|
والله احترت ابن جيراننا وابني
السلام عليكم ورحمة الله الاسبوع اللي فات جا ولدي من برا .. على المغرب ... وقعد سرحان .. مهو معاي .. بعد صمت يمكن نص ساعه .. رفع عينه فيني وقال لي ياماما انا بأقول لك سر بس بالله لا تعلمين ابوي قلت ماني معلمته قال لا احلفي بالله .. ( فديته ) قلت لازم تصدقني .. وش صار خوفتني قال اكتشفت ان ولد جيرانا الفلاني يدخن ............ انا عاد وجهي صار كله استفهامات قعدت اتأكد منه هو نفسه ؟ قصدك هو هو ؟ مش ممكن يا ولدي .. يعني دخان حقيقي؟ يدخن ويطلع دخان ؟ وولدي يقول والله ياماما دخان زي حق الكبار .. عارفين ليه قلت مش ممكن ؟ لأن الولد توه في ثالث ابتدائي صراحه جاني برود شديد في اطرافي ولد عمره 9 سنين ويدخن قال لا تعلمين .. بس هو قال ان امه تدري وما قالت شي ..قلت شكله يكذب عليكم .. يبغى بس يوحي لكم ان الموضوع حاصل وبشكل شرعي بعد.. وانت وش رايك في تصرفه؟ قال لا والله مو زين ولا حلو.. ياماما كان يخوف ..شكله غلط قلت طيب كيف ياخذ دخان وابوه مايحس؟ قال لا مو من ابوه قلت اجل من وين؟ قال فيه هندي يعطيه الكرتون اعتقد ب 3 ريال اناا نصدمت .. ونشف الدم في عروقي وخفت ودخت وكل المشاعر جت مره وحده المساله فيها هندي . معناتها زي ما يعطي ياخذ .. صح والا لا ياجماعه؟ لهذا السبب رحت علمت زوجي مسكين انصدم قال الاب اصلا مو مدخن ومعقوله الام تدري وساكته؟ قلت ماعاد ادري اللي اعرفه ان فيه هندي في الموضوع ويعطي طفل عمره 9 سنين دخان وداخل تجاره معاه الله لا يوفقه اخاف لا يسوي شي ثاني فيه والا في اي احد زوجي الحين محتار .. يعلم الاب والا لا؟ قلت ماندري وشلون الاب بيتعامل مع الولد.. بس ودي تعلمه لأن المسأله ابعد من الدخان المسأله فيها تعامل مع هندي ممكن يسوي اي شي شرايكم يعلم والا لا؟ مع العلم ان زوجي يقول ان الاب ماشاء الله رائع ومايستاهل واللي خلاني اخاف من الولد ان علاقة ولدي فيه مره سطحيه لا تتعدى المدرسه يعني مايلعبون مع بعض في العصر بس من لما اكتشف انه يدخن صار يناديه وامس اول مره يناديه واخليه يطلع له زوجي قام يصيح علي ليه تخلينه يروح له قلت والله مابيطول قال له تعال بسألك عن شي عند الباب وانا منتبهه لهم وفاتحه سبيكر الباب يعني امان صاير شد شوي بالبيت من هالسالفه وفي نفس الوقت خايفين على الولد ومنه واذا انكر الولد وش بيصير شكلنا ؟ |
لازم ياأختي زوجك يكلم أبو الولد ضرووووري
المسأله ماتحتمل اي تأجيل وأبنك أبعديه عن الولد تماما حتى لو ثواني عند الباب واذا تقدري تحصلي رقم الولد من ابنك وتكلمي امه بعد يكون احسن ومثل ماقلتي دام في هندي في الموضوع المساله اكبر من دخان الله يستر على اولاد المسلمين المشكله ان الولد صغير وأن شاء الله يفيدونك اكثر الي عندهم أولاد بهالسن |
وعليكم السلام ورحمة الله ما شاء الله لا قوة إلا بالله اعجبني تصرف ابنك لما خبرك وما سكت واعطى لكم قيمة اكثر من ابن جيرانه كل الموضوع ان زوجك يروح يسأل والده ويخبره ليتأكد من هذا حال ولده ،،،، وإن شاء الله جاركم يتصرف التصرف الصحيح مع ولده ،،،،، عزوبي:22: بس:d رجل:30: |
مشكلتي اصدق
الله يحفظ ابنك وابناء الكل يااارب ياقلبي لو الولد مو صاحب ابنك مو معناه انه لا علاقة لنا به هذا طفل ومسلم لابد للاب ان يعرف شوفي في الاول اتصلي بالام حتى لو ماكانت تعرفك وخبريها عن ابنها يمكن تكون مستانسة بالفلوس اللي يجيبها لها وهو كاذب عليها بالمصدر والا ما تعرف اصلا ولا ادري كيف لام ان تسعد بولدها الذي يملك المال بدون علم لمصدر هذا المال شوفي تعلم ما تعلم هذا خيار الان الطماطم خخخخ اطري الجو بس الخيار الثاني زوجك يكلم ابو الولد لانقاذه قبل فوات الاوان وربي يحفظ ابنك وابن الجيران واولاد الكل |
السلام عليكم ...
عندي حل يرضي كل الاطراف .. دعي ولدك يعزم الولد عندكم .. في البيت ... ثم دعي والد ابنك يجلس معهم ... ويستأنس بحديثهم و يدخل معهم بطرفه ونحوها ... ثم اذا استأنس الطفل به .. يأتي بنصيحه عامه عن الدخان ...وأيضا عن شراءه من العماله ويوضح الخطر لهم بطريقه عفويه ... ثم يسأل ابنه و يقول له هل دخنت يوما ... فيجيب ابنك .. ثم يسأل الطفل الاخر هل دخنت يوما هل جربته .. ويسايره بالكلام ويخبره بأنه حريص عليه ولن يخبر أباه ولكن يريد حل المشكله مع ذلك العامل الذي يبيعهم الدخان .. ثم شيء فشيء سيخبره الطفل ان كان فعلا يدخن بكل شيء .. ثم زوجك يقوم بواجبه و يتفاهم مع ذلك العامل بكل الطرق المتاحه لردعه عن البيع للاطفال و ما يقوم به من استدراج للبيع لهم وهذا ما نعرفه حتى الان .. ويستطيع التفاهم معه عن طريق الجهات الحكوميه المسؤله .. وبهذا الحل لا تخسري جيرانك ...ولا تخسروا الطفل .. وتكسبوا صديقا جديدا لأبنكم قد تكونون سبب في صلاحه ورده سالما لأهله .. فاذا لم تستطيعوا هذا الحل ... فليخبر والد الطفل بكل ما حدث لكيلا يضيع الطفل في دهاليز مظلمه .. والله أعلم ... |
الله يحفظو يارب فعلا اولاد 3 ورابع ابتدائي الان يدخنوا شفت بعيوونى
بس فعلا لازم ابو الولد يعرف عشان لا يروح لمصايب تانيه بعد الدخان وهو في دا السن |
ندى 1406
صح الموضوع مايحتمل اي تأجيل اصلا الجو متكهرب شوي عندي وام الولد مابيني وبينها اي علاقه صعب ادق عليها واقول لها .. لكن هذي مسألة رجال بأخليها لهم اما الهندي والله قمت اهوجس بكل هندي اشوفه احسه بيسوي شي في العيال الله يحفظهم عزوبي بس رجل ياليت الموضوع بهذي السهوله يالييييييييييييييييييت سعاد في عز شد الاعصاب ضحكتيني الله يسعدك ويضحك طقم سنونك كللللللللللله حلوه نجي الان للطماطم الأم زي ماقلت مره مابيني وبينها اي شي اصلا هي من النوع اللي تشوفني ايام الروضه في احتفالات التخرج وتدري انه انا ام وليد ولا تجي تسلم انا جالسه وهي الداخله .. الحق للجالس ... عموما مو هذا موضوعنا .. اللي اقصده انه ابسط اساليب التعامل تتجاهلها فكيف ادق عليها اقول الحقي ولدك؟ بس احس برضو انتي فاهمه غلط يا قلبي سعاد .. لأني ماقلت الولد يجيب فلوس.. قلت يجيب دخان زي ماقلت بأخلي الرجال يتصرفون بس بأعلمك وش في بالي السيف المهند اسعدك الله اولا لا يوجد وقت عند زوجي علشان يجلس هالجلسه معاهم .. يجي منتهي من الدوام..بالمره و هذا الولد بالذات ماقد دخل بيتنا ابدا ولا اكل ولا شرب معنا عكس باقي الاولاد ولا يتعامل مع ولدي ولا يلعب معاه ولا شي فكيف اقدر اقول له يجي ويدخل ويسولف معاه زوجي هذا غير انه فيه سبب ثاني بعد ردي على بنت مكه اقوله بنت مكه هذاااااااااااااااااا اللي مخرعني المصايب الثانيه يارب عساها سليمه مافيه مستجدات الا ان ابو وليد مررررررره مكتم .. وكتمني معاه .. نجي للسبب اللي مخلينا ما نتكلم مع اهل الولد ..ومخلينا نفككككر ولد الجيران هذا ابوه مهتم فيه بشكل خيالي من ناحية وقت الفراغ يعني الولد من نادي في نادي ماشاء الله .. بس ابوه معاه مو لوحده.. فإحتمال ان احد مأثر عليه من النوادي ضعيف جدا لكن قائم غير الكشافه غير انه يخليه يشارك في اي نشاط مدرسي يعني الولد له صيت .. وله حضوره .. ومتفووووووووووووق مو مهمل او بليد ويعتبر من واجهات المدرسه ماشاء الله يعني الاب جالس يأسس الولد صح .. حتى مرات تمنيت ان زوجي يكون عنده نفس هالقوه عشان ولدنا .. ومع هذا كله .. تدخين؟ مين مأثر عليه؟ وشلون تجيه الجرأه يدخن؟ في الشارع ؟ ورا بيت اهله؟ يعني اي احد يمر بالسياره يقدر يشوف!!!!!!!!!!!!!!!! شلون بدا؟ كيف تعرف على هالهندي؟ من وين له فلوس؟ اقل شي 3 ريال الا اذا الاب من النوع اللي يسلم بالشهري؟ معقوله الام ما حست؟ ما شمت الدخان؟ مش ممكن الولد مرررررررررره محترف لهذي الدرجه ؟ قمت افكر انه فعلا هي تدري وساكته لأن اللي اعرفه اني ادوخ من اول ما يدخل الدخان مع الباب .. المكان كله يصير فيه ريحة دخان.. والمدخن تبين ريحته انه كان يدخن .. ما يتخبى ابد ابد ابد مش ممكن هذي ما تشم شي... والله راسي اوجعني من التفكير... جالسه افكر في طريقه يتعامل فيها زوجي مع الولد .. ويعلمه بمكان الهندي النذل هذا وعلى طول جوازات ... وبعين يكلم الاب .. مو هذا تصرف صحيح ؟ بس مشكلتي في الوقت .. من وين يجيب وقت |
لاحول ولاقوة واله مرررررررررررررره صغير الولد
شوفي اختي خلي زوجك يقول لابو الولد باسلوب حلو يقول انتبه له ويقوله السالفه وشكل الاب من كلامك مهتم بولده ومتفهم الحل بيد الاب واريح لك خلي الكلام بين الرجال لاتدخلين انتي والا اذا كان امام المسجد علاقة حلوة مع اهل الحي خلي زوجك يقوله وهي راح يبلغ الاب مع اني اشوف انو افضل انو زوجك يقول لابو جيرانكم.....منها يعرف انكم ماترضون له بالشر وبيدري ان نيتكم طيبه يعني اذا قاله زوجك في كل الحالات موقفكم سليم ويبيض الوجه بعد :) |
كلمو الهيئه
وهم يراقبو الولد من بعيد ويوصلو للهندي اللعين ويوقعوه بشر اعماله هذا احسن حل فكرة فيه لان يمكن الاب يرفض الكلام ويقول عم تطلعو صيت على ابني وانتم ناس حقووووده ووووو ونحن نريد الهندي لانه اكيد هناك اطفااااااال اخرى وليس ابن الجيران الوحيد هو الضحيه نريد رأس الافعى لقتلها ولا نريد الضحاااااايا واكيد سينتشر الخير بعد ذلك ويمكن ابو الولد يعرف انكم انقذتم ابنه من سم قاتل ولكن كل همنا الآن الهندي وليس الولد |
منذ البدايه ولي سؤال ...
هل ولدك صادق عما قاله لأن هذا هو المحك !!؟؟ هل عمركم مدحتم الولد هذا عند ولدكم ؟؟!! فقد يكون الغيره دافع للكذب !! تأكدوا قبل ان تكونوا في موقف محرج ! أما اذا زوجك ليس عنده وقت فراغ ! فهذا شيء أخر ! لأن ولدك الان اذا الله اعطانا و اياكم عمر .. ستجديه مراهق بعد سنوات قليله .. وسيحتاج والده أكثر منك لتربيته .. لذا دعي زوجك ينظم وقته ويتجهز لتك المرحله ! استطردت كثيرا ... ولكن في كل الاحوال .. ما يحتاج زوجك يكتم ..يخبر والد الولد وتنتهي المسأله ... ولكن بالنسبه لا قتراحي السابق .. كنت أريد ان اكسب عصفورين بحجر واحد .. 1 - نصح الطفل و توجيهه و ردع العامل .. بدون جرح الطفل عند أهله ... 2 - ان يحس ولدكم باهتمامكم و اهتمام والده باصدقائه و هكذا يكون عنده تصور كامل وحذر من اختيار الاصدقاء .. و ما يحتاج يأكل ويشرب عندكم ... مدامه يلتقي بابنكم معناته يعرفه وزميله و قد يكون صديقه !! والله الموفق ... |
| الساعة الآن 04:11 PM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©