انا خلاص تعبت من حياتي الزوجية وزوجتي السبب (( مستجدات الرد 33))
 

بسم الله الرحمن الرحيم
الأعضاء الأفاضل
اطرح بين ايديكم مشكلتي مع زوجتي من بدايتها وسأروي لكم تفاصيل حياتنا لاخذ المشورة منكم

في البداية
------عمري 24سنة
وزوجتي من مدينة أخرى في ----- ايضا تكبرني بشهرين او اكثر
وهناك اختلاف بسيط في العادات ولا يذكر وليس بموضع نقاش ولكن الطامة الكبرى اختلاف التربية بيني وبينها عند اهالينا حيث انها عاشت في اسرة مترابطة ترابط شديد جدا بحكم بعدهم عن منطقة قبيلتهم وبحكم عدم معرفتهم لأحد في مدينتهم وهذا الترابط فضيييييييع لدرجة تطفشني منها ومن اهلها
وتربيتي كانت منفتحة شوي واجتماعية بعكسها هي اللي ما تحب الناس ولا تحب تجلس مع احد ومن هذا القبيل

خطبت بنت الناس تقريبا قبل 7 سنوات ولم اكن اعلم انه خطبها ولد عمها قبلي بسنتين تقريبا ورفضت امها ابن عمها وزوجتني انا الظاهر انه بالغصب حسب ما تبين لي لاحقا،،والظاهر ان باقي لها نظر في ولد عمها تزوجت بها منذ سنة ونص وكانت حياتنا في البداية عادية جدا وكلنا راضين ببعض حسب ما أرى الا أنه منذ 7 أشهر تقريبا بدأت المشاكل بيننا بشكل غير طبيعي،، أصبحت أشك فيها لاكتشافي بعض الامور التي قد تعد خيانة زوجية صغرى كرسالة لشخص في الشات على قناة تلفزيونية تبدي إعجابها به وكذلك بعض الأمور الأخرى التي تشكك أي شخص مهما كان
منذ فترة بدأت أيضا أشك في تعلقها بولد عمها الذي خطبها ورفضته امها وذلك لوجود دفتر اشعار لديها وبه بعض الابيات اللي تدلل على هالشيء وواجهتها بهذا الشيء وقالت انها قصائد بينها وبين زميلاتها ومدري ايش مع ان كل الابيات من خطها هي
زوجتي هذي نظافتها في بيتها وفي نفسها واهتمامها فيني وفي نفسها معدوم الى حد معين ولا أرى فيها الزوجه المهتمة بشؤون بيتها من كل النواحي
كذلك بينها وبين اهلها ترابط عجيب كما ذكرت سابقا لدرجة ان اهلها يتدخلون في كل صغيرة وكبيرة في حياتها واكتشفت مؤخرا ان اسرار بيتي كلها عند اخواتها وامها بكل تفاصيلها
الاحظ عليها ايضا عدم اهتمامها بأهلي وليتها على كذا ،، في بداية زواجنا كانت اكثر مشاكلنا او كلها بالاصح على سالفة اهلي وكأنها لا تريد ان يحصل بينها وبينهم أي تعارف

وانا ولله الحمد انسان متعلم وواعي رغم صغر سني ورغم قلة خبرتي بالحياة الزوجية الا اني اتلكم معها واحاورها في كل شيء واحاول ان اجعلها تعمل اي شيء من محض ارادتها وقناعتها ولا أؤمن بالطريقة الغجرية التي يتبها بعض الازواج في الاوامر والنواهي ولا اذكر اني قلت لها كلمة لا في أي شيء الا بعد اقناعها تمام الاقناع ان طلبها غير منطقي وماله لزوم نهائيا

الشاهد يا جماعة الخير:

قبل تقريبا شهر صارت بيني وبينها مشكلة بسبب دخولها مع دكتور يفحص عليها " هي الآن حامل بالشهر التاسع" بغرفة الاشعة لوحدها من دون ما تزهمني مع انها قالت انها حاولت تزهمني لاني كنت باستراحة الرجال وهي خشت معه وسوت الاشاعة وطلعت وانا قومت الدنيا وقعدتها عشان حركتها البايخه اتوقع كان بتقدر تطلع من الغرفة لحد ما اجي مو اجي وهي خلاص سوت الاشعة وقضينا،، المهم اني وبختها وبينت لها غلطها وباليوم الثاني انا حاولت اني اصلح الوضع او بالاصح انسى السالفة ودخلت البيت وقلت لها شيلي غرض من الارض وحطيه على الماسة فرجمت به بقوة ووقتها انا ثرت وما ادري وش صار فيني ومديت يدي عليها وضربتها ضرب مبرح وقد لعنت والديني وقت الضرب وتكلمت بكلام بذيء وهذا ما جعلني لا اتوقف عن ضربها لمدة ربع ساعة متواصلة ويشهد الله اني ندمان اشد الندم على هذا واعلم انه ليس برجولة ان يضرب الرجل امرأة ولكن قلت لعل وعسى ان اخر العلاج الكي ،، ووديتها لبيت اهلي لأن ابوي خالها وقلت لها خلي اهلك يجون ياخذونك لان اهلها بمدينة ثانية وطلبت منها كذا عشان تفكر هي قبل ما تروح لأهلها ابيها تروح من قناعتها مو مجبورة ،، هي ماراحت وبقت عند اهلي ،، بعدها بيومين تصالحنا لاني ندمان على الضرب وجيتها البيت عند اهلي وأعطيتها هدية غالية ومبلغ مالي كبير ارضاء لها وليس قيمة لضربها ،، بعد عشرة ايام تقريبا من بعد الصلح قامت والدتها حسبي الله عليها بالاتصال علي ودار بيني وبينها حديث طويل ولم ارضح لها فيه ولم اعتذر عن ما بدر مني بل فهمتها ان الامور طيبة وما تحتاج اي تدخل من احد لاننا تراضينا ،، وقامت امها بأرسال ولدها لأخذ زوجتي من بيت اهلي والذي هو بيتي ومنذ تلك الايام من حوالي 20 يوم دارت الاحداث التالية

في البداية كانت زوجتي لا تريد الذهاب ولكنها تغيرت والظاهر أهلها حشوا راسها وخاصة وحده من اخواتها فتانة بشكل مو طبيعي وصارت زوجتي تقفل جوالها وتتغلى وتثقل بشكل يطفش ومع اني منبه عليها ما تقفل جوالها وتقفله والمهم انها تسوي كل شي يرفع ضغطي ما ادري ليش ما ادري تبي تشوف انا متمسك فيها او لا بصراحة ما فهمتها وانا والله بأكون حقاني صح اني احيانا افتقدها فأحط حرتي فيها واتكلم واهددها لو ما ترجع بأسوي وأسوي وبرضه في نفس الوقت ابين لها اشتياقي لها بس اني اخطئ في التعبير واروح اسب اهلها اللي اخذوها وهو مو سب سب بس اني ابين لها انهم غلطوا بأخذها وحنا خلاص متراضين ،، المهم اخر رسالة ارسلتها لها بينت لها انها قفلت معاي من كثر تغليها وبرضه اليوم توفى واحد من اولاد عمها وادق عليها عشان اعزيها فما ترد مع اني اشوف ان وفاته مالها دخل في وضعنا المفروض ترد والحي ابقى من الميت والمفروض ما تحزن عليه لدرجة ترفع ضغطي وتخليني اغار عليها فأرسلت هذي الرسالة وبينت فيها ان الحي ابقى من الميت وان المفروض تنتبه لجوالها اذا دقيت ومن ذا الكلام وفي الاخر ابي ابين لها اني زعلت وقلت الله يلعن اليوم اللي عرفتها فيه هي وأهلها وان نفسي طابت منها وان الله بيعوضني بوحده بأحسن منها وكان قصدي انها تنتبه لوضعنا وما تطنش فردت برد بصراحة صدمني صدمه ما انتسيها الين اموت كان ردها بالنص:

الله يهدي امي اللي غصبتني عليك واللي يتكلم كلامك ماهو رجال
وقالت روح ما باتحسف عليك بس اعزي اللي بترضى بك بدالي

هذا موضوعي فابي ردودكم ووش تشوفون الحل وما ابي احد يجلس يغلطني انا عارف اني غلطت وهي غلطت وكلنا متشاركين بالأخطاء لكن هي زادت علي وأهلها تدخلوا بحياتنا وحتى اهلها رفعوا ضغطي ما يردون علي حتى وانا ابي اعزيهم في وفاة ولد عمهم " الله يرحمه "

وبصراحة انا افكر في الطلاق بعد الاهانة اللي تلقيتها منها بآخر رسالة وجهتها لي
وجالس افكر في اني اخليها اشهر عند اهلها بدون اني حتى اكلمها الين تتيسر الامور
وبعد أيام راح تضع مولودنا الاول فهل هذا المولود حسب خبرتكم له دور في حل مشاكلنا ام ماذا
بصراحة انا منحاس واشكي لله ثم اشكي لكم الوضع القائم
واتمنى من الله ان الامور تنحل ثم اتمنى منكم تنوروني في حيرتي
وكلم جزيل الشكر

الأخت بعيدة هناك أشكر لك ردك على موضوعي ولكن احب ابين لك عدة امور واعتبريها للنقاش او بالاصح ايضاح
1- ما سبيت اهلها بسب جارح وانما ابين لها انهم يتدخلون بحياتنا ويجبرونها تقفل جوالها او ما ترد وهذا ما يصير هي انسانه وزوجه ولازم يكون لها رأيها بالموضوع مو تزعل من زعلهم
2- انا راعيت بما فيه الكفاية وما ضربتها لأني من النوع اللي يتخذ الضرب حل لكل شيء وانما ضربتها لأنه طفح الكيل
3- ولد عمها وشكي في حبها له له مسببات تخيلي بعد الزواج هي اللي قالت لي على انه شافها وجالسة توصف شكله ولما عصبت عليها قالت ابيك بس تغار " أي اثارة للغيرة اللي تكون كذا؟ "
4- اهتمامها بالبيت انا اربطه بحبها لي " لو كانت تحبني كان اهتمت في كل تفاصيل حياتي "
5- زوجتي ماراحت لأهلها لأنها زعلانه أو عشان ضربتها لأنها اصلا ماراحت الا بعد 10 ايام من السالفة وحنا تراضينا وخلصنا بس اهلها هم اللي اخذوها يقولون ليش انتي يتيمه عشان تسكتين؟ يبون يسببون فتنه
6- انا بينت لها تمسكي الشديد فيها بكل الوسائل لأني شكيت انها تبي تختبرني بس اللي اشوفه مو اختبار الظاهر هي من جد ماتبيني وخصوصا انها تخاف من اني بأطلق بعد فترة او اتزوج عليها او من هذا القبيل عشان كذا احس انها ما تبيني

وبعدين وش رايك بسالفة الرسالة الاخيرة اللي ارسلتها وانتقصت فيها رجولتي وبينت لي انها مغصوبه علي ما اشوفك علقتي عليها بأي موضوع

يعطيك العافية على تفاعلك معاي وعسى الله يكتب اللي فيه خير لي ولها ولكل المسلمين

بس يا الغالية انا جاني منها كلام بصراحة محى كل محبتها وخصوصا انتقاصها لرجولتي ،، انا ومو مدحه لي بس عندي كرامه لو اوزعها على ميه شخص كفتهم ،، فكيف اتخيل نفسي معاها بعدين وهي قايلة كلام زي هذا

من وجهة نظرك تشوفين انها هي بعد راح تقول هذا ما عنده كرامه ولا ايش بالضبط؟
لأني اخاف اصلح المشكلة بمشكلة وبدال ما انتصر لكرامتي اهينها
ولعلمك انا بينت لها حبي وتمسكي فيها اكثر من مرة وغالبا ما احل مشاكلي معاها بالحوار والاقناع تخيلي احيانا اداوم مواصل عشان جالس اقنعها بشيء او اني احل معها مشكلة

وبعدين سؤال ثاني هي تقول انا احب الرجال يكون حمش "سي السيد" ما ادري وش هالمصطلحات سألتها واستنتجت من اجابتها تبيني اكون معها قوي شخصية مررره الظاهر تبيني ازفها في الرايحة والجاية والظاهر انها ما تحب التعامل الراقي

الله يهيها وبس وبعدين انا افكر ارسل رسالة ابين لها فيها انها غلطت غلط كبير بكلمة منت رجال بس تفكيري وقف ومالقيت كلام ارسله ممكن تساعديني وش اقول

بصراحه غريبه كلامها بس الناس أذواق ... حمش يعني تغار عليها من الهوا الطاير موب تزفها بالرايحه والجايه على قولتك!

هذي استعانه بالشر الله يهديك بس ما عليه انت طلبت
إما انك ترسلها رد بسيط قوي مع تهديد مثلاً تعيد نفس رسالتها وتحط اسهم بعدين تكتب
انتي قد هالحكي؟
أو
لو انتي ندمانه هالقد صدقيني ما راح تأثرين ولا بشعره من شعرات راسي ورايك ما يهمني ......
اتوقف هنا أخاف اخربها :)

سؤال ممكن!!