زوجي لا يريدني ان أرقد معه في نفس الغرفة
 

شوفي ما فيها شي ، لا تعقدي الموضوع ، الغرفة التانية مو بعيدة ، روحي اول الليل نيمي الولد ورضعيه ، وارجعي نامي عند زوجك ، وفي جهاز بتوصليه بسرير البيبي بخليكي تسمعيه لو تنفس ، يعني مجرد ما بكى بالليل بتصحي وكانه جنبك .. كنت بفضل لو اقتنع يكون سرير البيبي عندكم بغرفتكم حتى لو اول 6 اشهر ، بس برضه مو مشكلة ... هيك معظم الرجال الا من رحم ربي .


على طول ياخدو الموضوع انه انت بس المسؤولة عن البيبي .. كيف بده يخلق علاقة مع البيبي اذا ما صحاه من نومه وهو يبكي وقام يشوفه ويحمله ويهدهده ، ساعات بشوف انه الرجال بتخلو عن خبرات كتير حلوة بدون ما يعرفوا :)

وانتي غصب بدك تنامي عنده انت والبيبي ؟؟؟ .. حتى كل ما يصحى البيبي يبكي زوجك يصحى ويهاوش وانت تتعصبي وتتأثر نفسيتك وتقولي ما يحبني ولا يحب ابني ...

بتفكري خيالي خصب وبتخيل ؟؟؟ لا ابدا ... هاد اللي صار معي انا شخصيا !! ... ولما برجع بفكر في تصرفاتي بشوف اني كنت غلطانة جزئيا.

1- التصاقكك الشديد بالطفل ونسيانك ان زوجك موجود ومحتاج يشعر انه لسة على راس القايمة عندك .. خطأ.

2- توقعك ان البيبي محتاجك 24 ساعة باليوم ، رح يحملك عبء وتوتر نفسي .. عودي طفلك ترضعيه وتغيري له وتلاعبيه ... ورتبي برنامجك تنامي على نومته وتصحي معاه ، يعني اول فترة لا تستغلي نومه بانك تقومي باعمال منزلية ، لأنك لسة والدة ومحتاجة راحة ولما تتعبي حالك وهو نايم ما رح يصير عندك طاقة لما يصحى.

3- حاولي تطلبي من الاب يساعدك في حمام البيبي ، او لعبه ، حتى يتعود عليه ، اول الولادة في بعض رجال بيحسو انفسهم غريبين عن البيبي وبيكون في زي حاجز لتقبل البيبي.

خلال هادي الفترة ، الله بعينك نامي انت والبيبي في الغرفة التانية لحتى يتحسن وضع زوجك ويتعود على وجود بيبي في البيت، ويعرف ان الخلفة بترتب عليها تضحيات من الام والاب.... لكن بدون عصبية ولا اتهامات .. زوجك متل ما انت محتاجة قربه ومساندته الك في هالمرحلة ، هو كمان محتاجك .. خدي الموضوع بالهدوء والحوار والحنية.