|
سببت لبنتي عقدة من الموت
قبل فترة بدت بنتي تتعرف على معنى الموت يعني تشوف طير ميت ولا حشرة وتقول نايم بيقوم ولا أروح أقومه نقولها انه يا حبيبتي مات خلاص ما يقوم وهكذا مع المواقف والأيام ويبدو إنها فهمت المعنى بعدما كانت مو مستوعبته في البداية اللي صار إني كنت أبحث لها في الانترنت عن قصة للأطفال ومن بين الخيارات قصة بائعة الكبريت وشغلتها إلا شوي تسأل فين أمها وأنا من ذكائي وصراحتي الزايدة قلت لها ماتت وسألت عن أبوها قلت انه مات قالت ماعندها لا أم وأب قلت لا أحس إنها اصدمت وتهدج صوتها شوي يجي مشهد تموت فيه الجده والبنت الصغيره بائعة الكبريت تصيح وتنادي جدتها ولا ترد ماتت تسأل ليش ماتتكلم جدنها وأوقل لها ماتت :29: صارت تصيح معاها هنا وقفت القصة وبديت أشرح لها وأقول انتهى عمرها وصرت أقول لها كل شيء يا ماما يموت وينتهي عمره بس محد يدري متى بهذا زدت الطيب بلة ما أدري ايش بلاني وياها على هذا الكلام والأجوبة اللي تصدم من بعمرها وصارت تقول انتي بتموتين هنا بلشت عاد شقولها ما أقدر أقولها لا قلت ايوه بس إن شاء الله بعدين ورجعت صاحت جيت برقع قلت لها إن شاء الله اللي يموتون نشوفوهم في الجنة وإحنا قايلين لها مسبقا انه الجنة مكان حلو والناس الطيبين اللي يصلون ويحبون الخير ومن هالكلام الله يدخلهم الجنة في النهاية إني حست الدنيا وخبصتها في مخ الصغيره الحقيقة محد ضامن عمره وكل شي بيموت لكن ماأدري كيف وصلت لها المعلومة بصدمات إن شاء الله تقوم بكره وتكون نست لو ظاهريا لأنه فعليا أتوقع تخزن عندها في عقلها اللا واعي وربما ترجع تطرح نفس السؤال في مواقف مستقبلية حسيت إني أم شريرة ولا عرفت أتصرف بشكل جيد في هذا الموضوع وسببت لها ألم وحزن وخوف وهي صغيرة على إنها تتحمل الفكرة و ما أدري هل في طريقة تخفف من وقع المأسواية والسواد اللي زرعته براسها وقلبها |
الله يقلبي على العقل الصغير إللي ما استوعب الموت ..
بنتي كمان بدأت تردد مات ,,يموت ..لكن لسا ما سألتني معناها ..الله يجزاك الجنة نبهتيني ..ما اقولها الصراحة .. اتذكر بنتي سألتني عن بنت عمتها توفت الله يرحمها وشافت صورها معايا قالت فين راحت رولا ؟؟ قلت راحت الجنة عند ربي ..قالت ابغى اروح عندها ..قلتلها فال الله ولا فالك مع ضربه كمان :) والله ما اقدر افيدك لأن ما عندي خبرة سابقة .. لكن استفدت من موضوعك الله يخلي لك بنتك ويحفظها ويبارك لك فيها و يخليكم لها يااارب والله بكاني موضوعك ..الله لا يفجعنا في حبيب.. |
الله يعينا على تربيتهم التربية الصالحة الطيبة
صراحة الواحد يمر بمواقف يحس نفسه ما يعرف يتصرف ولا يسوي شيء ويتصرف تطلع نتائج غير مرغوبه جزاك الله خير عزيزتي على دعواتك الطيبة والله يصلح لك بنتك ويرزقك برها وصلاحها ويقر عينك بها ويخيلها لكم شاكرة لك مداخلتك |
ذكرتيني بولدي
قولي لها في حياتين حياة في الأرض ونسميها الدنيا وهي قصيرة مهما طالت وحياة في السماء ونسميها الآخرة وهي حياة أبديه مافيها موت ولا انتقال والموت هو مجرد إنتقال من الحياة الدنيا إلى الحياة الآخرة وكلنا لا زم نمر بالمرحلتين وننتقل من الحياة الدنيا إلى الآخرة ونستقر في الآخرةإلى الأبد كل واحد حسب عمله في الدنيا عشان كذا لا زم نعمل أعمال صالحة في الدنيا لأنها مرحلة بناء وزرع والحصاد بيكون في الآخرة أنا أعطيتك الفكرة وأنت صيغيها براحتك أهم شي تركزين أن الموت مجرد أنتقال وليس حرمان موفقة |
الله ينور عليكي
اياكي تكلميها عن النار كمان ههههههههههههههههههههه حسسيها بالامان الي نزعتيه منها لما قولتلها انك حتموتي بجد شيء قاسي جدا ربي يعينك حاولي تشغليها بامور اخري اختاري قصص مفرفشة في موقع اليوتيوب النقي كرتون اسلامي جميل |
زي ما قالت أم روزينة أعطيها فكرة حلوة عن الآخرة وإنها أحلى من الدنيا بكثير
وكل ماعملنا صالحات في الدنيا أكثر كل ما كانت أحلى وأحلى لأن اللي نزرعه هنا نحصده هناك سواء خير أو شر بدون ماتذكرين لها النار بشكل صريح موفقة |
اقتباس:
لأن توها مسوعبة الموت وأظن على انه حرمان يبغالي وياها فترة تفهم انه انتقال لأنها صغيرة حتى ما صار عمرها 5 سنوات نقول يصير استيعابها أعمق جزاك الله خير على مداخلتك عزيزتي |
اقتباس:
لأن لسه ما بتفهم ايش يعني حرق وتعذيب ياساتر لكن الموت المواقف جابت الكلام عنه يعني عصفور ويموت وتعتقده نايم لازم نقولها مات خلاص لكنها وقت سألتني بموت ما أقدر أكذب عليها وأقول لا الله يعين وإن شاء الله بحاول تكون القصص مفرفشة ومحد يصيح ولا ينظلم ولا يدور على أمه عشان لا تجيها عقد ثانية شكرا اختي لمداخلتك الله يسعدك |
اقتباس:
ودايما تقول ليش مانروح الجنة ومتى بنروح والنار مثل ما تفضلتوا لسه بدري عليها لكني ما أتكلم لها عن الشر واجد بس أقولها نسوي الأشياء الحلوه ونصوم ونصلي ونحب ماما وبابا ومن هذا الكلام أشكر لك جدا مشاركتي من جديد الله يعطيك العافية |
اختي مساء الخير شدني موضوعك خصوصا انه ذكرني بموقف وقع لما كنت صغيرة لا اتذكر الموقف الذي اخافني من الموت لكن ما اتذكره هو كيف كنت اترعب من الخوف على امي لتموت بعد الشر الله يعطيها طول العمر. تصوري اختي انني كنت انهض بالليل و اذهب احط اذني قريب من وجه ماما كي ارى اذا تتنفس او لا. هذا مثال و المواقف كثير . لكن المصيبة ان هذا الامر استمر معي حتى مرحلة الثانوي يعني رغم اني كبرت بقيت المخاوف تراودني. احذري اختي من مثل هذه المواقف على ابنتك و حاولي دائما تخليها جنبك و اذا تعبتي لا تحسسيها بذلك. هداها الله و اصلحها و انبتها نباتا حسنا.
|
| الساعة الآن 11:35 PM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©