|
مشكلتي عدم التفاهم بيني وبين والدي
السلام عليكم
كيف حالكم اخواني اخواتي المنتدى هذا من اجمل المنتديات الي راتها عيني ناس مثقفه واعيه بطريقة طرحها للموضوع هذي اول مشاركه لي قد تكون طويله قليلا لكن اتمنى المساعده منكم ولو بالقليل خلوني اول شي اعرفكم بنفسي عشان توضح لكم المشكله مع سردها طالب باحدى الجامعات بالرياض تخصص حاسب الي عمري 21 سنه الاخ الاكبر بالبيت مشكلتي من ناحيتين من ابوي الله يحفظه عندي الوالد مهما فعلت له ومهما سويت مستحيل اني القى تقدير للسويته باي لحظه يزعل من احد يقلل من قيمته انا اقول بنفسي هذا ابوك لازم تحترمه وتصبر والامور تزيد كل يوم عن الثاني طبعا الوالد بحكم شغله يطلع من الساعه 6 الصبح الى الساعه 2 الظهر انا الي قايم بامور البيت كامله من صيانه دوري للبيت من احضار اغراض البيت من المعاملات الحكوميه ولا عندي أي مشكله اني اسوي كل هذا لاني بالنهايه اخدم عائلتي ابوي دايم حاط حاز بيني وبينه وحساسيه شوي رغم انه يجلس ويضحك معي << ادري كلامي فيه تناقض لكن الحين اشرح لكم حساس من ناحية يناقش معي أي موضوع يزعل ويعصب على طوول ويجلس يتكلم اعلي بكل انواع المسبه وانا والله ماارد عليه الا سم _ وحاضر يعتقد الان هو انه جالس يشتناقش معي وبالحقيقه انه فرض راي يعني مالي كلمه انا مجرد مستمع فقط كنت قبل ادرس بتخصص سيئ وكلمته اني راح اغير التخصص وزعل وجلس شهر كامل ما يتكلم معي رغم بالنهاية هذا مستقبلي سحبت ملفي وقدمت على جامعه ثانيه والحمد الله الان ادرس افضل من التخصص الاول بعد فتره جاني يعاتبني ليه ما جيت اعتذر منه رغمي انا ما اخطات لكن جلس ينصح وفحران بالتخفصص الجديد رغم انه كان رافض الفكره اني اغير فكرت فيها بنفسي وقلت حرص زايد لكن حرص زايد يضيع مستقبلي ما اقبله يحب يتدخل بكل شيء يخصني رغم ان معاملته مع اخواني تختلف عني 180 درجه صح اني كنت متعبه يوم انا صغير لكن مومعقوله ان الاب يترسخ بمفهومه عن لابنه انه سيء طول عمره شي ما اتوقع انه يجي من ابوي خاصه وهو اخذ شهاده من دوله اجنبيه ومهندس باحد القطاعات الحكوميه ضغط رهيب اعاني منه من ابوي الان صرت احاول اشوفه باليوم لمدة دقيقه بس اسلم عليه وامشي لاني تعبت نفسيا منه بشكل كبير والوالده الله يحفظه مع ابوي اكيد رجله مقدر اقوله شي بالنهايه هي امي لكن الان صرت ما ابح اجلس بالبيت ابد الناس تعتبر البيت لراح هوانا صرت اعتبر البيت مثل السجن بالنسبه لي دايم تقليل من قدري انا ما توفقت بداية دراستي ودرست سنتين وبعدين سحبت ملفي ودخل جامعه ثانيه كل ما يشوفني هو وامي تهزئ الان انا تعبان جدا ضغط عندي خارج البيت وضغط مالي بالنسبه لي والله والله والله ثلاث مرات مصروفي الشهري 900 ريال مكافئة الكليه ما اخذ من ابوي ولا ريال احاول اشتغل داوم جزئي باي مكان لكن ما حصلت الان اقتصد على نفسي بشكل كبير ضغط داخل البيت من ابوي ومن الوالده الله يهديه تفرق بالمعامله بينا بشكل كبير انا من النوع المرح والاجتماعي لكن من النوع الكتوم فوالله اول مره اتكلم عن مشكلتي اتمنى تساعدوني لان الاسلوب هذا صار يشتعب معي لامور مستقبليه انا مخطط له |
وعليكم السلام ورحمة الله وضعك مثل وضعي لكن الوالد -حفظ الله - بعيد عني .......!!!!!! أن تقول أن معاملته لك تختلف عن بقية أخوانك ،،، وجهة نظري غالباً البكر يواجه تعامل خاص من قبل والده فهو مفترض فيك انك الكبير ، و تلقاه يشد في معاملته معك ،،، إلا ان اصبح هذا سلوك تلقائي وردة فعل ستشاهدها كل يوم... لكن ما عليك الآن سوى أنك تتولى زمام مسؤولية نفسك وتساعد اهلك بقدر ما تستطيع .... لا تنتظر من والدك شيء؛ لسبب ان حقه عظيم ، ثم لأن طبعه هكذا من زماااااااان.... وهو نشأ وكبر على ذلك فصعب أن تغيره... ونصيحتي لك بمجال تخصصك بما أنك تدرس حاسب آلي ،، أن تبدأ من الفصل الدراسي القادم بدراسة الشهادات العالمية والحصول عليها (شهادات مايكروسوفت - شهادات سيسكو) وهكذا ستساعدك بإذن الله في سوق العمل وتكون مؤهل ولها قبول في التوظيف .... أقصد من هذا كله ان استقلاليتك،،، ستصنع منك كيان يلقى الإحترام ممن حولك وخاصة والدك... أعرف انك قلق من أمور مستقبلية قد يتدخل فيها الوالد كالزواج مثلا..! لكن لكل حادث حديث ، وأرجـو انها ما تأثر بدراستك ونجاحك الشخصي وفقك الله ورزقك بر والديـك وحبب قلب والدك فيك عزوبي:22: بس:d رجل:30: |
اقتباس:
هلا والله اخوي عزوبي اشكرك على نصائحك الجمليه طبعا مثل ماقلت انت ان الكبير تكون له معامله خاصه لكن بعد تقدر تقول انا انسان لي حد بالتحمل يعني الواحد يكتم بصدره شي كبير من ضيقة الصدر تخلي يومك دايم مكتأب وبالنسبه لباقي كلامك فعلا انا هذا الي جالس اسويه الان احاول ابني نفسي بنفسي واكسب احترام الناس بجهدي والشهادات الحمد الله الترم الي راح اخذتشهادة اي سي دي ال __ وان شاء الله الترم هذا ناخذ دوره ثانيه الف شكر لك اخوي على كلامك والله ان الواحد فعلا يرتاح اذا تكلم لكن بنفس الوقت ابي حل لي انا الف شكر لك يالغالي |
الله يفرج همك ويشرح صدرك.
|
أن شاء الله مايضيعك زمانك
معظم الأباء خصوصا في مجتمعنا مشاعرهم جافة بالرغم من الحب الكبير الذي يحملونه في قلوبهم لن أخوض في ا لأسباب التي جعلتهم كذلك لكن بأنقل لك تجربة أخواني أبوي شديد ومثالي جدا وأتعب أخوتي بمثاليته الزائده خذ مثلا الصلاة أخواني الحمد لله يصلون لكن يوميا يتهزئون على الصلاه!! تدري ليش يقول لهم ليه ماتصلون السنه ؟؟وإذا صلو السنة قال ليه ما لحقتو تكبيرة الإحرام ؟؟وإذا لحقوها قال ليه ما أنتم في الصف الأول؟؟ وإذا كانو في الصف الأول ليه ماتقرأوا قران إلى أن تقام الصلاة ؟؟وهكذا محاضرة يوميه تعبت نفسية أخواني وعلى فكرة تشددة فقط مع الأولاد مو بس في الصلاة هذا فقط مثال تحس أنه يبيهم مثاليين في كل شيء مع أنهم ماشاء الله الواحد يفتخر فيهم لكن أبوي مايقتنع يبغى الكمال والكمال لله وحده فحسوا أن رضاه من رابع المستحيلات تدري كيف أتحسنت العلاقه بينهم واحد من أخواني انقبل في جامعة في مدينة أخرى والثاني إنقبل في نفس مدينة أهلي ولا حظنا أن أبوي تغيرة معاملته لخوي اللي راح لمدينة ثانيه وصار يفرح بجيته وصاروا صحبه وصار أبوي يفضفض له ويا خذ رأيه لأنه أثبت نفسه ونجح أبوي كان مفكر أنه أخواني ماهم ناجحين إلا عشانه وراهم ولما أثبتوا العكس تحسنت العلاقه مع أن معاملته لباقي أخوتي مثل ماهي فقرر أخوي الثاني الخروج من البيت إيضا وفعلا تحسن العلاقة الخلاصة طبعا أنا ضد الخروج من البيت مهما كان السبب فأنت مأجور على صبر وبرك وكلها كم سنةو تخرج فعليا من البيت وتتزوج وبتندم أنك ماصبرت خصوصا إنها فتره وبتعدي فلا تضيعها على نفسك لأنك بتضيع أجر عظيم وتأكد أن كل اللي يصلحه أبوك حب وحرص عليك وبكرة لما يصير عندك عيال رح تتذكر وبتعذرهم في أشياء كثيرة أخوي بنفسه لما بعدشوي صار يلقى أعذار كثيرة لأبوي عكس لما كان تحت الضغط ما كان يلتمس الأعذار ويحس بالظلم أحيانا لما نخرج من دائرة المشكلة وننظر لها من بعيد نكون أكثر إنصافا وليونة ممن يتعامل مع المشكلة في حينها ومادام أبوك زعل لما غيرت تخصصك ولما شاف بعينه التقدم في مستواك فرح معناها أنه بس يبيك تنجح ولما تنجح بتتغير معاملته لك فأثبت له أنك قد المسؤليه مارح أتكلم عن فضل الدعاء ولا بر الوالدين لأنها أمر مفروغ منه أعانك الله ويسر أمرك |
| الساعة الآن 12:35 PM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©