|
لا أعرف من المخطئ انا أم زوجي
صباح الخير يارب تكون بآحسن حال مشكلتي مع زوجي وغيرتي الزايده وشكوكي اللي ما اصدق تهدى الا وترجع مرتن ثانيه انا متزوجه من ست آشهر وزوجي حمدلله يحبني وانا احبه واقدره واحترمه زوجي طبيب نفسي وقبل كل شي هو رجل ملتزم وامام مسجد تجيه مكالمات من نساء وبنات مريضات .. وكثير احصل رسائل منهن على جواله وهو عادي يعطين الجوال يعني مايخبي عني ويقول مريضات وهذا عملي لازم اشوف مشاكلهم وانا الغيره بتذبحني ونبدا بالهواش ليش ترد وليش وليش لما هو خلاص يزعل مني وانا والله موب مقصره معه ابدا كل شي يقولي عليه لدرجة اذا اتصلت عليه مريضه يحط السبيكر ويكلمها عندي ويقولها حالتها او تجيه بالعياده وغيرها كثير منهن من تقول تزوجني (( الله لايوفقهن )) وانا ازعل لدرجه انو اقوله بروح معك العياده بكون معك واقولها وانا جد مقهوره والله اخاف يسرقون زوجي انا واثقه فيه هو يخاف الله وملتزم بس البنات مايخلن احد بحاله الحين ببيت اهلي لانو جايه اهلي زياره وهو راح عند اهله يقول متضايق من تصرفاتي وكلمته وتهاوشنا يجي ساعه بالجوال وماحبيت ادخل اهلي بالمشكله اللي يقول غيرتك الزايده بتخرب حياتنا كلمته من شوي والحمدلله رضا بس يقول اخاف تتكرر هالغيره واللي صار من مشاكل وتصيرين مجرد زوجه بدون حب انا مخنوقه لدرجه ودي اموت اغاااااار واسبب مشكله مع زوجي ثمن اندم وارجع اتآسف والله احبه وهو اجمل شي بحياتي عانيت كثير بحياتي الا لما الله جمعني معه بس مشكلتي الغيره والله احيانا اتمنى لو الانتحار موب حرام كان اول ما انتحر انا جد مضغوطه نفسيآ آختي اذا حبيت افضفض لها تقول بتجيبي مشاكل لنفسك واذا طلقك وش بيقولو الناس طلقها وهيه توها عروس وامي بتقول هذا اللي انتي اخترتيه واخواني بيقفون معه ضدي وماعندي احد اشكيلو انا بعرف الغلط مني والا منه ومكالمات البنات اللي الله لايوفق كل بنت تكلم رجل بالحرام وربي صايره ادعي على كل وحده تكلم زوجي وتبي تطلبه الزواج انو الله يكشف سترها ولايوفقها يارب اقوله خلني على عماي لاتقولي عن المشاكل اللي بالعمل ولاتقول كلمتني وحده فيها كذا وكذا ولاتقول يطلبوني اتزوجهن وانا مابي غيرك صرت اقول خبي عني كل شي مادري صح انو اقوله يخبي عني عشان ما ااغار والا خطاء والله فكري مشتت وموب عارفه اجمع كلام دلوني على الصح الله يريح بالكم |
السلام عليكم
حبيبتي انا اشوفك ان مشكلتك بسيطه و حلها سهل لاني قد عشت التجربه هذي مع زوجي اول سنه من زواجنا وانا ياقلبي اشوف ان زوجك بالعكس يستاهل الثقه منك مو الشك لالطريقه هذي والشي حبيبتي اذا زاد عن حده انقلب ضده يعني حاولي تأقلمي نفسك معاه حاولي تتغاضي ولاتفكري باتصالاته اذا جاء يكلم حاولي تاخذي نفسك وتقومي موضروري تسمعي المكالمه اهم شي الثقه موجوده وتكون بمحلها يارب |
حبيبتي خذيها نصيحه مني الرجال مايحب الزوجه الغيوره مرررررررررره
لان الغيره لمن تزيد عن حده تصير شك ويعدها بتبدي توسوسي غشان كذا خلاص حاولي حتى لو كنتي تغاري انك تبيني له ((طالما انا واثقه فيك مايهمني لو تكلم الف بنت وحاولي تبيني له انك واثقه من نفسك جدأأأأأأأأأأ ومتأكده ان محد راح يملاء عينه غيرك وصدقيني راح تطلعي بنتيجه حلوه وهذا شي انا مجربته ويا زوجي بالتوفيق ولاتنسي تطمنيني اش اخر الاخبار |
اقتباس:
وعليكم السلام ورحمة الله فديتك يالغلا مشكلتي انا حساسه مرررره هو الله يحفظه لي يارب موب مقصر بس نوبات صدق احس بليس راكب راسي والا لازم ازعله وبسرعه اندم لدرجة ابكي بدون شعور وانا اكلمه واخاف لايزعل مني ومابيه يتضايق بسببي الله يسعدك ويخليلك زوجك يارب مشكوره ع المرور فديت روحك |
اقتباس:
والله ياقلبي انا واثقه مررره مستحيل يلاقي مثلي لو عاشر مليون بنت بس عيبي هالغيره اللي تخنقني ان شاءالله بسوي اللي قلتي عليه بآذن الله من اليوم وطالع الله يجزاكي خير انا بطبعي عنيده بس بحاول اكابر شوي ومابين له غيرتي آدعيلي انو الله يهديني ويبعدني عن الوساوس والشكوك مشكووره حبيبتي الله يسعدك يآرب |
الله يسعدك ان شالله ويهدي سركــــــــــــم ويخليكم حق بعض
ويرزقكم الذريه الصالحه يارب ويبعد عنكم عيال وبنات الحرام لاتنسي تطمنيني باخر الاخبار |
هلا قلبووو
الله يهنيكم ويسعدكم ويبعد عندك شر بنات الغير اشين شي الحمدلله زوجك رجال صالح ورجال في ثقه بس ابليس يسوس لك انتبهي استتغفري ودايم فكري بشي الزين وخلي الغير عندك شوي حاولي تغيرن جو البيت لا تفكير بنات اللي يكلم يطلبون الزواج الهي نفسك عن هذي سالفه فكري كيف تجذبين زوجك لك اتمنى اني فدتك من جد مااعرف اعبر بكتابه الله يوفقك وكل مسلمه |
اقتباس:
آمين يآرب يسمع منك الله يحفظ آزوآجنا وآخوآننا من البنات اللي مايخافن الله الله يسعدك ياقلبي ومشكورة على المشاركات اللي والله آسعدتني كثير الله يحفظك |
الله يصلحك ياملوكة لا تدعين على بنات الناس
ولا تنسين انهم مريضات الله يشفيهن حبيبتي حاولي تبعدي نفسك عن جو عمله انا زيك غيورة وحساسة وفي المواقف اللي زي كذا ابعد نفسي عن زوجي لأن عمل زوجي يتطلب منه أحيانا مكالمة النساء صدقيني أحيانا يدق جواله واعطيه الجوال بدون ما اشوف من المتصل رغم انه يسألني من بس انا عودت نفسي من اول الزواج لا افتح جواله ولا افتش اغراضه عشان ارتاح وابعد عن دائرة الشكوك والغيرة واحيانا اتغابى واحيان اتجاهل اهم شي ما اعيش الموقف وافقد اعصابي خليك واثقة من نفسك وواثقة من قدراتك انتي زوجته بس اللي تكلمه هذي مريضة تتعالج عنده لازم تؤمنين بقناعات معينة تساعدك على الثبات والهدوء دربي نفسك شوي شوي ولا توسوسين طالما هو طيب معك اهتمي بالنتائج ولا تهتمي بالمقدمات يعني اهم شي انه مايتغير عليك |
اشكر ي الله ان من الله عليك بهذا الزوج الرائع الذي يحمل الخلق والدين
واذا زادت تصرفاتك وشكوكك قد تخسرينه وانتي اصلا عارفه وضع عمله واكيد واحد في عمله سوف يجيه مكالمات من اناس ضاقت بهم الحياة لذالك كيف تقارنين نفسك بهؤلاء المريضات شفاهن الله راجعي تصرفاتك وحاولي تكيفين وضعك مع عمله وتوقعي يجي دائما اتصالات من هؤلاء المرضى وهو انسان واعي ويكفيك انه يسمح لك بالاستماع لمشاكل بعض هؤلاء المرضى حافظي على مملكتك فالشك يدمر |
| الساعة الآن 01:38 PM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©