|
بعد ماتمت الخطوبة تفاجأت بالخبر الصاعق
السلام عليكم
اخواني هذه اول مشاركة لي بالمنتدى وحاب اعرض عليكم مشكلتي ممكن تكون مهي مشكله للبعض بس رجاءا بدون تجريح او استهبال من هذة الفئة انا الله يسلمكم كنت احب وحدة من بنات عمي ((وتكون بنت خالتي بنفس الوقت))الى درجة الجنون ولكن الوالد والوالدة كانوا محيرين وحدة من بنات عمي الثاني لي من يوم انا صغير وانا ما كنت ابيها المهم لين ما جاء الوقت المناسب وقلت لاهلي ورفضوا وقالو حنا معطين عمك كلمة ومن الكلام ومستحين نقوله انك ماتبي بنتهم الخ والحمد لله بعد جهد جهيد قالو لعمامي وزعلوا عمامي في البداية بس اخر شي رضخوا للامر الواقع وبعد ما انتهت المشكلة قلت لاهلي على بنت عمي الثانية وراحوا اخطبوها لي ووافقت البنت وكل شي صار تمام بس جاني خبر صاعق خلى الدنيا سودة بوجهي :( :( :( :( :(:(:( ان جدتي الله يحفضها تذكرت انها راضعة بنت عمي وبكذا تكون خالتي من الرضاعة وانا ياعالم كرهت حياتي وكرهت دراستي بالجامعة والحال تدهور بعد ما كنت م طلاب مرتبة الشرف الثانية ومعدلي ماشي بالنزول وما اقدر اركز في محاضراتي لدرجة اني اداوم من الساعة ثمانية الى 12 ولا كني حاضر والمشكلة اني ادرس في جامعة الملك فهد للبترول واعتقد ان السعوديين يعرفون صعوبتها بالحيل و باقيلي سنتين واتخرج وانا انسان عايش بعيد عن اهلي والفراغ العاطفي الل جابتة لي الصدمه لاعب بنفسيتي والمشكلة الاعظم اني انا الان كملت 21 و...........ا والله يا اخوان اني ماودي بالحرام بس الشيطان يلعب براسي ويالله امسك نفسي في كل ويك اند ورحت يم خالتي الجديدة وقلتلها كل اللي بقلبي وقالتلي ان ما لك حيل غير انك تتزوج على شان تنسى وانا كلمت ابوى وقالي صعب اني اخطبلك الان لان باقيلك سنتين(((لان من عاداتنا ان الملكة والزواج لازم يكون بينهم اكثر شي 6 شهور)) وانا ودي اخطب على شان انسى بس ما اقدر يا عالم ابي حل ؟؟؟؟؟؟؟؟؟؟ دمتم |
والله ماادري وش اقول
اولا.. الاعضاءماياخذون اي مشكله باستهتاار ثانيا ..انتو متأكدين ان جدتك مرضعتها خمس رضعات مشبعات <<تذكرت مسلسل بدوي نفس المشكله بعدين ماهي نهايه الحياااه وماتدري وش الخيييره فيه ويعني صار كذا تروح لحرااام ماادري ليش تقول كذا؟؟؟ وفعلا حلك تخطب وحده ثانيه مو شرط تكون ملكه بس خطبه اللين تخلص كليه الله يكتب لك الخيييره اللي فيها مصلحه لك وسعاااده:14: |
اخي يشرفني ان ارد عليك اول شي تكثر من الصلاة وخاصه صلاة اليل والدعابان الله يقوي قلبك وتتخطي هذي المحنه ويمكن هذا خير لك والله اراد كذا يمكن لوتزوجتها ماترتاح معها حتى لو تحبها بجنون حاول تقنع اهلك بشتى الوسائل انهم يسرعون في تزوجك حتي لو تكلم امك وابوك وتقنعهم بشتى الطرق وحاول دائما ترديد ان هذا خير وا ن الله ارد كذا وتذكر دائما اننا في جهاد مع النفس لكن الحرام يجر معه ويلات كثير وعاقبته وخيمه يكفي انه يهز عرش الرحمن ::::::::اخيرا اكثر من الاستغفار ففيه راحه عظيمه///////استغفرالله الذي لااله الا هو الحي القيوم واتوب اليه////////////
|
اقتباس:
ثانيا للاسف متاكدين ثالثا ماعندنا خطبة بس وبعدين الملكة غالبا الملكة بعد الخطبة مباشرة ((الا اذا كانوا اقرباء جدا وللاسف مافي بنت تقربلي مناسبة لسن الزواج |
يالله ربي يجبر كسر قلبك
شوف يااخوي لربي حكه في كل شيء ارضى بالواقع هذا اول شي وقول الحمدلله الحمدلله الحمدلله لان ربي سبحانه بااذنه مامنع زواجكم الا لخير لك ولها والله يعوض كل واحد فيكم الشي الثاني ليش تفكر بهالطريقه وان الحرام قريب منك ومعرف ايش؟؟ يااخي تبي ترتكب شي من السبع الموبقات؟؟ لشيطان يزن ع راسك عشان تدخل معه النار وهو حالف يغوينا اجمعين ليش تطاوعه يااخي لاتفتح المجال لنفسك حتى بالتفكير استغفرالله هذا شي كبير لايحليه بعينك ابليس اعوذ بالله منه ترى كل اللي تقوله براسك منه وبعدين ويك اند روح لااهلك الرياض تبعد عن الشرقيه بس 3 ساعات ونص مب تعب لو معك اصحابك او حتى بلحالك جك بك وتكون بين اهلك وتكون كسبت اجر صلة الرحم بدال ماكان يوسوس لك ابليس بالحرام اقهره ودوس ع راسه بعد الله يقويك ويحفظ لك دينك ومن رايي اخطب وحده قريبه لك لو خطبت قريبه عادي بيوافقون لان مابين الاقارب رسميات كمل دراسته وتخرج وتوظف لاتفكر في امور سلبيه |
تم النقل إلى قسم المقبلين على الزواج.. |
اقتباس:
والله يعينك اذا متأكدين بس لازم تنسى واي شي ربي يبعده عنك ترا خيييره لك خل هذي دائما قناعتك والله يكتبلك اللي فيه خييير |
: لا حول ولاقوة الا بالله ! وش عندهم الجدات مااشاءالله ماخلوا احد الا رضعـوه نفس حالة جدتي بس مااااااااعليه ياخـوي ماتدري وش الخيره فيه .. ربي صرف عنك الشر قول الحمد لله صح تحبها ومتعلق فيها بس اكيد ربي راح يعوضك بالي احسن منها وانت راح تتفاجأ بهالشي ! لأن قصتك والحب الي عشته مو بس انت لوحدك الي عشته غيرك ملاييييييييييين واكتشفـوا الحب الحقيقي بعدين بالزواج فا لاتشيل هم .. ماعليك غير تبحث عن عروس وتدعي الله عزوجل وتتحرى اوقات الأجابه .. بأذن الله ربي ييسرلك انتبه واقولك انتبه للمره المليون على دراستك .. جامعة الملك فهد صح صعبه وبعد مايبيلها غير شاطر .. بنفس مستواك هذا ماراح تجيب معدل كويس انفض عنك الهم وتذكر ان الله ماخلى هالشي ييصر الا لحكمـه كبيره وخيره لك .. عشان كذا افررررررررح الله مابتلاك الا ليفرح قلبك .. وان شاءالله بييجيك الفرج عاجلا غير آجلا اسأل الله العلي العظيم ان يذيقك برد عفوه ويمن عليك بالعافيه وراحة البال ويرزقك الزوجه الصالحه التي تكون قرة عين لك وتكون انت قرة عين لها ... اللهم اميييييين اللهم امين .. الزم الأـستغفار الزم الأستغفار .. الزم الأستغفار .. اقسم بالذي لا اله الا هوو انه سبب بعد الله عزوجل في تفريج همومي وخطوبتي ورزقي ... الزم الأستغفار ولن تخسر شيئا ابــــــــــــدا .. : |
:18:الله يكون فى عونك طيب ليه ماتشوف بنت عمك المرشحة الاولى لانها لو بتحبك هتكون اكتر واحدة مناسبة ليك وربنا يوفقك
|
ان شاء الله خير لك والحمدلله لسه ماصار شي
اعرف واحد اتزوج واحده وخلف منها 2 او 3 وبعدين عرف انها اختو بي الرضاعه وهو يحبها ويموت فيها طبعا حصل طلاق والان هو اتزوج وهي اتزوجت والاولاد الا راحو فيها بس الله يعين المصيبه من اولها افضل من ماتكبر ((وعسى ان تكرهوا شيئا وهو خير لكم)) الله يرزقك بي الزوجه الصالحه يارب ويرزق الجميع |
| الساعة الآن 08:22 PM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©