما بعد كلامه كلام كفى ووفى
حبيبتي المفروض ما فعل اخوكي بك يكون حافز لك للقوه وليس القهر اثبتي وجودك وقومي قابلي الناس واضحكي حبيبتي الناس تفرح وقت تلاقي حد مقهور عشان تتسلى باخباره ولكن وقت يجدوكي قويه وتضحكي يسكتو ويخافو منك الله يطول بعمر والديكي وضعي هدف واحد بحياتك ارضاء رب العالمين ثم امك وابوكي ورح توكني من اسعد الناس والله يرزقك الزوج الصالح |
كلام الاخ عبدالعزيز عين العقل
حاولي تثبتي وجودك كملي دراستك .. او ادخلي دورات تطور قدراتك وهكذا اثبتي للكل انك افضل منهم الله يوفقك ويسعدك |
يا حياتـي أنتــــي ! والله العظيم إنه مهوب رجـااااااال، لا تهتمين بكلامـه ولا تعيدين التفكير فيه
عارفة قد ايش صعب على الأخت تشوف من أخوهـا مواقف خذلان زي كذا ، حسبي الله ونعم الوكيل في كل ظالم لكن صدقيني مصيره بيندم وبيحس بقيمتك ! وعندك أبوك وأمك .. شايلينك على كفوف الراحة ^_^ وبإذن الله قريب قريب يجي سعيد الحظ اللي يطلبك زوجة ... ويحبك ويعزك وتربين معه عيااالكم العسولين ياااااااااارب آمين لكن أنتي لا تهتمين بكلام هذا السفيه، واطلعي للمجتمع وتوكلي على ربك ! ربك يختبر صبرك .. يبيك تجين لمّه تطلبينه ! ما حرمك إلا ليعطيك وما ابتلاك إلا ليسمع صوت رجاءك في آآآآخر اللييييييييل ! تدعينه من كل قلب يزوجك بزوج تتمناه قلوب البنـات .. وأنا أعرف اللي تزوجوا بعد الثلاثين والآن سعيدات ربي يتمم سعادتهم.. المشكلة فقط في نظرتك لنفسك صدقيني.. ربي يسعدك ويفرجك همك وتجين تبشرينا بعرسك يااااااارب .. |
أختي الغالية في الله
هوني ما في نفسك وأكثري من قول ((لا حول ولا قوة الا بالله العلي العظيم)) فأنها تذهب الهموم وتريح القلب من كل الكروب، أتظنين أن الله يخلق الأنسان من أجل لا شيء، حاشاه، وحاشاه أن يفعل ذلك، وبما أنك في هذا الوجود أذن أنتي خلقتي من أجل شىء فلا تقلل من شأنك، قال تعالى( وما خلقت الجن والأنس الا ليعبدون) ولا تظنين أن الزوج كل شىء في هذه الحياة لا والله، وإذا رضى عنك الأحد فلا يهمك أحد وإذا غضب عليك الأحد فلن ينفعك أحد، إذن الرسالة موجودة والطريق أمام طويل، أستعيني بالله، وهل تعلمين عن أهل المصائب يقال فيهم هنئياً لأهل المصائب، رضوا بما قسم الله لهم فأصبح مع الدمعه بسمه وكل الهموم جوائز ، مع المحنه منحه، وإذا حلت المصيبه يكفر الذنب وتمحى الخطايا، فكم من مصيبة مرت عليك في الحياة وأخرجك الله منها، فلا يضيق صدرك مما حصل وقولي قدر الله ماشاء الله فعل، أسأل الله العظيم رب العرش العظيم أن يحفظك ويرزقك الزوج الصالح الذي يصونك، |
الله يصبرك ويثبتك يارب..
الزواج مو كل شي بالحياة! ندري ! بس للأسف المجتمع يقول لك انه كل شي بالحياة! وخاصة في مجتمع كل شي فيه بيد الرجل! وبعدين كل واحده تبي زوج يحبهاوتحبه :) يدللها وتدللــه :) يخاف عليها وتخاف عليه :) يحن عليها وتحن عليه :) هاذي سنة الحياة! لا أحد يقول الزواج مو كل شي!!!!!!!!! ندري.......... بس شي مهم.. |
ربنا يكون فى عونك
حبيبتى سنك 30 لسه صغيره والله لسه صغيره البنات سنهم ارتفع جدا .............. صديقتنا سنها بقى 35 ولسه عروسه لها كام شهر بس واتجوزت واحد ما اتجوزش اصلا قبل كده ومحترم وراجل وشاريها والله قعده الخزانه ولا جوازه الندامه اخوكى يخليه فى حاله ويفوق لبيته وعياله ويفكه منك أحسن له ربنا يديم عليكى والدك حبيبتى انتى كل ما هتنقهرى هتدى سبب للى حواليكى يتنططوا عليكى زى القرود .......زوكل واحد وللا واحده بتاخد على دماغها فى بيتها هتعملك تسليتها وتعوض او يعوض النقص اللى عنده فيكى اضحكى حتى لو من ورا قلبك بينى للناس وش عليه ابتسامه حتى لو زايفه .......... اعملى خطط لحياتك طورى نفسك وحياتك اخوكى مش هو اللى هينام فى حضن الزوج الغير كفء ولا حد غيرك اصلا هيشيل الهم بعد الشر لو اترميتى لاى راجل انتى مش خضار بايت ولا انتيش عاله.......... انتى انسان وروح قيمتها عاليه اوى اوى مهما ان تواضعت مقوماتك.......... انسان ............ فيه دعاء جميل .......حسبى الله ونعم الوكيل ...........لا اله الا انت سبحانك انى كنت من الظالمين .......اللهم انصرنى ممن ظلمنى وارنى فيه ثأرى واقر بذلك عينى سيبك من اخوكى ده مجنون...... احتمى بوالدك وقولى له شكوتك كأنه صديق و الله ليكفخ اللى يقولك كلمه وحشه والله ما يرضى لك ابدا الا الخير روحى له واترمى فى حضنه واشكى له قولى له يا بويا بيأذونى ولو ما وسعكيش حضن ابوكى يساعك من قبله ومن بعده حضن ربنا وحضننا اوعى تيأسى أوعى انتى بتموتينى انتى واى بنت تانيه رغم انى ما اعرفكيش لما تنعى حظك وتنقهرى اياكى تنقهرى لا حبيبتى شبابك وعمرك ما يستاهلوش منك كده انتى احسن قسما بربى انتى احسن وهتبقى افضل منهم كلهم |
أخي عبدالعزيز جزاك الله خير على كلامك الطيب
أختي كلا له وجهة نظر أهم شيء ثقتك بالله ثم بنفسك الناس لا يرضيهم شيء فهل نضيق بأنفسنا لاجلهم الله ييسر لك ولي ولبنات المسلمين أمورنا |
اسأل الله ان يخلي لك ابوك وامك وان ينصرك على من حطمك اختي الكريمه انتي لستي كبيره بالسن انا والله زوجتي دخلت علي وعمرها تقريباً 30 وانا في نفس السن وهذا شي عادي لاتأيسي يجيك نصيبك وفيه قريبه لي تزوجت قريب جداً عمرها 36 سنه لاتصيرين حساسه لهذي الدرجه ولما يتقدم لك احد لا توافقي عليه حتى تتاكدي انه ادمي وانسان وفيه خير ما عليك من اخوك قليل الشيمه وخلي الامور طبيعيه بينك وبينه وادعي ربك يرزقك الزوج الصالح أسأل الله يرزقك الزوج الصالح وبعدين نعرف بنات في الخمسين ما تزوجوا الى الحين مع العلم انهن يملكن المال والجمال والموضوع عادي بالنسبه لهم علماً بأنه تقدم لهم الكثير من العرسان ولم يوافقن لا تتضايقي نصحيتي لك الدنيا ما تستاهل الضيقه
اخوك قسوره ولد قسوره |
| الساعة الآن 02:34 AM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©