|
تعبت من جفاء زوجي وقررت الذهاب لأهلي !
السلام عليكم ورحمه الله وبركاته
لاول مره بحياتي اطلب استشاره من النت وان شاء الله مايخيب رجاي فيكم بشرح وضعب بدون مقدمات انا متزوجه من ثلاث سنوات اول سنتين كنت انا وزوجي كلنا ندرس ولما خلصنا دراسه هو راح مدينه ثانيه يكمل دراسات عليا وانا بقيت عند اهلي يروح من السبت الى الثلوث ويجي عندي من ظهر الثلوث الى الجمعه طبعا خلال هالأيام يجي ياكل وينام واذا جلس في البيت اما يطالع التلفزيون او يجهز اشياء خاصه بحلقته (( حلقه تحفيظ القران)) يعني جلسته في البيت قليل عنده طلعات رسميه تجي طبعا على حسابي(( الاربعاء في الليل شي اساسي مع ربعه والخميس من الظهر الى الليل مع ربعه بس طبعا غير عن اللي جلس معهم الاربعاء)) اشياء فيه متعبتني نفسيييا تصرفاته احيانا كأنه شايب على ان عمره مايتعدى 25 (مايبغاني احط مكياج لاعنده ولاعند الناس) (مو من النوع اللي يحب الهدايا ولما اقوله عن هالشي يقول المصروف اللي اعطيك كل شهر هو هديه!!) (مايحب الرقص ومايحب التجديد والحفلات يقول هذي جتنا من الغرب !!) ( طبعا صفه ملازمه كل رجل انه يكره السوق ومايروح فيني الا بعد طلعه الروح وبعد الزعل والصراخ يوافق واذا اخذت رأيه باللبس اللي بشتريه يقول اهم شي ساتر على اني مو من النوع اللي اتفصخ بالملابس لبسي محتشم ) (خلال الايام اللي مايكون عندي مايرد على اتصالاتي الا قليل بحجه انه عند اصحابه واني احرجه مايحب يرسل رسائل بس المفروض انه يضغط على نفسه عشان يعوض عن غيابه عني ) بااختصار انا تعبت جدا منه مايحب يقرا او يسمع شي يخص بتجديد الحياة الزوجيه ويقول انا راضي عن حياتي كذا لكن انا مو راضيه هو اهم شي نفسه انه مرتاح لما اشغل التلفزيون وفيه برنامج عن الحياه الزوجيه قال اشغلونا كن مافي الحياه الا الزوجين !! وامس كنت عند اهله وكنت بغرفه انا وهو ومافي احد غيرنا قال ليه حاطه مكياج وليه هالخربطه وانا ابتسمت اخذت الموضوع بااستهبال قال مادري متى بتزهدين بالدنيا ويكلمني بااسلوب بايخ انا عديتها له يوم جا واخذني عاتبته قلت ليه تكلمني بهالاسلوب ويجلس يهوش انتي كل شي تدققين عليه انتي لازم تتحمليني وتحملين كل اخطائي ولا تسألين ولا تعاتبين انا اجي اخر الاسبوع ابغى انبسط وانتي بس تدورين اخطائي وتعاتبين خلاص انا احسن شي مااكلمك وماتكلميني عشان مااخطي وتزعجيني انا سكت وتركته يوم رحت البيت هو دخل ونام كالعاده قلب ميت وجيت على السرير وبدا ولدي يبكي انا من القهر ماتحملت من جهه الولد ومن جهه ابوه وجلست ابكي مقهوووورررره بس يبغاني اتحمل واتحمل ليه انا حجر قدامه بس اهم شي هو تتوقعون يعني حس ومادرى عني ولاالتفت لي نومت ولدي وطلعت وتركته واليوم صحى من النوم الصباح ويطلع ومااستجاب لصياح ولده لانه يبغى يروح معه يجي الظهر وماكأن شي صار ويجلس يسولف ويعصب عشاني ماعطيته وجه!!! يقول دايم زعل زعل يعني طول الليل سافهني وانا ابكي ماحد درى عني ويبغاني ارضى بهالسرعه جابني الحين عند اختي وعصب علي بالسياره لاني اجاوب على قد السؤال قال سوي اللي تبغني ماتحبيني براحتك تبغين تجلسين عند اهلك بعد براحتك ماراح اغصبك وهذا الشي اللي انا فكرت هو من زمان مهملني وانا مو من النوع اللي اعاقبه وازعل واخذ حقي منه وطبعا من امس جهزت اغراضي بجلس عند اهلي لاني تبعت من جفاه يعني وش لاقيه منه انا ماانكر انه مهتم بالصلاه ويحب يعمل الخير ويحب حلقات القران ومهتم فيها لكن كل شي صاير على حسابي واعذروني انا طوولت بكلامي بس اتمنى تفيدوني الله يسعدددددددددددددددددددكم وش اسوي انام عند اهلي اليوم ولا اروح ولا كيف اتعامل معه انا ابغى اروح عشان يعرف ان حياتي مو متوقفه عليه اتمنى تتفاعلون وجزيتم خيراً |
ربنا يعينك
|
همممم
لي عودهـ لأطرح رأيي ان شاء الله وَاسْتَعِينُوا بِالصَّبْرِ وَالصَّلاةِ وَإِنَّهَا لَكَبِيرَةٌ إِلَّا عَلَى الْخَاشِعِينَ |
رمانة حببيبتي
شوفي يالغالية زوجك الظاهر من النوع المتشدد بالدين لكن ابيك تجلسين معه جلسة ناس مثقفة ولها اسلوب ماثر بالحوار الراقي فهميه ان اهماله لزوجته ولطبات ورغبات زوجته ليس من الدين ذكريه بافضل خلق الله محمد عليه افضل الصلاوات والسلام حبيبتي لو تبين تقهرينه جد لا تدققين معه كثير خليه على هواه وبامكانك تعاقبينه بدون رفع صوت او دموع ان كيدهن عظيم خليك ذكية النوع هذا من الرجال مايجي معه العنف او الدموع بل الحيلة والمحتالة اقوى من الساحرة هذا مثل ..روحي بيت اهلك بدون ماتقولي له انك زعلانة وحسسيه انه غلطان بحقك بدون لوم وعتب الحركة تكفي واللبيب بالاشارة يفهم وش يفيدك قهرك ودموعك؟ بالله قولي حطي مكياج خفيف بحيث انك تطلعين جميلة بدون مايبان المكياج واكشخي بطريقة راقية وخليك قدامه قوية وسالفة بعدك عنه لازم تتعدل لكن دام ظروفك كذا ارضي بالمقسوم في الوقت الحالي لا تقهرين ولاتزعلين نفسك خففي اتصالات عليه وقت مايكون مع اصحابه ابد لا تدقي ولا ترسلين رسالة لكن حسسيه انه مقصر بحقك بطريقة تخليه هو يحتار فيك وتحسسه بالذنب فهمتي حبيبتي؟ |
اقتباس:
مشكوره حبيبتي بس اولا انا كم مره اقوله خلنا نجلس نتناقش بحياتنا ويقول النقاش مااحبه اي شي يضيق صدري لاتقولينه لي تبغين تسولفين وتضحكين عادي لكن نقاش واشياء تضيق الصدر ماابي اسمعها ثانيا كيف احسسه اني متضايقه واحسسه اني مقصره بدون زعل انا مااعرف الا يااكون زعلانه او راضيه لكن اني اكون وسط مااقدر ياليت تفيديني |
شوفي حبيبتي رمانة نوع زوجك هذا محتاج انك تطنشين زعلك وقهرك قدامه
يعني في احساس تقدرين توصلينه له انك سعيدة قدامه لكن من داخلك لا اولا جدا لازم تهتمين بمظهرك قدامه لازم يكون شكلك روعة لدرجة انه يفلت احد طلعاته مع ربعه الشى الثاني شيلي سالفة انك تدقي عليه وهو برى البيت لا تناقشينه بشكل مباشر لكن قولي له ان الي يقصر على زوجته تراه محاسب يوم الدين وجيبي له قصص ان الزوجة لو حست بقصور ممكن تتعلق باي شى يقدم لها من غير زوجها قولي له مثلا قصة من نسج الخيال ان وحدة كان مهملها زوجها وتعرفت على واحد في النت وعوضها عن نقص زوجها بالكلام الحلو والاهتمام بالذات وبالاخير طلبت الطلاق وراحت تزوجت ذاك الشى قولي له فعلا هي مخطئة لانها خانت زوجها ولكن زوجها من دفعها للخيانة انتبهي تخوني يالغالية الله يبعدك عن ذا الشى هي مجرد طريقة عشان تهزين كيانه وترى سمعت قصة لواحد دق على الشيخ المنجد على الهوى وقاله ان زوجته خانته وكان هو السبب وقاله الشيخ انت لك الخطئ الاكبر في ذالك ولكن مايجوز ان الزوجة تحتج بهذا رمانة ابي زوجك لاطلع من البيت يشتاق للرجوع اليك مو ينفر منك حاولي تغيري اي شى يزعجه فيك خليه محتاررررررررررر ليش وعشان ايش تغيرت صدقيني انتي تخلينه يشرد من وانتي قادرة تخلينه هو يطلب النقاش معك معلش على الاحراج لكن حتى في الجماع ابيك تتغيرن معه يعني كوني اكثر اغراء على السرير سووووووووووري لكن ابي مصلحتك حبيبتي |
زوجك انسان يخاف الله ويحبك ويعتبر الحركا ت الزوجية مالها داعي
كما أنه يكمل دراساته وماسك حلقات علم ماشاء الله وتاكدي انه يحبك ويعزك زاختارك من بين عدة فتياة و دورك الصبر والاحتساب حتى تنتهي مدة دراسته وعند مناقشته في حياتكم ناقشيه بهدوء وبالنسبة للمكياج ضعي شئ بسيط مادام انه يحب يراك دون مكياج وهذا يحافظ على بشرتك وعند عودته يوم الثلاثاء اليك استعدي له بالبيت باللبس الجميل وتفنني بالأكل وبالكلم الجميل واطلبي منه يوم تقضيته معه في رحلة وشاركيه في برامج الحلقات و مايحتاجه واقترحي عليه كل شهر ان تذهبي اليه في مكان دراسته اما الليلة ارجعي الى بيتك وحافظي عليه ولاتنسي الدعااء والاستغفار اعانك الله وسخره لك وكلها سنوات بسيطة ويرجع اليك |
وعليكم السلام ورحمة الله وبركاته
-- اختي اولا أشدد على ان لاتخرجي من منزلك وتذهبي لأهلك ،، لاتتخلي عن مملكتك بهذه السهولة والبساطة ومهما كان المرء محاصرا فـ دائما هناك مخرج لكل شيء ،، هذا ماتعلمته من تجارب حياتي -- سأعقب على ماذكرتي هنا اختي زوجك انسان ناجح وذو علاقات اجتماعية ، ويضع اهتمام كبيرة لاعماله ،، وانتي من حقك ان يكون لديك الوقت معه لكن هو يحب اعماله كثيرا بحيث تشغله عن كل شي وعنك،، لذا الحل بدل ان تطالبيه بأن يهتم بحياته الزوجية وانتي تعرفي انه لن يفعل ذلك هناك باب اخر وهو ( اعماله ) شاركيه اعماله واظهري انك مهتمة بها وكانك انتي صاحبة العمل ،، مثلا هو لديه حلقة تحفيظ قران وغيره ، حاولي ان تنتجي فكرة وتعرضيها عليه وتناقشيه فيها ،، وهكذا باقي الامور في البداية ستجدي صد منه وربما يقول لك ( انا اعرف شغلي - شكرا على نصائحك خليها لك - مالك دخل ...إلخ ، وغيرها من العبارات المماثله ) لكن انا اعرف طبع الرجال ان مايظهره كثير من الاحيان يخالف ما يبطنه ،، يعني سيصدك ولكنه سيفكر بما قلتي وبعدها ربما ينفذها وانتي لاتعرفي مثلا بخصوص الطلعات مع اصحابه لاتتذمري واعرضيه عليه مثلا ان يعزم عائلة اصدقائه وبالتالي تتعرفي على زوجاتهم مهما حاول ان يصد استمري ،، لانك ستجدي النتائج مثمرة لاحقا ،، ستلاحظيه حبة حبة يحاول ان يناقشك ويأخذ رأيك ويحكي لك ماحصل معه وهذا حتى تجديه شخص مختلف جدا ،، لاتيأسي ابدا ابدا واستمري وازرعي هنا وهناك لتحصدي بأكبر كمية ممكنة === اختي زوجك ربما تربى على امور يراها في نظره غير جائزة والبرمجة هذه في عقله مترسخة ، ويمكن استبدالها ببرمجة أخرى سليمة وصحيحة بخصوص المكياج اولا المكياج يحتوي على مواد كيماوية كثيرة التي قد تؤثر على وجهك <I_ الامر لايعنيني لكن فقط مداخلة :D الشيء الاخر مثل ماقالوا الاخوات فوق ، لاتحطي مكياج ثقيل وتغيري منظرك الطبيعي ، شي خفيف لايغير منظرك الطبيعي ويزيد جمالك لابأس به ،،، صحيح ستسمعيه يقول لك ( مافي داعي له ، ومو حلو وو إلخ) لكن الرجل مستحيل يكره الجمال بالعكس يحب النظر والتلذذ به لذا لاتهتمي واظهري نفسك في أجمل صورة له ( لا يرى منك الا كل جميل ، ولا يشم منك الا أطيب ريح ) وعندما ينتقد تزينك لاتهتمي للكلمات التي سيلقيها لأن ما بداخله يقول العكسس تماما -( لاتنسي انه انسان محافظ لذا صعب ان يظهر ذلك من اول مرة او بسهولة )- وايضا لاتعيدي فتح حوارات تسبب مشاكل مثل ( ليش كنت تكلمني كذا وليش وليش ) لأن انتي الان في مرحلة تساعدي زوجك على التغيير ،، لذا اي كلام يقوله ويزعجك ليدخل من أذن ويخرج من أذن آخرى -- وعندما يكون غائب اختاري الاوقات التي قد يكون فيها لوحده واتصلي عليه او ارسلي له مسجات وغيرهـ ،، الحديد ينشق اذا استمررنا بالطرق عليه --- لاتنتظري من زوجك ان يقرأ ويتثقف وغيره لانك تعلمي انه لن يفعل ذلك ،، لذا علمك وثقافتك حوليها الى وااااقع يعيشه انتما الان تعيشان في ظلال الحلال وخير المؤمنين من جمع خير الدنيا والاخرة وأفضل المؤمنين من استمتع بحلال الدنيا والاخرة --- أخيرا اختي اياك ثم اياك ان تذهبي الى بيت اهلك ،، لاتفتحي باب من ابواب الشيطان ولتعلمي ان اقرب الشياطين لأبليس هو المفرق بين الازواج ،، لذا استعيني بالله وابدأي بما قلت لك ، ولا تيأسي او تعجزي ، اصبري وادعي واستغفري حولي كل ماتعرفي في امور الحياة الزوجية الى واقع علمي وحياة يراها امام عينه لاتهتمي لأي كلام يزعجك يصدرهـ لانه باختصار ليس نابع من قلبه ،، هو متمسك للدين ويعرف ان الرسول كان يدلع امنا عائشة رضي الله عنها ويناديها يا عائش او يابنت الصديق --( يمكنك ان تبدأي انتي وتختاري له لقب جميل وتدلعيه)--،، لكن لانه ملتزم بالدين يحد الامر صعبا ، وهذا واقع متجمعنا فقد تعودنا على اظهار مشاعر الغضب والاكتئاب اما مشاعر الحب والود فعجزنا عنها لذا لاتيأسي ابدا واستمري في عيش حياتك والاستمتاع بها ،، واصنعي عالمك ،، زوجك سيسخر لك في النهاية والامر يعتمد عليك وامسحي نهائيا فكرة الذهاب لمنزل اهلك ، نهائيا نهائيا وَاسْتَعِينُوا بِالصَّبْرِ وَالصَّلاةِ وَإِنَّهَا لَكَبِيرَةٌ إِلَّا عَلَى الْخَاشِعِينَ |
آه كم يثير غيظي هؤلاء الواحد منهم قد يحفظ المصحف والصحيحين عن ظهر قلب لكنه في تعامله مع أهله ومجتمعه أجهل ما يكون عليه الانسان وللاسف هو مدرس تحفيظ وماسك حلقه وسينقل طريقته هذه للاجيال الجديده ومش بعيد يبقى داعيه في يوم من الايام ويطلع على المنبر يحدثنا عن النبي صلى الله عليه وسلم وكيف كان يسابق عائشه حقيقة أنا رأيت بعض هؤلاء وحال أسرهم لا تسر عدو ولاصديق .. مهتم بالدعوه لكنه تارك أهله وبعضهم يدرس تحفيظ وأبنائه في الشارع !! حالة انفصام عجيبه بين العلم والعمل وهؤلاء هم أشد من يحاسب يوم القيامه بحسب الاوصاف التي ذكرتيها يا أختي فزوجك ليس بناجج إحتماعيا كما يقول الاخ ماهر بل هو فاشل بإمتياز فرجل لايستطيع الصبر على جلسة مناقشه واحده مع زوجته كيف له أن يصبر على الغير زوجك وقولك أنه يصلي ويحفظ القرآن فهذا لا يشفع له فالدين المعامله الدين المعامله لكن يا أختي لاأنصحك بالجلوس في بيت أهلك بل عودي لبيتك وأبدأي معه بأسلوب جديد أنا مع الاخت حور الدنيا في فكرتها في إثارة غيرته وخوفه عليك .. لو مثلا تسوي لك ايميل بإسم واحد وترسلي على ايميله الشخصي بعض قصص الخيانات الزوجيه التي حدثت بسبب برود الزوج .. أظن قصه مثل هذه ستزلزل كيانه المكياج أيضا لا تكثري منه فأغلب الرجال لايجبوه وحاولي تتعلمي كيف تحطين المكياج صح كوني أنيقه جدا وبنفس الوقت لاتتودي له أبدا بل إشغلي نفسك بأي شي آخر ولو تقدري تنشغلي بنشاطات خارجيه (مثله تماما ) يكون أفضل طبعا تطنيشه بهذه الطريقه بيكون صعب عليكي لكن أنا أنصحك بالصبر .. اصبري واصبري ولا تستعجلي النتائج وفي الاخير هو اللي بيجيك قبل كل هذه الحلول .. الدعاء ثم الدعاء الله يسخر لك قلب زوجك |
| الساعة الآن 07:50 AM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©